Atënë so azo ahunda
Eskê tënë “mo yeke bata ala”, so ayeke na Psaume 12:7, aye ti sara tënë ti “azo ti mawa” (versê 5) wala aye ti sara tënë ti “atënë ti yanga ti Jéhovah” (versê 6)?
Atënë so angoro versê so afa so atënë so aye ti sara tënë ti azo.
Psaume 12:1-4 atene so “azo so ayeke be-ta-zo ahunzi na popo ti azo awe.” Na pekoni, na Psaume 12:5-7, lo tene:
Jéhovah atene: “‘Ndali ti pasi so a sara na azo ti mawa,
nga na dema ti awayere,
mbi yeke londo ti sara mbeni ye.
Mbi yeke sö ala na tïtî azo so asara ye na ala tongana ambumbuse zo.’
Atënë ti yanga ti Jéhovah ayeke nzoni kue;
a yeke tongana argent so a tö ni na yâ ti four ti sese, na a zi saleté ni lege mbasambala.
Jéhovah, mo yeke bata ala;
mo yeke bata ala oko oko kue si azo ti ngoi so asara sioni na ala lâ oko pëpe.”
Versê 5 asara tënë ti ye so Nzapa ayeke sara ndali ti “azo ti mawa.” Lo yeke sö ala.
Versê 6 atene so “atënë ti yanga ti Jéhovah ayeke nzoni kue”, ‘a yeke tongana argent so a tö ni na yâ ti four na azi saleté ni’. Tënë so afa atënë ti bê ti e na ndö ti atënë ti Jéhovah.—Ps. 18:30; 119:140.
Fadeso, gbu li na ndö ti versê ti peko, Psaume 12:7, so atene: “Jéhovah, mo yeke bata ala; mo yeke bata ala oko oko kue si azo ti ngoi so asara sioni na ala lâ oko pëpe.” Tënë “ala” aye ti sara tënë ti nyen?
So versê 6 asara tënë ti “atënë ti yanga ti Jéhovah”, ambeni zo apeut ti pensé so versê 7 aye ti fa so tënë “ala” aye ti sara tënë ti tënë ti yanga ti lo. E hinga so Nzapa abata lani Bible atâa so azo asara kue ti kanga lege na azo ti wara ni nga ala gi ti futi ni.—És. 40:8; 1 Pi. 1:25.
Me a yeke nga tâ tënë so Jéhovah ayeke bata azo ti lo, tongana ti so versê 5 afa. Jéhovah amû lani maboko na ‘azo so abâ pasi’ nga na azo so ‘a sara pasi na ala’, nga lo sö ala, na lo yeke ngbâ ande ti sara ni.—Job 36:15; Ps. 6:4; 31:1, 2; 54:7; 145:20.
Tongaso, tënë “ala” na versê 7 aye ti sara tënë ti nyen?
Tongana e bâ psaume so nzoni, a yeke polele so a ye ti sara tënë ti azo.
Na tongo nda ti Psaume chapitre 12, David asara tënë ti awakua be-ta-zo ti Jéhovah so asioni zo atene mvene na ala. Na pekoni, lo tene so Jéhovah ayeke londo na terê ti azo so atene asioni tënë. Psaume so asara si e hinga biani so Nzapa ayeke aidé azo ti lo ndali ti so atënë ti yanga ti lo ayeke nzoni kue.
Tongaso, versê 7 aye ti tene so Jéhovah ayeke bata “ala”, so ti tene azo so asioni zo ayeke sara pasi na ala.
Na yâ ti acopie ti Mbeti ti Nzapa so a sû ândö na Hébreu, so zo apeut ti zia bê ti lo dä, a sara kua na tënë “ala” na yâ ti versê so. Na yâ ti Septante, so a sû ni ândö na Grec, a sara kua fani use na tënë “e” na versê 7, ye so afa so a yeke azo so ayeke be-ta-zo la abâ pasi nga a sara pasi na ala. Na nda ni, versê 7 atene so a yeke bata abe-ta-zo “oko oko kue” si “azo ti ngoi so”, wala asioni zo so ayeke pusu amba ti ala ti sara sioni, asara sioni na ala ape (Ps. 12:7, 8). Na yâ ti Mbeti ti Nzapa so a sû na Hébreu, so a kiri peko ni na Araméen, versê 7 atene: “SEIGNEUR, mo yeke bata azo ti mbilimbili, mo yeke bata ala si asioni zo ti ngoi so asara sioni na ala lâ oko ape.” A-Bible so a-aidé nga e ti bâ so Psaume 12:7 aye pëpe ti sara tënë ti atënë ti yanga ti Nzapa.
Tongaso, versê so amû beku na azo so ayeke be-ta-zo, ala hinga so Nzapa ayeke sara mbeni ye ndali ti ala.
