1, 2. (a) Nyen la asara si awakua ti Nzapa ayeke na ngia laso? (b) Tongana nyen la ababâ na amama so ayeke aChrétien nga na a-ancien alingbi ti mû maboko na amaseka ti hinga nda ti batême?

MBENI ancien atene na Christopher so ayeke na ngu 12, lo tene: “Mbi hinga mo depuis so a dü mo, na a nzere na mbi mingi ti mä so mo ye ti wara batême. Mbi ye ti hunda mo, ngbanga ti nyen la mo ye ti wara batême?” Hundango ndo ti ancien ni ayeke na lege ni. Biani, a nzere na e mingi ti bâ so ngu oko oko amaseka saki mingi na yâ ti dunia ayeke wara batême (Zo-ti. 12:3).  Me, ababâ na amama nga na a-ancien ti congrégation aye ti hinga wala amaseka ni wani la amû desizion ni nga ala hinga ndani so ala ye ti wara batême.

² Mbeti ti Nzapa afa so ti mû tere na Nzapa nga ti wara batême ayeke tongo nda ti mbeni fini so aChrétien ayeke wara tënë nzoni ti Jéhovah, me Satan ayeke gi nga ti kanga lege na ala (aProv. 10:22; 1 Pi. 5:8). Ye oko, ababâ na amama so ayeke aChrétien ayeke mû ngoi ti fa na amolenge ti ala ye so a ku na mbage ti mbeni disciple ti Christ. Ti amaseka so ababâ na amama ti ala ayeke aChrétien ape, na ndoye a-ancien ayeke mû maboko na ala ti hinga ye so mungo tere na Nzapa nga na batême aye ti tene. (Diko Luc 14:27-30.) Legeoko tongana ti so a hunda na mbeni zo ti leke tere ti lo nzoni si lo hunzi da so lo ye ti leke ni, a hunda nga ti tene zo aleke tere ti lo nzoni si lo lingbi ti sara na Jéhovah be-ta-zo juska “na nda ni”. (Mat. 24:13). Me nyen la amaseka alingbi ti sara ti leke na bê ti ala ti sara na Jéhovah na yâ ti fini ti ala kue? Zia e bâ ni.

3. (a) Atënë ti Jésus na ti Pierre afa na e nyen na ndo ti ndani so batême ayeke kota ye? (Mat. 28:19, 20; 1 Pi. 3:21). (b) Ahundango ndo wa la e yeke sara tënë na ndo ni, nga ngbanga ti nyen la e yeke sara tënë dä?

³ Mo yeke mbeni maseka so aye ti wara batême? Tongana a yeke tongaso, e gonda mo mingi. Ti wara batême ti ga Témoin ti Jéhovah ayeke mbeni kota pasa. Ti wara batême ayeke mbeni ye so a lingbi aChrétien asara, nga a yeke mbeni kota ye so ayeke mû lege na zo ti wara salut (Mat. 28:19, 20; 1 Pi. 3:21). Ndali ti so mo ye tâ na bê ti mo kue ti sara ye alingbi na zendo so mo yeke mû na Jéhovah, leke tere ti mo ti sara ye alingbi na ni. A yeke nzoni mo gbu li ti mo na ndo ti ahundango ndo ota so alingbi ti mû maboko na mo ti bâ wala mo leke tere ti mo nzoni awe ndali ti batême. Ahundango ndo ni ayeke so: (1) Mbi kpengba nzoni awe ti mû desizion ni so? (2) Mbi wani la mbi mû desizion ni? (3) Mbi hinga nda ti mungo tere na Jéhovah? Zia e bâ ahundango ndo so.

4, 5. (a) Ngbanga ti nyen a yeke pëpe gi akota zo la adoit ti wara batême? (b) Ti tene mbeni Chrétien akpengba aye ti tene nyen?

⁴ Bible atene ape so gi akota zo wala azo so ngu ti ala ague na li ni kamême awe la si ayeke wara batême. A-Proverbe 20:11 atene: “Même molenge afa tënë ti bê ti lo na lege ti kusala ti lo, tongana a yeke nzoni wala mbilimbili.” Mbeni zo so ade maseka alingbi ti hinga ye so ayeke nzoni na ye so ayeke sioni nga lo lingbi ti mû tere ti lo na Zo so acréé lo. Tongaso, batême ayeke mbeni kota ye nga mbeni ye so ayeke na lege ni ndali ti mbeni maseka so akpengba awe nga so amû tere ti lo na Jéhovah.—aProv. 20:7.

⁵ Ti tene mbeni zo akpengba aye ti tene nyen? Ti tene mbeni zo akpengba aye lakue pëpe ti sara tënë ti ngu ti zo ni wala ti konongo ti lo. Bible atene so azo so akpengba ayeke azo so “na lege ti sarango kusala na ngangu ti gbungo li ti ala, asara si ngangu ti gbungo li ti ala ni aga nzoni awe ti hinga popo ti ye ti nzoni na ye ti sioni.” (aHéb. 5:14). Tongaso, azo so akpengba ahinga ye so ayeke nzoni na lê ti Jéhovah na ala leke na bê ti ala ti ngbâ ti sara ye alingbi na ni. Ye ti pekoni ayeke so, ala yeke zia pëpe si mbeni zo apusu ala ti sara ye ti sioni nga mbeni zo la ayeke tene na ala lakue pëpe ti sara ye ti nzoni. Biani, a yeke na lege ni ti ku ti tene mbeni maseka so awara batême awe asara ye alingbi na andia ti Nzapa même na ngoi so babâ na mama ti lo wala mbeni kota zo ayeke na tere ti lo ape.—Bâ aPhilippien 2:12.

6, 7. (a) Fa akpale so Daniel atingbi na ni lani na ngoi so lo yeke na Babylone. (b) Tongana nyen la Daniel afa lani so lo kpengba awe?

⁶ Amaseka alingbi biani ti fa so ala kpengba tongana ti so Bible afa so? En, zia e bâ tapande ti Daniel so ayeke na yâ ti Bible. Peut-être lo de lani maseka na ngoi so a mû lo na ngangu na maboko ti babâ na mama ti lo a gue na lo na Babylone. Hio tongaso, Daniel ayeke na popo ti azo so bango ndo ti ala ayeke tâ nde mingi na ndo ti nzoni ye nga na sioni ye. Na ndo ni, Daniel atingbi lani na mbeni kpale nde na Babylone, a bâ lo lani tongana mbeni zo so ayeke ti lo nde mingi. Tongaso, lo yeke lani na popo ti amaseka so a soro ala nzoni ti sara kua na gbia (Dan. 1:3-5, 13). Na bango ni Daniel ayeke lani na mbeni kota kua na Babylone so lo lingbi ti wara mara ni na Israël lâ oko ape.

⁷ Daniel so ayeke maseka asara lani ye tongana nyen? Lo sara lani nzara ti apendere ye ti Babylone? Lo zia lani si azo ti Babylone asara si lo changé sarango ye ti lo wala ala sara si mabe ti lo awoko? Ên-ën. Bible atene so na ngoi so Daniel ayeke na Babylone, Daniel ‘akanga bê ti lo si lo sara lo mveni ti ga sioni’ pëpe, na lege so lo ndu pëpe mbeni ye so andu vorongo ti wataka (Dan. 1:8). Daniel afa lani biani so lo kpengba awe.

8. Nyen la mo lingbi ti manda na lege ti tapande ti Daniel?

⁸ Nyen la mo lingbi ti manda na lege ti tapande ti Daniel? Mbeni maseka so akpengba ayeke gbu tënë ti aye so lo mä na bê na ni ngangu même na yâ ti aye ti ngangu. Lo yeke sara ye pëpe tongana mbeni caméléon so ayeke changé couleur ti lo ti lingbi na ndo so lo yeke dä. A yeke na lege ni ape ti tene na Da ti Royaume lo sara ye tongana kamarade ti Nzapa me na ekole lo sara ye tongana kamarade ti dunia so. Lo yeke ngbâ be-ta-zo même tongana ye atara mabe ti lo.—Diko aÉphésien 4:14, 15.

9, 10. (a) Tongana mbeni maseka agbu li ti lo na ndo ti ye so lo sara ade ti ninga ape na ngoi so a tara mabe ti lo, ye ti nzoni wa la lo yeke wara? (b) Batême aye ti tene nyen?

⁹ Biani, mbeni zo so siokpari ayeke na tere ti lo pëpe ayeke dä ape, ngoi na ngoi amaseka nga na akota zo kue ayeke sara afaute (Zo-ti. 7:20). Me tongana mo ye ti wara batême, a yeke nzoni mo hinga wala mo leke biani na bê ti mo awe ti sara ye alingbi na  acommandement ti Nzapa. Tongana nyen la mo lingbi ti hinga biani ye so mo leke na bê ti mo ti sara? Hunda tere ti mo: ‘A sara ngoi oke la mbi yeke sara ye alingbi na acommandement ti Nzapa?’ Gbu li ti mo na ndo ti ye so mo sara ade ti ninga ape na ngoi so a tara mabe ti mo. Mo fa lani so mo hinga ti sara kangbi na popo ti ye so ayeke nzoni na ye so ayeke sioni? Tongana Daniel, mbeni zo awa mo ti mû akode so mo yeke na ni ti sara na kua na yâ ti dunia ti Satan? Mo yeke “ngbâ ti gi ti hinga wala ye so bê ti Jéhovah aye ayeke nyen” même na ngoi so ye so mo ye ti sara ague nde na ye so bê ti lo aye?—aÉph. 5:17.

¹⁰ Ngbanga ti nyen la e hunda atënë so? Ahundango tënë so ayeke mû maboko na mo ti bâ tongana nyen la batême ayeke kota mingi. Tongana ti so a fa na tongo nda ni, tongana mo wara batême andâ mo mû mbeni kpengba zendo na Jéhovah. Mo mû zendo ti ye lo nga ti sara na lo na bê ti mo kue teti lakue lakue (Marc 12:30). A lingbi zo kue so awara batême asara ye alingbi na zendo so lo mû.—Diko Zo-ti-fa-tene 5:3, 4.

11, 12. (a) Nyen la a lingbi zo so ayeke gbu li ti lo ti wara batême ahinga ni nzoni? (b) Nyen la ayeke mû maboko na mo ti bâ batême tongana ti so Jéhovah ayeke bâ na ni?

¹¹ Bible atene so awakua ti Jéhovah, so na popo ni a yeke wara amaseka, ayeke ‘mû tere ti ala mveni’ ti sara kua ti lo (Ps. 110:3). Tongaso, a lingbi zo so aye ti wara batême azia si desizion ni alondo na lo wani. Ye so ahunda peut-être ti tene mo hinga ye so ayeke na yâ ti bê ti mo nzoni si, mbilimbili tongana mo kono na yâ ti sewa so ayeke Témoin ti Jéhovah.

¹² Na yâ ti ngu so ahon, kite ayeke dä ape so mo bâ azo mingi so awara batême, na popo ti ala ambeni ayeke akamarade ti mo nga peut-être même aita ti mo. Me a yeke nzoni mo sara hange si mo komanse pëpe ti pensé so a lingbi mo wara batême ndali ti so ngu ti mo alingbi na ni awe wala ngbanga ti so ambeni zo awara batême. Tongana nyen la mo lingbi ti hinga biani so mo bâ batême tongana ti so Jéhovah ayeke bâ na ni? Mû ngoi ti gbu li na ndo ti ndani so batême ayeke kota ye mingi. Na yâ ti article so nga na ti peko, mo yeke wara gbâ ti anzoni raison ni.

13. Tongana nyen la mo yeke hinga wala desizion so mo mû ti wara batême alondo na bê ti mo wani?

¹³ Ambeni ye ayeke dä so alingbi ti mû maboko na mo ti hinga wala desizion so mo mû ti wara batême alondo na bê ti mo. Na tapande, nzara so mo yeke na ni ti sara na Jéhovah na bê ti mo kue ayeke sigigi polele na yâ ti asambela ti mo. Fani oke la mo yeke sambela ka Jéhovah? Tënë ti nyen la mo yeke tene na yâ ti asambela ti mo? Kiringo tënë ti mo na ahundango ndo so alingbi ti fa kpengba songo so mo yeke na ni na Jéhovah (Ps. 25:4). Mbeni kpengba lege so Jéhovah ayeke kiri tënë na asambela ti e ayeke na lege ti Bible. Tongaso, tongana e sara ngangu ti manda Bible ayeke mbeni ye so afa so e ye biani ti ga nduru na Nzapa nga ti sara na lo na bê ti e kue (Jos. 1:8). Hunda tere ti mo: ‘Mbi yeke manda ka Bible lakue? Mbi yeke mû mbage na vorongo Nzapa na yâ ti sewa na bê ti mbi kue?’ Kiringo tënë ti mo na ahunda so ayeke mû maboko na mo ti bâ wala desizion so mo mû ti wara batême alondo na bê ti mo wani.

14. Fa kangbi so ayeke na popo ti mungo tere na Nzapa nga na batême.

¹⁴ Ambeni maseka ahinga pëpe kangbi so ayeke na popo ti mungo tere na Nzapa nga na batême. Na tapande, ambeni maseka atene so ala mû tere ti ala na Nzapa awe me ala yeke nduru ti wara batême ape. Tënë so ayeke na lege ni? Mungo tere na Nzapa ayeke mbeni sambela so mo sara na Jéhovah so mo  tene na lo so mo ye ti sara na lo teti lakue lakue. A yeke na ngoi so mbeni zo awara batême la lo yeke fa na lê ti azo so lo mû tere ti lo na Nzapa awe. Tongaso, batême ayeke fango na lê ti azo so mo mû lani tere ti mo na Jéhovah na yâ ti sambela awe gi mo na lo use. Kozo ti tene mo wara batême, a yeke nzoni mo hinga nda ti mungo tere na Nzapa.

15. Mungo tere na Nzapa aye ti tene nyen?

¹⁵ Na nduru tënë, tongana mo mû fini ti mo na Jéhovah, mo tene na lo so tere ti mo ayeke ti mo encore ape. Mo mû zendo na Jéhovah so mo yeke sara ye so bê ti lo aye kozo si mo sara aye ti mo wani. (Diko Matthieu 16:24.) Azendo kue so e mû ayeke kota ye, me zendo so e mû na Jéhovah Nzapa ayeke kota mingi ahon atanga ni kue (Mat. 5:33). Tongana nyen la e lingbi ti fa biani so e ke tere ti e nga Jéhovah la ayeke fadeso wa ti e?—aRom. 14:8.

16, 17. (a) Ti ke tere ti mo aye ti tene nyen? Mû mbeni tapande. (b) Tënë ti nyen la mbeni zo so amû tere ti lo na Nzapa ayeke tene biani?

¹⁶ Zia e mû mbeni tapande, bâ so mbeni kamarade ti mo amû na mo mbeni oto na cadeau. Lo mû na mo mbeti ti oto ni na lo tene: “Oto ni ayeke ti mo.” Me tara ti bâ so kamarade ti mo ni atene: “Mbi yeke bata clé ti oto ni. Mbi la mbi yeke kpe na oto ni, me a yeke mo ape.” Mo yeke pensé nyen na ndo ti “cadeau” ni? Mo yeke pensé nyen na ndo ti kamarade ti mo ni?

¹⁷ Fadeso, gbu li ti mo na ndo ti mbilimbili ye so Jéhovah ayeke ku na mbage ti mbeni zo so amû tere ti lo na lo, mbeni zo so atene na lo: “Mbi mû tere ti mbi na mo. Mbi yeke ti mo.” Ka tongana zo ni so akomanse ti sara ye ti sioni na hondengo ni peut-être lo yeke gue na peko ti mbeni zo so ayeke Témoin ape ti sara mariage na lo? Ka tongana lo yeke sara mbeni kua so ayeke kanga lege na lo ti sara na Jéhovah na âme ti lo kue na fango tënë wala ti gue na abungbi? A yeke mo bâ mo tene lo bata clé ti oto ni la ape? Zo so amû tere ti lo na Jéhovah atene na Jéhovah atene: “Fini ti mbi ayeke ti mo me ti mbi wani ape. Tongana a yeke ti soro ye so bê ti mo aye na ye so bê ti mbi aye, mbi yeke sara lakue gi ye so bê ti mo aye.” Ye so ague oko na bango ndo so Jésus ayeke na ni, na ngoi so lo yeke lani na sese. Lo tene: “Mbi londo na yayu mbi zu ti sara pëpe ye so bê ti mbi aye, me ti sara ye so bê ti lo so atokua mbi aye.”—Jean 6:38.

18, 19. (a) Tongana nyen la atënë ti Rose na ti Christopher afa so batême ayeke mbeni pasa nga ayeke ga na aye ti nzoni? (b) Mo bâ ti mo pasa so mo yeke na ni ti wara batême tongana nyen?

¹⁸ A yeke polele so batême ayeke mbeni kota ye, na a lingbi a bâ ni tongana kete ye ape. A yeke mbeni kota pasa ti tene mbeni zo amû tere ti lo na Nzapa nga lo wara batême. Amaseka so aye Jéhovah nga so ahinga ye so mungo tere na lo aye ti tene ayeke pusu pëpe lango ti batême ti ala na peko, wala ala yeke regretté pëpe desizion so ala mû. Rose, mbeni maseka so awara batême awe, atene: “Mbi ye Jéhovah, nga ti sara na lo anzere na mbi mingi ahon ye kue. Mbi hinga so na nyen na nyen mbi yeke wara batême, me lâ oko mbi duti sûr tongaso ape na ndo ti adesizion so mbi yeke mû ka ni.”

¹⁹ Ka ti Christopher, so e sara tënë ti lo fade na tongo nda ti article so? Lo yeke lani na raison ti wara batême na ngoi so lo yeke na ngu 12? Christopher adabe ti lo na ngoi so lo mû tere ti lo na Jéhovah nga lo wara batême na a nzere na lo mingi. Lo komanse ti sara kua ti pionnier permanent na ngu 17 nga lo ga wakua ti mungo maboko na ngu 18. Laso, lo yeke sara kua na Béthel. Lo tene: “Desizion so mbi mû ti wara batême ayeke nzoni desizion. Mbi yeke na ngia ti sara kua ndali ti Jéhovah nga na bungbi ti lo.” Tongana mo ye ti wara batême, tongana nyen la mo lingbi ti leke tere ti mo ndali ni? Article ti peko ayeke kiri tënë na hundango ndo so.