1, 2. (a) Fa tongana nyen la batême ayeke kota ye mingi. (b) Nyen la a lingbi zo ahinga ni nzoni kozo ti wara batême? Ngbanga ti nyen?

MO YEKE mbeni maseka so aye ti wara batême? Tongana a yeke tongaso, ye so ayeke ku mo ayeke mbeni kota pasa so ahon atanga ni kue so zo alingbi ti wara. Ye oko, tongana ti so e bâ na yâ ti article so ahon, batême ayeke mbeni kota ye. Batême afa so mo mû tere ti mo na Jéhovah awe, so ti tene, mo mû zendo ti sara na lo teti lakue lakue na lege so mo yeke sara ye so bê ti lo aye kozo na aye kue so mo ye ti sara na yâ ti gigi ti mo. A yeke na lege ni so mo lingbi ti wara batême gi tongana mo kpengba awe ti mû desizion ni, tongana nzara ni alondo na bê ti mo wani nga tongana mo hinga nda ti mungo tere na Nzapa.

² Ka tongana mo bâ so a de mo leke tere ti mo nzoni ape ndali ti batême? Ka tongana mo ye ti wara batême me babâ na mama ti mo abâ so a yeke nzoni mo ku, peut-être juska mo hinga ambeni ye mingi na ndo ti gigi ti aChrétien si? Tongana a si tongaso, découragé ape. Mû ngoi ni so ti maï, tongaso si kete na pekoni mo lingbi ti  wara batême. Tongana mo hinga tongaso, mo lingbi ti zia aye ota na gbele mo ti kiri ti bâ ni nzoni: (1) aye so mo mä na bê na ni, (2) asarango ye ti mo, nga (3) kiringo singila ti mo.

3, 4. Nyen la amaseka alingbi ti manda na lege ti tapande ti Timothée?

³ Gbu li ti bâ tongana nyen la mo yeke kiri tënë na ahundango ndo so: Ngbanga ti nyen la mbi mä na bê so Nzapa ayeke dä? Nyen la afa na mbi biani so Bible ayeke Mbeti ti Nzapa? Ngbanga ti nyen la mbi yeke sara ye alingbi na acommandement ti Nzapa ahon ti mû peko ti sarango ye ti azo ti dunia so? Nda ti ahundango ndo so ayeke ti zia kite na bê ti mo ape. Me a yeke ti mû maboko na mo ti sara ye alingbi na wango ti bazengele Paul so atene: ‘Ala wani ala hinga ye so bê ti Nzapa aye, so ayeke nzoni, so anzere nga so alingbi kue.’ (aRom. 12:2). Me ngbanga ti nyen la a yeke lani nzoni ti tene aChrétien so ayeke na Rome ahinga ala wani ye so ala yeda na ni kozo awe?

⁴ Zia e bâ mbeni tapande ti Bible. Timothée ahinga lani Mbeti ti Nzapa nzoni mingi. Mama ti lo nga na âta ti lo afa ye na lo “ngbene ye so [lo] de foroto”. Ye oko, Paul awa lo atene: “Ngbâ na yâ ti aye so mo manda lani na so a ga na mo ti ye pekoni.” (2 Tim. 3:14, 15). Na yâ ti mbeni mbeti a tene so, tënë ti Grec so a kiri pekoni na “a ga na mo ti ye pekoni” aye ti tene ti “yeda na mbeni ye nga ti hinga so tënë so a tene na ndo ti mbeni ye ayeke tâ tënë.” Timothée ayeda na tâ tënë na bê ti lo wani. A yeke pëpe ngbanga ti so mama ti lo nga na âta ti lo la atene na lo ti yeda na ni, me a yeke ngbanga ti so lo gbu li ti lo na ndo ti aye so lo manda la aga na lo ti yeda na ni.—Diko aRomain 12:1.

5, 6. Ngbanga ti nyen la a yeke kota ye ti tene mo sara kua na “hingango ndo” ti mo na ngoi so mo de maseka?

⁵ Ka ti mo. Peut-être mo hinga atâ tënë ti Bible aninga awe. Tongana a yeke tongaso, zia na gbele mo ti gbu li na ndo ti araison so apusu mo ti mä na bê na aye ni so. Ye so ayeke kpengba mabe ti mo nga ayeke mû maboko na mo ti kpe ti mû adesizion so ayeke na lege ni ape tongana amba ti mo, bibe ti dunia so, wala bê ti mo wani apusu mo ti mû ni.

⁶ Tongana mo hinga ti sara kua na “hingango ndo” ti mo na ngoi so mo de maseka, mo yeke kiri tënë nzoni na amba ti mo tongana ala hunda mo atene: ‘Mo hinga tongana nyen so Nzapa ayeke biani dä? Ngbanga ti nyen Nzapa ti ndoye azia lege na aye ti sioni ti si? Nyen la afa atene Nzapa ayeke lakue gi dä?’ Tongana mo leke tere ti mo nzoni, mara ti ahunda tongaso ayeke woko mabe ti mo ape me ayeke pusu mo ti manda ye mingi mo wani.

7-9. Fa tongana nyen la afiche ti sarango na étude so ayeke na ndo ti Internet na mbage so atene “Qu’enseigne réellement la Bible?”, a lingbi ti mû maboko na mo ti kpengba mabe ti mo.

⁷ Tongana mo manda ye mo wani nzoni ayeke mû maboko na mo ti kiri tënë na ahunda so azo ahunda na mo, mo yeke duti na kite ape na ndo ti aye so mo mä na bê na ni, nga mabe ti mo ayeke kpengba (Kus. 17:11). E yeke na ambeti mingi so alingbi ti mû maboko na mo ti sara ni. Aita mingi abâ so ti manda ambeti ti e so asara tënë na ndo ti Kota Wasarango e nga na aye so lo créé amû maboko na ala mingi. Nga, amaseka mingi ayeke gue na ndo ti site jw.org na mbage so atene “Qu’enseigne réellement la Bible?” na ala wara ye ti nzoni dä mingi. Ti wara ni gue na mbage so atene LA BIBLE ET VOUS > ADOLESCENTS. Fiche oko oko ti sarango na étude so ayeke na mbage so ayeke mû maboko na mo ti kpengba mabe ti mo na ndo ti mbeni tënë so ayeke na yâ ti Bible.

⁸ Mo hinga Bible awe, tongaso mo lingbi ti kiri tënë hio na ambeni hundango ndo so ayeke na ndo ti afiche ti sarango na étude so. Me ngbanga ti nyen mo hinga biani so akiringo tënë ti mo ni ayeke tâ tënë? Afiche ti sarango na étude ni ayeke mû lege na mo ti sara tënë  na ndo ti gbâ ti aversê nga na pekoni ti sû na mbeti apensé ti mo na ndo ti aversê ni. A lingbi ti mû maboko na mo ti hinga tongana nyen la mo yeke kiri tënë na azo na ndo ti aye so mo mä na bê na ni na yâ ti Bible. Mbage “Qu’enseigne réellement la Bible?”, so ayeke na ndo ti Internet, amû maboko na amaseka mingi ti kpengba mabe ti ala. Tongana mo yeke gue ka na mbage so, mo lingbi ti zia ni na yâ ti kapa ti mandango ye ti mo wani.

⁹ Tongana mo yeke kpengba mabe ti mo, andâ mo yeke sara mbeni kota ye so ayeke mû lege na mo ti wara batême. Mbeni ita-wali so ade maseka atene: “Kozo ti tene mbi mû desizion ti wara batême, mbi manda lani Bible na mbi bâ so tâ bungbi ti vorongo Nzapa la. Lâ na lâ, mabe ti mbi ayeke kpengba kpengbango.”

10. Ngbanga ti nyen a yeke na lege ni ti tene mbeni ita so awara batême asara ye so ague oko na mabe ti lo?

¹⁰ Bible atene: “Mabe so ayeke na akusala ni pëpe akui awe.” (Jacq. 2:17). Tongana mabe ti mo akpengba, a yeke na lege ni ti tene mo fa ni na lege ti asarango ye ti mo. Asarango ye wa? Bible asara tënë ti “sarango ye so ayeke nzoni-kue nga na akusala so afa so [mo] gbu tënë ti Nzapa ngangu”.—Diko 2 Pierre 3:11.

11. Fa nda ti tënë “sarango ye so ayeke nzoni-kue”.

¹¹ Ti duti na “sarango ye so ayeke nzoni-kue”, a lingbi mo duti na sioni oko pëpe. A yeke ye so mo yeke sara la? Na tapande, gbu li ti mo na ndo ti anze omene so ahon. Tongana nyen la mo fa so “ngangu ti gbungo li” ti mo aga nzoni awe ti hinga popo ti ye ti nzoni na ye ti sioni? (aHéb. 5:14). Mo dabe ti mo na ambeni mbilimbili ngoi so mo gbu ngangu na yâ ti tara wala na ngoi so mbeni mba ti mo apusu mo ti sara sioni ye? Sarango ye ti mo na ekole amû lege na azo ti sara nzoni tënë ti mabe ti mo? Mo yeke ngbâ be-ta-zo na Jéhovah, wala mo yeke gi ti sara ye tongana amba ti mo ti ekole tongaso si ala he mo ape? (1 Pi. 4:3, 4). Ti tâ tënë ni, zo oko ayeke nzoni-kue ape. Na ambeni ngoi, même azo so asara na Jéhovah aninga alingbi ti sara kamene ti sara tënë ti mabe ti ala na lê ti azo. Ye oko, a yeke na lege ni so mbeni zo so amû tere ti lo na Jéhovah ayeke na kamene ape ti ga Témoin ti Jéhovah, na lo yeke fa ni na lege ti sarango ye ti lo.

12. Ambeni ‘kusala’ wa la afa so mo “gbu tënë ti Nzapa ngangu”? A lingbi mo bâ “akusala” ni so tongana nyen?

¹² “Akusala” wa la afa so mo “gbu tënë ti Nzapa ngangu”? A yeke akua so mo yeke sara na yâ ti congrégation, na tapande gango na bungbi nga na fango tënë. A ye nga ti sara tënë ti aye so mo yeke sara ti voro na Jéhovah so zo ayeke bâ ape, na tapande, asambela so mo oko mo yeke sara nga na mandango ye mo wani. Zo so amû tere ti lo na Nzapa awe ayeke bâ pëpe akua so tongana mbeni kua so akpengba mingi. Me, lo yeke duti na bango ndo ti Gbia David so atene: “Mbi ye ti sara ye so bê ti Mo aye, O Nzapa ti mbi, Ndia ti Mo ayeke na yâ bê ti mbi.”—Ps. 40:9.

13, 14. Nyen la alingbi ti mû maboko na mo ti sara “akusala” so afa so mo “gbu tënë ti Nzapa ngangu”? Ye so amû maboko na ambeni maseka tongana nyen?

¹³ Ti mû maboko na mo ti zia ambeni ye na gbele mo ti sara, mo yeke wara ambeni hundango ndo na lembeti 308 ti si na 309 ti buku Les jeunes s’interrogent — Réponses pratiques, Volume 2. Mbage so ayeke mû lege na mo ti sû akiringo tënë ti mo na ndo ti ahunda tongana: “Atënë ti nyen la mo yeke tene ka mbilimbili na yâ ti asambela ti mo? Tongana nyen la asambela ni afa so mo ye Jéhovah?” “Nyen la mo yeke manda ka na ngoi so mo yeke manda ye mo wani?” “Mo yeke fa tënë même tongana babâ na mama ti mo afa tënë ape?” Na mbage so mo yeke wara nga mbeni place so mo lingbi ti sû aye kue so mo zia na gbele mo ti sara so andu asambela ti mo, mandango ye mo wani nga na fango tënë.

¹⁴ Amaseka mingi so aye ti wara batême  abâ mbage so tongana mbeni ye ti mosoro. Mbeni ita-wali so ade maseka so iri ti lo ayeke Tilda atene: “Mbi sara kua na ahunda so ti zia na gbele mbi aye so mbi ye ti sara. Mbi sara aye ni so oko na oko kue, ngu oko tongaso na pekoni, mbi leke tere ti mbi nzoni awe ti wara batême.” Mbeni ita-koli, so iri ti lo ayeke Patrick so awara nga ye ti nzoni, atene: “Mbi hinga lani awe aye so mbi zia na gbele mbi ti sara, me so mbi sû ni na mbeti amû maboko na mbi ti sara ngangu ti sara ni.”

15. Fa ndani so a lingbi mo wani la mo mû desizion ti mû tere ti mo na Nzapa.

¹⁵ Mbeni kota hunda so ayeke na mbage so ayeke so: “Mo yeke ngbâ ti sara na Jéhovah même tongana babâ na mama ti mo nga na akamarade ti mo azia ti sara na lo?” Girisa ape so, so mo mû tere ti mo na Nzapa na mo wara batême awe, mo wani la mo yeke kpengba songo ti mo na lo. Mo yeke sara kua ti Jéhovah ndali ti amba ti mo wala ndali ti babâ na mama ti mo ape. Akusala so ayeke nzoni-kue nga na akusala so afa so mo gbu tënë ti Nzapa ngangu so mo yeke sara afa biani so tâ tënë agbu bê ti mo nga mo yeke gue na li ni ti wara batême.

16, 17. (a) A lingbi nyen la apusu mbeni zo ti ga Chrétien? (b) Mû mbeni tapande ti fa tongana nyen la e lingbi ti kiri singila ndali ti ngere so a futa ti zi na azo.

¹⁶ Mbeni koli, so ahinga lani Ndia ti Moïse nzoni mingi ahunda Jésus, atene: “Commandement wa si ayeke kota ahon atanga ni kue na yâ ti Ndia?” Jésus akiri tënë na lo: “Mo ndoye Jéhovah Nzapa ti mo na bê ti mo kue, na âme ti mo kue nga na bibe ti mo kue.” (Mat. 22:35-37). Ge, Jésus afa so a lingbi ndoye so zo ayeke na ni na mbage ti Jéhovah la aduti raison so apusu lo ti wara batême ti ga Chrétien. Mbeni nzoni ye so mo peut ti sara ti ndoye Jéhovah mingi ayeke ti gbu li na ndo ti ngere so lo futa ti zi na azo, so ayeke kota matabisi so ahon atanga ni kue so lo mû na e. (Diko 2 aCorinthien 5:14, 15; 1 Jean 4:9, 19.) Ti gbu li na ndo ti ngere so a futa ti zi na azo nga ndani so a futa ngere ni so ayeke pusu mo ti kiri singila ndali ni.

¹⁷ A lingbi ti haka kiringo singila ti mo ndali ti ngere so a futa ti zi na azo na tapande so: Tara ti bâ na yâ ti li ti mo so mo yeke linda ngu na mbeni zo aga asö mo. Tongana mo kiri na yanga-da mo changé bongo ti mo, mo yeke girisa zo so asö mo so? Ên-ën. Mo yeke kiri singila lakue na lo. Tâ tënë, lo la lo sö mo na kuâ. Legeoko nga, a lingbi e kiri singila mingi na Jéhovah Nzapa nga na Jésus ndali ti ngere so a futa ti zi na azo. E yeke na fini grâce na ala. Tongana fade a futa ngere so ape ka e yeke kui biani biani. Me, ndali ti kota ndoye so, e yeke na beku so mara ni ayeke use ape, ti wara fini ti lakue lakue na yâ ti paradis na sese.

18, 19. (a) Ngbanga ti nyen a lingbi mo sara mbeto ape ti ga zo ti Jéhovah? (b) Tongana nyen la ti sara na Jéhovah ayeke sara si fini ti mo aga nzoni mingi?

 ¹⁸ Mo yeke kiri singila na Jéhovah ndali ti aye so lo sara ndali ti mo? Tongana a yeke tongaso, a yeke na lege ni ti tene mo mû tere ti mo na Jéhovah nga mo wara batême. Girisa ape so, ti mû tere na Nzapa ayeke mbeni zendo so mo mû na Jéhovah ti sara ye so bê ti lo aye teti lakue lakue, atâa nyen la asi. A lingbi mbeto asara mo ti mû mara ti zendo tongaso? Ên-ën. Hinga so Jéhovah aye nzoni ti mo nga lo yeke “zo ti futango azo so ayeke gi lo ngangu.” (aHéb. 11:6). Tongana mo mû tere ti mo na Nzapa nga mo wara batême, mo yeke duti na ngia nga na siriri na yâ ti fini ti mo. Mbeni ita-koli so ayeke na ngu 24, so awara batême na ngoi so lo de molenge, atene: “Tongana lani mbi yeke kota zo ka mbi yeke mä yâ ti aye nzoni mingi, me so mbi mû desizion ti mû tere ti mbi na Jéhovah abata mbi si mbi tomba peko ti aye ti dunia so ape.”

¹⁹ Jéhovah aye nzoni ti mo. Me, Satan ayeke gi gi ye ndali ti lo wani na lo yeke bi nga bê ti lo na mo ape. Satan ayeke mû pëpe mbeni nzoni ye so aninga na azo so amû peko ti lo. Lo peut ti sara ni ape. Satan lo wani lo yeke na mbeni nzoni tënë oko ti gbu li na ndo ni ape, lo yeke ku ti wara mbeni nzoni ye oko ape. Tongana nyen la lo lingbi ti mû na mo mbeni ye so lo wani lo yeke na ni ape? Lo ye gi ti tene gigi ti mo ti kekereke aduti sioni tongana ti so lo yeke ku ni.—Apoc. 20:10.

20. Nyen la a lingbi mbeni maseka asara ti gue na li ni ti mû tere ti lo na Nzapa na ti wara batême? (Bâ encadré “ Ti mû maboko na mo ti gue na li ni.”)

²⁰ A yeke polele so, a yeke na lege ni ti tene mo mû tere ti mo na Jéhovah. Mo leke tere ti mo nzoni awe ti sara ni? Tongana a yeke tongaso, kiri na lango ni na peko ape. Me tongana mo ye ti leke tere ti mo nzoni si, sara kua na awango so ayeke na yâ ti article so ti ngbâ ti gue na li ni. Paul atene lani na aPhilippien, lo tene: “Ndo so e maï ngbii si e si dä awe so, zia e ngbâ ti tambela mbilimbili na ndo ti oko lege ni so.” (aPhil. 3:16). Tongana mo sara ye alingbi na awango so, a yeke ninga ape mo yeke mû fini ti mo na Jéhovah na mo yeke wara batême.