1-2. Nyen la mbeni zo adoit ti sara kozo si lo wara batême?

 NA YÂ ti ngu oku so ahon, azo ahon kutu oko awara batême na ala ga aTémoin ti Jéhovah. A fa ye na mingi ti ala ‘ngbene ye so ala de foroto’ tongana ti so a fa lani na disciple Timothée na ngoi ti akozo Chrétien (2 Tim. 3:​14, 15). Ambeni amanda ye na ndö ti Jéhovah na ngoi so ala ga kota, ti ambeni na mbakoro ti ala. Mbeni wali so aTémoin ti Jéhovah amanda Bible na lo awara batême na ngu 97.

² Tongana mo yeke manda Bible wala babâ na mama ti mo ayeke aTémoin, eskê mo yeke pensé ti wara batême? Ye so mo zia na gbele mo so ayeke pendere mingi. Me kozo ti tene mo wara batême, mo bezoin ti mû terê ti mo na Jéhovah. Article so ayeke fa ye so aye ti tene ti mû terê ti mo na Nzapa. A yeke aidé nga mo ti bâ ndani so a yeke nzoni mo sara mbeto ape ti mû terê ti mo na Nzapa nga ti wara batême tongana mo yeke nduru ti sara ni.

TI MÛ TERÊ NA NZAPA AYE TI TENE NYEN?

3. Fa azo so Bible atene ala mû terê ti ala na Jéhovah.

³ Na yâ ti Bible, mbeni zo so amû terê ti lo na Jéhovah ayeke zo so a soro lo ti sara mbeni kua so ayeke nde. Azo ti Israël ayeke azo so amû terê ti ala na Jéhovah awe. Me ambeni zo ti Israël amû lani terê ti ala na Jéhovah na mbeni lege so ayeke nde. Na tapande, Aaron ayü lani na devant ti turban ti lo plaque ti lor so aza zango, “ye so afa so a zia lo nde ndali ti Nzapa”. Plaque ti lor so afa so a soro lani lo ti sara na Jéhovah na mbeni lege so ayeke nde, so ti tene ti duti kota prêtre na Israël (Lév. 8:9). A-Naziréen nga kue amû lani terê ti ala na Jéhovah na mbeni lege so ayeke nde. Tënë “Naziréen”  alondo na tënë ti Hébreu nazir so ndani aye ti tene “Zo so a zia lo nde” wala “Zo so amû terê ti lo ti sara mbeni ye.” A-Naziréen adoit ti sara ye alingbi na acommandement so ayeke nde so a sû na yâ ti Ndia ti Moïse.—Nom. 6:​2-8.

4. (a) Tongana mo mû terê ti mo na Jéhovah awe, nyen la ayeke ga kota ye na lê ti mo? (b) Ti “ke terê” ti mo wani aye ti tene nyen? (Bâ nga foto.)

⁴ Tongana mo mû terê ti mo na Jéhovah, mo soro ti ga disciple ti Jésus Christ nga sarango ye so bê ti Nzapa aye aga kota ye mingi na lê ti mo. Mungo terê na Nzapa ahunda ti tene mo sara nyen? Jésus atene: “Tongana mbeni zo aye ti ga na peko ti mbi, zia lo ke terê ti lo wani.” (Mat. 16:24). Tënë ti Grec so a kiri peko ni na “zia lo ke terê ti lo wani” aye nga ti tene “lo ngbâ na fini ndali ti lo wani mbeni pëpe.” So mo mû terê ti mo na Jéhovah awe, mo doit ti ke ye kue so anzere na lo ape (2 aCor. 5:​14, 15). So aye ti tene mo doit ti ke “akusala ti mitele”, na tapande lango-sioni (aGal. 5:​19-21; 1 aCor. 6:18). Eskê ti sara ye alingbi na acommandement so ayeke sara si gigi aga ngangu na mo? Tongana mo ye Jéhovah nga mo hinga biani so andia ti lo ayeke ndali ti nzoni ti mo, a yeke duti tongaso ape (Ps. 119:97; És. 48:​17, 18). Mbeni ita-koli, so iri ti lo Nicholas, atene: “Mo peut ti bâ aye so Jéhovah ahunda na mo ti sara tongana abarre ti da ti kanga so a kanga lege na mo ti sara ye so mo ye wala tongana abarre ti da so bamara ayeke na yâ ni so ayeke bata mo si lo sara sioni na mo ape.”

5. (a) Mo yeke mû terê ti mo na Jéhovah tongana nyen? (b) Kangbi wa la ayeke na popo ti mungo terê na Jéhovah nga na batême? (Bâ nga foto.)

⁵ Mo yeke mû terê ti mo na Jéhovah tongana nyen? Mo yeke sara ni na lege so mo mû zendo na lo na yâ ti sambela mo tene mo yeke voro gï lo oko nga mo yeke zia ye so bê ti lo aye kozo na yâ ti fini ti mo. Ti vrai ni, mo  mû zendo na Jéhovah so mo yeke ngbâ ti ye lo “na bê ti mo kue, na âme ti mo kue, na bibe ti mo kue nga na ngangu ti mo kue.” (Marc 12:30). Na ngoi so mo mû terê ti mo na Jéhovah, gï mo na lo la ahinga ni. Me na ngoi so mo yeke wara batême, azo ayeke bâ mo; a fa na ala so mo mû terê ti mo na Nzapa awe. Mungo terê na Nzapa ayeke kete zendo ape, Jéhovah aye ti tene mo sara ye alingbi na ni tongana ti so mo nga mo ye ti sara ye alingbi na ni.—Zo-ti. 5:​4, 5.

NGBANGA TI NYEN LA MO DOIT TI MÛ TERÊ TI MO NA JÉHOVAH?

6. Nyen la ayeke pusu mbeni zo ti mû terê ti lo na Jéhovah?

⁶ Kota raison so ndali ni mo yeke mû terê ti mo na Jéhovah ayeke so mo ye lo. A yeke gï pëpe nzerengo terê la apusu mo ti ye lo. Me a yeke “tâ hingango ye” nga na “gbungo nda ti ye kue na lege ti yingo,” so ti tene aye so mo hinga na ndö ti Jéhovah la apusu mo ti ye lo (aCol. 1:9). So mo manda Bible, mo hinga biani so (1) Jéhovah ayeke dä, (2) Bible ayeke tënë ti yanga ti lo nga (3) lo yeke sara kua na bungbi ti lo ti sara ye so bê ti lo aye.

7. Nyen la e doit ti sara kozo ti mû terê ti e na Nzapa?

⁷ A yeke nzoni azo so amû terê ti ala na Jéhovah ahinga akozo fango ye ti Bible nga ala sara ye alingbi na aye so Nzapa ahunda. Ala yeke sara ye kue so ala peut ti sara ti fa na azo aye so ala manda (Mat. 28:​19, 20). Ala ye Jéhovah mingi nga ye so ala ye mingi ti sara ayeke ti voro gï lo oko. Ti mo nga ayeke tongaso? Tongana mo ye Jéhovah na bê ti mo kue, mo yeke mû terê ti mo na lo nga mo yeke wara batême ti zia ngia na bê ti zo so ayeke manda Bible na mo wala babâ na  mama ti mo ape, wala ndali ti so akamarade ti mo nga asara tongaso.

8. Tongana nyen la bibe ti kiringo singila ayeke aidé mo ti mû desizion ti mû terê ti mo na Jéhovah? (Psaume 116:​12-14).

⁸ Tongana mo gbu li ti mo na ndö ti aye kue so Jéhovah asara ndali ti mo, mo yeke kiri singila na lo nga mo yeke ye ti mû fini ti mo na lo. (Diko Psaume 116:​12-14.) A yeke na lege ni so Bible airi Jéhovah Zo so amû “nzoni matabisi kue nga na matabisi kue so ayeke mbilimbili-kue”. (Jacq. 1:17). Matabisi so ahon atanga ni kue ayeke sacrifice ti Molenge ti lo, Jésus. Bâ tongana nyen la matabisi so ayeke kota mingi. Ye so a futa ti zi azo amû lege na mo ti duti na kpengba songo na Jéhovah. Lo mû nga na mo beku ti ngbâ na fini lakue lakue (1 Jean 4:​9, 10, 19). Mungo terê ti mo na Jéhovah ayeke nzoni lege ti fa na lo so mo kiri singila na lo ndali ti kota ye so, so lo sara ti fa so lo ye mo, nga ndali ti anzoni ye kue so lo mû na mo (Deut. 16:17; 2 aCor. 5:15). A sara tënë na ndö ti mara ti kiringo singila tongaso na yâ ti buku Ngbâ na fini lakue lakue!, ye ti manda 46, point 4, so na yâ ni mo yeke wara mbeni vidéo ti penze-ngbonga ota so li ni ayeke Mû acadeau ti mo na Nzapa.

ESKÊ MO YEKE NDURU TI MÛ TERÊ TI MO NA JÉHOVAH NGA TI WARA BATÊME?

9. Ngbanga ti nyen la a yeke nzoni ape ti tene a pusu mbeni zo ti mû terê ti lo na Nzapa?

⁹ Peut-être mo bâ so ade mo leke terê ti mo ape ti mû terê ti mo na Nzapa nga ti wara batême. Peut-être mo bezoin ti sara achangement na yâ ti fini ti mo ti sara ye so Jéhovah ahunda, wala peut-être mo bezoin encore ngoi ti kpengba mabe ti mo (aCol. 2:​6, 7). Awamandango Bible kue ayeke gue na li ni legeoko ape, nga amaseka kue ayeke mû terê ti ala na Nzapa nga ayeke wara batême na même ngu ape. Gi ti hinga achangement so mo bezoin ti sara na sara ni, me haka terê ti mo na mbeni zo ape.—aGal. 6:​4, 5.

10. Nyen la mo peut ti sara tongana mo bâ so mo yeke nduru ape ti mû terê ti mo na Nzapa nga ti wara batême? (Bâ nga encadré “ Amaseka so babâ na mama ti ala ayeke aTémoin.”)

¹⁰ Même tongana mo bâ so ade mo duti nduru ape ti mû terê ti mo na Jéhovah, ngbâ ti gi ti sara ni. Hunda Jéhovah ti aidé mo ti sara achangement kue so mo bezoin ti sara (aPhil. 2:13; 3:16). Mo peut ti hinga biani so lo yeke mä sambela ti mo nga lo yeke aidé mo.—1 Jean 5:14.

NDANI SO AMBENI ZO AYEKE SARA MBETO TI MÛ TERÊ TI ALA NA NZAPA NGA TI WARA BATÊME

11. Tongana nyen la Jéhovah ayeke aidé e ti ngbâ be-ta-zo na lo?

¹¹ Ambeni zo so ayeke nduru ti mû terê ti ala na Nzapa nga ti wara batême ayeke sara mbeto. Ala peut ti hunda terê ti ala, atene: ‘Ka tongana mbi wara batême na pekoni mbi sara mbeni kota siokpari na a bi mbi na gigi?’ Tongana mara mbeto tongaso asara mo, hinga biani so Jéhovah ayeke mû na mo ye kue so mo bezoin ni ti “tambela na lege so alingbi na lê ti [lo], ti mû ngia mingi na lo.” (aCol. 1:10). Lo yeke mû nga na mo ngangu ti sara ye so ayeke na lege ni. Lo aidé azo mingi awe ti sara ye so ayeke na lege ni (1 aCor. 10:13). Ndani la azo so a yeke bi ala na gigi ayeke mingi ape. Jéhovah ayeke aidé azo ti lo ti ngbâ be-ta-zo.

12. Tongana nyen la e peut ti kpe ti sara mbeni kota siokpari?

¹² Bê ti azo kue so ayeke mbilimbili-kue ape ayeke pusu ka ala ti sara asioni ye (Jacq. 1:14). Ye oko, mo doit ti soro ye so mo yeke  sara tongana bê ti mo apusu mo ti sara sioni ye. Ti tâ tënë ni, mo la mo yeke mû desizion na ndö ti fason so mo yeke vivre na ni. Ambeni zo atene so e lingbi ape ti komande nzara ti bê ti e nga na ye so e yeke sara. Me a yeke tâ tënë ape. Mo peut ti manda ti kanga asioni nzara ti bê ti mo. Même tongana bê ti mo apusu mo ti sara sioni ye, mo peut ti soro ti sara ni ape. Tongaso, sambela lâ na lâ. Ngbâ ti manda Bible lakue. Gue lakue na abungbi. Fa aye so mo mä na bê na ni na azo. Tongana mo yeke sara aye so lakue, a yeke mû na mo ngangu ti ngbâ be-ta-zo na Jéhovah. Na girisa lâ oko ape so Jéhovah ayeke aidé mo ti sara ni.—aGal. 5:16.

13. Nzoni tapande wa la Joseph azia na e?

¹³ A yeke duti ngangu na mo ape ti sara ye alingbi na mungo terê ti mo na Nzapa tongana mo hinga kozoni awe ye so mo yeke sara tongana mo wara tara. Bible asara tënë ti gbâ ti azo so asara tongaso, atâa so ala nga kue ayeke mbilimbili-kue ape. Na tapande, fani mingi wali ti Potiphar agi ti zia nzara ti lo na yâ ti Joseph. Me lo hinga awe ye so lo yeke sara. Bible atene so “lo yeke ke ka,” nga lo tene: “Mbi lingbi ti sara kota ye ti sioni so tongana nyen? Nga mbi lingbi ti sara siokpari na terê ti Nzapa tongana nyen?” (Gen. 39:​8-10). A yeke polele so Joseph ahinga lani ye so lo yeke sara même kozo ti tene wali ni agi ti zia nzara ti lo na yâ ti lo. A sara si a yeke ngangu na lo ape ti sara ye na lege ni na ngoi so lo wara tara.

14. Tongana nyen la e peut ti manda ti ke ti sara sioni ye?

¹⁴ Tongana nyen la e peut ti mû tapande ti Joseph ti ngbâ be-ta-zo na Nzapa na ngoi so a tara e? Mo peut ti leke laso ye so mo yeke sara ande tongana a tara mo. Manda ti ke na lê ni lê ni aye so Jéhovah ake ni, nga ke même ti pensé na ni (Ps. 97:10; 119:165). Tongana mo sara ni, mo yeke sara siokpari ape tongana mo wara tara. Mo yeke hinga kozo awe ye so mo yeke sara.

15. Tongana nyen la mbeni zo apeut ti fa so lo yeke ‘gi Jéhovah ngangu’? (aHébreu 11:6).

¹⁵ Peut-être mo hinga so mo wara tâ tënë awe nga mo ye ti sara na Jéhovah na bê ti mo kue, me mbeni ye angbâ ti kanga lege na mo ti mû terê ti mo na lo nga ti wara batême. Mo peut ti sara ye so Gbia David asara lani. Mo peut ti voro yanga na Jéhovah, mo tene: “Nzapa, bâ bê ti mbi nzoni, nga gi ti hinga ye so ayeke na yâ ni. Bâ mbi nzoni, nga gi ti hinga  agingo bê ti mbi. Bâ wala na yâ ti mbi mbeni ye so alingbi ti sara sioni na mbi ayeke dä, nga gue na mbi na ndö ti lege ti lakue lakue.” (Ps. 139:​23, 24). Jéhovah ayeke sara tufa na ndö ti azo so ayeke “gi lo ngangu.” So mo yeke gi ti mû terê ti mo na Nzapa nga ti wara batême afa so mo yeke gi lo.—Diko aHébreu 11:6.

NGBÂ TI GA NDURU NA JÉHOVAH

16-17. Tongana nyen la Jéhovah ayeke gboto na mbage ti lo azo so babâ na mama ti ala ayeke aTémoin ti lo? (Jean 6:44).

¹⁶ Jésus atene lani so Jéhovah la ayeke gboto adisciple ti lo na mbage ti lo. (Diko Jean 6:44.) Bâ tongana nyen la nda ti tënë so alï mingi nga tongana nyen la abâ mo. Jéhovah abâ mbeni nzoni ye na mbage ti azo oko oko kue so lo gboto ala na mbage ti lo. Lo bâ zo oko oko kue tongana “ye ti lo wani so lo zia ni nde”, wala “ye ti lo so ayeke ye ti mosoro.” (Deut. 7:​6, kete tënë na gbe ni). Lo bâ nga mo tongaso.

¹⁷ Me peut-être mo yeke mbeni maseka so akono na yâ ti tâ tënë. Mo peut ti bâ so mo yeke sara na Jéhovah gï ndali ti so babâ na mama ti mo ayeke sara na lo me pëpe ndali ti so Jéhovah agboto mo na mbage ti lo. Ye oko, Bible atene: “Ala ga nduru na Nzapa, na lo yeke ga ande nduru na ala.” (Jacq. 4:8; 1 Chron. 28:9). Tongana mo mû li ni ti ga nduru na Jéhovah, lo yeke ga nduru na mo. Jéhovah abâ mo pëpe gï tongana membre ti mbeni groupe. Lo gboto zo oko oko kue na mbage ti lo, na tapande zo oko oko kue so akono na yâ ti tâ tënë. Tongana mara ti zo so amû li ni ti ga nduru na Jéhovah, Lo yeke ga nduru na lo, tongana ti so Jacques 4:8 atene.—Bâ 2 aThessalonicien 2:13.

18. Nyen la e yeke bâ na yâ ti article ti peko? (Psaume 40:8).

¹⁸ Tongana mo mû terê ti mo na Jéhovah nga mo wara batême, mo yeke fa so mo yeke na mara bango ndo ti Jésus. Lo yeda lani na bê ti lo wani ti sara ye kue so Babâ ti lo ahunda na lo. (Diko Psaume 40:8; aHéb. 10:7.) Na yâ ti article ti peko, e yeke bâ ye so ayeke aidé mo ti ngbâ ti sara na Jéhovah be-ta-zo na peko ti batême ti mo.