1. Nyen la ambeni wakua be-ta-zo ti Jéhovah apeut ti duti na kite na ndö ni?

 BÊ TI e adë mingi ti hinga so awakua ti Jéhovah azia ngia na bê ti lo. Bible atene: “Bê ti Jéhovah anzere na terê ti azo ti lo.” (Ps. 149:4). Me na ambeni ngoi, ambeni adécouragé mingi na ala peut ti hunda terê ti ala: ‘Eskê mbi zia ngia na bê ti Jéhovah?’ Gbâ ti awakua ti Jéhovah so Bible asara tënë ti ala so asara na lo be-ta-zo ayeke tiri lani na mara ti bibe so na ambeni ngoi.—1 Sam. 1:​6-10; Job 29:​2, 4; Ps. 51:11.

2. Azo wa la ayeke zia ngia na bê ti Jéhovah?

² Bible afa polele so azo so ayeke mbilimbili-kue ape apeut ti zia ngia na bê ti Jéhovah. Na lege wa? E doit ti mä na bê na Jésus Christ nga e wara batême (Jean 3:16). Tongana e sara tongaso, e yeke fa na azo so e changé bê ti e awe nga e mû zendo ti sara ye so bê ti Nzapa aye (Kus. 2:38; 3:19). Jéhovah ayeke na ngia tongana e sara aye so ti ga akamarade ti lo. Tongana e ngbâ ti sara kue ti sara ye alingbi na yanga so e mû ti sara na Jéhovah, e yeke zia ngia na bê ti lo nga lo yeke bâ e tongana akamarade ti lo.—Ps. 25:14.

3. Ahunda wa la e yeke bâ ni fadeso?

³ Me ngbanga ti nyen la na ambeni ngoi ambeni ita apeut ti bâ so ala zia ngia na bê ti Nzapa ape? Tongana nyen la Jéhovah ayeke fa so e zia ngia na bê ti lo? Tongana nyen la mbeni Chrétien apeut ti duti sûr so lo zia ngia na bê ti Nzapa?

NDANI SO AMBENI ITA APEUT TI BÂ SO ALA ZIA NGIA NA BÊ TI JÉHOVAH APE

4-5. Même tongana e bâ so e yeke ye oko ape, nyen la e peut ti duti sûr na ni?

⁴ Ngbene ye so e de kete, mingi ti e abâ so e yeke ye oko ape (Ps. 88:15). Ita-koli Adrián atene: “Lakue mbi bâ so mbi yeke ye oko ape. Na ngoi so mbi de kete, mbi dabe ti mbi so mbi  yeke sambela lani ti tene afami ti mbi avivre na yâ ti Paradis, atâa so mbi hinga so mbi lingbi ti vivre kâ ape.” Tony, so babâ na mama ti lo ayeke aTémoin ape, atene: “Babâ na mama ti mbi atene na mbi lâ oko ape so ala ye mbi wala ala yeke na ngia ndali ti mbi. Ye so asara si mbi bâ so ye kue so mbi sara apeut ti zia ngia na bê ti ala ape.”

⁵ Tongana na ambeni ngoi e bâ so e yeke ye oko ape, e peut ti dabe ti e so Jéhovah wani la agboto e na mbage ti lo (Jean 6:44). Lo bâ anzoni sarango ye ti e so peut-être e bâ ni ape, nga lo hinga ye so ayeke na bê ti e (1 Sam. 16:7; 2 Chron. 6:30). Tongaso, e peut ti sara confiance na lo tongana lo tene so e yeke ye ti ngangu ngere na lê ti lo.—1 Jean 3:​19, 20.

6. Asiokpari so bazengele Paul asara ândö asara si lo bâ terê ti lo tongana nyen?

⁶ Kozo ti manda tâ tënë, ambeni na popo ti e asara aye so asara si juska laso ala bâ so tënë ayeke na li ti ala (1 Pi. 4:3). Même aChrétien so ayeke be-ta-zo ayeke tiri na awokongo. Eskê bê ti mo afâ ngbanga na ndö ti mo? Tongana a yeke tongaso, bê ti mo ayeke dë ti hinga so ambeni wakua ti Jéhovah so ayeke be-ta-zo atiri na mara bibe ni so. Na tapande, bazengele Paul asara lani mawa na ngoi so lo gbu li na ndö ti awokongo ti lo (aRom. 7:24). Tâ tënë, Paul achangé lani bê ti lo nga lo wara batême. Me lo tene lo yeke “zo so ayeke kete mingi na popo ti abazengele ni kue” nga lo yeke “kota” wasiokpari na popo ti awasiokpari kue.—1 aCor. 15:9; 1 Tim. 1:15.

7. Nyen la a yeke nzoni e girisa ape na ndö ti asiokpari so e sara ândö?

⁷ Babâ ti e ti yayu atene lo yeke pardonné e tongana e changé bê ti e (Ps. 86:5). Tongaso, tongana e sara vundu biani ndali ti asiokpari so e sara, e peut ti hinga biani so tënë so Jéhovah atene ayeke tâ tënë nga lo pardonné e awe.—aCol. 2:13.

8-9. Tongana e bâ so aye so e sara alingbi ape ti tene e zia ngia na bê ti Jéhovah, e peut ti hon ndö ni tongana nyen?

⁸ E kue e ye ti sara ye kue so e peut ti sara ti sara na Jéhovah. Me ambeni ita abâ so aye so ala sara alingbi lâ oko ape ti sara si ala zia ngia na bê ti Jéhovah. Mbeni ita-wali so iri ti lo Amanda atene: “Mbi yeke pensé ka so ti sara ye so mbi peut ti sara ndali ti Jéhovah aye ti tene mbi doit lakue ti sara ambeni ye na ndö ti so mbi sara awe. Tongaso, mingi ni mbi yeke gi ti sara ye mingi ahon ti so mbi peut ti sara. Ni la tongana mbi bâ so mbi peut ti sara ni ape, mbi yeke tene so mbi zia vundu na bê ti Jéhovah tongana ti so mbi zia vundu na bê ti mbi wani.”

⁹ Tongana e bâ so aye so e sara alingbi ape ti tene e nzere na Jéhovah, e peut ti hon ndö ni tongana nyen? Girisa ape so Jéhovah asara ye ahon ndö ni ape. Lo hunda lâ oko na e ape ti sara ye so e peut pëpe ti sara. Tongana e sara ye kue so e peut ti sara ndali ti lo, lo bâ ni na nene ni. Gbu nga li na ndö ti tapande ti azo so Bible asara tënë ti ala so ala sara na Jéhovah na âme ti ala kue. Gbu li na ndö ti tapande ti Paul. Lo sara lani kua ngangu mingi na yâ ti angu mingi, lo voyagé kilomètre saki mingi nga lo sara si acongrégation mingi abâ gigi. Me tongana aye achangé na yâ ti fini ti lo nga lo peut pëpe ti fa tënë mingi tongana ti so lo sara kozo, eskê a ye ti tene so lo zia ngia na bê ti Jéhovah encore ape? Ên-ën! Lo ngbâ lani ti sara ye so lo peut ti sara, na Jéhovah asara tufa na ndö ti lo (Kus. 28:​30, 31). Legeoko nga, ye so e peut ti mû na Jéhovah apeut ti changé na ambeni ngoi. Me ye so ayeke kota na lê ti lo ayeke bibe so ayeke pusu e ti sara na lo. Zia e bâ fadeso ambeni lege so Jéhovah ayeke fa na e so e zia ngia na bê ti lo.

 TONGANA NYEN LA JÉHOVAH AYEKE FA SO E ZIA NGIA NA BÊ TI LO?

10. Tongana nyen la e peut ti “mä” Jéhovah na tenengo na e so e zia ngia na bê ti lo? (Jean 16:27).

¹⁰ Na lege ti Bible. Jéhovah ayeke gi alege ti fa na awakua ti lo so lo ye ala nga ala zia ngia na bê ti lo. Bible asara tënë ti angoi use so lo tene na Jésus so lo yeke Molenge ti lo so lo ye lo mingi nga so lo zia ngia na bê ti lo (Mat. 3:17; 17:5). Eskê mo ye ti mä Jéhovah atene na mo so mo zia ngia na bê ti lo? Jéhovah angbâ na yayu kâ ayeke sara tënë na e ape, me lo yeke sara tënë na e na lege ti Bible. E peut ti “mä” Jéhovah atene so e zia ngia na bê ti lo tongana e diko atënë so Jésus atene na yâ ti aÉvangile. (Diko Jean 16:27.) Jésus asara ye lani tâ gï tongana Babâ ti lo. Tongaso, tongana e diko atënë so Jésus atene na adisciple ti lo, so ayeke mbilimbili-kue ape me so ayeke be-ta-zo, ti fa so ala zia ngia na bê ti lo, e peut ti imaginé Jéhovah na tenengo atënë so na e.—Jean 15:​9, 15.

11. Ngbanga ti nyen la tongana e wara akpale, a ye ti tene ape so e zia ngia na bê ti Jéhovah encore ape? (Jacques 1:12).

¹¹ Na lege ti aye so lo sara. Jéhovah aye mingi ti aidé e, na tapande ti mû na e aye ti sese so e bezoin ni. Me na ambeni ngoi, Jéhovah ayeke zia si aye ti ngangu asi na e, tongana ti so lo zia lani si a si na Job (Job 1:​8-11). Tongana e wara akpale, a ye ti tene ape so e zia ngia na bê ti Jéhovah encore ape. Me akpale azi lege na e ti fa so e ye Nzapa mingi nga e sara confiance na lo. (Diko Jacques 1:12.) Tongana lo aidé e ti gbu ngangu, e yeke bâ so lo ye e nga lo yeke mû maboko na e.

12. Nyen la e peut ti manda na lege ti ye so asi na Dimitri?

¹² Bâ ye so asi na Dimitri, mbeni ita-koli so ayeke na Asie. Lo perdre lani kua ti lo na a sara anze mingi lo wara mbeni ape. Tongaso, lo mû desizion ti fa tënë mingi, ye so afa so lo sara confiance na Jéhovah. Nze mingi ahon, me lo wara kua ape. Na pekoni, lo wara mbeni ngangu kpale ti seni na lo yeke gï na gbogbo. Lo komanse ti pensé so lo yeke nzoni koli ti wali wala nzoni babâ ape, nga lo hunda même terê ti lo wala lo ngbâ ti zia ngia na bê ti Jéhovah. Na mbeni lakui, molenge ti lo ti wali asû na lê ti mbeti atënë so ayeke na Ésaïe 30:15 so atene: “Tongana ala duti kpô nga ala zia bê ti ala na mbi, ala yeke wara ngangu.” Lo ga na ni na lo na lo tene: “Papa, tongana mo sentir terê ti mo nzoni ape, dabe ti mo na  versê so.” Dimitri abâ so grâce na Jéhovah, sewa ti lo ayeke na kobe, bongo nga na ndo ti lango. Lo tene: “Ye so mbi doit ti sara ayeke ti duti kpô nga ti ngbâ ti sara confiance na Nzapa ti mbi.” Tongana mo yeke na mara kpale so, duti sûr so Jéhovah ayeke bâ lege ti mo nga lo yeke mû maboko na mo ti gbu ngangu.

13. Azo wa la Jéhovah apeut ti sara kua na ala ti fa na e so e zia ngia na bê ti lo? Lo yeke sara ni tongana nyen?

¹³ Na lege ti amba ti e aChrétien. Jéhovah ayeke sara kua na aita ti e ti fa na e so e zia ngia na bê ti lo. Na tapande, lo peut ti pusu ambeni ita ti tene na e atënë so akpengba e so e yeke tâ na bezoin ni. A yeke ye so asi na mbeni ita-wali na Asie na ngoi so lo gi bê ti lo ngangu. Lo perdre lani kua ti lo nga terê ti lo ason ngangu. Na pekoni, koli ti lo asara mbeni kota siokpari na a zi lo na kua ti ancien. Lo tene: “Mbi comprendre lani ape ndani so aye so asi na mbi. Mbi pensé lani so peut-être mbi sara mbeni ye na lege ni ape nga mbi zia ngia na bê ti Jéhovah encore ape.” Ita ti e ti wali so avoro lani yanga na Jéhovah ti fa na lo so lo ngbâ ti zia ngia na bê ti lo. Jéhovah afa ni tongana nyen? Lo tene: “A-ancien asara lisoro na mbi na ala aidé mbi ti bâ so Jéhovah angbâ ti ye mbi.” Me ambeni ngoi na pekoni, lo kiri lo hunda Jéhovah ti fa na lo so lo ngbâ ti zia ngia na bê ti lo. Lo tene: “Na oko lango ni, mbi wara mbeni lettre so mbeni groupe ti aita ti congrégation atokua na mbi. Na ngoi so mbi diko atënë ti ala so adë bê ti mbi, mbi bâ so Jéhovah amä mbi.” Fani mingi, Jéhovah ayeke fa so e zia ngia na bê ti lo na lege ti atënë so amba ti e atene na e na nzoni bê.—Ps. 10:17.

14. Mbeni lege nde so Jéhovah ayeke fa na e so e zia ngia na bê ti lo ayeke so wa?

¹⁴ Jéhovah ayeke fa nga na e so e zia ngia na bê ti lo na lege so lo sara kua na amba ti  e aChrétien ti mû na e wango na ngoi so e bezoin ni. Na tapande, na ngoi ti akozo Chrétien, Jéhovah amû lani yingo vulu ti lo na bazengele Paul ti sû lettre 14 na amba ti lo aChrétien. Na yâ ti alettre so, Paul amû wango na aita polele nga lo sara ni na ndoye. Ngbanga ti nyen la Jéhovah afa lani na Paul ti mû na ala mara ti wango so? Jéhovah ayeke nzoni Babâ, nga lo yeke kiri na nzoni lege amolenge ti lo “so lo ye [ala] mingi.” (aProv. 3:​11, 12). Tongaso, tongana mbeni ita amû na e wango so alondo na Bible, a ye ti fa ape so Jéhovah asara ngonzo na terê ti e, me a ye ti fa so lo ngbâ ti ye e (aHéb. 12:6). Ambeni ye nde wa la afa so e ngbâ ti zia ngia na bê ti Jéhovah?

AMBENI YE SO AFA SO E ZIA NGIA NA BÊ TI JÉHOVAH

15. Azo wa la Jéhovah ayeke mû yingo vulu ti lo na ala? A peut ti sara si e hinga nyen biani?

¹⁵ Jéhovah ayeke mû yingo vulu ti lo na azo so azia ngia na bê ti lo (Mat. 12:18). E peut ti hunda terê ti e: ‘Eskê a yeke bâ ambeni mbage ti lengo ti yingo ti Nzapa na yâ ti sarango ye ti mbi?’ Eskê mo bâ so mo yeke kanga bê na azo ahon ti so mo yeke sara kozo ti hinga Jéhovah? Tongana mo gi ti maï ambage ti lengo ti yingo ti Nzapa mingi, mo peut ti hinga biani so mo zia ngia na bê ti Jéhovah.—Bâ encadré “ Lengo ti yingo ayeke . . . ”

16. Azo wa la Jéhovah ayeke sara kua na ala ti fa nzoni tënë? Ti hinga ni asara mo tongana nyen? (1 aThessalonicien 2:4).

¹⁶ A nzere na Jéhovah ti mû kua ti fango nzoni tënë na azo so azia ngia na bê ti lo. (Diko 1 aThessalonicien 2:4.) Bâ tongana nyen la mbeni ita-wali so iri ti lo Jocélyne abâ nzoni na lege ti fango nzoni tënë. Mbeni lâ na ndapre Jocélyne azingo, vundu asara lo mingi. Lo tene: “Mbi yeke lani na ngangu ape nga mbi bâ so zo oko abezoin mbi ape. Me mbi yeke lani pionnier na a yeke lango ti fango tënë ti mbi. Tongaso, mbi sambela na mbi gue na fango tënë.” Na ndapre ni so, Jocélyne awara Marie so ayamba lo nzoni nga ayeda ti manda Bible. Ambeni nze na pekoni, Marie atene so lo yeke sambela lani Nzapa ti aidé lo na ngoi so Jocélyne apika yanga-da ti lo. Jocélyne agbu li ti lo na ndö ti ye so asi so, lo tene: “Mbi bâ so Jéhovah ayeke tene na mbi, atene: ‘Mo zia ngia na bê ti mbi.’” Ti tâ tënë ni, azo kue la ayeke yeda ti mä tënë so e fa ape. Me e peut ti hinga biani so tongana e  sara ye kue so e peut ti sara ti fa nzoni tënë na azo, a nzere na Jéhovah.

17. Tënë so Vicky atene na ndö ti ye so a futa ti zi azo afa na mo nyen? (Psaume 5:12).

¹⁷ Azo so azia ngia na bê ti Jéhovah la ayeke bâ nzoni na lege ti ye so a futa ti zi azo (1 Tim. 2:​5, 6). Ka tongana e ngbâ ti pensé so e zia ngia na bê ti Jéhovah ape, atâa so e mä na bê na ye so a futa ti zi azo nga e wara batême? Girisa ape so apensé ti e ayeke lakue na lege ni ape, me ti Jéhovah ayeke lakue na lege ni. Lo bâ azo so amä na bê na ye so a futa ti zi azo tongana azo ti mbilimbili nga lo mû zendo ti sara tufa na ndö ti ala. (Diko Psaume 5:12; aRom. 3:26.) Gbungo li na ndö ti ye so a futa ti zi azo a-aidé lani Vicky. Mbeni lâ, na peko ti so lo gbu li mingi na ndö ti ye so a futa ti zi azo, lo tene: “Jéhovah akanga bê na mbi teti angu mingi. . . . A yeke mo bâ mo tene mbi yeke tene na Jéhovah: ‘Kota ndoye ti mo alingbi ti si na mbi ape. Sacrifice ti Molenge ti mo alingbi ti kanga ndö ti siokpari ti mbi ape.’” So lo gbu li na ndö ti cadeau so ayeke ye so a futa ti zi azo, lo komanse ti bâ so Jéhovah aye lo. E nga kue, tongana e gbu li na ndö ti ye so a futa ti zi azo, e yeke bâ so Jéhovah aye e nga e zia ngia na bê ti lo.

18. Tongana e ngbâ ti ye Babâ ti e ti yayu, nyen la e peut ti duti sûr na ni?

¹⁸ Atâa so e peut ti sara ngangu ti sara ye alingbi na aye so e manda na yâ ti article so, na ambeni ngoi e peut ti découragé nga e hunda terê ti e wala e zia ngia na bê ti Jéhovah. Tongana ye tongaso asi na mo, girisa ape so azo “so angbâ ti ye Lo” azia ngia na bê ti lo (Jacq. 1:12). Tongaso, ngbâ ti ga nduru na Jéhovah nga gi ti hinga aye kue so lo sara ti fa so mo zia ngia na bê ti lo. Girisa lâ oko ape so Jéhovah ayeke “yongoro pëpe na e oko oko kue.”—Kus. 17:27.