1-2. Tongana nyen la gigi ti mbeni zo ayeke ga nzoni mingi na peko ti batême ti lo?

 E YEKE na ngia mingi tongana e wara batême nga e ga na yâ ti sewa ti Jéhovah. Azo so ayeke na pasa so ayeda na tënë so David so ayeke mbeni zo ti sungo psaume atene: “Ngia ayeke na zo so mo [Jéhovah mo] soro lo nga mo sara si lo ga lo duti na lê ti alacour ti mo.”—Ps. 65:4.

² Azo kue la Jéhovah aga na ala na lê ti alacour ti lo pëpe. Tongana ti so e bâ na yâ ti article so ahon, lo soro ti gboto na mbage ti lo azo so afa so ala ye ti duti na kpengba songo na lo (Jacq. 4:8). Tongana mo mû terê ti mo na Jéhovah nga mo wara batême, mo yeke ga nduru mingi na lo na mbeni lege so ayeke nde. Mo peut ti hinga biani so na pekoni lo yeke ‘tuku tufa ti lo mingi mingi na ndö ti mo juska ye oko amanke mo pëpe.’—Mal. 3:10; Jér. 17:​7, 8.

3. Kota kua wa la aChrétien so amû terê ti ala na Nzapa nga awara batême ayeke na ni? (Zo-ti-fa-tene 5:​4, 5).

³ Batême ayeke tongo nda ti gigi ti mo na yâ ti kua ti Jéhovah. Na peko ti batême ti mo, mo yeke sara kue ti sara ye alingbi na yanga so mo mû ti sara na Jéhovah nga ti ngbâ be-ta-zo na lo même tongana aye atara mabe ti mo. (Diko Zo-ti-fa-tene 5:​4, 5.) So mo yeke mbeni disciple ti Jésus, mo yeke sara kue ti mû tapande ti lo nga ti sara ye alingbi na  acommandement ti lo (Mat. 28:​19, 20; 1 Pi. 2:21). Article so ayeke aidé mo ti sara ni.

“NGBÂ TI MÛ PEKO” TI JÉSUS ATÂA MO WARA ATARA

4. Na lege wa la adisciple ti Jésus ayeke yô “keke ti pasi” ti ala? (Luc 9:23).

⁴ Na peko ti batême ti mo, mo yeke wara ande akpale. Ti vrai ni, Jésus afa lani polele so adisciple ti lo ayeke yô ande mbeni “keke ti pasi”. Ala yeke yô ni “lâ na lâ”. (Diko Luc 9:23.) Eskê Jésus aye ti tene so adisciple ti lo ayeke bâ pasi lakue? Ên-ën. Me lo ye lani ti tene so na ndö ti so ala yeke wara ande atufa, ala yeke wara ande nga akpale. Ambeni kpale ni apeut ti duti ngangu mingi.—2 Tim. 3:12.

5. Anzoni ye wa la Jésus atene azo so asara asacrifice ayeke wara ande?

⁵ Peut-être afami ti mo akanga lege na mo awe wala peut-être mo dö ambeni ye ti sese mo zia ti zia Royaume kozo (Mat. 6:33). Tongana a yeke tongaso, hinga so Jéhovah abâ aye kue so mo sara ndali ti lo (aHéb. 6:10). Peut-être mo bâ awe so atënë ti Jésus so ayeke tâ tënë: “Zo kue so azia da ti lo, aita ti lo ti koli, aita ti lo ti wali, mama ti lo, babâ ti lo, amolenge ti lo na ayaka ti lo ngbanga ti mbi nga ngbanga ti nzoni tënë, lo yeke wara na yâ ti ngoi ti fadeso ada, aita ti koli, aita ti wali, amama, amolenge na ayaka. Aye so kue lo yeke wara ni fani 100, nga a yeke sara aye ti ngangu na lo na ndö ni. Me na yâ ti aye ti ngoi so ayeke ga, lo yeke wara ande fini ti lakue lakue.” (Marc 10:​29, 30). Anzoni ye so mo wara ayeke kota mingi ahon asacrifice kue so mo sara.—Ps. 37:4.

6. Ngbanga ti nyen la mo doit ti ngbâ ti tiri na “nzara ti mitele” na peko ti batême ti mo?

⁶ Mo doit ande ti ngbâ ti tiri na “nzara ti mitele” na peko ti batême ti mo (1 Jean 2:16). A yeke ngbanga ti so mo ngbâ hale ti Adam so siokpari ayeke na terê ti lo. Peut-être na ambeni ngoi mo pensé tongana bazengele Paul so atene: “Na yâ ti bê ti mbi, mbi wara ngia biani na yâ ti ndia ti Nzapa, me mbi bâ na yâ ti amembre ti terê ti mbi mbeni ndia so ayeke sara bira na ndia ti bibe ti mbi na so ayeke gue na mbi tongana ngbâa na mbage ti ndia ti siokpari so ayeke na yâ ti amembre ti terê ti mbi.” (aRom. 7:​22, 23). Mo peut ti découragé ndali ti so mo doit ti tiri na asioni nzara ti bê ti mo. Me, tongana mo gbu li na ndö ti zendo so mo mû lani na Jéhovah na ngoi so mo mû terê ti mo na lo, a yeke mû na mo ngangu ti ngbâ ti dö sese na atara. Ti tâ tënë ni, zendo so ayeke aidé mo tongana mo wara atara. A yeke aidé mo tongana nyen?

7. Tongana nyen la mungo terê ti mo na Jéhovah ayeke aidé mo ti ngbâ be-ta-zo na lo?

⁷ Na ngoi so mo mû terê ti mo na Jéhovah, mo ke terê ti mo wani. So aye ti tene so mo soro ti ke anzara ti bê ti mo nga mo leke na bê ti mo ti zia ngia na bê ti Jéhovah (Mat. 16:24). Tongaso, tongana mo wara mbeni tara, mo bezoin ape ti hunda terê ti mo na ye so mo yeke sara. Mo hinga awe ye so mo yeke sara, so ti tene mo yeke ngbâ be-ta-zo na Jéhovah. Atâa nyen la asi, mo yeke sara ye so azia ngia na bê ti Jéhovah. Mo yeke sara ye tongana Job. Atâa so lo wara lani akpale so ayeke tâ ngangu mingi, lo tene: “Mbi yeke ngbâ gï na ndö ti sarango ye ti mbi ti mbilimbili!”—Job 27:5.

8. Tongana nyen la ti gbu li na ndö ti sambela so mo sara ti mû terê ti mo na Nzapa apeut ti aidé mo ti dö sese na atara?

⁸ Tongana mo gbu li na ndö ti sambela so mo sara ti mû terê ti mo na Jéhovah, mo yeke wara ngangu ti dö sese na atara kue. Na tapande, eskê mo yeke gi ti zia nzara ti mo na yâ ti wali wala koli ti mbeni zo? Oko pëpe! Mo tene  na Jéhovah awe so mo yeke sara mara ti ye tongaso lâ oko ape. Tongana mo zia si asioni nzara amaï na yâ ti bê ti mo ape, mo yeke ande pëpe na bezoin ti gi ti zi ni na yâ ti bê ti mo. Mo yeke “tourné peko” na “lege ti azo ti sioni”.—aProv. 4:​14, 15.

9. Tongana nyen la ti gbu li na ndö ti sambela so mo sara ti mû terê ti mo na Nzapa apeut nga ti aidé mo ti ngbâ ti zia vorongo Jéhovah kozo?

⁹ Ka tongana a ye ti mû na mo mbeni kua so ayeke kanga lege na mo ti gue na abungbi lakue? Mo hinga awe ye so mo yeke sara. Kozo si a mû na mo kua ni, mo leke na bê ti mo awe ti ke kua so ayeke kanga lege na mo ti gue na abungbi. Tongaso, bê ti mo ayeke handa mo ape ti yeda na mara kua so si na pekoni mo gi ti wara mbeni lege ti zia Jéhovah kozo. Tongana mo gbu li na ndö ti tapande ti Jésus so aleke na bê ti lo ti ngbâ ti zia ngia na bê ti Babâ ti lo, hio mo yeke ke na kuru go aye kue so mo hinga so ayeke zia vundu na bê ti Nzapa so mo mû terê ti mo na lo.—Mat. 4:10; Jean 8:29.

10. Tongana nyen la Jéhovah ayeke aidé mo na peko ti batême ti mo ti “ngbâ ti mû peko” ti Jésus?

¹⁰ Atara ayeke mû lege na mo ti fa so mo leke na bê ti mo ti “ngbâ ti mû peko” ti Jésus. Hinga biani so Jéhovah ayeke aidé mo ti ngbâ ti sara ni. Bible atene: “Nzapa ayeke be-ta-zo, na lo yeke zia ande pëpe si a tara ala ahon ti so ala lingbi ti kanga bê dä, me tongana tara ni ayeke si na ala, lo yeke leke nga lege ti tene ala lingbi ti gbu ngangu dä.”—1 aCor. 10:13.

AYE SO MO PEUT TI SARA TI NGBÂ TI MÛ PEKO TI JÉSUS

11. Mbeni nzoni lege ti ngbâ ti mû peko ti Jésus ayeke so wa? (Bâ nga foto.)

¹¹ Jésus asara lani na Jéhovah na bê ti lo kue nga lo yeke sambela lo lakue (Luc 6:12). Mbeni nzoni lege ti ngbâ ti mû peko ti Jésus  na peko ti batême ti mo ayeke ti ngbâ ti sara aye so ayeke sara si mo ga nduru mingi na Jéhovah. Bible atene: “Ndo so e maï ngbii si e si dä awe so, zia e ngbâ ti tambela mbilimbili na ndö ti oko lege ni so.” (aPhil. 3:16). Ngoi na ngoi, mo yeke mä aye so asi na aita so agi ti sara aye mingi na yâ ti kua ti Jéhovah. Peut-être ala sara Ekole ti awafango nzoni tënë ti Royaume wala ala gue na ndo so a bezoin awafango tënë mingi dä. Tongana dutingo ti mo amû lege na mo, mbeni pendere ye so mo peut ti gi ti sara la. Awakua ti Jéhovah aye mingi ti sara akua ti lo mingi (Kus. 16:9). Ka tongana mo peut ti sara ni na ndembe so ape? Pensé ape so azo so apeut ti sara ni ahon mo. Kota ye ni ayeke ti tene mo ngbâ ti gbu ngangu (Mat. 10:22). Girisa ape so mo zia ngia mingi na bê ti Jéhovah so mo sara ye kue so mo peut ti sara alingbi na dutingo ti mo ti voro lo. So ayeke nzoni lege ti ngbâ ti mû peko ti Jésus na peko ti batême ti mo la.—Ps. 26:1.

12-13. Nyen la mo peut ti sara tongana mo bâ so mo yeke sara na Jéhovah na ngia tongana ti kozo ape? (1 aCorinthien 9:​16, 17). (Bâ nga encadré “ Ngbâ ti kpe loro ni.”)

¹² Nyen la a yeke nzoni mo sara tongana mo bâ so mo yeke sambela Jéhovah na bê ti mo kue ape wala fango tënë anzere na mo tongana ti kozo ape? Ka tongana dikongo Bible anzere na mo tongana ti kozo ape? Tongana mo bâ tongaso, tene ape so yingo ti Jéhovah ayeke na ndö ti mo encore ape. So mo yeke mbilimbili-kue ape, ngoi na ngoi bango ndo ti mo apeut ti changé. Tongana mo yapu na kua ti Jéhovah tongana ti kozo ape, gbu li na ndö ti tapande ti bazengele Paul. Atâa so lo yeke gi lani ti mû tapande ti Jésus, lo hinga so na ambeni ngoi lo yeke na nzara ti sara ni tongana ti ambeni ngoi ape. (Diko 1 aCorinthien 9:​16, 17.) Lo tene: “Même tongana mbi sara  ni na bê use, kamême a zia mbeni ye na maboko ti mbi ti bata ni.” So ti tene, Paul aleke lani na bê ti lo ti ngbâ ti fa tënë atâa bibe ti lo ayeke lani so wa na ngoi ni so.

¹³ Legeoko nga, zia ape si atënë ti bê ti mo so ayeke mbilimbili-kue ape apusu mo ti mû desizion. Leke na bê ti mo ti sara ye so ayeke na lege ni même tongana mo ye ti sara ni ape. Tongana mo ngbâ ti sara ye so ayeke na lege ni, tongana ngoi ayeke hon, atënë ti bê ti mo apeut ti changé. Juska ti si na ngoi ni so, mandango ye mo wani, sambela, guengo na abungbi nga na fango tënë ayeke aidé mo ti ngbâ ti mû peko ti Jésus na peko ti batême ti mo. Tongana mo ngbâ ti sara aye so, a yeke kpengba nga amba ti mo aChrétien.—1 aThes. 5:11.

‘ALA NGBÂ TI BÂ TERÊ TI ALA TI BÂ WALA ALA YEKE TONGANA NYEN’

14. Ngbanga ti nyen la a yeke nzoni lakue e bâ yâ ti asarango ye ti e? (2 aCorinthien 13:5).

¹⁴ Na peko ti batême ti mo, a yeke kota ye ti bâ lakue yâ ti asarango ye ti mo. (Diko 2 aCorinthien 13:5.) Ngoi na ngoi, a yeke nzoni mo bâ wala lâ na lâ mo yeke sambela, mo yeke diko Bible nga mo yeke manda ni, mo yeke gue na abungbi nga mo yeke fa tënë. Gi alege ti tene ambage ti vorongo Nzapa so anzere na mo encore mingi nga mo bâ nzoni dä. Na tapande, hunda terê ti mo na ahunda so: ‘Eskê mbi peut ti fa na azo nzoni akozo fango ye ti Bible? Eskê ambeni ye ayeke dä so mbi peut ti sara ti tene fango tënë anzere na mbi mingi? Eskê mbi yeke sambela ndali ti ambeni mbilimbili ye? Eskê asambela ti mbi afa so mbi zia bê ti mbi kue na Jéhovah? Eskê mbi yeke gue lakue na abungbi? Tongana nyen la na ngoi ti abungbi mbi peut ti dengi mê nga ti mû mbage dä nzoni ahon ti kozo?’

15-16. Nyen la mo manda na lege ti tapande ti mbeni ita-koli so adö sese na mbeni tara?

¹⁵ A yeke nga kota ye ti hinga awokongo ti mo. Ita Robert afa mbeni ye so asi na lo so afa so a yeke kota ye ti sara tongaso. Lo tene: “Na ngoi so mbi yeke na ngu 20, mbi yeke sara lani mbeni kua. Mbeni lâ na peko ti kua, mbeni mba ti mbi ti place ti kua so ayeke wali atisa mbi na ndo ti lo. Lo tene e yeke duti ande gï e use nga e yeke ‘passé ande mbeni nzoni ngoi.’ Na tongo nda ni, mbi fa ambeni raison so aluti ape so ndali ni mbi ye ti gue ape, me na nda ni mbi ke ti gue na mbi fa na lo ndani.” Robert adö lani sese na tara ni, na so ayeke nzoni. Me na pekoni, lo gbu li ti lo na ndö ti ye so asi, na lo bâ so lo doit lani ti sara ye na mbeni lege nde. Lo tene: “Mbi ke lani tisango  ndo ti wali ni na kuru go ape wala mbi sara ye hio ape tongana Joseph so adö lani sese na wali ti Potiphar (Gen. 39:​7-9). Ti vrai ni, li ti mbi akpe so a yeke lani ngangu na mbi ti ke. Ye so asi lani so a-aidé mbi ti bâ so mbi doit ti kpengba songo ti mbi na Jéhovah.”

¹⁶ Tongana mo bâ yâ ti asarango ye ti mo tongana ti so Robert asara, a peut ti aidé mo. Même tongana mo dö sese na mbeni tara, hunda terê ti mo: ‘A mû ngoi oke ti tene mbi tene ên-ën?’ Tongana mo bâ so mo bezoin ti sara achangement, découragé ape. Duti na ngia so mo hinga wokongo ti mo so. Sambela Jéhovah ndali ti wokongo ti mo ni nga sara aye so ayeke aidé mo ti duti na nzara mingi ti mä yanga ti lo.—Ps. 139:​23, 24.

17. Ye so asi na Robert andu iri ti Jéhovah tongana nyen?

¹⁷ Mbeni ye nde ayeke dä so e peut ti manda na lege ti ye so asi na Robert. Lo kiri lo tene: “Na peko ti so mbi ke tisango ndo ni, wali ni atene: ‘Mo sigi dä.’ Mbi hunda lo, mo ye ti tene nyen la? Lo tene na mbi so mbeni kamarade ti lo so ayeke ândö Témoin atene na lo so aTémoin kue so ayeke amaseka ayeke sara ka asioni ye na hondengo ni tongana lege ayeke dä. Tongaso, lo tene na kamarade ti lo ni so lo yeke tara mbi ti bâ wala mbi nga mbi yeke tongaso. Na pekoni, mbi bâ so mbi yeke na ngia mingi so mbi mû lani gonda na iri ti Jéhovah.”

18. Nyen la mo leke na bê ti mo ti ngbâ ti sara na peko ti batême ti mo? (Bâ nga encadré “ A-article so ayeke nzere na mo.”)

¹⁸ Tongana mo mû terê ti mo na Jéhovah nga mo wara batême, mo fa so mo ye ti sara si iri ti lo aga nzoni-kue atâa nyen la asi. Mo peut ti duti sûr so Jéhovah ahinga akpale so mo yeke wara nga na atara so mo dö sese na ni. Lo yeke sara tufa na ndö ti a-effort so mo yeke sara ti ngbâ be-ta-zo na lo. Duti na confiance so na lege ti yingo vulu ti lo, lo peut ti mû na mo ngangu ti sara ni (Luc 11:​11-13). Grâce na mungo maboko ti Jéhovah, mo peut ti ngbâ ti mû peko ti Jésus na peko ti batême ti mo.