1-2. “Kusala so ayeke nzoni mingi” so mbeni ancien ayeke sara ayeke nyen?

 TONGANA mo yeke wakua ti mungo maboko asara mbeni ngoi awe, peut-être mo yeke sara ngangu ti duti na asarango ye so a hunda ti ga ancien. Eskê mo peut ti gi ti sara “kusala so ayeke nzoni mingi” so?—1 Tim. 3:1.

² Kua wa la mbeni ancien ayeke sara? Lo yeke mû li ni na fango tënë, lo yeke sara vizite na aita ti kpengba ala na lo yeke fa ye nga lo yeke kpengba congrégation na lege ti atënë ti lo nga na tapande ti lo. Ndani la Bible airi a-ancien so ayeke sara kua ngangu ‘akoli so a mû ala tongana amatabisi.’—aÉph. 4:8.

3. Tongana nyen la mbeni ita-koli apeut ti ga ancien? (1 Timothée 3:​1-7; Tite 1:​5-9).

³ Tongana nyen la mo peut ti ga ancien? Aye so a hunda na mbeni zo ti ga ancien ayeke nde na aye so a hunda ti wara kua ti nginza. Mingi ni ti wara mbeni kua ti nginza, mo bezoin ti duti gï na akode so zo so ayeke mû mo na kua ayeke gi ti bâ ni. Me tongana mo ye ti ga ancien, gï ti fa tënë na ti fa ye nzoni alingbi ape. Mo doit ti sara aye so a fa ni na 1 Timothée 3:​1-7 nga na Tite 1:​5-9. (Diko ni.) Article so ayeke fa akota ye ota so a hunda na a-ancien: ti duti na nzoni iri na yâ ti congrégation nga na gigi ni, ti duti mbeni mokonzi ti sewa so azia nzoni tapande nga ti duti nduru ti sara kua ndali ti aita ti congrégation.

DUTI NA NZONI IRI

4. Ti ‘duti zo so tënë ayeke na li ti lo pëpe’ aye ti tene nyen?

⁴ Ti ga ancien, mo doit ti ‘duti zo so tënë ayeke na li ti lo  pëpe,’ so ti tene mo yeke na nzoni iri na yâ ti congrégation ndali ti so sarango ye ti mo amû lege na azo ti bi tënë na li ti mo ape. Na ndö ni, a yeke nzoni “azo ti gigi asara nzoni tënë” ti mo. Azo so avoro Jéhovah ape apeut ti tene sioni tënë na ndö ti aye so mo mä na bê na ni, me sarango ye ti mo adoit ti mû lege na ala lâ oko ape ti duti na kite so mo yeke nzoni zo (Dan. 6:​4, 5). Hunda terê ti mo: ‘Eskê mbi yeke na nzoni iri na yâ ti congrégation nga na gigi ni?’

5. Tongana nyen la mo peut ti fa so mo yeke “zo so andoye nzoni ye”?

⁵ Tongana mo yeke “zo so andoye nzoni ye,” mo yeke gi ti bâ gï anzoni sarango ye ti azo nga mo yeke gonda ala ndali ni. A yeke nzere nga na mo ti sara nzoni na azo même tongana a yeke aye so azo aku ti tene mo sara la ape (1 aThes. 2:8). Ngbanga ti nyen la sarango ye so ayeke kota ye na a-ancien? Ngbanga ti so ala yeke mû angoi mingi ti sara vizite ti kpengba aita nga ti sara akua ti congrégation (1 Pi. 5:​1-3). Atâa so sarango aye so ayeke kua mingi, ala yeke na ngia mingi ti sara ni.—Kus. 20:35.

6. Ti duti “zo ti yambango agene nzoni” aye ti tene nyen? (aHébreu 13:​2, 16; bâ nga foto.)

⁶ Mo yeke fa so mo yeke “zo ti yambango agene nzoni” tongana mo yeke sara nzoni na azo, même na azo so ayeke akota kamarade ti mo ape (1 Pi. 4:9). Mbeni mbeti atene so zo so ayeke yamba agene ayeke sara nzoni bê même na azo so lo hinga ala ape nga lo yeke na ngia ti tisa ala na da ti lo. Tongaso, hunda terê ti mo: ‘Eskê a hinga mbi tongana zo so ayeke yamba azo so aga gango na yâ ti congrégation ti mbi?’ (Diko aHébreu 13:​2, 16.) Zo so ayeke yamba agene ayeke sara nzoni bê na mara ti azo nde nde so ayeke ga na yâ ti congrégation. Na tapande, awayere, aita so aga ti mû diskur nga na ambeni ita so ayeke sara ngangu ti kpengba aita tongana asurveillant ti circonscription.—Gen. 18:​2-8; aProv. 3:27; Luc 14:​13, 14; Kus. 16:15; aRom. 12:13.

7. Tongana nyen la mbeni ancien ayeke fa so lo yeke “zo ti yengo nginza pëpe”?

⁷ “Zo ti yengo nginza pëpe.” A ye ti tene so mo yeke pëpe zo so azia li ti lo gï na ndö ti aye ti sese. Atâa mo yeke na mosoro wala mo yeke wayere, sarango na Jéhovah ayeke ye so  ayeke kota mingi na yâ ti gigi ti mo (Mat. 6:33). Mo yeke mû ngoi ti mo, ngangu ti mo nga na aye ti mo ti voro na Jéhovah, ti bâ lege ti azo ti sewa ti mo nga ti sara akua ti congrégation (Mat. 6:24; 1 Jean 2:​15-17). Hunda terê ti mo: ‘Eskê nginza ayeke kota ye mingi na lê ti mbi? Eskê mbi zia bê ti mbi gï na ndö ti aye so mbi bezoin ni? Wala mbi zia li ti mbi na ndö ti warango nginza nga na gbâ ti aye ti sese?’—1 Tim. 6:​6, 17-19.

8. Ti duti zo so “sarango ye ti terê ti lo ayeke lakue nzoni” nga “zo so ahinga ti kanga nzara ti bê ti lo” aye ti tene nyen?

⁸ Tongana mo yeke zo so “sarango ye ti terê ti lo ayeke lakue nzoni” nga “zo so ahinga ti kanga nzara ti bê ti lo”, mo yeke sara ye ahon ndö ni ape na yâ ti aye kue so mo yeke sara. Atâa a yeke tënë ti tengo ye, nyongo ye, yungo bongo, lekengo terê ti mo nga na angia so mo soro ti sara, mo yeke sara ye ahon ndö ni ape. Mo yeke pëpe ngbâa ti afini ye so a yeke sigi na ni na yâ ti dunia so (Luc 21:34; Jacq. 4:4). Mo yeke duti kpô même tongana azo agi yanga ti mo. Mo yeke “ngbâa ti sämba pëpe” wala a hinga mo pëpe tongana zo so ayeke nyon sämba mingi. Hunda terê ti mo: ‘Eskê fason so mbi yeke vivre na ni afa so mbi yeke sara ye ahon ndö ni ape nga mbi hinga ti kanga nzara ti bê ti mbi?’

9. Ti duti “zo so abata bibe ti lo nzoni” nga zo so ayeke “sara ye kirikiri pëpe” aye ti tene nyen?

⁹ Tongana mo yeke “zo so abata bibe ti lo nzoni,” mo yeke sara ye alingbi na amama-ndia ti Bible na yâ ti aye nde nde. Mo yeke gbu li ti mo nzoni na ndö ti amama-ndia so, ye so ayeke sara si lê ti mo ayeke zi nga mo yeke mä yâ ti aye nzoni. Mo yeke mû desizion gï na loro loro ape. Me mo yeke duti sûr so mo yeke na asango kue so mo bezoin ni (aProv. 18:13). Ye ti peko ni ayeke so mo yeke mû anzoni desizion so ague oko na apensé ti Jéhovah. Tongana mo yeke zo so ayeke “sara ye kirikiri pëpe,” mo yeke leke aye nzoni nga mo yeke sara ye na l’heure. A hinga mo tongana zo so a peut ti zia bê na ndö ti lo nga zo so ayeke sara ye alingbi na afango lege. Asarango ye so ayeke sara si mo wara nzoni iri. Zia e sara tënë fadeso na ndö ti asarango ye so Bible atene mbeni ancien adoit ti duti na ni si lo duti mbeni mokonzi ti sewa so azia nzoni tapande.

DUTI MBENI MOKONZI TI SEWA SO AZIA NZONI TAPANDE

10. Tongana nyen la mbeni koli apeut ti “fa lege nzoni mingi na azo ti da ti lo”?

¹⁰ Tongana mo yeke koli ti wali na mo ye ti ga ancien, azo ti sewa ti mo adoit ti duti na nzoni iri. Tongaso, mo doit ti ‘fa lege nzoni mingi na azo ti da ti mo.’ Mo doit ti bâ lege ti azo ti sewa ti mo na ndoye nga ti mû anzoni desizion ndali ti ala. Mo yeke mû li ni na yâ ti aye kue so ala yeke sara ti voro Jéhovah. Ngbanga ti nyen la a yeke kota ye? Bazengele Paul ahunda tënë so: “Tongana mbeni zo ahinga ti fa lege nzoni na azo ti da ti lo wani pëpe, lo yeke bata ande congrégation ti Nzapa ni tongana nyen?”—1 Tim. 3:5.

11-12. Ngbanga ti nyen la sarango ye ti amolenge ti mbeni ita-koli so aye ti ga ancien ayeke kota ye mingi? (Bâ nga foto.)

¹¹ Tongana mo yeke babâ so amolenge ti mo ayeke na gbe ti ngu 18, ala doit ti ‘woko terê na gbe ti mo na bê ti ala kue.’ Na ndoye, mo doit ti fa ye na ala nga ti fa kua na ala. Ti vrai ni, tongana ti amolenge kue, ala ye ti sara ngia. Me ndali ti so mo fa ye na ala nzoni, ala yeke mä yanga ti mo, ala yeke ne mo nga ala yeke duti na anzoni sarango ye. Mo doit nga ti sara kue ti aidé amolenge ti mo ti duti na nzoni songo na Jéhovah, ti sara ye alingbi na amama-ndia ti Bible nga ti gue na li ni ti wara batême.

 ¹² “Lo yeke na amolenge so amä na bê na a bi tënë na li ti ala pëpe a tene ala yeke amolenge ti kirikiri wala amolenge ti ngangu-li.” Tongana mbeni molenge awara batême awe na lo sara mbeni kota siokpari, a yeke ndu babâ ti lo tongana nyen? Tongana lo fa ye na lo nga lo gboto mê ti lo na bê ti lo kue ape, peut-être lo peut ti ga ancien ape.—Bâ Tour ti Ba Ndo ti lango 15 ti octobre 1996, l. 21, par. 6-7 na Français.

SARA KUA NA AITA TI CONGRÉGATION

13. Tongana nyen la mo peut ti fa so mo yeke “zo so asara ye na lege ni” nga “zo so asara gï ye ti li ti lo pëpe”?

¹³ Aita-koli so ayeke na anzoni sarango ye ayeke aidé congrégation mingi. Mbeni ita-koli so ayeke “zo so asara ye na lege ni” ayeke sara si siriri amaï. Tongana mo ye ti tene a hinga mo tongana zo so asara ye na lege ni, mä azo nga gi ti comprendre ala. Na tapande, tongana mingi ti a-ancien amû mbeni desizion so ague oko na amama-ndia ti Bible, eskê mo yeke yeda na ni même tongana bango ndo ti mo ague nde na ti ala? Ti duti “zo so asara gï ye ti li ti lo pëpe” aye ti tene mo yeke luti nganganga na ndö ti bango ndo ti mo ape. Mo hinga so a yeke kota ye ti mä atënë so amba ti mo atene (Gen. 13:​8, 9; aProv. 15:22). Mo yeke “zo so aye tiri pëpe” wala “zo so aye ngonzo mingi” ape. So aye ti tene mo yeke ne azo nga mo yeke papa na ala ape. Me mo yeke sara ye na ala na nzoni bê. So mo ye siriri, mo yeke mû li ni ti sara si siriri akiri même tongana tënë alondo (Jacq. 3:​17, 18). Anzoni tënë so mo tene apeut ti dë bê ti azo même azo so aye ti mä tënë so e fa ape.—aJu. 8:​1-3; aProv. 20:3; 25:15; Mat. 5:​23, 24.

14. Ti duti “fini zo na yâ ti mabe pëpe” nga “zo so ayeke be-ta-zo” aye ti tene nyen?

¹⁴ Mbeni ita-koli so alingbi ti ga ancien ayeke “mbeni fini zo na yâ ti mabe pëpe”. Atâa so mo wara batême ade asara angu mingi ape, mo bezoin ngoi ti ga Chrétien so akpengba. Kozo ti tene mo ga ancien, tongana ti Jésus, mo doit ti sara terê ti mo kete nga ti ku ti tene Jéhovah amû na mo mbeni kua (Mat. 20:23; aPhil. 2:​5-8). Mo yeke fa so mo yeke “zo so  ayeke be-ta-zo” na lege so mo ngbâ nduru na Jéhovah, mo sara aye so lo hunda nga mo mû peko ti afango lege ti bungbi ti lo.—1 Tim. 4:15.

15. Eskê mbeni ancien adoit ti duti gï zo so apeut ti mû diskur pendere? Fa ndani so mo tene tongaso.

¹⁵ Bible afa polele so a-ancien adoit ti ‘hinga ti fa ye nzoni’. Eskê so aye ti tene so mo doit ti duti gï zo so amû diskur pendere? Ên-ën. A-ancien kue la ayeke na kode ti mungo diskur pendere ape. Me na ngoi so ala yeke fa tënë nga ala yeke sara avizite na aita ti kpengba ala, ala yeke sara ni nzoni. (Bâ 1 aCorinthien 12:​28, 29 nga na aÉphésien 4:11.) Atâa so kue, mo bezoin ti gi lakue ti maï kode ti mo ti fango ye. Mo peut ti sara ni tongana nyen?

16. Tongana nyen la mo peut ti fa ye nzoni ahon ti kozo? (Bâ nga foto.)

¹⁶ “Zo so angbâ gï na ndö ti tënë so ayeke tâ tënë”. Ti fa ye nzoni ahon ti kozo, sara kue si atënë so mo yeke fa nga na awango so mo mû na aita ague lakue oko na atënë ti Bible. Manda Bible nga na ambeti ti e nzoni (aProv. 15:28; 16:23). Na ngoi so mo yeke manda ye, bâ tongana nyen la ambeti ti e ayeke fa nda ti aversê tongaso si mo sara kua na ni na lege ni. Nga, na ngoi so mo yeke fa ye, sara kue ti ndu bê ti azo so ayeke mä mo. Mo peut ti fa ye nzoni ahon ti kozo tongana mo hunda wango na a-ancien so aninga na yâ ti kua ni nga mo sara ye alingbi na ni (1 Tim. 5:17). A-ancien adoit ti “wa” aita ti ala; me na ambeni ngoi a-ancien adoit ti “suku” na ala. Atâa ye ni ayeke so wa, ala doit ti sara ni lakue na nzoni bê. Tongana mo sara ye na ngangu ape, na ndoye nga fango ye ti mo alondo na yâ ti Bible, mo yeke fa ye nzoni ndali ti so mo yeke sara ye tongana Jésus, Kota Wafango ye.—Mat. 11:​28-30; 2 Tim. 2:24.

NGBÂ TI GI TI GA ANCIEN

17. (a) Nyen la apeut ti aidé awakua ti mungo maboko ti ngbâ ti gi ti ga ancien? (b) Na ngoi so a-ancien ayeke gi ti bâ wala mbeni ita-koli apeut ti ga ancien, nyen la a yeke nzoni ala girisa ape? (Bâ encadré “ Ala sara ye ahon ndö ni ape na ngoi so ala yeke bâ wala mbeni ita-koli apeut ti ga ancien.”)

¹⁷ Ambeni wakua ti mungo maboko apeut ti  bâ so ala lingbi lâ oko ti ga ancien ape ndali ti so asarango ye so ala doit ti gi ti maï ni ayeke mingi. Me girisa ape so Jéhovah nga na bungbi ti lo ahunda ape ti tene mo sara aye so tâ mbilimbili (1 Pi. 2:21). Yingo vulu ti Jéhovah la ayeke aidé mo ti maï asarango ye so (aPhil. 2:13). Eskê mbeni sarango ye ayeke dä so mo ye ti maï ni? Sambela Jéhovah na ndö ni. Sara recherche na ndö ni nga hunda mbeni ancien ti fa na mo aye so mo peut ti sara ti maï ni.

18. A wa awakua ti mungo maboko kue ti sara nyen?

¹⁸ Zia e kue, même azo so ayeke sara kua ti ancien awe, e ngbâ ti gi ti maï asarango ye so a fa na yâ ti article so (aPhil. 3:16). Eskê mo yeke wakua ti mungo maboko? Gi ti ga ancien. Hunda na Jéhovah ti fa ye na mo nga ti leke mo tongaso si lo sara kua na mo mingi na yâ ti congrégation (És. 64:8). Zia Jéhovah asara tufa na ndö ti angangu kue so mo yeke sara ti ga ancien.