1. Bazengele Paul abâ lani awakua ti mungo maboko tongana nyen?

 AWAKUA ti mungo maboko ayeke sara akota kua mingi na yâ ti congrégation. Bazengele Paul abâ akoli so, so ayeke be-ta-zo, na nene ni mingi. Na tapande, na ngoi so lo yeke sû lani mbeti na aChrétien ti Philippes, lo bara awakua ti mungo maboko nga na a-ancien.—aPhil. 1:1.

2. So Ita-koli Luis ayeke wakua ti mungo maboko, lo bâ ni tongana nyen?

² Aita-koli mingi so awara batême awe, atâa so ala yeke maseka wala ala ga mbakoro, ayeke na ngia mingi ti sara kua tongana awakua ti mungo maboko. Na tapande, Devan ayeke lani na ngu 18 na ngoi so lo ga wakua ti mungo maboko. Me Luis aga lani wakua ti mungo maboko na ngoi so lo hon ngu 50. Lo fa na nduru tënë atënë ti bê ti awakua ti mungo maboko mingi na lege ti tënë so: “Mbi bâ so a yeke mbeni kota pasa ti sara kua tongana wakua ti mungo maboko, mbilimbili tongana mbi gbu li na ndö ti aye kue so aita ti congrégation asara na mbi na ndoye.”

3. Ahunda wa la e yeke bâ ni?

³ Tongana mo yeke mbeni ita-koli so awara batême awe me ade mo ga wakua ti mungo maboko ape, eskê mo peut ti gi ti ga ni? Nyen la apeut ti pusu mo ti ga ni? Aye wa la Bible afa ni so mo doit ti gi ti sara ye alingbi na ni? Na yâ ti article so, e yeke kiri tënë na ahunda so. Me kozoni, zia e sara tënë na ndö ti kua ti awakua ti mungo maboko.

 KUA TI WAKUA TI MUNGO MABOKO AYEKE NYEN?

4. Kua ti wakua ti mungo maboko ayeke nyen? (Bâ nga foto.)

⁴ Mbeni wakua ti mungo maboko ayeke mbeni ita-koli so awara batême awe so a soro lo grâce na yingo vulu ti aidé a-ancien ti bâ lege ti gbâ ti akota kua na yâ ti congrégation. Ambeni wakua ti mungo maboko ayeke sara si awafango tënë awara territoire nga na ambeti so ala bezoin ni ti fa na tënë. Ambeni a-aidé ti nettoyé Da ti Royaume nga ti bâ lege ni. Ala yeke yamba nga azo so aga na abungbi nga na ngoi ti abungbi, ala yeke bâ lege ti sono nga na avidéo. Akua so kue a-aidé azo. Me kozoni kue, awakua ti mungo maboko ayeke na kpengba songo na Jéhovah; ala ye lo nga ala yeke sara aye so lo hunda. Ala ye nga aita ti ala mingi (Mat. 22:​37-39). Tongana nyen la mbeni ita-koli so awara batême apeut ti gi ti ga wakua ti mungo maboko?

5. Tongana nyen la mbeni ita-koli apeut ti gi ti ga wakua ti mungo maboko?

⁵ Bible afa aye so aita-koli so aye ti ga awakua ti mungo maboko adoit ti sara (1 Tim. 3:​8-10, 12, 13). Mo peut ti leke terê ti mo ti sara pendere kua so tongana mo manda ye na ndö ti asarango ye so nga mo sara ngangu ti sara ye alingbi na ni. Me kozoni, mo doit ti hunda terê ti mo na ndö ti ndani so mo ye ti ga wakua ti mungo maboko.

NYEN LA APUSU MO TI GI TI SARA KUA SO?

6. Nyen la adoit ti pusu mo ti ye ti sara kua ndali ti aita ti mo? (Matthieu 20:28; bâ nga foto.)

⁶ Gbu li na ndö ti Jésus, so azia na e nzoni tapande. Ye kue so lo sara, lo sara ni ndali ti so lo ye Babâ ti lo nga lo ye azo. Ndoye so apusu lo ti sara kua ngangu nga ti sara asenge kua ndali ti azo. (Diko Matthieu 20:28; Jean 13:​5, 14, 15.) Tongana ndoye la apusu mo ti ga wakua ti mungo maboko, Jéhovah ayeke sara tufa na ndö ti mo nga lo yeke aidé mo ti ga ni.—1 aCor. 16:14; 1 Pi. 5:5.

7. Ngbanga ti nyen la a yeke na lege ni ape ti gi ti ga wakua ti mungo maboko gï ti tene azo agonda mo?

⁷ Fani mingi na yâ ti dunia so, azo ayeke gonda azo so ayâa iri ti ala. Me awakua ti Jéhovah ayeke sara tongaso ape. Mbeni ita-koli so aye azo tongana ti Jésus ayeke gi pëpe ti komande na ndö ti azo wala ti sara si azo abâ lo tongana kota zo. Tongana a mû kua ti  wakua ti mungo maboko na mbeni ita so aye ti tene a bâ lo tongana zo so ayeke kota ahon amba ti lo, peut-être lo yeke yeda ape ti sara asenge kua wala ambeni ye so a hunda ti sara ti bâ lege ti ataba ti Jéhovah. Lo peut ti bâ ambeni kua tongana ambumbuse kua (Jean 10:12). Jéhovah ayeke sara tufa pëpe na ndö ti mbeni zo so baba nga na nzara ti yâa iri ti lo la ayeke pusu lo ti sara ye.—1 aCor. 10:​24, 33; 13:​4, 5.

8. Wango wa la Jésus amû na abazengele ti lo?

⁸ Na ambeni ngoi, sioni bibe la apusu même akota kamarade ti Jésus ti gi ti sara ambeni kua. Gbu li na ndö ti ye so abazengele ti Jésus use, Jacques na Jean, asara. Ala hunda na Jésus ti mû na ala kota ndo na yâ ti Royaume ti lo. Jésus agonda ala ndali ti ye so ala hunda so ape. Me lo tene na abazengele 12 kue, lo tene: “Zo so aye ti ga kota na popo ti ala, a lingbi lo duti zo ti kua ti ala; na zo so aye ti duti na li ni na popo ti ala, a lingbi lo duti ngbâa ti ala kue.” (Marc 10:​35-37, 43, 44). Aita so nzoni bibe apusu ala ti sara ye, so ti tene ala yeke na nzara ti sara kua ndali ti amba ti ala, ayeke mbeni tufa ndali ti congrégation.—1 aThes. 2:8.

NYEN LA APEUT TI AIDÉ MO TI YE TI SARA KUA NDALI TI AITA TI MO?

9. Nyen la apeut ti aidé mo ti ye ti sara kua ndali ti aita ti mo?

⁹ Kite ayeke dä ape so mo ye Jéhovah nga mo ye ti sara kua ndali ti amba ti mo. Me, peut-être mo yeke na nzara ape ti sara kua so mbeni wakua ti mungo maboko ayeke sara. Nyen la apeut ti aidé mo ti ye ti sara kua ndali ti aita ti mo? Gbu li na ndö ti ngia so mo peut ti wara tongana mo sara kua ndali ti ala. Jésus atene: “Mungo ye na zo aga na ngia mingi ahon warango ye na tïtî zo.” (Kus. 20:35). Jésus asara ye lani alingbi na mama-ndia so. Lo yeke na ngia mingi ti sara kua ndali ti azo, mo nga kue mo yeke wara ngia tongana mo sara ni.

10. Tongana nyen la Jésus afa so lo yeke na ngia ti sara kua ndali ti azo? (Marc 6:​31-34).

¹⁰ Bâ mbeni tapande so afa so Jésus ayeke na ngia ti sara kua ndali ti azo. (Diko Marc 6:​31-34.) Mbeni lâ, Jésus na abazengele ti lo afatigué. Ala gue na mbeni ndo so azo ayeke dä ape ti wu terê ti ala. Me gbâ ti azo asi kâ kozo na ala, na ala ye si Jésus afa ye na ala. Lo peut lani ti ke ndali ti so “ala wara même ngoi ti wu terê ti te kobe pëpe.” Wala Jésus apeut lani ti tene na azo ni ti gue na peko ti so lo fa na ala ye gï kete. Me ndali ti so ndoye apusu lo ti sara ye, lo “to nda ti fa aye mingi na ala.” Na lo ngbâ lani ti fa ye na ala juska “l’heure ahon mingi”. (Marc 6:35). Lo sara ni pëpe ndali ti so lo doit ti sara ni, me ndali ti so “mawa ti ala asara lo”. Lo ye lani ti fa ye na ala ndali ti so lo ye ala. Sarango kua ndali ti azo asara si Jésus ayeke na ngia mingi.

11. Nyen la Jésus asara lani ti aidé azo so amä lo? (Bâ nga foto.)

¹¹ Jésus a-aidé lani azo na lege so lo fa ye na ala na ndö ti Nzapa, me lo sara nga ambeni ye ti aidé ala. Na lege ti miracle lo sara si kete kobe aga gbani na lo mû ni na adisciple ti lo ti kangbi ni na azo ni (Marc 6:41). So lo sara tongaso, lo fa na adisciple ti lo tongana nyen ti sara kua ndali ti azo. Lo fa nga na ala so mara ti akua so, so awakua ti mungo maboko apeut ti sara, ayeke kota mingi. Imaginé kota ngia so abazengele ti Jésus ayeke na ni ti sara kua maboko na maboko na lo ti mû na azo kobe so lo mû na ala na lege ti miracle so “azo ni kue ate, yâ ti ala asi.” (Marc 6:42). So ayeke gï mbeni tapande oko so afa tongana nyen la Jésus azia abezoin ti azo kozo na ti lo. Lo sara ni na yâ ti gigi ti lo kue na ndö ti sese (Mat. 4: 23; 8:16). Jésus ayeke na ngia mingi ti fa ye na azo nga ti mû na ala aye so ala bezoin ni. Mo nga kue, mo yeke duti na ngia mingi tongana nzoni bibe la apusu mo ti gi ti ga wakua ti mungo maboko.

12. Ngbanga ti nyen la a yeke nzoni zo oko na popo ti e apensé ape so lo peut ti aidé congrégation ape?

¹² Tongana mo bâ so mo yeke na anzoni kode ape, découragé ape. Kite ayeke dä ape so mo yeke na ambeni kode so mo peut ti sara kua na ni ti aidé congrégation. Gbu li na ndö ti atënë ti Paul na 1 aCorinthien 12:​12-30 na pekoni hunda na Jéhovah ti aidé mo ti bâ tongana nyen la abâ mo. Atënë ti Paul so afa polele so a bezoin mo nga na awakua ti Jéhovah kue nga ala yeke ye ti ngangu ngere na yâ ti congrégation. Tongana na ndembe so mo peut ti ga wakua ti mungo maboko ape ndali ti so mo ngbâ ti gi ti duti na ambeni sarango ye so mo bezoin ni, découragé ape. Me sara ye kue so mo peut ti sara ti sara na Jéhovah nga ti aidé aita ti mo. Mo peut ti duti sûr so a-ancien ayeke pensé na mo na ala yeke mû na mo akua so mo peut ti sara.—aRom. 12:​4-8.

13. Nyen la ayeke tâ tënë na ndö ti mingi ti aye so a hunda na aita-koli so amû li ni ti duti na ni?

¹³ Gbu li na ndö ti mbeni raison so ndali ni a yeke nzoni mo gi ti ga wakua ti mungo maboko: Mingi ti aye so a hunda abâ aChrétien kue. Ti vrai ni, a yeke nzoni aChrétien kue aduti na kpengba songo na Jéhovah, awara ngia ti mû ye na zo nga asara aye so azia ngia na bê ti Nzapa. Ambilimbili ye wa la mbeni ita-koli apeut ti sara ti ga wakua ti mungo maboko?

AYE TI SARA TI GA WAKUA TI MUNGO MABOKO

14. Ti ‘duti zo so ane terê ti lo’ aye ti tene nyen? (1 Timothée 3:​8-10, 12).

¹⁴ Zia e bâ fadeso ambeni sarango ye so a sara tënë ni na 1 Timothée 3:​8-10, 12. (Diko ni.) Mbeni wakua ti mungo maboko adoit ti ‘duti zo so ane terê ti lo.’ A peut nga ti kiri peko ti tënë so na tënë “a lingbi ti tene a ne lo” wala “ti sara ye na mbeni fason so asara si azo ane mo.” So aye ti tene ape so mo yeke he ngia wala mo yeke sara ngia lâ oko ape (Zo-ti. 3:​1, 4). Me, a yeke nzoni mo gi ti sara akua ti mo kue nzoni. Tongana a hinga mo tongana zo ti confiance, aita ti congrégation ayeke ne mo.

15. Ti duti zo so ‘yanga ti lo ayeke use use pëpe’ nga ti “sara bê ti warango ye na lege ti likisi pëpe” aye ti tene nyen?

¹⁵ Ti duti zo so ‘yanga ti lo ayeke use use  pëpe’ aye ti tene ti sara ye na handa ape nga ti duti zo ti confiance. Mo yeke sara ye alingbi na tënë ti yanga ti mo nga mo yeke handa azo ape (aProv. 3:32). Ti “sara bê ti warango ye na lege ti likisi pëpe” aye ti tene so mo yeke gi ti wara go na ndö ti mbeni zo ape nga mo yeke sara ye na lege ni na nginza so aita amû. Mo yeke gi pëpe ti profité ti wara nginza na maboko ti aita ndali ti songo so mo yeke na ni na ala.

16. (a) Ti duti zo so ‘abi terê ti lo na yâ ti nyongo vin pëpe’ aye ti tene nyen? (b) Ti duti na “nzoni conscience” aye ti tene nyen?

¹⁶ Ti duti zo so ‘abi terê ti lo na yâ ti nyongo vin pëpe’ aye ti tene so mo yeke nyon sämba ahon ndö ni ape nga azo ahinga mo tongana mbeni zo so anyon sämba mingi ape. Ti duti na “nzoni conscience” aye ti tene ti vivre alingbi na aye so Jéhovah ahunda. Atâa so mo yeke mbilimbili-kue ape, mo yeke na siriri ndali ti so mo yeke na nzoni songo na Nzapa.

17. Ti ‘tara zo kozoni ti bâ wala lo lingbi na kua ni’ aye ti tene nyen? (1 Timothée 3:10; bâ nga foto.)

¹⁷ Ti ‘tara zo kozoni ti bâ wala lo lingbi na kua ni’ aye ti tene so zo ni afa awe so lo yeke zo ti confiance na lege so lo sara akua so a mû na lo. Tongaso, tongana a-ancien amû na mo mbeni kua, sara kue ti sara ye alingbi na fango lege ti bungbi ti Jéhovah. Duti sûr so mo hinga mbilimbili ye so mo doit ti sara nga na ngoi wa la mo doit ti hunzi ni. Tongana mo yeke sara kua so a mû na mo nzoni nga na yapungo terê, aita ayeke bâ guengo na li ni ti mo. A-ancien, ala duti nduru ti fa kua na aita-koli so awara batême awe. (Diko 1 Timothée 3:10.) Eskê na yâ ti congrégation ti mo, aita-koli so awara batême so ngu ti ala ayeke na popo ti ngu 10 ti si na ngu 14 wala na gbe ni ayeke dä? Eskê ala yeke na nzoni kapa ti mandango ye? Eskê ala yeke kiri tënë lakue na abungbi nga ala yeke fa tënë lakue? Tongana a yeke tongaso, mû na ala akua so alingbi na ngu ti ala nga na dutingo ti ala. A yeke na lege so la si a yeke “tara ala kozoni ti bâ wala ala lingbi na kua ni”. Tongaso, ti si na ngoi so ala yeke wara ngu 17 ti si na ngu 19, ala peut ti ga awakua ti mungo maboko.

18. Ti duti zo so ‘tënë ayeke na li ti lo pëpe’ aye ti tene nyen?

¹⁸ Ti duti zo so ‘tënë ayeke na li ti lo pëpe’ aye ti tene so mbeni zo apeut ti bi tënë na li ti mo ape atene mo sara mbeni sioni ye. Ti vrai ni, a peut ti bi tënë ti mvene na li ti aChrétien.  A tene lani atënë ti mvene na ndö ti Jésus na lo tene so a yeke sara mara ni na adisciple ti lo (Jean 15:20). Me tongana mo ngbâ ti duti na nzoni sarango ye tongana ti Jésus, mo yeke duti na nzoni iri na yâ ti congrégation.—Mat. 11:19.

19. Ti duti ‘koli so ayeke gï na wali oko’ aye ti tene nyen?

¹⁹ ‘Koli so ayeke gï na wali oko.’ Tongana mo sara mariage awe, a lingbi mo sara ye alingbi na ye so Jéhovah aleke na tongo nda ni ndali ti mariage: koli oko teti wali oko (Mat. 19:​3-9). Mbeni ita-koli adoit lâ oko ape ti sara lango-sioni (aHéb. 13:4). Me a ngbâ gï ge ape. Mo doit ti duti be-ta-zo na wali ti mo, mo doit lâ oko ape ti sara nzara ti mbeni wali nde.—Job 31:1.

20. Tongana nyen la mbeni koli ayeke “fa lege nzoni” na azo ti da ti lo?

²⁰ “Ala fa lege nzoni na amolenge ti ala nga na azo ti da ti ala.” Tongana mo yeke mokonzi ti sewa, mo doit ti sara kua ti mo nzoni. Mû li ni lakue na vorongo Nzapa na yâ ti sewa. Fa tënë legeoko na wali ti mo nga na amolenge ti mo lakue tongana lege ni ayeke dä. Aidé amolenge ti mo ti duti na songo ala wani na Jéhovah (aÉph. 6:4). Mbeni koli so ayeke bâ lege ti azo ti sewa ti lo afa so lo peut ti bâ ndo na ndö ti congrégation.—Bâ 1 Timothée 3:5.

21. Tongana ade mo ga wakua ti mungo maboko ape, nyen la mo peut ti sara?

²¹ Aita-koli, tongana ade ala ga awakua ti mungo maboko ape, pardon ala diko article so nzoni nga ala sambela Jéhovah na ndö ti tënë ni. Manda ye na ndö ti aye so a hunda ti ga wakua ti mungo maboko nga sara kue ti sara ye alingbi na ni. Gbu li ti bâ tongana nyen la mo ye Jéhovah nga na aita ti mo mingi. Gi ti duti na nzara mingi ti aidé ala (1 Pi. 4:​8, 10). Gi ti ga wakua ti mungo maboko na mo yeke wara ngia mingi so mo sara kua ndali ti aita ti mo. Zia Jéhovah asara tufa mingi na ndö ti angangu so mo yeke sara ti gi ti ga wakua ti mungo maboko.—aPhil. 2:13.