ESKÊ a yeke ngangu na mo ti manda Bible lakue nga ti tene mandango ye ni anzere na mo? E kue na ambeni ngoi a yeke ngangu na e. Me gbu li na ndö ti ambeni ye so e yeke sara lakue, na tapande sukulango ngu. Ti sara ni ahunda ngoi nga na effort, me na pekoni terê ti e ayeke dë. Mandango Bible apeut nga ti dë bê ti e tongana “ngu” so asara si terê ti e adë (aÉph. 5:26). Bâ ambeni wango so apeut ti aidé la:

• Leke mbeni kapa. Mandango Bible ayeke na popo ti “aye so ayeke akota ye mingi ahon atanga ni” so mbeni Chrétien adoit ti sara (aPhil. 1:10). Ti girisa ape ngoi ti mo ti mandango ye ni, sû na mbeti lango ni nga na ngoi ni nga zia ni na mbeni ndo so mo peut ti bâ ni hio. Wala mo peut ti zia réveil na ndö ti téléphone wala tablette ti mo tongaso si adabe ti mo na l’heure ni.

• Manda ye alingbi na dutingo ti mo. Eskê a yeke ngangu na mo ape ti manda ye na yâ ti mbeni ngoi so aninga, wala ti manda ye gï kete la ayeke nzoni na mo? Mo la mo hinga dutingo ti mo nzoni. Tongaso, leke ti manda ye alingbi na dutingo ti mo. Tongana terê ti mo ane nengo na ngoi so l’heure ti mandango ye ni alingbi, peut-être a yeke nzoni mo mû gï penze-ngbonga 10 ti manda ye. A peut ti si so ye so mo manda na yâ ti apenze-ngbonga 10 anzere na mo mingi asara si mo ye ti ngbâ ti manda ye.—aPhil. 2:13.

• Soro kozoni ye so mo ye ti manda. Tongana mo gbu li na ndö ti ye so mo ye ti manda gï na ngoi so mo ye ti manda ye, peut-être mo yeke ‘sara kua nzoni na ngoi ti mo ape’. (aÉph. 5:16). Sû na mbeti a-article wala atënë so mo ye ti manda ni. Lakue tongana mo yeke na mbeni hunda, sû ni na mbeti. Tongana mo hunzi ti manda ye, mo peut ti sû ambeni tënë so mo ye ti manda ye na ndö ni.

• Duti nduru ti changé ambeni ye. Kota ye ni ayeke ti tene mo manda ye yenga oko oko. Ti manda ye lakue, tongana a hunda ti sara ni mo peut ti changé lango ni nga na l’heure ni, ngoi so mandango ye ni ayeke ninga na ni nga na tënë so mo ye ti manda.

Tongana e manda ye yenga oko oko, e yeke bâ nzoni dä. E yeke ga nduru mingi na Jéhovah, e yeke manda ti sara ye na ndara nga e yeke wara ngangu.—Jos 1:8.