1-2. (a) Ambeni ye wa la awakua ti Jéhovah apeut ti duti na kite na ndö ni? (b) Nyen la e yeke bâ na yâ ti article so?

 AZO kue, atâa ngu ti ala ayeke oke, na ambeni ngoi ala yeke na kite a na ndö ti mbeni ye. Na tapande, imaginé mbeni Témoin so ade maseka so ayeke hunda terê ti lo wala Jéhovah ayeke pensé biani na lo. Peut-être ndali ni lo yeke sûr ape so a yeke nzoni lo wara batême. Mbeni tapande ni ayeke ti mbeni ita-koli so na maseka ti lo asoro ti zia kua ti Jéhovah kozo na yâ ti fini ti lo ahon ti sara kua so ayeke ga na lo gbâ ti nginza. Fadeso lo kpengba koli awe, nginza so lo yeke na ni alingbi gï ti tene lo bâ na lege ti azo ti sewa ti lo. Lo peut ti hunda terê ti lo wala nzoni desizion la lo mû na ngoi so lo ngbâ maseka. Imaginé mbeni ita-wali so aga mbakoro so ayeke na ngangu mingi encore ape. Lo peut ti découragé ndali ti so lo peut ti sara encore ape aye so lo sara ândö. Eskê mbeni lâ mo hunda terê ti mo na mara ti atënë so awe: ‘Eskê Jéhovah ayeke pensé na mbi biani? Eskê a yeke nzoni so mbi sara asacrifice ndali ti Jéhovah? Eskê Jéhovah apeut ti ngbâ ti sara kua na mbi?’

² Tongana e gi ti wara kiringo tënë na mara ti ahunda so  ape, a peut ti buba songo ti e na Jéhovah. Na yâ ti article so, e yeke bâ tongana nyen la Bible apeut ti aidé e tongana e pensé so (1) Jéhovah ayeke pensé na e ape, (2) adesizion so e mû ândö ayeke nzoni ape wala (3) Jéhovah ayeke sara kua na e encore ape.

LEGE TI HON NDÖ TI AKITE SO E YEKE NA NI

3. Mbeni lege ti hon ndö ti akite ti e ayeke so wa?

³ Mbeni lege ni ayeke ti gi ti wara kiringo tënë na ahunda ti e na yâ ti Bible. Tongana e sara tongaso, mabe ti e nga na songo ti e na Jéhovah ayeke kpengba mingi nga e yeke wara lege ti “luti ngangu na yâ ti mabe”.—1 aCor. 16:13.

4. Tongana nyen la e yeke “gi ti bâ wala aye kue ayeke tâ tënë”? (1 aThessalonicien 5:21).

⁴ Diko 1 aThessalonicien 5:21. Bâ so Bible awa e ti “gi ti bâ wala aye kue ayeke tâ tënë”. E peut ti sara ni tongana nyen? E peut ti gi ti hinga wala aye so e mä na bê na ni ayeke tâ tënë tongana e haka ni na aye so Bible afa. Na tapande, gbu li na ndö ti maseka so ayeke hunda terê ti lo wala Jéhovah ayeke pensé biani na lo. Eskê a yeke nzoni lo pensé so bango ndo ti lo ni ayeke na lege ni? Ên-ën, a yeke nzoni lo “gi ti bâ wala aye kue ayeke tâ tënë” na lege so lo gi ti hinga apensé ti Jéhovah na ndö ti tënë ni.

5. Nyen la e peut ti sara ti hinga kiringo tënë ti Jéhovah na ahunda ti e?

⁵ Tongana e diko Bible, a yeke mo bâ mo tene Jéhovah ayeke sara tënë na e. Me, ti hinga pensé ti lo na ndö ti mbeni mbilimbili hunda, e doit ti sara effort. Dikongo Bible ti e adoit ti luti na ndö ti hunda so e ye ti wara kiringo tënë na ni. E peut ti sara kua na agbakuru so bungbi ti Jéhovah asigi na ni ti sara recherche na ndö ti tënë ni (aProv. 2:​3-6). E peut nga ti sambela Jéhovah ti aidé e na yâ ti recherche ni ti wara kiringo tënë na hunda ti e ni. E peut ti gi amama-ndia ti Bible nga na asango so ayeke aidé e na ndö ti tënë ni. E peut nga ti diko na yâ ti Bible ambaï ti azo so ayeke be-ta-zo so apensé tongana e.

6. Tongana nyen la abungbi ayeke aidé e ti hon ndö ti akite ti e?

⁶ Jéhovah ayeke sara nga tënë na e na lege ti abungbi ti e. Tongana e yeke gue na abungbi lakue, e peut ti mä mbeni diskur wala mbeni commentaire so akiri tënë na ahunda ti e (aProv. 27:17). Zia e bâ fadeso ambeni ye so apeut ti aidé e ti hon ndö ti ambeni mbilimbili kite ti e.

TONGANA MO YEKE NA KITE SO JÉHOVAH AYEKE PENSÉ NA MO

7. Hunda wa la ambeni zo apeut ti hunda terê ti ala na ni?

⁷ Mo hunda terê ti mo lâ oko awe mo tene: ‘Eskê Jéhovah ayeke pensé biani na mbi?’ Tongana mo bâ so mo yeke ye oko ape, mo peut ti pensé so mo lingbi ape ti ga kamarade ti Lo so acréé dunia kue. Peut-être Gbia David kue apensé lani tongaso. So Jéhovah apensé même na asenge zo ahon gbungo li ti lo, ni la lo hunda ndo, lo tene: “Jéhovah, zo ayeke nyen si mo zia lê ti mo na ndö ti lo? Molenge ti zo ti sese ayeke nyen si mo bi bê na lo?” (Ps. 144:3). Eskê Jéhovah ayeke pensé biani na azo? E peut ti wara kiringo tënë na hunda so na ndo wa?

8. Ti gue oko na 1 Samuel 16:​6, 7, 10-12, nyen la Jéhovah ayeke bâ na mbage ti azo?

⁸ Bible afa so Jéhovah ayeke bâ azo so azo abâ ala tongana ambumbuse zo. Na tapande, Jéhovah atokua lani Samuel na ndo ti Jessé ti tuku mafuta na li ti mbeni molenge ti lo so ayeke ga ande gbia ti Israël. Jessé airi amolenge ti lo mbasambala ti ga ti wara Samuel, me lo iri David ape so ayeke ngambe ti  ala. b Me a yeke David la Jéhovah asoro lani lo. (Diko 1 Samuel 16:​6, 7, 10-12.) Jéhovah abâ lani zo so David ayeke ni biani. Lo hinga so maseka-koli so aye lo mingi.

9. Ngbanga ti nyen la mo peut ti duti sûr so Jéhovah ayeke pensé na mo? (Bâ nga foto.)

⁹ Gbu li na ndö ti aye so Jéhovah asara awe so afa so lo pensé na mo. Lo mû na mo wango so mo yeke tâ na bezoin ni (Ps. 32:8). Tongana lo hinga mo ape, lo peut ti mû na mo wango ape (Ps. 139:1). Tongana mo sara ye alingbi na wango ti Jéhovah nga mo bâ tongana nyen la a-aidé mo, mo yeke hinga biani so Jéhovah apensé na mo (1 Chron. 28:9; Kus. 17:​26, 27). Jéhovah abâ a-effort so mo yeke sara. Lo bâ apendere sarango ye ti mo nga lo ye ti duti kamarade ti mo (Jér. 17:10). A yeke nzere na lo tongana mo yeda ti ga kamarade ti lo.—1 Jean 4:19.

TONGANA MO BÂ SO ADESIZION SO MO MÛ ÂNDÖ AYEKE NZONI APE

10. Tongana e gbu li na ndö ti adesizion so e mû ândö, ahunda wa la apeut ti londo?

¹⁰ Tongana ngoi ayeke hon, ambeni zo apeut ti gbu li na ndö ti adesizion so ala mû ândö na ala hunda terê ti ala wala nzoni desizion la ala mû lani. Peut-être ala ke lani mbeni nzoni kua wala ala ke ti dë buze tongaso si ala sara kua ti Jéhovah mingi. Peut-être a sara angu mingi awe. Ala peut ti bâ azo so ala hinga ala so ayeke sara nzoni kua nga so na bango ni ala yeke na nginza mingi. A sara si ala peut ti hunda terê ti ala: ‘Eskê a yeke na lege ni so mbi sara asacrifice ti voro Jéhovah? Wala a yeke lani nzoni ti tene mbi sara kua mingi tongaso si mbi duti na gbâ ti nginza laso?’

11. Nyen la asara si zo ti sungo Psaume 73 agi bê ti lo?

 ¹¹ Tongana mara ti ahunda so asara si mo gi bê ti mo, gbu li na ndö ti pensé ti zo ti sungo Psaume 73. Lo bâ so azo so avoro Jéhovah ape ayeke na nzoni seni, na mosoro nga na bango ni, ala gi bê ti ala ape (Ps. 73:​3-5, 12). So lo bâ so ala yeke na ngia na yâ ti gigi ti ala asara si lo bâ so effort so lo sara ti voro na Jéhovah ayeke gï senge senge. So lo pensé tongaso adécouragé lo, a sara si lo ‘gi bê ti lo na yâ ti lango ni kue’. (Ps. 73:​13, 14). Lo hon ndö ti asioni pensé so tongana nyen?

12. Ti gue oko na Psaume 73:​16-18, nyen la a-aidé zo ti sungo psaume so ti hon ndö ti asioni pensé ti lo?

¹² Diko Psaume 73:​16-18. Zo ti sungo psaume so ague na place so a yeke voro Jéhovah dä so ayeke nzoni-kue. Kâ, lo peut ti gbu li ti lo nzoni. Lo comprendre so atâa so gigi ti ala ayeke nzoni, ala yeke na beku ape. Tongaso, lo découragé encore ape na lo hinga biani so ti voro Jéhovah ayeke tâ nzoni desizion. Na ye so asara si lo leke na bê ti lo ti ngbâ ti voro Jéhovah.—Ps. 73:​23-28.

13. Tongana nyen la mo peut ti duti na siriri ti bê tongana mo yeke na kite na ndö ti adesizion so mo mû ândö? (Bâ nga foto.)

¹³ Tongana ti zo ti sungo psaume so, mo nga kue Bible apeut ti aidé mo ti hon ndö ti agingo bê ti mo. Tongana nyen? Girisa ape anzoni ye so mo yeke na ni, so na popo ni mo yeke wara tufa ti Jéhovah nga girisa ape so azo so ayeke voro Jéhovah ape, lo yeke aidé ala ape. Ala peut ti zia bê ti ala na ndö ti aye so ala wara laso ndali ti so ala yeke na beku ti kekereke ape. Me ti mo, Jéhovah amû na mo gbâ ti aye laso nga lo mû zendo ti mû na mo gbâ ti apendere ye na yâ ti angoi so ayeke ga (Ps. 145:16). Gbu li nga na ndö ti hunda  so: Gigi ti mo ayeke duti laso tongana nyen tongana mo mû lani ambeni desizion nde? Me mbeni ye ayeke sûr: Tongana mo mû adesizion ndali ti so mo ndoye Nzapa nga na amba ti mo, mo yeke wara lakue aye so ayeke sara si mo duti na ngia mingi.

TONGANA MO YEKE NA KITE SO JÉHOVAH APEUT TI SARA KUA NA MO

14. Dutingo ti ambeni zo ayeke tongana nyen? Hunda wa la ala peut ti hunda terê ti ala na ni?

¹⁴ Ambeni wakua ti Jéhovah apeut ti sara na lo mingi encore ape tongana ti so ala ye ndali ti so ala ga mbakoro, ala yeke na kpale ti seni wala mbeni mbage ti terê ti ala abuba. Ala peut ti bâ so ala yeke ye oko na lê ti Jéhovah ape. Ala peut ti hunda terê ti ala: ‘Eskê Jéhovah apeut ti ngbâ ti sara kua na mbi?’

15. Nyen la zo ti sungo Psaume 71 ayeke sûr na ni?

¹⁵ Zo ti sungo Psaume 71 ayeke lani na oko bibe so. Lo sambela, lo tene: “Zia mbi pëpe tongana ngangu ti mbi ahunzi.” (Ps. 71:​9, 18). Atâa so lo woko, lo yeke sûr so tongana lo ngbâ ti voro Jéhovah be-ta-zo, Lo yeke mû maboko na lo. Zo ti sungo psaume so ahinga so azo so asara ye kue so ala peut ti sara ti voro Jéhovah atâa so ala tingbi na akpale ayeke zia ngia na bê ti lo.—Ps. 37:​23-25.

16. Jéhovah ayeke sara kua na azo so aga mbakoro na alege wa? (Psaume 92:​12-15).

¹⁶ Ambakoro, ala duti na oko bango ndo ti Jéhovah na ndö ti dutingo ti ala. Lo peut ti aidé mo ti ngbâ ti sara na lo be-ta-zo atâa so mo yeke na akpale. (Diko Psaume 92:​12-15.) Ahon ti pensé na aye so mo peut ti sara ape, pensé na aye so mo peut ti sara. Na tapande, mo peut ti kpengba azo na lege so mo yeke be-ta-zo nga mo fa so mo yeke pensé na azo. Mo peut ti fa na azo tongana nyen la Jéhovah  a-aidé mo na yâ ti angu mingi nga mo peut ti fa na ala azendo ti Bible so mo yeke ku gango tâ tënë ni. Nga, girisa ape so asambela so mo yeke tene ndali ti azo ayeke aidé ala mingi (1 Pi. 3:12). Atâa dutingo ti e ayeke so wa, e kue e peut ti sara mbeni ye ndali ti Jéhovah nga na amba ti e.

17. Ngbanga ti nyen la a yeke nzoni ape ti tene e haka terê ti e na amba ti e?

¹⁷ Tongana bê ti mo ason ndali ti so mo peut ti sara kua ti Jéhovah mingi encore ape, duti sûr so lo yeke bâ na nene ni aye kue so mo peut ti sara. Peut-être mo gi ti haka ye so mo yeke sara na ye so ambeni zo apeut ti sara. Sara tongaso ape. Ngbanga ti nyen? Ngbanga ti so Jéhovah ayeke sara ni ape (aGal. 6:4). Na tapande, Marie amû mbeni mafuta so afun pendere so ayeke ti ngangu ngere lo tuku na gere ti Jésus (Jean 12:​3-5). Ye oko, mbeni wali-mua so ayeke wayere abi akete lê ti nginza use so ngere ni ayeke kete mingi na yâ ti sanduku (Luc 21:​1-4). Me Jésus abâ ye so awali use so kue asara tongana ye so afa so ala yeke na mabe. Babâ ti lo Jéhovah abâ na nene ni mingi ye kue so mabe nga na ndoye apusu mo ti sara ndali ti lo, atâa so na lê ti mo a yeke kete ye.

18. Nyen la ayeke aidé e ti hon ndö ti akite ti e? (Bâ nga encadré “ Aversê so apeut ti aidé mo ti hon ndö ti kite.”)

¹⁸ E kue na ambeni ngoi e yeke na akite. Me tongana ti so e bâ fade, Bible apeut ti aidé e ti hon ndö ni. Sara kue ti hon ndö ti akite ti mo tongaso si mo découragé ape me mo duti na nzoni bango ndo na ndö ti mo wani. Jéhovah ahinga mo nzoni. Lo bâ na nene ni asacrifice so mo sara nga lo yeke futa mo ndali ni. Hinga biani so Jéhovah andoye awakua ti lo kue so ayeke be-ta-zo nga lo pensé na ala.