AZO ti Israël aye lani mozoko mingi. Fani mingi, Bible asara tënë ti azo so ayeke pika aye ti pikango mozoko nga ala yeke he bia. Kota mbage ti Bible ayeke abia. Na tapande, mbeti ti Psaume, Bia ti Salomon nga na Toto ti Jérémie ayeke abia. Mbeni buku na ndö ti gigi ti azo so Bible asara tënë ti ala atene so Bible afa polele so azo ti Israël ayeke he bia na ngoi ti akua nde nde so ala yeke sara.

Mozoko na yâ ti gigi ti lâ oko oko. Azo ti Israël ayeke pika lani mozoko nga ala yeke he bia ti fa atënë ti bê ti ala (És. 30:29). Awali ayeke pika lani atambourin, ala yeke he bia na ngia nga ala yeke dodo na ngoi ti amatanga, na tapande na ngoi so a soro mbeni fini gbia, na ngoi so aturugu asö benda na yâ ti bira nga na ngoi ti amatanga ti vorongo Jéhovah (aJu. 11:34; 1 Sam. 18:​6, 7; 1 aGbia 1:​39, 40). Azo ti Israël ayeke he nga lani abia ti vundu ti fa vundu ti bê ti ala na ngoi so mbeni zo akui (2 Chron. 35:25). A yeke polele so azo ti Israël aye lani mozoko mingi.

Agbia ti Israël aye lani mozoko mingi. Terê ti agbia ti Israël ayeke nzere tongana ala yeke mä bia. Gbia Saül airi lani David na yangbo ti lo ti pika mozoko na lo (1 Sam. 16:​18, 23). Na ngoi so David aga gbia, lo leke aye ti pikango mozoko, lo sû apendere bia nga lo leke yâ ti azo ti pikango mozoko nga ti hengo bia so na pekoni ala pika mozoko nga ahe bia na temple ti Jéhovah (2 Chron. 7:6; Amos 6:5). Gbia Salomon ayeke lani na azo ti hengo bia ti koli na ti wali na yangbo ti lo.—Zo-ti. 2:8.

Azo ti Israël ayeke pika lani mozoko ti voro na Jéhovah. Ti vrai ni, akoli 4000 ayeke pika lani aye ti pikango mozoko na temple na Jérusalem (1 Chron. 23:5). Ala pika lani acymbale, atrompette, aharpe nga na ambeni ye ti pikango mozoko so ayeke na kamba (2 Chron. 5:12). Me a yeke gï azo so ayeke na kode ti pikango mozoko la ayeke voro Jéhovah na lege ti mozoko ape. Azo ti Israël mingi ayeke he lani Abia ti azo so ayeke monté na ngoi so ala yeke gue na Jérusalem ti sara amatanga ti ngu oko oko (Ps. 120-134). Ti gue oko na ambeti ti aJuif, azo ti Israël ayeke he lani aPsaume ti Hallel a na ngoi so ala yeke te kobe ti Pâque.

Laso, mozoko angbâ lakue kota ye mingi na lê ti awakua ti Jéhovah (Jacq. 5:13). Hengo bia ayeke mbage ti vorongo ti e (aÉph. 5:19). Hengo bia asara si e yeke beoko na amba ti e Chrétien (aCol. 3:16). Nga, mozoko ayeke kpengba e na ngoi so e yeke na yâ ti akpale (Kus. 16:25). Hengo bia ayeke mbeni pendere lege ti fa na Jéhovah so e yeke na mabe na lo nga e ye lo.