1-2. Nyen la asara si awakua ti Nzapa ayeke na ngia? (Jacques 1:​22-25).

 JÉHOVAH na Molenge ti lo so lo ye lo mingi aye ti tene e duti na ngia. Zo ti sungo Psaume 119:2 atene: “Ngia ayeke na azo so asara ye alingbi na awango ti lo na so ayeke gi lo na bê ti ala kue.” Jésus atene: “Ngia ayeke na ala so amä tënë ti Nzapa na abata ni!”—Luc 11:28.

² So e yeke awakua ti Jéhovah, e yeke azo so ayeke na ngia. Ngbanga ti nyen? E yeke na araison mingi, me mbeni so ayeke kota ayeke so e yeke diko Bible lakue nga e yeke gi ti sara ye alingbi na ye so e manda.—Diko Jacques 1:​22-25.

3. Tongana e sara ye alingbi na ye so e diko na yâ ti Bible, e yeke bâ nzoni dä tongana nyen?

³ Tongana e “ga azo so ayeke sara ye alingbi na tënë ni,” e yeke bâ nzoni na alege mingi. Na tapande, tongana e sara ye alingbi na ye so e manda na yâ ti Bible, e yeke zia ngia na bê ti Jéhovah na asara si e kue e yeke na ngia (Zo-ti. 12:13). Tongana e sara ye alingbi na wango ti Bible, songo ti e na azo ti sewa ti e nga na aita ti congrégation ayeke kpengba. Peut-être mo bâ so tënë so ayeke tâ tënë na yâ ti fini ti mo. Na ndö ni, e yeke wara pëpe akpale so azo so amä yanga ti Jéhovah ape ayeke wara. A yeke tënë so Gbia David atene. Na peko ti so na yâ ti bia David asara tënë ti andia ti Jéhovah, yanga so lo mû na ndö ti aye nde nde nga na angbanga so lo fâ, lo tene: “Zo so abata aye so ayeke wara futa mingi.”—Ps. 19:​7-11.

4. Ngbanga ti nyen la a yeke lakue kete ye ape ti ga zo so ayeke sara ye alingbi na ye so lo diko na yâ ti Bible?

 ⁴ Ti tâ tënë ni, a yeke lakue kete ye ape ti ga zo so ayeke sara ye alingbi na ye so lo diko na yâ ti Bible. Atâa so e yeke na aye mingi ti sara, e bezoin ti mû ngoi ti diko Bible nga ti manda ni tongaso si e comprendre ye so Jéhovah aye ti tene e sara. Tongaso, zia e bâ ambeni wango so apeut ti aidé e ti diko Bible lakue. E yeke bâ nga aye so ayeke aidé e ti gbu li na ndö ti ye so e diko nga ti bâ na yâ ti aye wa la e peut ti sara ye alingbi na ni.

ZIA NGOI NDE TI DIKO BIBLE

5. Akua wa la ayeke mû ngoi ti e mingi?

⁵ Mingi ti awakua ti Jéhovah ayeke na aye mingi ti sara. E yeke mû ngoi ti e mingi ti sara aye so Bible afa so ayeke kota ye na e. Na tapande, mingi ti e ayeke sara kua ti nginza ti bâ lege ti e wani nga na azo ti sewa ti e (1 Tim. 5:8). A-Chrétien mingi ayeke bâ lege ti afami ti ala so terê ti ala ason wala so aga mbakoro. Nga e kue e bezoin ti bâ lege ti seni ti e, ye so ayeke mû ngoi. E yeke nga na akota kua ti sara na yâ ti congrégation. Mbeni kota kua so e yeke na ni ayeke ti yapu ti fa tënë. So mo yeke na aye so kue ti sara, tongana nyen la mo peut ti wara ngoi ti diko Bible lakue, ti gbu li na ndö ti ye so mo diko nga ti sara ye alingbi na ni?

6. Tongana nyen la mo peut ti sara si dikongo Bible aga mbeni ye so mo yeke sara kozo? (Bâ nga foto.)

⁶ Dikongo Bible ayeke na popo ti “aye so ayeke akota ye mingi ahon atanga ni” na e aChrétien, tongaso e yeke sara si a ga mbeni ye so e yeke sara kozo (aPhil. 1:10). Kozo chapitre ti psaume atene na ndö ti zo so ayeke na ngia, atene: “Ngia ti lo ayeke na yâ ti ndia ti Jéhovah, na lo diko ndia ni na gbe ti go bï na lâ.” (Ps. 1:​1, 2). Ye so afa polele so e doit ti zia mbeni ngoi nde ti diko Bible. Ngoi wa la ayeke nzoni ti diko Bible? Kiringo tënë ti e apeut ti duti nde nde. Ye so ayeke kota ye ayeke ti tene e zia mbeni ngoi nde so e leke so e peut ti diko na Bible lakue. Mbeni ita-koli so iri ti lo Victor atene: “Mbi ye ti diko Bible na ndapre. Atâa so mbi ye ti zingo hio na ndapre ape, aye ti  gbotongo lê ti zo ayeke mingi na ngoi ni so ape. Aye ayeke mingi na yâ ti li ti mbi ape nga a yeke ngangu na mbi ape ti zia li ti mbi na ndö ti ye so mbi diko.” Peut-être ti mo ayeke nga tongaso. Hunda terê ti mo: ‘Ngoi wa la ayeke nzoni na mbi ti diko Bible?’

GBU LI NA NDÖ TI YE SO MO DIKO

7-8. Nyen la apeut ti sara si e bâ nzoni kue ape na lege ti ye so e diko? Fa mbeni tapande ni.

⁷ Me ti tâ tënë ni, e peut lakue ti diko gbâ ti aye sân ti bata ni. Eskê a si na mo awe ti diko mbeni ye na kete na pekoni mo dabe ti mo ape na ye so mo diko? E kue a si na e awe. Mawa ni ayeke so a peut ti si na e tongaso na ngoi so e diko Bible. Peut-être e zia na gbele e ti diko ambeni mbilimbili wungo ti achapitre ti Bible lâ oko oko. So ayeke nzoni. A yeke nzoni e gi ti sara ambeni ye na e sara kue ti sara ni (1 aCor. 9:26). Ye oko, e doit ti sara ye mingi ahon gï ti diko Bible tongana e ye ti wara ye ti nzoni mingi dä.

⁸ Gbu li na ndö ti hakango ye so: Akeke abezoin ngu si ala ngbâ na fini. Me tongana, na yâ ti kete ngoi ngu-nzapa apika mingi, sese ayeke ga popoto. Tongana ngu akiri apika mingi, a yeke lï sese ape na akeke ayeke bâ nzoni dä ape. Me tongana ngu apika yeke, a yeke lï sese na ayeke aidé akeke ti kono. Legeoko nga, a yeke nzoni e diko Bible na loro loro ape, so ti tene, e diko Bible hio hio si na pekoni e wara lege ape ti gbu li na ndö ni, ti dabe ti e na ye so e diko nga ti sara ye alingbi na ni.—Jacq. 1:24.

9. Nyen la a yeke nzoni e sara tongana e yeke diko ka Bible na loro loro?

⁹ Eskê mo bâ so na ambeni ngoi mo yeke diko Bible na loro loro? Tongana a yeke tongaso, nyen la a yeke nzoni mo sara? Gue na ni yeke. Sara effort ti gbu li ti mo na ndö ti ye so mo yeke diko wala ye so mo londo ti diko. A doit ti duti mbeni kpale na mo ape. Mo peut ti leke ti mû ngoi mingi ti manda ye tongaso si mo peut ti gbu li. Wala mo peut ti soro ti diko aversê mingi ape na mo mû ngoi so angbâ ti gbu li na ndö ti ye so mo diko. Victor, so e sara tënë ti lo fade, atene: “Mbi yeke diko aversê ti Bible mingi ape, peut-être  mbi yeke diko gï chapitre oko. So mbi diko ni hio na ndapre, mbi yeke ngbâ ti gbu li na ndö ni na yâ ti lango ni kue.” Atâa aversê oke la mo soro ti diko, a yeke kota ye ti diko ni na mbeni loro so ayeke mû lege na mo ti wara ye ti nzoni mingi na lege ti ye so mo diko.—Ps. 119:97; bâ encadré “ Ahunda ti gbu li na ndö ni.”

10. Fa na lege ti mbeni tapande tongana nyen la mo peut ti sara ye alingbi na ye so mo manda. (1 aThessalonicien 5:​17, 18).

¹⁰ Atâa ngoi wa la mo diko Bible wala ngoi oke la mo yeke diko ni, sara kue ti bâ tongana nyen la mo peut ti sara ye alingbi na ye so mo diko. Na ngoi so mo yeke diko mbeni mbage ti Bible, hunda terê ti mo: ‘Tongana nyen la mbi peut ti sara ye alingbi na ni laso wala na yâ ti ngoi so ayeke ga?’ Na tapande, bâ so mo diko 1 aThessalonicien 5:​17, 18. (Diko ni.) Na peko ti so mo diko aversê use so awe, mo peut ti luti na ti gbu li ti bâ fani oke la mo yeke sambela nga asambela ti mo ayeke tongana nyen. Nga, mo peut ti gbu li na ndö ti aye so mo kiri singila ndali ni. Peut-être mo leke na bê ti mo ti kiri singila na Jéhovah ndali ti ambilimbili ye ota. Même tongana mo mû apenze-ngbonga kete ti gbu li nzoni, a yeke aidé mo ti ga zo so amä tënë ni nga asara ye alingbi ni. Gbu li ti bâ tongana nyen la mo yeke wara ye ti nzoni tongana lâ oko oko mo sara tongaso na ambage ti Bible so mo diko. Biani, mo yeke ga zo so asara ye alingbi na wango ti Bible mingi ahon ti kozo. Ka tongana, na bango ni, aye ayeke mingi so mo doit ti gi ti sara ni?

GI TI SARA ACHANGEMENT YEKE YEKE

11. Ngbanga ti nyen la na ambeni ngoi mo peut ti découragé? Mû mbeni tapande ti fa ni.

¹¹ Na ngoi so mo diko Bible, mo peut ti découragé na ambeni ngoi tongana mo bâ so mo doit ti sara achangement na yâ ti aye mingi. Na tapande, bâ so mbeni lâ na yâ ti dikongo Bible, Bible awa mo ti bâ yâ ti azo bango si mo sara ye na ala ape (Jacq. 2:​1-8). Peut-être mo bâ so mo doit ti changé fason so mo yeke sara na ye na azo. So ayeke nzoni. Na ndade ni mo diko ambeni versê so afa so a yeke kota ye ti sara hange na atënë ti yanga ti mo (Jacq. 3:​1-12). Mo bâ so na ambeni ngoi atënë ti yanga ti mo adécouragé azo. Tongaso, mo leke na bê ti mo ti tene atënë so akpengba zo. Na lango ti peko, aversê so mo diko agboto mê ti mo na ndö ti sarango kamarade na dunia so (Jacq. 4:​4-12). Mo bâ so mo bezoin ti sara hange mingi na angia so mo soro ti sara. Ti si na osio lango ni, mo peut ti bâ so a yeke ngangu mingi ti sara achangement so kue.

12. Ngbanga ti nyen la a yeke nzoni mo découragé ape tongana mo bâ so mo bezoin ti sara achangement na ngoi so mo diko Bible? (Bâ nga kete tënë na gbe ni.)

 ¹² Tongana mo bezoin ti sara achangement mingi, découragé ape. Ye so afa so mo sara terê ti mo kete nga mo yeke na nzoni bibe. Mbeni zo so asara terê ti lo kete nga so ahinga lo wani nzoni, na ngoi so lo diko Bible lo yeke gi ti bâ aye so lo bezoin ti changé. a Girisa ape so ti yü “fini zo” ayeke mbeni ye so zo ayeke ngbâ ti sara (aCol. 3:10). Nyen la ayeke aidé mo ti ngbâ ti duti zo so asara ye alingbi na tënë ni?

13. Nzoni lege ti sara ye alingbi na ye so mo manda ayeke so wa? (Bâ nga foto.)

¹³ Ahon ti gi ti sara ye alingbi na ye kue so mo manda na oko ngoi, mo peut ti gi ti sara ye alingbi na ye oko wala use (aProv. 11:2). Tara ye so: Sara molongo ti aye so mo doit ti sara changement dä, na pekoni soro ye oko wala use so mo ye ti changé ni na zia atanga ni teti angoi so ayeke ga. A yeke nzoni mo komanse na ndo wa?

14. Aye wa la mo peut ti gi ti changé ni kozo?

¹⁴ Mo peut ti komanse na ye so a yeke ngangu na mo ape ti sara ni. Wala mo peut ti soro ti changé ye so mo bâ so a yeke ngangu na mo mingi ti changé ni. Tongana mo hinga ye so mo doit ti changé awe, sara recherche na yâ ti ambeti ti e, na tapande Index des publications des Témoins de Jéhovah wala Mbeti ti sarango na recherche ndali ti aTémoin ti Jéhovah. Sambela ndali ni, hunda na Jéhovah ti mû na mo “nzara ti sara ye nga na ngangu ti sara ye ni so.” (aPhil. 2:13). Na pekoni, sara ye alingbi na ye so mo manda. Tongana mo changé kozo ye so mo ye ti changé awe, peut-être a yeke pusu mo ti gi ti  sara mbeni changement nde. Tongana mo bâ so mo sara mbeni changement awe, mo yeke bâ so mo peut ti ngbâ ti sara achangement. Na a yeke duti ngangu na mo ape ti sara ni.

ZIA SI TËNË TI NZAPA ‘ASARA KUA NA YÂ TI BÊ TI MO’

15. Tongana nyen la awakua ti Jéhovah ayeke nde na azo mingi so ayeke diko Bible? (1 aThessalonicien 2:13).

¹⁵ Ambeni zo atene so ala diko Bible fani mingi. Me eskê ala mä na bê biani na atënë so Bible atene? Eskê ala yeke sara ye alingbi na ni wala ala zia si achangé gigi ti ala? Mawa ni ayeke so mingi ni kiringo tënë ni ayeke ên-ën. Me ti awakua ti Jéhovah ayeke ti lo nde. Tongana ti akozo Chrétien, e bâ Bible “tongana tënë ti Nzapa, na a yeke tënë ti lo biani”. Na ndö ni, e yeke sara kue ti sara ye alingbi na awango ti Bible.—Diko 1 aThessalonicien 2:13.

16. Nyen la apeut ti aidé e ti ga azo so asara ye alingbi na tënë ni?

¹⁶ A yeke lakue kete ye ape ti diko Bible nga ti sara ye alingbi na ni. A peut ti duti ngangu na e ti wara ngoi ti diko ni. Wala e peut ti diko ni na loro mingi na e gbu li na ndö ti ye so e diko ape. Wala e peut ti bâ so achangement so e doit ti sara ayeke mingi. Atâa kpale ti mo ni ayeke so wa, mo peut ti hon ndö ni. Jéhovah apeut ti aidé mo ti hon ndö ni. Zia e leke na bê ti e ti yeda na mungo maboko ti lo na ti ga pëpe azo so ayeke mä gï tënë ni na mê na ala girisa ni, me e ga azo so ayeke sara ye alingbi na ni. Kite ayeke dä ape so tongana e diko Bible mingi nga e sara ye alingbi na ni, e yeke duti na ngia mingi.—Jacq. 1:25.