1. Ngbanga wa la a ga nduru ti fâ ni awe?

 AKOTA changement ayeke si ande na ngoi ti e. Fafadeso, Jésus ayeke fâ ngbanga na ndö ti azo kue so ayeke na fini. Jésus afa na e aye so ayeke si na yâ ti dunia kozo si lo fâ ngbanga. Jésus afa na adisciple ti lo “fä” ti ngoi so lo yeke duti dä me so azo ayeke bâ lo ape nga ti “ngoi so aye ti ngoi so ayeke gue ti hunzi”. (Mat. 24:3). Matthieu chapitre 24 na 25, Marc chapitre 13 nga na Luc chapitre 21 asara tënë ti fä so.

2. Nyen la e yeke bâ na yâ ti article so? Ngbanga ti nyen la a yeke aidé e?

² Jésus atene atoli ota so na yâ ni lo gboto mê ti e ti aidé e ti leke terê ti e. A yeke toli ti ataba na angasa, ti amaseka-wali so ade ti hinga koli ape so asara ye na ndara nga na ala ti buba nga na toli ti atalent. Atoli so kue afa na e so Jésus ayeke fâ ngbanga ti mbeni zo alingbi na sarango ye ti lo. Na ngoi so e yeke bâ atoli so, zia e bâ aye so e peut ti manda dä nga tongana nyen la e peut ti sara ye alingbi na ni. Kozo toli so e yeke sara tënë na ndö ni ayeke ti ataba na angasa.

ATABA NA ANGASA

3. Lawa la Jésus ayeke fâ ande ngbanga ti azo?

³ Na yâ ti toli ti ataba na angasa, Jésus afa so lo yeke fâ ngbanga ti azo alingbi na sarango ye ti ala na peko ti so a fa nzoni tënë na ala nga alingbi na aye so ala sara ti mû maboko  na aita ti lo (Mat. 25:​31-46). Na ngoi ti “kota ye ti vundu”, lo yeke fâ ande ngbanga so kete kozo si Harmaguédon akomanse (Mat. 24:21). Tongana ti so mbeni berger ayeke kangbi popo ti ataba na angasa, Jésus ayeke kangbi ande popo ti azo so amû maboko na adisciple ti lo so a soro ala ti gue na yayu na ala so asara ni ape.

4. Ti gue oko na Ésaïe 11:​3, 4, ngbanga ti nyen la e peut ti hinga biani so Jésus ayeke fâ ande ngbanga ti azo na lege ni? (Bâ nga ti couverture.)

⁴ Bible atene so na ngoi so Jésus ayeke sara kua ti Juge so Jéhovah amû na lo, lo yeke fâ ande ngbanga ti azo lakue na lege ni. (Diko Ésaïe 11:​3, 4.) Aye so Jésus ayeke gi ti bâ ni nzoni ayeke sarango ye ti azo, bango ndo ti ala, atënë so ala tene nga na sarango ye ti ala na mbage ti aita ti lo (Mat. 12:​36, 37; 25:40). Jésus ayeke hinga ande azo wa la amû lani maboko na aita ti lo nga na kua ti ala. a Mbeni kota ye so azo so ayeke tongana ataba ayeke sara ti mû maboko na aita ti Christ ayeke ti mû maboko na ala na kua ti fango tënë. Azo so asara ni lo yeke bâ ala tongana “azo ti mbilimbili” nga ala yeke na beku ti wara ande “fini ti lakue lakue” na ndö ti sese (Mat. 25:46; Apoc. 7:​16, 17). So ayeke mbeni pendere futa. Tongana ala ngbâ be-ta-zo na ngoi ti kota ye ti vundu nga na pekoni, iri ti ala ayeke ngbâ na yâ ti “mbeti ti fini”.—Apoc. 20:15.

5. Toli ti ataba na angasa awa e ti sara nyen? Azo wa la adoit ti sara ni?

⁵ Fa so mo yeke be-ta-zo. Toli ti Jésus na ndö ti ataba na angasa abâ mbilimbili azo so ayeke na beku ti wara fini na ndö ti sese. Ala fa so ala yeke na mabe na Christ na lege so ala mû maboko na aita ti lo na kua ti fango tënë nga ala yeda na fango lege ti kete groupe ti aita-koli so a soro ala ti gue na yayu so Jésus asoro ala (Mat. 24:45). Me azo so a soro ala ti gue na yayu adoit nga ti mä awango ti gbotongo mê so ayeke na yâ ti toli so. Ngbanga ti nyen? Ngbanga ti so Jésus ayeke bâ sarango ye ti ala, bango ndo ti ala nga lo yeke mä atënë so ala tene. Ala nga kue adoit ti duti be-ta-zo. Ti vrai ni, Jésus atene ambeni toli ni use so awango ti yâ ni abâ mbilimbili azo so a soro ala ti gue na yayu. Atoli ni so ayeke na Matthieu chapitre 25. Zia e sara tënë na ndö ti toli ti amaseka-wali so asara ye na ndara nga na ala ti buba.

AMASEKA-WALI SO ASARA YE NA NDARA NGA NA ALA TI BUBA

6. Tongana nyen la amaseka-wali oku so ade ti hinga koli ape afa so ala sara ye na ndara? (Matthieu 25:​6-10).

⁶ Na yâ ti toli ti amaseka-wali so ade ti hinga koli ape, Jésus asara tënë ti amaseka-wali bale-oko so ala gue ti tingbi na mbeni koli so ayeke mû wali fini fini (Mat. 25:​1-4). Ala kue aye ti gue ti zia koli ni na matanga ti mariage ti lo. Jésus afa so oku ayeke azo ti “ndara” nga oku ayeke azo ti “buba”. Amaseka-wali so asara ye na ndara aleke terê ti ala nga lê ti ala akpengba. Ala yeke lani nduru ti ku koli ni aninga même tongana lo si na bê ti bï. Tongaso, ala ga na alampe ti ala so mafuta ayeke dä ti bâ na ndo na bï. Ala ga même na mbeni mafuta hinga ape koli ni asi hio ape. Tongaso, ala leke terê ti ala ti tene lampe ti ala angbâ ti za. (Diko Matthieu 25:​6-10.) Na ngoi so koli ni asi, lo na amaseka-wali so asara ye na ndara ague na matanga ni. Legeoko nga, aChrétien so a soro ala ti gue na yayu afa so ala leke terê ti ala awe na lege so lê ti ala akpengba nga ala ngbâ be-ta-zo juska na ngoi so Christ aga. A yeke  bâ so ala lingbi ti duti na terê ti Jésus, so ayeke Koli so amû wali fini fini, na yâ ti Royaume ti lo na yayu (Apoc. 7:​1-3). b Ka ti amaseka-wali oku ti buba so?

7. Nyen la asi lani na amaseka-wali oku ti buba? Ngbanga ti nyen?

⁷ Nde na amaseka-wali ti ndara so, amaseka-wali oku ti buba ni aleke terê ti ala ape na ngoi so koli so aye ti mû wali fini fini asi. Lampe ti ala ayeke gue ti mingo nga ala ga na mafuta ape. Na ngoi so ala mä so koli ni ayeke si fafadeso, ala doit ti gue ti vo mafuta. Ade ala kiri ape na ngoi so koli ni asi. Na ngoi ni so, “amaseka so aleke terê ti ala awe alï legeoko na lo na matanga ti mariage ni, na a kanga yanga-da ni na peko ti ala.” (Mat. 25:10). Na pekoni, na ngoi so amaseka-wali ti buba so akiri na ala ye ti lï, koli ni atene na ala: “Mbi hinga ala pëpe.” (Mat. 25:​11, 12). Amaseka-wali so aleke terê ti ala ti ku koli ni ape juska lo ga. Nyen la aChrétien so a soro ala ti gue na yayu amanda dä?

8-9. Nyen la aChrétien so a soro ala ti gue na yayu apeut ti manda na lege ti toli ti amaseka so ade ahinga koli ape? (Bâ nga foto.)

⁸ Leke terê ti mo nga zia lê ti mo akpengba. Jésus atene ape so groupe ti aChrétien so a soro ala ti gue na yayu ayeke use: oko so aleke terê ti lo ti ku juska na hunzingo ti aye ti ngoi so nga oko so aleke terê ti lo ape. Me lo fa ye so ayeke si na aChrétien so a soro ala ti gue na yayu tongana ala leke terê ti ala ape ti gbu ngangu juska na nda ni. Tongana ala leke terê ti ala ape, ala yeke wara futa ti ala ape (Jean 14:​3, 4). So ayeke kota tënë mingi. Atâa beku ti e ayeke ti wara fini na yayu wala na ndö ti sese, a yeke nzoni e kue e dengi mê na tënë ti gbotongo mê so ayeke na yâ ti toli ti amaseka-wali so. E kue e doit ti lango pëpe nga ti leke terê ti e, e duti nduru ti gbu ngangu juska na nda ni.—Mat. 24:13.

⁹ Na peko ti so Jésus atene toli ti amaseka-wali  so ti fa ndani so a yeke kota ye ti leke terê ti e nga ti tene lê ti e akpengba, lo tene toli ti atalent. Toli ni agboto lê mingi na ndö ti sarango kua ngangu.

ATALENT

10. Tongana nyen la angbâa use afa so ala yeke be-ta-zo? (Matthieu 25:​19-23).

¹⁰ Na yâ ti toli ti atalent, Jésus asara tënë ti angbâa ota, use ayeke be-ta-zo na wa ti ala na oko ayeke be-ta-zo ape (Mat. 25:​14-18). Angbâa use so afa so ala yeke be-ta-zo na lege so ala sara kua ngangu na ala wara nginza na ndö ti nginza so wa ti ala amû na ala. Kozo ti tene wa ti ala avoyagé, lo mû na ala atalent: mbeni kota wungo ti nginza. Angbâa use so ayeke be-ta-zo so asara kua ngangu na ala sara kua na nginza ni na ndara. Ye ti peko ni ayeke nyen? Na ngoi so wa ti ala akiri, ala wara wungo ti nginza so wa ti ala amû na ala fani use. Wa ti ala agonda ala, na ala ‘duti na ngia legeoko na wa ti ala.’ (Diko Matthieu 25:​19-23.) Ka ti ota ngbâa ni? Nyen la lo sara na nginza so wa ti lo amû na lo?

11. Nyen la asi na ngbâa so ayeke “zo ti goigoi”? Ngbanga ti nyen?

¹¹ Ota ngbâa ni awara lani talent oko, me lo yeke “zo ti goigoi”. Wa ti lo ayeke ku lani ti tene lo sara kua na talent ni na ndara. Me lo lu ni na gbe ti sese. Na ngoi so wa ti lo akiri, ngbâa so akiri na lo gï talent oko. Ngbâa so ayeke lani na nzoni bango ndo ape. Me ahon ti tene lo hunda pardon na wa ti lo ndali ti so lo wara mbeni ye na ndö ti talent ni ape, lo tene tënë ti kirikiri na ndö ti wa ti lo, lo iri lo ‘zo so ason mingi ndali ti aye ti lo’. Bê ti wa ti lo ason na terê ti lo. Na ndö ni, a zi talent ni na maboko ti lo nga a tomba lo na yâ ti da ti wa ti lo.—Mat. 25:​24, 26-30.

12. Angbâa use so ayeke be-ta-zo aye ti sara tënë ti azo wa laso?

¹² Angbâa use so ayeke be-ta-zo aye ti sara tënë ti aChrétien so a soro ala ti gue na yayu so ayeke be-ta-zo. Wa ti ala Jésus atisa ala ti ‘ga, ti duti na ngia legeoko na lo.’ Ala wara futa ti ala ti yayu na lege ti kozo zingongo ti akuâ (Mat. 25:​21, 23; Apoc. 20:5b). Na mbage, sioni tapande ti ngbâa so ayeke zo ti  goigoi agboto mê ti azo so a soro ala ti gue na yayu. Na lege wa?

13-14. Nyen la azo so a soro ala ti gue na yayu amanda na lege ti toli ti atalent? (Bâ nga foto.)

¹³ Sara kua ngangu. Na yâ ti toli ti atalent nga na ti amaseka so ade ti hinga koli ape, Jésus atene ape so azo so a soro ala ti gue na yayu ayeke ga azo ti goigoi. Me lo yeke fa lani ye so ayeke si tongana ala yapu encore ape. Tongana a si tongaso, ‘iringo so a iri na ala nga sorongo so a soro na ala ayeke duti tâ ye biani’ pëpe nga a yeke mû lege na ala pëpe ti lï na yâ ti Royaume ti yayu.—2 Pi. 1:10.

¹⁴ Toli ti Jésus na ndö ti amaseka so ade ti hinga koli ape nga na ti atalent afa polele so aChrétien kue so a soro ala ti gue na yayu adoit ti leke terê ti ala, lê ti ala akpengba nga ala sara kua ngangu. Me, eskê Jésus atene mbeni tënë nde ti gboto mê ti aChrétien so? En, lo tene ni. E peut ti wara tënë ti lo ni na Matthieu 24:​40, 41.

ZO WA LA A YEKE ‘MÛ LO A HON NA LO’?

15-16. Tongana nyen la Matthieu 24:​40, 41 afa so lê ti azo so a soro ala ti gue na yayu adoit ti kpengba?

¹⁵ Kozo ti tene Jésus atene atoli ota so, lo fa ndangba ngbanga so a yeke fâ na ndö ti azo so a soro ala ti gue na yayu so ayeke fa azo wa la azia ngia na bê ti Nzapa. Lo sara tënë ti akoli use so ayeke sara kua na yaka nga na awali use so ayeke neka ye na tênë. Na bango ni, akoli use so ayeke sara oko kua na awali ni nga kue, me Jésus atene a yeke “mû oko a hon na lo, na a dö oko ni a zia.” (Diko Matthieu 24:​40, 41.) Na pekoni, lo wa adisciple ti lo, lo tene: “Ala lango pëpe, ngbanga ti so ala hinga pëpe lango so Seigneur ti ala ayeke ga na ni.” (Mat. 24:42). Jésus atene lani mara tënë so na peko ti so lo tene toli ti amaseka so ade ti hinga koli ape (Mat. 25:13). Eskê atënë ni so ague oko na mba? Na bango ni, a yeke tongaso. A yeke gï azo so a soro ala biani ti gue na yayu nga so ayeke be-ta-zo la Jésus ayeke “mû” ala ti gue na ala na yâ ti Royaume ti yayu.—Jean 14:3.

¹⁶ Fa so lê ti mo akpengba. Azo kue so a soro ala ti gue na yayu so lê ti ala akpengba ape, a yeke bungbi ande ala oko ape na ‘azo so a soro ala’. (Mat. 24:31). Nga azo kue so ayeke na beku ti ngbâ na fini lakue lakue na ndö ti sese, a yeke nzoni lê ti ala akpengba nga ala ngbâ be-ta-zo.

17. Ngbanga ti nyen la a yeke nzoni e gi bê ti e ape tongana Jéhovah asoro ambeni zo ti gue na yayu na ngoi ti e?

¹⁷ E hinga Jéhovah nzoni, tongaso e yeke na confiance so ye kue so lo yeke sara ayeke na lege ni. E yeke gi bê ti e ape tongana Jéhovah asoro ambeni zo so ayeke be-ta-zo ti gue na yayu na ngoi ti e. c E dabe ti e na tënë so Jésus atene na ndö ti azo so a mû ala na kua nduru na ngbonga 11 na yâ ti tapande ti lo na ndö ti yaka ti vigne (Mat. 20:​1-16). Azo so a mû ala na kua hio ape na yâ ti lango ni so awara oko futa so azo so a mû ala na kua hio awara. Legeoko nga, azo so a soro ala ti gue na yayu ayeke wara futa ti ala na yayu tongana ala ngbâ be-ta-zo, atâa a soro ala na ngoi wa.

SARA YE ALINGBI NA ATËNË TI GBOTONGO MÊ

18-19. Nyen la e manda na lege ti atoli so?

¹⁸ Nyen la e bâ ni fade? Ti azo so ayeke na beku ti ngbâ na fini na ndö ti sese, toli ti ataba na angasa afa so ala bezoin ti ngbâ be-ta-zo na Jéhovah na ndembe so nga na ngoi ti kota ye ti vundu so ayeke ga. Na ngoi ni so,  Jésus ayeke bâ ande so azo so ayeke be-ta-zo alingbi ti “wara fini ti lakue lakue.”—Mat. 25:46.

¹⁹ E bâ nga atoli use so atënë ti yâ ni agboto mê ti azo so a soro ala ti gue na yayu. Na yâ ti toli ti Jésus na ndö ti amaseka so ade ti hinga koli ape so asara ye na ndara nga na ala ti buba, oku afa so ala yeke na ndara. Ala leke terê ti ala, lê ti ala akpengba nga ala yeke nduru ti ku juska koli so aye ti mû wali fini fini asi. Me amaseka ti buba ni aleke terê ti ala ape. Tongaso, koli ni amû lege na ala ape ti lï na yâ ti matanga ti mariage ni. E nga kue e doit ti leke terê ti e ti ku, atâa aninga ngoi oke, juska Jésus aga afuti aye ti ngoi so. Nga, na yâ ti toli ti Jésus na ndö ti atalent, e bâ so angbâa use so ayeke be-ta-zo asara kua ngangu. Ala sara kua ngangu ndali ti wa ti ala na ala zia ngia na bê ti lo. Me, a tomba ngbâa so ayeke zo ti goigoi. Nyen la e manda dä? E doit ti ngbâ ti sara kua ti Jéhovah mingi laso juska na nda ni. Na nda ni, e bâ so azo so a soro ala ti gue na yayu, lê ti ala adoit ti kpengba tongaso si Jésus ‘amû’ ala ti gue ti wara futa ti ala na yayu. Ala yeke ku kungo ti tene a ‘bungbi’ ala na Jésus na yayu. Na peko ti bira ti Harmaguédon, ala yeke duti wali ti Jésus na yâ ti mariage ti Molenge ti taba ni.—2 aThes. 2:1; Apoc. 19:9.

20. Nyen la Jéhovah ayeke sara ande na azo so asara ye alingbi na atënë ti lo ti gbotongo mê?

²⁰ Atâa so ngoi ti fango ngbanga ayeke pusu nduru nduru, e yeke na raison ti sara mbeto ape. Tongana e ngbâ be-ta-zo, Babâ ti e ti yayu so aye e ayeke mû na e “ngangu so ahon ti so zo ayeke na ni” tongaso si e “wara lege ti . . . luti na gbele Molenge ti zo.” (2 aCor. 4:7; Luc 21:36). Atâa beku ti e ayeke ti wara fini na yayu wala na sese, e yeke zia ngia na bê ti Babâ ti e tongana e sara ye alingbi na atënë ti gbotongo mê so ayeke na yâ ti atoli ti Jésus. Grâce na kota nzobe ti Jéhovah, lo yeke ‘sara iri ti e na mbeti’ ti fini.—Dan. 12:1; Apoc. 3:5.