1-2. So Jéhovah acréé e ti bâ so e yeke na ngia tongana e mû ye na zo, a aidé e tongana nyen?

 NA NGOI so Jéhovah acréé lani azo, lo leke ala na mbeni fason ti tene ala wara ngia mingi tongana ala sara nzoni na zo ahon ti wara ye na tîtï zo (Kus. 20:35). Eskê so aye ti tene so e yeke duti na ngia ape tongana mbeni zo amû ye na e? Ên-ën. E kue e yeke na ngia tongana a mû na e mbeni cadeau. Me e yeke duti na ngia mingi tongana e mû ye na zo. A yeke nzoni so Jéhovah acréé e tongaso. Ngbanga ti nyen?

² So Jéhovah acréé e tongaso, e wani e peut ti gi ti duti na ngia mingi. E peut ti gi ti duti na ngia mingi tongana e gi ambeni lege ti mû ye na azo. A yeke pendere mingi so Jéhovah asara e tongaso.—Ps. 139:14.

3. Ngbanga ti nyen la Bible atene Jéhovah ayeke “Nzapa so ayeke na ngia”?

³ So Bible atene azo so amû ye na azo ayeke na ngia, a yeke ngangu ape ti comprendre ndani so Bible atene Jéhovah ayeke “Nzapa so ayeke na ngia”. (1 Tim. 1:11). Lo la lo yeke kozo zo so amû ye na azo na mbeni zo so amû ye na azo mingi ahon lo ayeke dä ape. Tongana ti so bazengele Paul atene, ndali ti lo la “e yeke na fini, e yeke tambela na e yeke dä”. (Kus. 17:28). Ti vrai ni, “nzoni matabisi kue nga na matabisi kue so ayeke mbilimbili-kue” alondo na Jéhovah.—Jacq. 1:17.

4. Nyen la ayeke sara si e duti na ngia mingi?

⁴ Peut-être e kue e ye ti wara mingi ngia so zo ayeke wara tongana lo mû ye na zo. E peut ti wara ni tongana e mû tapande  ti Jéhovah so amû ye mingi na azo (aÉph. 5:1). Na yâ ti article so, e yeke manda ye na ndö ti pendere tapande ti Jéhovah so amû ye mingi na azo nga e yeke bâ ye so e peut ti sara tongana e bâ so azo akiri singila na e ape ndali ti aye so e sara ndali ti ala. Ye so ayeke aidé e ti ngbâ ti mû ye na azo tongaso si e duti na ngia mingi.

MÛ TAPANDE TI JÉHOVAH SO AMÛ YE MINGI NA AZO

5. Aye wa la Jéhovah amû na e?

⁵ Ambeni ye wa la anzere na Jéhovah ti mû na e? Bâ ambeni tapande ni. Jéhovah amû na e aye so e yeke na bezoin ni. Peut-être e yeke na aye ti luxe ape, me grâce na Jéhovah, mingi ti e ayeke na aye so e bezoin ni. Na tapande, lo sara si e yeke na kobe, bongo nga na ndo ti lango (Ps. 4:8; Mat. 6:​31-33; 1 Tim. 6:​6-8). Eskê Jéhovah amû na e aye so e bezoin ni ndali ti so lo doit gï ti sara ni? Ên-ën. Me lo mû na e ni ngbanga ti nyen?

6. Nyen la e manda na lege ti Matthieu 6:​25, 26?

⁶ Jéhovah ayeke mû na e aye so e bezoin ni ndali ti so lo ye e. Gbu li na ndö ti atënë ti Jésus so ayeke na Matthieu 6:​25, 26. (Diko ni.) Jésus asara kua na tapande ti andeke na lo tene: “Ala yeke lu ngongoa ti kobe pëpe wala ala yeke ko ye wala ala yeke bata ye na gogoro pëpe.” Ye oko, na pekoni lo tene: “Babâ ti ala so ayeke na yayu ayeke mû kobe na andeke so.” Na pekoni, Jésus ahunda ndo atene: “Ngere ti ala ahon ngere ti andeke so ape?” Nyen la e manda dä? Ngere ti awakua ti Jéhovah ayeke kota mingi na lê ti lo ahon ti anyama. So Jéhovah ayeke mû kobe na anyama, e peut ti duti sûr so lo yeke bâ lege ti e. Legeoko tongana ti mbeni babâ so ayeke bâ lege ti azo ti sewa ti lo, Jéhovah ayeke bâ lege ti azo ti sewa ti lo na ndoye.—Ps. 145:16; Mat. 6:32.

7. Mbeni lege so e peut ti mû tapande ti Jéhovah so amû ye mingi na azo ayeke so wa? (Bâ nga foto.)

⁷ Tongana Jéhovah, e nga kue ndoye apeut ti pusu e ti mû ye na azo. Na tapande, eskê mo hinga mbeni ita so ayeke na bezoin ti kobe wala bongo? Jéhovah apeut ti sara kua na mo ti aidé lo. A hinga awakua ti Jéhovah tongana azo so ayeke mû maboko na amba ti ala na angoi ti kpale. Na tapande, na ngoi ti COVID-19, aita amû kobe, bongo nga na ambeni ye na azo so ayeke na yâ ti bezoin. Gbâ ti aita amû nga offrande ndali ti kua ti e na yâ ti dunia kue. Ye so a-aidé ti mû maboko  na aita na yâ ti dunia kue na angoi ti kpale. Aita so asara ye alingbi na tënë so ayeke na aHébreu 13:16 so atene: “Ala girisa pëpe ti sara ye ti nzoni nga ti kangbi ye na zo, ndali ti so a yeke mara ti asandaga tongaso la si anzere na Nzapa mingi.”

8. Na alege wa la e yeke wara aye ti nzoni na lege ti ngangu ti Jéhovah? (aPhilippien 2:13).

⁸ Jéhovah ayeke mû ngangu na zo. Jéhovah ayeke na ngia ti mû ngangu na awakua ti lo so ayeke be-ta-zo. (Diko aPhilippien 2:13.) Eskê a si awe so mo sambela ti wara ngangu ti dö sese na mbeni tara wala ti gbu ngangu na yâ ti mbeni ngangu kpale? Peut-être mo sambela nga ti wara ngangu ti sara aye so mo bezoin ti sara na yâ ti mbeni lango. Tongana Jéhovah amû na mo ngangu so mo hunda ni, mo peut ti tene mara tënë ti bazengele Paul so: “Mbi wara ngangu ti sara aye kue ndali ti lo so lo mû ngangu ni na mbi.”—aPhil. 4:13.

9. Na ambeni lege wa la e peut ti mû tapande ti Jéhovah na lege so e sara kua na ngangu ti e ti aidé ambeni zo? (Bâ nga foto.)

⁹ Atâa so e yeke mbilimbili-kue ape, e peut ti sara kua na ngangu ti e tongana ti Jéhovah. E peut ti mû vrai ngangu na azo ape. Me e peut ti sara kua na ngangu ti e ti aidé azo. Na tapande, e peut ti aidé aita so ayeke mbakoro wala aita so terê ti ala ason ti sara akua ti da ti ala wala ti gue ti vo ye na ala. Tongana lege ayeke dä, e peut ti aidé ti nettoyé Da ti Royaume nga ti bâ lege ni. Tongana e sara kua na ngangu ti e ti sara aye so, e peut ti sara anzoni ye mingi na aita ti e.

10. Tongana nyen la e peut ti kpengba azo na lege ti atënë ti yanga ti e?

¹⁰ Girisa nga ape so atënë ti yanga ti e ayeke na ngangu. Eskê mo peut ti pensé na mbeni zo so apeut ti wara ngangu na lege ti atënë so mo tene ti gonda lo? Eskê mo hinga mbeni zo so ayeke na bezoin ti tene a dë bê ti lo? Tongana a yeke tongaso, sara kue ti tene zo ni ahinga so mo pensé na lo. Mo peut ti gue ti bâ zo ni, ti iri lo na téléphone wala peut-être ti tokua na lo mbeni carte wala message. Gi bê ti mo mingi ape na ndö ti tënë so mo yeke tene. Mbeni senge tënë so alondo na bê ti mo apeut ti duti ye so ita ti mo abezoin ni ti ngbâ be-ta-zo wala ti yapu.—aProv. 12:25; aÉph. 4:29.

11. Tongana nyen la Jéhovah ayeke sara kua na ndara ti lo?

¹¹ Jéhovah ayeke mû ndara na zo. Disciple Jacques atene: “Tongana ndara amanke mbeni zo na popo ti ala, zia lo ngbâ ti hunda ni na Nzapa, ngbanga ti so Nzapa ayeke mû ye mingi na azo kue na lo yeke hunda yanga  ti zo ndali ni pëpe.” (Jacq. 1:5; kete tënë na gbe ni). Tongana ti so atënë so afa, Jéhovah ayeke bata ndara ti lo gï ndali ti lo wani ape. Lo yeke mû ni mingi na azo. Jacques atene nga so tongana Jéhovah amû ndara na zo, “lo yeke suku ndali ni pëpe” wala “lo yeke hunda yanga ti zo ndali ni pëpe.” Lo ye lâ oko ape ti tene e bâ so e yeke nzoni ape ndali ti so e hunda lo ti fa lege na e. Me lo wa e ti gi ndara ti lo.—aProv. 2:​1-6.

12. Alege wa la azi na e ti aidé azo ti duti na ndara?

¹² Ka ti e? Eskê e peut ti mû tapande ti Jéhovah na lege so e aidé azo ti duti na ndara? (Ps. 32:8). Alege mingi azi na awakua ti Jéhovah ti fa na azo aye so ala manda. Na tapande, mingi ni e yeke fa ka ye na afini wafango tënë. A-ancien ayeke kanga bê ti aidé awakua ti mungo maboko nga na aita-koli so awara batême ti sara akua so a mû na ala na yâ ti congrégation. Aita so aninga na yâ ti kua ti construction nga na yâ ti kua ti bango lege ti ada so a yeke sara kua ti Jéhovah dä ayeke fa kua na ala so ayeke sara kua ni fini fini.

13. Na ngoi so e yeke fa kua na azo, tongana nyen la e peut ti mû tapande ti fason so Jéhovah ayeke aidé azo ti duti na ndara?

¹³ A yeke nzoni azo so ayeke fa kua na azo amû tapande ti fason so Jéhovah ayeke aidé azo ti sara ye na ndara. Girisa ape so Jéhovah ayeke na ngia ti mû ndara ti lo na azo. Legeoko nga, e yeke na ngia ti fa na azo so ayeke manda ye aye so e hinga. E yeke ke pëpe ti fa ye na mbeni zo ndali ti so e sara mbeto ti tene zo ni amû place ti e. Na ambeni ngoi azo apensé so ndali ti so zo oko afa ye lani na ala ape, ala nga kue ala yeke fa ye na zo oko ape. Place ti mara ti bango ndo tongaso ayeke na popo ti awakua ti Jéhovah ape. E yeke na ngia ti fa na azo so e yeke fa ye na ala aye so e hinga, “me e yeke mû nga terê ti e kue na ala”. (1 aThes. 2:8). E yeke na beku so ala nga “na pekoni ayeke lingbi ande biani ti fa ni na ambeni zo.” (2 Tim. 2:​1, 2). Tongana e kue e aidé azo ti sara ye na ndara, e na ala e yeke sara ye na ndara mingi nga e yeke duti na ngia mingi.

TONGANA AZO AKIRI SINGILA NA E APE

14. Nyen la mingi ti azo ayeke sara tongana e mû mbeni ye wala e sara mbeni ye na ala?

¹⁴ Tongana e mû mbeni ye wala e sara mbeni ye na azo, mbilimbili na aita, mingi ni ala yeke kiri singila na e. Ala peut ti tokua na e mbeni mbeti wala ala peut ti kiri singila na e na mbeni lege nde (aCol. 3:15). Na ngoi so ala kiri singila na e, e yeke na ngia même mingi so e sara mbeni ye ndali ala.

15. Nyen la a yeke nzoni e girisa ape tongana ambeni zo akiri singila na e ape?

¹⁵ Na ambeni ngoi, ambeni zo ayeke kiri singila na e ape ndali ti ye so e sara na ala. A peut ti si so e mû ngoi ti e, ngangu ti e wala aye ti e ti aidé mbeni zo, me na pekoni e peut ti hunda terê ti e wala ye so e sara na zo ni anzere na lo. Tongana a si tongaso, nyen la e peut ti sara ti perdre ngia ti e ape wala ti tene bê ti e ason ape? Zia e girisa ape atënë so ayeke na Kusala 20:​35, so ayeke versê so ayeke mama-tene ti article so. Ngia so e yeke wara na mungo ye na zo ayeke pëpe gï ndali ti so azo akiri singila na e. E peut ti ngbâ ti mû ye na azo na ngia même tongana ala kiri singila na e ape. Na lege wa? Bâ ambeni lege ni.

16. Nyen la apeut ti aidé e ti ngbâ ti mû ye na azo na ngia?

¹⁶ Girisa ape so tongana mo mû ye na azo mo yeke sara ye tongana Jéhovah la. Lo yeke mû anzoni ye na azo atâa ala kiri singila na lo wala pëpe (Mat. 5:​43-48). Jéhovah atene so tongana e mû ye na zo sân ‘ti ku mbeni  ye na pekoni, futa ti e ayeke duti ande kota’. (Luc 6:35). Tënë “mbeni ye” apeut ti duti kiringo singila. Atâa azo akiri singila na e wala pëpe, Jéhovah ayeke futa e lakue ndali ti anzoni ye so e sara ti aidé azo nga ndali ti so e yeke ‘azo so amû ye na ngia.’—aProv. 19:17; 2 aCor. 9:7.

17. Nzoni bango ndo wa la e peut ti ngbâ ti duti na ni? (Luc 14:​12-14).

¹⁷ Mbeni ye nde so e peut ti sara ti sara ye tongana Jéhovah na ngoi so e ye ti mû ye na azo ayeke ti sara ye so Jésus atene na Luc 14:​12-14. (Diko ni.) A yeke sioni ape ti tisa wala ti sara nzoni bê na azo so apeut ti sara na e mara ni. Me ka tongana e bâ so mingi ni e yeke mû ye na azo ndali ti so e ye ti wara mbeni ye na pekoni? A yeke nzoni e sara ye alingbi na ye so Jésus afa. E peut ti tisa mbeni zo so e hinga so lo peut ti tisa e ape. Tongana e sara ni, e yeke duti na ngia ndali ti so e sara ye tongana Jéhovah. Oko bango ndo so ayeke aidé nga e ti ngbâ ti duti na ngia tongana azo akiri singila na e ape.

18. Nyen la apeut ti aidé e ti kanga bê na azo?

¹⁸ Duti na sioni bango ndo na ndö ti azo ape (1 aCor. 13:7). Tongana azo akiri singila na e ape, e peut ti hunda terê ti e, e tene: ‘Eskê ti vrai ni ala kiri singila ape? Wala ala girisa girisango?’ Peut-être ambeni raison ayeke dä so ndali ni ala kiri singila na e ape tongana ti so e ye fade. Ye so e sara apeut ti nzere na ambeni mingi, me a yeke ngangu na ala ti fa ni. Kamene apeut ti sara ala ti tene a aidé ala mbilimbili tongana ândö ala la ayeke aidé azo. Atâa ye ni ayeke so wa, ndoye ayeke pusu e ti kanga bê na aita nga ti ngbâ ti wara ngia na mungo ye na azo.—aÉph. 4:2.

19-20. Mbeni ye nde wa la apeut ti aidé e ti duti na ngia ti mû ye na azo? (Bâ nga foto.)

¹⁹ Kanga bê. Na ndö ti mungo ye mingi na azo, Gbia Salomon so asara ye na ndara atene: “Bi mapa ti mo na lê ti ngu, teti na peko ti alango mingi, mo yeke kiri ti wara ni.” (Zo-ti. 11:1). Atënë so afa na e so, na ambeni ngoi azo apeut ti kiri singila na e “na peko  ti alango mingi”. A yeke ye so asi na mbeni ita-wali.

²⁰ A sara angu mingi awe, wali ti mbeni surveillant ti circonscription atokua mbeni lettre ti kpengbango zo na mbeni ita-wali so awara batême fini fini, na yâ ti lettre ni lo wa lo ti ngbâ be-ta-zo. Ngu miombe tongaso na pekoni, ita-wali ni atokua na lo mbeni lettre na yâ ni, lo tene: “Mo hinga ape, me mbi ye ti tene na mo so, lettre ti mo so a-aidé mbi mingi na yâ ti angu so ahon.” Lo kiri lo tene: “Atënë so mo tene na mbi ayeke pendere mingi nga mbi yeke girisa lâ oko ape versê so mo fa.” a Na peko ti so ita-wali ni afa ambeni kpale so lo wara, lo tene: “Na ambeni ngoi, mbi ye ti dö aye kue ti zia nga ti zia ti sara na Jéhovah. Me na pekoni, mbi yeke dabe ti mbi lakue na versê so mo tokua na mbi na amû na mbi ngangu ti ngbâ be-ta-zo.” Lo kiri lo tene: “Na yâ ti ngu miombe so kue, mbeni ye so akpengba mbi tongana lettre ti mo so ayeke dä ape.” Imaginé tongana nyen la terê ti wali ti surveillant ti circonscription so anzere mingi ti wara lettre so “na peko ti alango mingi”. E nga kue mbeni zo apeut ti kiri singila na e na peko ti alango mingi na peko ti so e sara mbeni nzoni ye na lo.

21. Ngbanga ti nyen la mo leke na bê ti mo ti ngbâ ti sara ye tongana Jéhovah so amû ye mingi na azo?

²¹ Tongana ti so e tene fade, Jéhovah acréé e na mbeni fason so ayeke nde mingi. Atâa so a nzere na e ti tene azo amû ye na e, e yeke na ngia mingi tongana e mû ye na azo. Tongana e mû maboko na aita ti e ayeke sara nzoni na e. Na e yeke na ngia tongana ala kiri singila na e. Me tongana azo akiri singila na e wala pëpe, e peut ti duti na ngia ndali ti so e sara nzoni ye. Girisa lâ oko ape so atâa nyen la mo mû na zo, “Jéhovah ayeke na ngangu ti mû na mo ye mingi ahon so.” (2 Chron. 25:9). E peut ti mû ye na azo mingi ahon Jéhovah ape. Nga tongana Jéhovah afuta e ayeke nzoni futa ahon atanga ni kue. Tongaso, zia e leke na bê ti e ti ngbâ ti sara ye tongana Babâ ti e ti yayu so amû ye mingi na azo.