A yeke nzoni e pensé ape so, so adisciple 70 ayeke lani dä ape na ngoi so Jésus azia na sese Kobe ti Seigneur aye ti tene so lo ke ala wala ala dö lo azia awe. Jésus aye lani gï ti duti na abazengele na ngoi ni so.

Lo ye lani abazengele 12 nga na adisciple 70 kue. Jésus asoro lani kozoni akoli 12 na popo ti gbâ ti adisciple ti lo na lo iri ala abazengele (Luc 6:​12-16). Lo yeke lani na Galilée na ngoi so “lo iri adisciple ti lo 12” na lo “tokua ala ti fa tënë ti Royaume ti Nzapa nga ti kaï akobela.” (Luc 9:​1-6). Na pekoni, na ngoi so Jésus ayeke na Judée, lo ‘soro ambeni nde 70, lo tokua ala use use’. (Luc 9:51; 10:1). Tongaso, Jésus ayeke lani na adisciple na ando nde nde so ayeke fa tënë ti lo.

A-Juif so aga adisciple ti Jésus angbâ lani ti sara Pâque ngu oko oko, peut-être na azo ti sewa ti ala (Ex. 12:​6-11, 17-20). Na ngoi so lango ti kuâ ti Jésus ayeke pusu nduru nduru, lo na abazengele ti lo ague na Jérusalem. Me lo hunda lani ape na adisciple ti lo kue so ayeke na Judée, Galilée nga na Pérée ti tene ala ga asara Pâque ndo oko. A yeke polele so Jésus aye gï ti duti na abazengele ti lo na ngoi ni so. Lo tene na ala, lo tene: “Mbi ye mingi ti te kobe ti Pâque so na ala kozoni si mbi bâ pasi.”—Luc 22:15.

Lo yeke lani na nzoni raison ti tene tongaso. Na yâ ti kete ngoi, Jésus ayeke kui tongana ‘Kete taba ti Nzapa so azi siokpari ti dunia so’. (Jean 1:29). Ye so adoit ti si na Jérusalem ndo so a yeke mû lani asandaga dä na Nzapa. Kete taba ti Pâque adabe ti azo ti Israël so Jéhovah azi lani ala na Égypte. Me sandaga ti Jésus ayeke sara ye mingi ahon ti so. A yeke zi azo kue na gbe ti siokpari nga na kuâ (1 aCor. 5:​7, 8). Ye so Jésus asara amû lege na abazengele 12 ti ga mbage ti fondation ti congrégation ti aChrétien (aÉph. 2:​20-22). “Atênë ti fondation” ti Jérusalem, gbata so ayeke nzoni-kue, “ayeke 12,” a sû “iri 12 na ndö ni, iri ti abazengele 12 ti Molenge ti taba ni.” (Apoc. 21:​10-14). Biani, abazengele so ayeke be-ta-zo ayeke na mbeni kota kua ti sara na yâ ti gango tâ tënë ti ye so Nzapa aleke na bê ti lo ti sara. Tongaso, e comprendre ndani so Jésus aye lani ti tene ala duti na terê ti lo na ngoi ti ndangba Pâque nga na ngoi ti ye so aga na pekoni: Kobe ti Seigneur.

Adisciple 70 nga na ambeni ayeke lani dä ape na terê ti Jésus na ngoi ti kobe so. Me adisciple kue so ayeke be-ta-zo ayeke bâ nzoni na lege ti Kobe ti Seigneur so Jésus azia lani na sese. Adisciple kue so a yeke soro ande ala ti gue na yayu ayeke lï na yâ ti mbele ti royaume so Jésus asara tënë ni lani na abazengele ti lo na bï ni so.—Luc 22:​29, 30.