Awamungo maboko na tâ vorongo ti giriri na ti laso

MO DABE mo na iri ti koli so atoto lani na ndo ti ngbele gbata ti Jérusalem? Peut-être mo yeke tene, ‘Jésus’, na tâ tënë Jésus atoto tongaso lani (Luc 19:28, 41). Me angu 400 tongaso kozoni si Jésus aga na sese, mbeni wakua be-ta-zo ti Nzapa atoto nga na ndo ti Jérusalem. Iri ti lo ayeke Néhémie.​—Néhémie 1:3, 4.

Ye nyen abi lani vundu mingi na bê ti Néhémie si lo toto na ndo ti Jérusalem? Lo sala lani nyen teti nzoni ti gbata ni nga ti azo ti yâ ni? Na e lingbi ti manda nyen na lege ti tapande ti lo? Ti kiri tënë na ni, zia e bâ ambeni ye so asi na ngoi ti lo.

Tënë agbu bê ti lo na lo sala nga ye

A zia lani Néhémie na mbata ti gouverneur ti Jérusalem. Me kozoni na so, lo yeke lani mbeni kota zo na yangbo ti gbia ti Perse, na gbata ti Suse. Ye oko, nzoni duti ti lo akanga lege na lo pëpe ti gi bê teti nzoni ti aita ti lo aJuif so ayeke yongoro kâ na Jérusalem. Biani, kozo ye so lo sala tongana mbeni bungbi ti aJuif alondo na Jérusalem aga na Suse ayeke ti ‘hunda ala tënë ti ambeni Juif so angbâ, ala so ague na ngbâa pëpe, na lo hunda ala tënë ti Jérusalem.’ (Néhémie 1:2).

 Tongana aJuif so aga atene na lo so azo ti Jérusalem ‘ayeke na yâ ye ti vundu mingi’ na so “a fâ” gbagba ti gbata ni na sese, Néhémie ‘aduti, na lo toto na vundu lâ oko oko’. Na pekoni, na yâ mbeni sambela so lo sala na bê kue, lo fa vundu ti bê ti lo na Jéhovah (Néhémie 1:3-11). Ngbanga ti nyen vundu asala Néhémie mingi tongaso? Ngbanga ti so Jérusalem ayeke lani kota ndo ti vorongo Jéhovah na ndo ti sese, na a bâ lege ni nzoni pëpe (1 aGbia 11:36). Nga, gbata ni so abuba afa so azo ti yâ ni aduti nzoni pëpe na lege ti yingo.​—Néhémie 1:6, 7.

Gingo bê so Néhémie ayeke na ni teti Jérusalem nga be-nzoni ti lo teti aJuif so aduti kâ apusu lo ti mû tele ti lo na kusala. Na peko ti so gbia ti Perse amû lege na lo ti zia teti mbeni ngoi kusala ti lo ti gue, Néhémie ato nda ti leke yongoro tambela ni na Jérusalem (Néhémie 2:5, 6). Lo ye lani ti mû ngangu ti lo, ngoi ti lo, nga na akode ti lo ti mû maboko na kusala ti lekengo gbagba ni so abuba. Alango kete na peko ti so lo si kâ, lo yeke na mbeni ye na li ti lo awe ti kiri ti leke gbagba ti Jérusalem ni kue.​—Néhémie 2:11-18.

Néhémie akangbi yâ ti kota kusala ti lekengo gbagba ni na popo ti asewa mingi, so ala kue asala kusala maboko na maboko. * A mû “ndo” oko na sewa oko oko, so wungo ti ala ahon 40, ti kiri ti leke ni. Na yâ ti asewa ni, a wara nga ababâ na mama so amolenge ti ala asala kua na tele ti ala. Ye ti pekoni ayeke nyen? Teti so awakua ni ayeke mingi mingi, na so ala mû ngoi nga na ngangu ti ala na yâ ni, ala hunzi kua so akpa mbeni ye so alingbi fade ti hunzi ni pëpe (Néhémie 3:11, 12, 19, 20). Na yâ ti anze use so asi singo na akusala, a kiri a leke gbagba ni kue! Néhémie asû nga lani na mbeti so même ala so asala gbä ti kanga lege na kusala ti lekengo gbagba ni ayeda so “Nzapa ti e asala kusala so.”​—Néhémie 6:15, 16.

Mbeni tapande so a lingbi e dabe e na ni

Néhémie amû pëpe gi ngoi nga na akode ti lo ti lekengo yâ ti akua. Lo mû nga amosoro ti lo ti mû maboko na tâ vorongo. Na nginza ti lo mveni, lo zi aita ti lo aJuif na gbe ti ngbâa. Lo mû nginza na bon na azo na interêt pëpe. Lo “zia kungba” lâ oko pëpe na ndo ti aJuif na hundango na ala ti futa na lo mbeni ye teti so lo yeke gouverneur. Nde na so, ‘azo ngbangbo oko na ndo ni bale-oku . . . na azo so aduti na popo ti amara so angoro lo’ alingbi lani ti gue lakue na da ti lo ti wara kobe ti tengo ni. Lâ oko oko lo mû teti azo so aga na da ti lo ‘koli bagara oko, na angasangbaga omene ti nzoni nga na andeke’. Nga, fani oko na yâ alango bale-oko, lo mû na ala “vin nde nde mingi”; ye so kue gi na nginza ti bozo ti lo.​—Néhémie 5:8, 10, 14-18.

Tapande ti mungo ye na nzobe, so Néhémie azia na awakua kue ti Nzapa ti giriri nga na ti laso ayeke biani nde mingi! Ngangu wakua ti Nzapa so amû na bê ti lo kue amosoro ti lo ti mû maboko na awakua si tâ vorongo ague na li ni. A yeke biani na lege ni si lo hunda na Jéhovah: “O Nzapa ti mbi, Mo dabe Mo na ye kue so mbi sala teti azo so, si Mo sala nzoni na mbi.” (Néhémie 5:19). Jéhovah ayeke dabe lo biani na lo.​—aHébreu 6:10.

Azo amû peko ti tapande ti Néhémie laso

Ti bâ so azo ti Jéhovah laso ayeke fa mara ti ndoye tongaso, ala yeke sala ye na bê ti ala kue, nga ala yeke fa bibe ti gbanzi ye na tele ndali ti tâ vorongo, a mû ngia na bê mingi. Tongana e mä so afon e awamabe awara akpale, e yeke gi bê ti e mingi na ndo nzoni ti ala (aRomain 12:15). Legeoko tongana Néhémie, e hunda na Jéhovah na yâ sambela ti mû maboko na aita ti e so ayeke na yâ ti kpale, na tenengo: “Mbi voro Mo, fadeso Mo zia mê ti Mo [amä] sambela ti boi ti Mo, na sambela ti aboi ti Mo, ala so ayeke na ngia ti kpe mbito ti iri ti Mo”.​—Néhémie 1:11; aColossien 4:2.

Ye oko, gingo bê ti e ndali ti nzoni duti ti aita ti e aChrétien na lege ti mitele nga na ti yingo nga ndali ti guengo na li ni ti tâ vorongo andu gi bê ti e pëpe. A pusu nga e na kusala. Ndoye  apusu ala so dutingo ti ala amû lege na ala ti sala ni, ti zia nzoni duti ti ada ti ala na ti gue na ambeni ndo, tongana ti so Néhémie asala giriri, ti mû maboko na azo so ye atia ala. Atâa so dutingo ti aita so ague na ambeni kodoro alingbi ti duti nzoni tongana ti kodoro ti ala mveni pëpe, ye so akanga lege na ala oko pëpe. Ala yeke mû maboko na guengo na li ni ti tâ vorongo na yâ ti akodoro ni, nga ala yeke sala kusala maboko na maboko na aita ti ala aChrétien. Bibe ti gbanzingo ye na tele so ala fa ni na gigi ayeke biani ye ti gonda.

E mû mbage ti e na ndo so e yeke dä

E hinga so mingi ti e alingbi pëpe ti gue na mbeni ndo nde. Ni la, e yeke mû maboko na tâ vorongo gi na ndo so e yeke dä. A fa nga tapande ti ye so na yâ buku ti Néhémie. Bâ mbeni tënë so Néhémie atene na ndo ti ambeni sewa be-ta-zo so amû mbage ti ala na kusala ti lekengo gbagba ni. Lo tene: “Jedaja molenge ti Harumaph aleke gbagba ni na gbele da ti lo. . . . Benjamin na Hassub aleke gbagba ni na gbele da ti ala. Na peko ti ala, Azaria molenge ti Maaséja, molenge ti Anania, aleke gbagba ni na tele ti da ti lo mveni.” (Néhémie 3:10, 23, 28-30, e si e sû agere ti mbeti so nde). Na mungo mbage ti ala na kusala ti lekengo gbagba ni na ndo so ala yeke dä, akoli so nga na asewa ti ala amû maboko mingi ti pusu tâ vorongo na li ni.

Laso, mingi ti e amû maboko na tâ vorongo  na yâ gbata ti e mveni na alege nde nde. E yeke mû mbage ti e na kusala ti lekengo afini Da ti Royaume, ti mungo maboko na azo so kpale asi na ala nga, mingi ahon so, na kusala ti fango tënë ti Royaume. Na ndo ni, atâa e wara lege ti mû mbage ti e wala pëpe na kusala ti lekengo ada wala na mungo maboko na azo so ayeke na yâ ti akpale, e kue e yeke na kota nzara ti mû maboko na tâ vorongo na lege ti amosoro ti e, legeoko tongana ti so Néhémie amû lani ye mingi na ngoi ti lo.​—Bâ li ti tënë “Aye so ahunda ti mû ye na bê kue.”

Ngoi na ngoi, a lingbi ti bâ so a yeke ngangu ti wara nginza kue so ahunda teti kusala ti petengo ambeti ti e so angbâ ti gue na li ni, ti mungo maboko na azo so ayeke na yâ ti akpale, nga ti ambeni kusala nde nde so a sala na ndo sese mobimba. Me dabe mo so giriri a bâ a tene kusala ti lekengo kota gbagba ti Jérusalem ayeke hunzi lâ oko pëpe (Néhémie 4:10). Me ngbanga ti so a kangbi yâ ti kusala ni na popo ti asewa mingi so ayeke lani ndulu ti mû maboko, a hunzi ti leke gbagba ni. Legeoko nga laso, tongana e oko oko e yô mbeni mbage ti kungba ti kusala ni, a lingbi ti wara gbâ ti nginza so ahunda ti sala kusala ti e na ndo sese kue.

Tënë so ayeke na gbe ti li ti tënë “Alege nde nde so a soro ti mû” na aye afa alege mingi so mbeni zo alingbi ti mû nginza ndali ti kusala ti Royaume. Na ngu so ahon, mingi ti azo ti Nzapa amû mara ti maboko tongaso, nga  Wabatango Bungbi ti aTémoin ti Jéhovah aye ti mû ngoi so ti kiri kota singila na ala kue so bê ti ala apusu ala ti mû mbage na yâ mungo ye na bê kue. Me mingi ahon kue, e kiri singila na Jéhovah teti kota deba nzoni so lo hiri na ndo angangu so azo ti lo asala na bê ti ala kue ti maï na tâ vorongo na ndo sese mobimba. Tâ tënë, tongana e gbu li ti e na ndo tongana nyen maboko ti Jéhovah afa lege na e na yâ ti angu so ahon, bê ti e apusu e ti tene oko tënë so Néhémie atene na bê ti kiri singila: ‘Tïtî Nzapa ti mbi, a yeke nzoni na ndo mbi.’​—Néhémie 2:18.

[Kete Tene na Gbe Ni]

[Encadré/Afoto na lembeti 28, 29]

Alege nde nde so a soro ti mû na

A-OFFRANDE TETI KUSALA SO A SALA NA NDO SESE KUE

Azo mingi azia nde wala aleke na yâ mama-nginza ti ala mbeni wungo ti nginza so ala zia na yâ asanduku teti a-offrande so kete mbeti “A-offrande teti kusala na ndo sese kue​—Matthieu 24:14” ayeke na ndo ni.

Nze oko oko, akongregation ayeke tokua anginza ni na kota ndokua ti aTémoin ti Jéhovah na Brooklyn wala na filiale so ayeke na kodoro ti ala. Mo lingbi nga ti tokua a-offrande so mo mû na bê kue gi na Biröo so abâ lege ti nginza (Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483), wala na filiale so abâ lege ti kusala ni na kodoro ti mo. Mo lingbi nga ti mû tongana matabisi aye ti go, ti mê, ti maboko, na ambeni ye nde ti ngele ngangu. A yeke nzoni mo sû na tele ni mbeni mbeti ti fa so amatabisi so ayeke a-offrande so mo mû biaku.

AMATABISI SO A HUNDA MBENI YE KOZONI

Mbeni zo alingbi ti mû nginza tongana mbeni matabisi na hundango mbeni ye kozoni. Tongana lo yeke na yâ ti bezoin, a lingbi ti kiri na lo nginza so lo mû tongana offrande. Ti wara sango mingi na ndo ni, sû mbeti na Biröo so abâ lege ti nginza na adresse so a fa na use paragraphe ni.

AMATABISI

Nde na amatabisi ti nginza so a mû biaku na ti so a hunda mbeni ye kozoni, ambeni lege nde nde ayeke dä ti mû nginza ndali ti kusala ti fango tënë ti Royaume na ndo kue. Aye so andu:

Assurance: A lingbi ti zia ni na iri ti Société Watch Tower ti tene lo wara ande nginza so mbeni zo amû assurance ndali ni, wala nginza so mbeni zo abata ngbanga ti retraite ti lo.

Nginza na banque: Na yâ ambeni kodoro, a lingbi ti bata teti Société Watch Tower nginza so a zia na banque, mbeni mbeti so afa atene a zia nginza kâ, wala mbeti ti nginza so a bata teti lâ ti retraite, wala so a zia na iri ti Société ti tene lo wara ni tongana zo ni akui.

Ambeti ti mosoro na ti mbele: A lingbi ti mû ambeti ti mosoro na ti mbele na Société Watch Tower tongana mbeni matabisi so a hunda mbeni ye na pekoni pëpe.

Ada: A lingbi ti mû na Société Watch Tower ada so alingbi ti kä ni; zo ni alingbi ti mû ni biaku, wala lo fa so Société ayeke mû ni ande na peko ti kuâ ti lo na lo yeke ngbâ ti lango na yâ ni na ngoi kue so lo de na fini. Kozoni ti mû na filiale mbeni matabisi ti da tongaso, a yeke nzoni a bâ lo si.

Testament na amatabisi so a bata ti mû na mbeni ngoi: A lingbi ti zia na Société Watch Tower ada na nginza na lege ti mbeni testament so ndia ayeda na ni, wala a lingbi ti sû mbeni mbeti ti fa so fade Société Watch Tower ayeke ga mveni ti mbage ti mosoro ni na mbeni ngoi. Lekengo ye ti tene mbeni lege ti vorongo aga ande mveni ti mbeni mosoro alingbi peut-être ti zi lege ti kiri na peko alampo so a lingbi a futa ni.

Amara ti mungo amatabisi tongaso ahunda ti tene zo ni agbu li ti lo nzoni. Ti mû maboko na ala so aye ti mû matabisi teti kusala ti aTémoin ti Jéhovah na ndo sese kue na alege nde nde, a leke mbeni brochure na yanga ti Anglais nga na Espagnole, Charitable Planning to Benefit Kingdom Service Worldwide. A sala brochure so ti kiri tënë na gbâ ti atënë so a yeke hunda na ndo mungo amatabisi, atestament, nga na amatabisi so a bata ti mû na mbeni ngoi. A wara nga na yâ ni ambeni nzoni tënë na ndo warango akungba na peko ti kuâ ti mbeni zo, tënë ti lampo, na bango lege ti akungba ti zo mveni. A fa na azo alege nde nde ti mû mbeni matabisi fadeso wala na peko ti kuâ ti ala. A lingbi ti hunda brochure ni senge na Filiale so ayeke bâ lege ti kusala ni na kodoro ti mo.

Na peko ti dikongo brochure so nga na salango lisoro na aita ti Filiale na kodoro ti ala, azo mingi awara lege ti mû maboko na aTémoin ti Jéhovah na ndo sese kue nga ti wara ye ti nzoni na lege ti futango lampo. A lingbi a tokua na Filiale mbeni oko ti testament ni wala mbeni oko ti mbeti ti amatabisi so a bata ti mû na mbeni ngoi. Tongana mbeni oko ti alege ti mungo matabisi so anzere na mo, mo lingbi ti sala tënë ni na Filiale na tokuango mbeti wala na pikango singa, na lege ti adresse so a mû na gbe ni ge.

Filiale ti aTémoin ti Jéhovah

Association “Les Témoins de Jéhovah”

B.P. 662, Bangui, R.C.A.

Singa: 61-20-70

[Encadré na lembeti 30]

Aye so ahunda ti mû ye na bê kue

Na yâ ambeti so lo sû na aCorinthien, bazengele Paul afa akota ye ota so a hunda ti mû ye na bê kue. (1) Na ndembe so lo sû tënë na ndo ti rongo nginza, Paul amû wango so: “Na lâ ti kozoni ti semaine kue, a lingbi azo oko oko kue akamata mbeni ye ti ye so ala wara, ala bata ye so nde”. (1 aCorinthien 16:2a). Ni la, a lingbi a leke kozoni ye so zo aye ti mû, na a lingbi lo sala ni na lege ni. (2) Paul asû nga so a yeke nzoni zo oko oko amû ye alingbi na ‘ye so lo wara’. (1 aCorinthien 16:2b). So ti tene, mbeni zo so aye ti mû ye na bê ti lo kue, a yeke nzoni lo mû ni alingbi na ye so lo yeke na ni. Même tongana mbeni Chrétien awara nginza gi kete, Jéhovah ayeke bâ na nene ni kete ye so lo lingbi ti mû (Luc 21:1-4). (3) Paul akiri asû: “Zia azo oko oko kue amû ye tongana bê ti ala aye, na vundu pëpe, wala na forcé pëpe; teti Nzapa andoye zo so amû matabisi na ngia.” (2 aCorinthien 9:7). Anzoni Chrétien ayeke mû ye na bê kue nga na ngia.

[Afoto na lembeti 26]

Tënë agbu lani bê ti Néhémie na lo sala nga ye

[Afoto na lembeti 30]

A-offrande amû lege ti pete ambeti, ti mû maboko na azo so awara kpale, ti leke aDa ti Royaume, na ti sala anzo kusala na ndo sese kue