Teti nyen a yeke ngangu mingi ti hunda pardon?

NA JUILLET 2000, Bungbi ti awalungo ndia ti Californie na Amerika asigigi na mbeni fini ndia. Ndia ni ahunda ti zi tënë na li ti zo so asala tënë ti nzobe na mbage ti zo so awara sioni na yâ ti ndao so ala sala. Ngbanga ti nyen ti wara mara ti ndia tongaso? A bâ so, tongana mbeni zo awara sioni na yâ mbeni ndao, mingi ni azo ayeke gi bê ti ala wala a lingbi ala hunda pardon. Senge pëpe, teti tongana a gue na tënë ni na gbele ngbanga, a lingbi ti bâ hundango pardon ni tongana mbeni ye so afa so zo ni ayeda so ayeke faute ti lo. Na mbeni mbage nde, azo so abâ so tongana a hunda pardon na ala hio pëpe, bê ti ala alingbi ti so, tongaso kete ndao alingbi ti ga kota tënë.

Biani, a hunda pëpe ti tene pardon ndali ti mbeni ndao so mo yeke na gunda ni pëpe. Ambeni ngoi alingbi ti duti dä so a yeke nzoni ti sala hange na tënë so mo yeke tene. Mbeni ngbele proverbe atene: “Na yâ tënë mingi mingi, kengo-ndia atia pëpe, me zo so abata yanga ti lo, lo yeke na ndara.” (aProverbe 10:19; 27:12). Me atâa so kue, mo lingbi ti sala ye na yekiango ndo nga ti mû maboko.

Ye oko, azo mingi azia ti hunda pardon, même tongana ayeke gue na tënë ni na  gbele ngbanga pëpe. A yeke tongaso pëpe? Na yanga-da mbeni wali ti koli alingbi ti dema tele ti lo, ‘Koli ti mbi ayeke tene pardon lâ oko pëpe.’ Na place ti kua, mbeni wakode-kua alingbi ti dema tele ti lo, ‘Azo ti kua ti mbi ayeda ka pëpe na afaute ti ala, na a yeke ngangu ti tene pardon asigigi na yanga ti ala.’ Na ekole, mbeni wafango ye alingbi ti tene, ‘A fa na amolenge pëpe ti tene pardon.’

Mbeni nda ti tënë ni so apusu mbeni zo ti tene pardon hio pëpe alingbi ti duti mbito ti tene a ke lo. Teti so lo yeke na mbito ti tene a ye tënë ti lo mbeni pëpe, lo lingbi ti fa pëpe ye so ayeke biani na yâ bê ti lo. Zo so a sala sioni na lo alingbi même ti kpe zo so ayeke na gunda ni, na a sala si a yeke ngangu mingi ti leke kpale ni.

Mbeni nda ti tënë nde so alingbi ti pusu azo ti hunda pardon pëpe ayeke so ala bi bê na tënë ti bê ti ambeni zo pëpe. Mara ti azo tongaso alingbi ti tene, ‘Hundango pardon ayeke zi pëpe sioni so mbi sala awe.’ Même ambeni aye ti tene pardon hio pëpe ngbanga ti so ala kpe ye so alingbi ti si na pekoni. Ala yeke hunda tele ti ala, ‘A yeke tene ande so faute ni ayeke ti mbi, na a yeke hunda mbi ti futa nginza ndali ni pëpe?’ Ye oko, kota kpale ahon kue so akanga lege na zo ti tene pardon ayeke baba. Zo so bê ti lo asi na baba na so a yeke ngangu na lo ti tene “pardon” alingbi mbilimbili ti tene na nda ni, ‘Tongana mbi yeda na sioni so mbi sala, a yeke kiri na mbi na peko, na a yeke ye so mbi ye pëpe. Mbi yeke ne na lê ti azo mbeni pëpe.’

Atâa nda ti tënë ni ayeke so wa, ti azo mingi a yeke ngangu ti hunda pardon. Me a yeke biani kota ye ti hunda pardon? Tongana zo ahunda pardon, aye ti nzoni wa lo yeke wara?

[Foto na lembeti 3]

“A fa na amolenge pëpe ti tene pardon”

[Foto na lembeti 3]

“Koli ti mbi ayeke tene pardon lâ oko pëpe”

[Foto na lembeti 3]

“Azo ti kua ti mbi ayeda ka pëpe na afaute ti ala”