Kobe ti Seigneur aye ti tene nyen teti mo?
Kobe ti Seigneur aye ti tene nyen teti mo?
“Zo so ate mapa so, wala anyon kopo so ti Seigneur na lege ni pëpe, fade lo yeke na ngbanga ti tele na ti mênë ti Seigneur na li ti lo.”—1 ACORINTHIEN 11:27.
1. Ye ti kota ahon tanga ti aye kue, so a leke ti sala ni na ngu 2003, ayeke nyen? Na a bâ gigi tongana nyen?
YE TI kota ahon tanga ti aye kue, so a leke ti sala na ngu 2003, ayeke tï ande na lango 16 ti nze ti avril, na peko ti lindango ti lâ. Na lango so, aTémoin ti Jéhovah ayeke wara tele ande teti Matanga ti Dango bê na kui ti Jésus Christ. Tongana ti so article so ahon afa, Jésus azia lani na sese matanga so, so ahiri nga ni Kobe ti Seigneur, na pekoni so lo na abazengele ti lo asala matanga ti Pâque na lango 14 ti Nisan, ti ngu 33. Mapa so mama ni ayeke dä pëpe na bengba vin ti Mémorial ni aduti fä ti tele ti Christ so siokpari ayeke dä pëpe, na fä ti mênë ti lo so lo sa; na a yeke gi oko sandaga so alingbi ti zi azo na gbe ti siokpari na kui so ala wara tongana ye ti héritier.—aRomain 5:12; 6:23.
2. Gbotongo mê wa a sû ni na 1 aCorinthien 11:27?
2 A lingbi ala so ayeke te mapa na ayeke nyon vin ti Mémorial asala ni na lege ni. Bazengele Paul afa ni polele tongana lo sû mbeti na aChrétien ti Corinthe ti giriri; kâ, a yeke sala lani matanga ti Kobe ti Seigneur tâ na lege ni pëpe (1 aCorinthien 11:20-22). Paul asû mbeti so: “Zo so ate mapa so, wala anyon kopo so ti Seigneur na lege ni pëpe, fade lo yeke na ngbanga ti tele na ti mênë ti Seigneur na li ti lo.” (1 aCorinthien 11:27). Atënë so aye ti tene nyen?
Ambeni zo ayeke sala ni giriri na lege ni pëpe
3. Tongana nyen aChrétien mingi na Corinthe ayeke sala ye lani na ngoi ti amatanga ti Kobe ti Seigneur?
3 Giriri, aChrétien ti Corinthe mingi ayeke te mapa na ayeke nyon vin ti Mémorial na lege ni pëpe. Kangbi ayeke lani dä na popo ti ala, na teti mbeni ngoi, ambeni ayeke ga na kobe ti ala mveni na ayeke te ni kozoni si bungbi ni ato nda ni wala na ngoi ti bungbi ni, na fani mingi ala yeke te na ala yeke nyon ye ahon ndo ni. Na yâ li ti ala, nga na lege ti yingo, ala yeke sala hange oko pëpe. Ye so asala si ala yeke na “ngbanga ti tele na ti mênë ti Seigneur na li ti [ala].” Ala so ate ye oko pëpe, nzara ayeke gbu ala, na ala to nda ti mä tënë nzoni pëpe na ti zia si li ti ala ahon na ndo ti ambeni ye nde. Biani, ala mingi ayeke te mapa na ayeke nyon vin ni sân ti duti tâ na yekiango ndo wala ti bâ nene ti matanga ni. A yeke ye ti dongo bê pëpe ti bâ so ala ga na ngbanga lani na ndo ala mveni!—1 aCorinthien 11:27-34.
4, 5. Ngbanga ti nyen a yeke kota ye mingi teti ala so ayeke mû mapa na vin ti Mémorial, ti bâ tele ti ala nzoni?
4 Ngu oko oko, na ngoi so lango ti Mémorial ayeke pusu ndulu, a yeke kota ye mingi teti ala so ayeke mû ka lakue mapa na vin ni, ti gi ti bâ tele ti ala mveni nzoni. Ti kangbi kobe so tâ na lege ni, a lingbi ala duti na nzoni seni na lege ti yingo. Tongana mbeni zo ayeke fa yekiango ndo pëpe, wala même ayeke bâ tongana senge ye na lê ti lo sandaga ti Jésus, a lingbi ti ‘lungula lo na popo ti azo ti Nzapa’, legeoko tongana ti so a yeke sala giriri na mbeni zo ti Israël so ate mbeni kobe ti peko ti sandaga ti offrande ti siriri na yâ mbeni dutingo so ayeke nzoni pëpe.—Lévitique 7:20; aHébreu 10:28-31.
5 Paul ahaka matanga ti Mémorial na mbeni kobe so azo mingi ayeke kangbi na peko ti mbeni sandaga ti offrande ti siriri na ngoi ti Israël ti giriri. Lo fa kozoni kue so ala so ayeke te mapa na ayeke nyon vin ni ayeke wara mbage na yâ Christ; na pekoni, lo tene: “I lingbi nyon kopo ti Seigneur na kopo ti ayingo sioni pëpe; i lingbi ti te kobe na table ti Seigneur na table ti ayingo sioni pëpe.” (1 aCorinthien 10:16-21). Tongana mbeni zo so ayeke mû ka lakue mapa na vin ti Mémorial asala mbeni kota siokpari, a lingbi lo fa ni na gigi na Jéhovah na lo hunda na a-ancien ti kongregation ti mû maboko na lo na lege ti yingo (aProverbe 28:13; Jacques 5:13-16). Tongana lo gbian bê ti lo biani, na lo lë alengo ti zo so achangé bê ti lo, fade lo yeke mû mapa na vin ni tâ na lege ni.—Luc 3:8.
Ala ga ti bâ ni gi na yekiango ndo me ala mû mbage dä pëpe
6. Nzapa abata matabisi ti mû mapa na vin ti Kobe ti Seigneur gi na azo wa?
6 A lingbi ala so laso ayeke sala nzoni na tanga ti aita ti Christ 144 000 amû nga mapa na vin ti Kobe ti Seigneur? (Matthieu 25:31-40; Apocalypse 14:1). Oko pëpe. Nzapa abata matabisi so gi teti ala so lo sa yingo vulu na ndo ti ala ti ga “afon Christ na yâ ye ti héritier”. (aRomain 8:14-18; 1 Jean 2:20). Tongaso, dutingo ti ala so ayeke na beku ti ngbâ na fini teti lakue lakue na yâ mbeni paradis so ayeke mû ande ndo ti sese kue na gbe ti komandema ti Royaume ni ayeke tongana nyen? (Luc 23:43; Apocalypse 21:3, 4). Teti so ala yeke pëpe afon Jésus na yâ beku ti gue na yayu, ala yeke ga na Mémorial ti bâ gi ni na yekiango ndo me ala mû mbage ti ala dä pëpe.—aRomain 6:3-5.
7. Ngbanga ti nyen aChrétien ti kozo siècle ahinga so a hunda na ala ti te mapa na ti nyon vin ti Mémorial?
7 A sa yingo vulu lani na ndo ti atâ Chrétien ti kozo siècle. Mingi ti ala awara lani lege ti sala kusala na amatabisi ti yingo oko wala ahon ni, na tapande, salango tënë na ayanga nde nde. Tongaso, a yeke duti fade ngangu pëpe na azo so ti hinga so a sa yingo na ndo ti ala, na so a hunda na ala ti te mapa na ti nyon vin ti Mémorial. Ye oko, na ngoi ti e, a lingbi ti hinga ni gi na lege ti atënë so a sû ni na gbe ti yingo tongana ti so: “Azo kue so Yingo ti Nzapa afa lege na ala, ala yeke amolenge ti Nzapa. Teti i kamata yingo ti ngbâa pëpe, si i kiri i duti na mbito; me i kamata Yingo so asala si i wara ndo-ti-molenge; na yâ Yingo so, e tene na kongo, Abba! Babâ!”—aRomain 8:14, 15, e si e sû agere ti mbeti so nde.
8. Azo wa a haka ala na “nzo blé” nga na “sio blé ti ngonda” na yâ Matthieu chapitre 13?
8 Tongana angu ayeke hon, atâ Chrétien so a sa yingo na ndo ti ala amaï tongana “nzo blé” na yâ mbeni yaka ti “sio blé ti ngonda”, so ayeke fä ti aChrétien ti wataka (Matthieu 13:24-30, Mt13:36-43). Na yâ angu 1870, “nzo blé” ni ato nda ti fa tele ti lo polele na gigi, na angu mingi na pekoni, a mû tënë so na asurveillant Chrétien so a sa yingo na ndo ti ala: ‘A lingbi a-ancien afa na ala so abungbi [teti Mémorial] atënë so: (1) ti duti na mabe na yâ mênë [ti Christ]; na (2) ti mû tele kue na Seigneur nga na kusala ti lo, même juska na kuâ. Na pekoni, a lingbi ala tisa ala so aye ti sala tongaso na so amû tele ti ala kue na Nzapa awe ti ga ti sala matanga ti kui ti Seigneur.”—Études des Écritures, Molongo omene, The New Creation, lembeti 473. *
Gingo “ambeni ngasangbaga”
9. Na ngu 1935, tongana nyen si a fa lani polele azo wa ayeke “azo mingi so asi singo”? Na tënë so asala nyen na ndo ambeni zo so ayeke mû lani mapa na vin ti Mémorial na ngoi ni so?
9 Tongana ngoi ayeke hon, bungbi ti Jéhovah angbâ ti zia lê ti lo gi pëpe na ndo adisciple ti Christ so a sa yingo na ndo ala; lo to nda ni nga ti zia lê ti lo mingi na ndo ti ambeni zo nde. Na ndo tënë so, mbeni kpengba ye asi na ngu 1935. Kozoni na ngu so, azo ti Nzapa apensé ti ala lani so “azo mingi so asi singo” ti Apocalypse 7:9 ayeke mbeni use bungbi na lege ti yingo so ayeke duti ande na tele ti aChrétien 144 000 so a sa yingo na ndo ti ala so azingo ala na kuâ ti duti na yayu; ala yeke duti tongana andeko ti wali ti Christ (Psaume 45:15, 16; Apocalypse 7:4; 21:2, 9). Me ti si na lango 31 ti mai, ngu 1935, na yâ mbeni diskur so a mû ni na mbeni kota bungbi ti aTémoin ti Jéhovah na Washington, na Amerika, a fa na lege ti Mbeti ti Nzapa so “azo mingi so asi singo” ayeke “ambeni ngasangbaga” so aduti na fini na ngoi ti lâ ti nda ni (Jean 10:16). Na peko ti kota bungbi so, ambeni zo so giriri ayeke mû mapa na vin ti Mémorial azia ti mû ni ngbanga ti so ala bâ so beku ti ala ayeke ti ngbâ na fini ge na sese, me pëpe ti gue na yayu.
10. Mo yeke fa ande peko ti beku nga na akungba ti “ambeni ngasangbaga” ti laso tongana nyen?
10 A yeke mbilimbili ti londo na ngu 1935 si a to nda ti gi ala so ayeke duti ande na popo ti “ambeni ngasangbaga” so azia mabe ti ala na yâ kota ngele ti sandaga ti Christ, so amû tele ti ala mveni na Nzapa, na so ayeke mû maboko na “kete kundu” ti ala so a sa yingo na ndo ti ala, na yâ kusala ti fango tënë ti Royaume (Luc 12:32). Ambeni ngasangbaga so ayeke na beku ti duti na fini teti lakue lakue na ndo sese ge, me na yâ tanga ti aye kue, ala kpa tanga ti ahéritier ti Royaume so laso ade na sese. Legeoko na awande so ayeke dä na Israël giriri, so ayeke voro Jéhovah na ayeke bata Ndia ti Moïse, ambeni ngasangbaga so ayeke dä laso ayeda ti sala akusala ti aChrétien, na tapande fango nzo tënë na tele ti ala ti Israël ti yingo (aGalate 6:16). Ye oko, legeoko tongana ti so mbeni wande alingbi pëpe ti ga gbia wala prêtre na Israël, ala so ayeke ti ambeni ngasangbaga alingbi nga pëpe ti komande ande na yâ Royaume ti yayu, wala ti sala kusala tongana aprêtre.—Deutéronome 17:15.
11. Ngbanga ti nyen lango so mbeni zo amû na tele ti lo na Nzapa na lege ti batême alingbi ti sala ngangu na ndo beku ti lo?
11 Ni la, na yâ angu 1930, a to nda ti bâ polele so a hunzi biani awe ti soro bungbi ti ala so ayeke gue na yayu. Teti angu mingi fadeso awe, a yeke gi azo so ayeke ti ambeni ngasangbaga, na so beku ti ala ayeke ti wara fini na sese. Tongana mbeni Chrétien so a sa yingo na ndo ti lo atï, ti bâ ni nzoni biani, a yeke na popo ti ala so asala na Nzapa be-ta-zo aninga awe tongana mbeni oko ti ambeni ngasangbaga, si a yeke soro mbeni zo ti mû ande place so angbâ senge na yâ azo 144 000 so.
Ngbanga ti nyen ambeni apensé na lege ni pëpe so ala yeke gue na yayu?
12. Na angoi wa si a lingbi mbeni zo azia ti mû mapa na vin ti Mémorial? Ngbanga ti nyen?
12 A-Chrétien so a sa yingo na ndo ti ala ahinga tâ biani na yâ bê ti ala so a hiri ala ti gue na yayu. Me ye ni ayeke duti tongana nyen tongana ambeni zo so a hiri ala tongaso pëpe ayeke mû mapa na vin ti Mémorial? Teti ala hinga fadeso awe so a hiri ala lâ oko pëpe ti gue na yayu, kite ayeke pëpe so yingo-ti-hinga ti ala ayeke pusu ande ala ti zia ti te mapa na ti nyon vin ni. Fade Nzapa ayeke yeda pëpe na mbeni zo so atene na bê ti lo mveni so a hiri lo ti ga mbeni gbia na prêtre na yayu me so lo mveni ahinga biani so a hiri lo tongaso pëpe (aRomain 9:16; Apocalypse 20:6). Jéhovah afâ lani Koré so ayeke ti mara ti Lévi, teti so lo gi na lege ti fandara ti gbu na ngangu kungba ti prêtre so amû na Aaron (Exode 28:1; Nombre 16:4-11, 31-35). Tongana mbeni Chrétien abâ so lo yeke mû na lege ni pëpe mapa na vin ti Mémorial, a lingbi lo zia lege ti mungo ni na lo sambela Jéhovah na tâ be-ti-molenge ti mû pardon na lo.—Psaume 19:14.
13, 14. Ngbanga ti nyen ambeni zo apensé na lege ni pëpe so a hiri ala nga ti gue na yayu?
13 Ngbanga ti nyen ambeni apensé na lege ni pëpe so a hiri ala nga ti gue na yayu? Kuâ ti koli wala wali ti ala, wala mbeni ngangu kpale nde alingbi ti sala si nzara ti duti na fini na sese asigigi na yâ ti ala. Wala peut-être ala sala nzara ti duti na oko beku ti guengo na yayu ti mbeni kota kamarade ti ala so atene ni yeke mbeni Chrétien so a sa yingo na ndo ti ni. Biani, Nzapa amû yanga pëpe na mbeni zo ti soro amba ti lo teti matabisi so. Nga, lo yeke soro pëpe ahéritier ti Royaume ni na salango si ala mä ambeni go so ayeke tene na ala so a sa yingo na ndo ti ala awe.
14 Bibe ti wataka ti alege ti vorongo so atene azo ti nzoni kue ayeke gue na yayu alingbi ti pusu ambeni zo ti pensé so ala kue a hiri ala ti gue na yayu. Ni la, a yeke ti e ti sala hange si abango ndo ti wataka ti giriri wala ambeni ye nde asala ngangu pëpe na ndo ti e. Na tapande, ambeni alingbi ti hunda tele ti ala : ‘Mbi yeke nyon ambeni yorö so ayeke sala ngangu na ndo abibe ti mbi? Mbi yeke na ngangu bibe so ayeke pusu mbi ti pensé so mbi kue a sa yingo na ndo ti mbi?’
15, 16. Ngbanga ti nyen ambeni zo alingbi nga ti tene na lege ni pëpe so a sa yingo na ndo ti ala?
15 Ambeni peut-être alingbi ti hunda tele ti ala: ‘Mbi ye ti ga mbeni kota zo? Mbi yeke na kota nzara ti yô gi kungba fadeso, wala ti ga gi fon Christ ande na yâ ye ti héritier?’ Na ngoi so a hiri lani ahéritier ti Royaume na kozo siècle, a yeke ala kue pëpe si ayeke na akota kungba na yâ kongregation. Nga, azo so a hiri ala ti gue na yayu ayeke gi pëpe kota ndo wala ayeke pika kate pëpe teti beku ti ala. Ala yeke fa na gigi tâ be-ti-molenge so a yeke ku na mbage ti ala so ayeke na “bibe ti Christ.”—1 aCorinthien 2:16.
16 Ambeni atene peut-être na nda ni so a hiri ala nga ti gue na yayu ngbanga ti so ala yeke tâ na kota hingango ye mingi ti Mbeti ti Nzapa. Ye oko, tongana a sa yingo na ndo mbeni zo ti gue na yayu, ye so ayeke mû pëpe na lo mbeni gbungo nda ti ye so adö bê, teti Paul abâ lani so a lingbi lo fa lege na nga lo mû wango na ambeni Chrétien so a sa yingo na ndo ti ala (1 aCorinthien 3:1-3; aHébreu 5:11-14). Nzapa aleke ye ti mû kobe ti yingo na azo ti lo kue (Matthieu 24:45-47). Tongaso, a lingbi mbeni zo oko apensé pëpe so ti duti mbeni Chrétien so a sa yingo na ndo ti lo ayeke mû na lo mbeni ndara so ahon ti ala so ayeke na beku ti ngbâ na sese. A yeke pëpe kpengba kode ti kiringo tënë na ahundango tënë ti Bible, ti fango tënë wala ti mungo adiskur na ndo Bible si ayeke fa so zo tongaso, a sa yingo na ndo ti lo. A-Chrétien so ayeke na beku ti ngbâ na fini ge na sese ayeke sala nga nzoni mingi na lege so.
17. Sango yingo na ndo ti mbeni zo aga na lege ti nyen nga na ti zo wa?
17 Tongana mbeni ita ahunda tënë so andu beku ti gue na yayu, mbeni ancien wala mbeni Chrétien biazo alingbi ti sala lisoro na lo na ndo ni. Ye oko, mbeni zo alingbi pëpe ti mû desizion so na place ti mba ti lo. Zo so biani a hiri lo ti gue na yayu ayeke na bezoin pëpe ti hunda amba ti lo wala lo yeke na beku so. Ti aChrétien so a sa yingo na ndo ti ala, ‘A dü ala mbeni pëpe na lê ni so alingbi futi, me na lê ni so alingbi futi pëpe, na lege ti Tënë ti Nzapa, so ayeke na fini na angbâ lakue lakue.’ (1 Pierre 1:23). Na lege ti yingo ti lo nga na Tënë ti lo, Nzapa ayeke lu “lê ni” so asala si mbeni zo aga “création ti fini”, na beku ti gue na yayu (2 aCorinthien 5:17). Nga, a yeke Jéhovah si ayeke soro zo ni. Sango yingo na ndo zo ni ti gue na yayu ‘aga na lege ti zo pëpe teti lo ye wala teti lo kpe ti wara, me a londo na Nzapa’. (aRomain 9:16). Tongaso, tongana nyen mbeni zo alingbi ti hinga so biani a hiri lo ti gue na yayu?
Ngbanga ti nyen ala yeke na kite oko pëpe na ndo beku ti ala ti gue na yayu?
18. Tongana nyen yingo ti Nzapa ayeke sala tënë ti témoin na yingo ti aChrétien so a hiri ala ti gue na yayu?
18 A yeke yingo ti Nzapa si ayeke fa na aChrétien so a sa yingo na ndo ti ala so biani ala yeke na beku ti gue na yayu. Paul asû na mbeti: “I kamata Yingo so asala si i wara ndo-ti-molenge; na yâ Yingo so, e tene na kongo, Abba! Babâ! Yingo mveni asala tënë ti témoin na yingo ti e, Lo tene e yeke amolenge ti Nzapa. Na tongana e yeke amolenge, e yeke ahéritier, ahéritier ti Nzapa, na afon Christ na yâ ye ti héritier; tongana e hu pono legeoko na Lo, tongaso fade A mû gloire na e legeoko na Lo nga.” (aRomain 8:15-17). Teti so ala yeke na gbe ti ngangu ti yingo vulu, yingo wala bibe so afa lege ngangu na ala ayeke pusu aChrétien so a sa yingo na ndo ti ala, ti bâ so ye so Mbeti ti Nzapa ayeke tene na ndo amolenge ti Jéhovah na lege ti yingo andu mbilimbili ala (1 Jean 3:2). Yingo ti Nzapa amû na ala bibe so ala yeke amolenge ti Nzapa, na a dü na yâ ala mbeni beku so ayeke ti lo nde (aGalate 4:6, 7). Biani, ti duti na fini ti lakue lakue na ndo sese tongana zo so ayeke mbilimbili-kue nga na popo ti azo ti sewa ti mo na akamarade ti mo ayeke tâ pendere ye mingi; ye oko, so ayeke pëpe beku so Nzapa amû na ala. Na lege ti yingo ti lo, Nzapa ayôro na yâ ala mbeni beku ti gue na yayu so ayeke tâ ngangu mingi, a sala si ala yeke ndulu ti dö asongo na aye kue na sese ti zia ti hon.—2 aCorinthien 5:1-5, 8; 2 Pierre 1:13, 14.
19. Kusala wa fini mbele ayeke sala na yâ fini ti mbeni Chrétien so a sa yingo na ndo ti lo?
19 A-Chrétien so a sa yingo na ndo ti ala ayeke na kite oko pëpe so a hiri ala ti gue na yayu, nga so a te fini mbele na ala. Jésus asala tënë ni tongana lo zia na sese Mémorial; lo tene: “Kopo so ayeke fini mbele na yâ mênë ti Mbi, mênë so a sa teti i.” (Luc 22:20). Na yâ fini mbele so, a yeke wara Nzapa nga ala so a sa yingo na ndo ti ala (Jérémie 31:31-34; aHébreu 12:22-24). Jésus ayeke Wasalango songo ni. Teti so mênë ti Christ so a sa ni amû ngangu na ni, fini mbele ni agboto azo pëpe gi na popo ti aJuif me nga na popo ti amara teti iri ti Jéhovah na lo sala si ala ga mbage ti “hale” ti Abraham (aGalate 3:26-29; Kusala 15:14). “Mbele ti lakue lakue” so amû lege na azo kue ti Israël ti yingo ti londo na popo ti akuâ ti wara fini so a lingbi futi ni lâ oko pëpe kâ na yayu.—aHébreu 13:20.
20. Mbele wa si ala so a sa yingo na ndo ti ala ate na Christ?
20 Ala so a sa yingo na ndo ti ala ayeke na kite oko pëpe na ndo beku ti ala. A te na ala nga mbeni mbele nde, so ayeke mbele teti Royaume. Na ndo tënë ti dutingo ti ala oko na tele ti Christ, Jésus atene: “I yeke ala so angbâ na Mbi na yâ ye ti handa so atara Mbi; na Mbi mû royaume na i, legeoko tongana Babâ ti Mbi amû na Mbi”. (Luc 22:28-30). Mbele so a te na popo ti Christ na afon lo gbia so, ayeke ngbâ ande lakue na ngangu.—Apocalypse 22:5.
Ngoi ti Mémorial ayeke ngoi ti kota ngia
21. Tongana nyen e lingbi ti wara ye ti nzoni mingi na ngoi ti Mémorial?
21 Angoi ti ngia mingi ayeke dä tongana lango ti Mémorial ayeke pusu ndulu. E lingbi ti wara nzoni na lege ti programme ti dikongo Bible so a leke teti ngoi ni so. A yeke nga mbeni nzoni ngoi ti sambela, ti gbu li na ndo fini ti Jésus na sese nga na kui ti lo, na ti mû mbage na kusala ti fango tënë ti Royaume (Psaume 77:13; aPhilippien 4:6, 7). Matanga ni mveni adabe e na ndoye so Nzapa nga na Christ afa na lege ti sandaga ti kota ngele ti Jésus (Matthieu 20:28; Jean 3:16). Sandaga so amû na e beku nga na dengo bê na a lingbi a pusu e na ngangu ti sala kue ti ngbâ ti tambela na oko lege so Christ atambela dä (Exode 34:6; aHébreu 12:3). A lingbi Mémorial akpengba nga e si e sala ye alingbi na mungo tele ti e na Nzapa tongana awakua ti Lo, na si e ngbâ lakue adisciple be-ta-zo ti Molenge ti Lo so Lo ndoye mingi.
22. Matabisi so Nzapa amû na azo so ahon tanga ti amatabisi kue ayeke so wa? Nga mbeni oko lege ti fa bê ti kiri singila ndali ni ayeke so wa?
22 So apendere matabisi si Jéhovah amû na e! (Jacques 1:17). Tënë ti lo ayeke fa lege na e, yingo ti lo ayeke mû maboko na e, na nga e yeke na beku ti fini ti lakue lakue. Matabisi so Nzapa amû na so ahon atanga ni kue ayeke sandaga so Jésus amû teti siokpari ti ala so a sa yingo na ndo ti ala, nga teti tanga ti azo kue so afa mabe na gigi (1 Jean 2:1, 2). Tongaso, kui ti Jésus ayeke tâ kota ye biani teti mo? Fade mo yeke duti na popo ti azo so ayeke fa bê ti kiri singila ti ala ndali ni na bungbingo oko na lango 16 ti nze ti avril ngu 2003, na peko ti lindango ti lâ teti matanga ti Kobe ti Seigneur?
[Kete tënë na gbe ni]
^ par. 8 A yeke aTémoin ti Jéhovah si a sigigi na ni, me fadeso a zia lege ti sigingo na ni awe.
Fade mo kiri tënë tongana nyen?
• A lingbi azo wa si ate mapa na anyon vin ti Mémorial?
• Ngbanga ti nyen “ambeni ngasangbaga” ayeke ga na Kobe ti Seigneur gi ti bâ ni na yekiango ndo me pëpe ti mû mbage na kobe ni?
• Tongana nyen aChrétien so a sa yingo na ndo ti ala ayeke hinga so a hunda na ala ti mû mapa na vin ti Mémorial ti kui ti Christ?
• Ngoi ti Mémorial ayeke mbeni nzoni ngoi ti sala aye wa?
[Ahundango tënë ti manda na ye]
[Tënë na afoto na lembeti 18]
(Ti bâ tënë ni mbilimbili bâ buku ni
Wungo ti azo so aga na Mémorial
WUNGO NI NA KUTU
15 597 746
15
14
13 147 201
13
12
11
10
9
8
7
6
5
4 925 643
4
3
2
1
878 303
63 146
1935 1955 1975 1995 2002
[Foto na lembeti 18]
Fade mo yeke duti dä na matanga ti Kobe ti Seigneur ti ngu so?
[Afoto na lembeti 21]
Ngoi ti Mémorial ayeke mbeni nzoni ngoi ti kono mbage so mo yeke mû na dikongo Bible nga na fango tënë ti Royaume