Mango na bê na Nzapa so peut-être e hinga lo pëpe

NA Zamani, tongana a mû azo ota, use na popo ni amä na bê na Nzapa. Ye oko, tongana a hunda lani na azo ahon saki oko ti fa mara ti Nzapa wa ala mä na bê na ni, zo oko oko amû mbeni kiringo tënë so ayeke nde nde. Mbeti-sango FOCUS atene: “Azo ti Zamani oko oko ayeke na bango ndo so ayeke nde nde na ndo Nzapa”. Ti mä na bê na Nzapa ayeke ye ti gonda. Me, a yeke ye ti vundu ti mä na bê na lo sân ti hinga lo yeke mara ti Nzapa wa, ni la pëpe?

A yeke gi pëpe na Zamani si azo ahinga nzoni pëpe tongana nyen Nzapa ayeke; a yeke wara ni nga na ambeni ndo nde ti Poto. Mbeni gingo nda ti ye so a sala na Autriche, Grande Bretagne, nga na Pays-Bas afa so azo kue ayeda so Nzapa ayeke “mbeni ngangu so ayeke kota, wala mbeni ye so zo ahinga li ti lo na ni pëpe”. Mbilimbili na popo ti amaseka, même na popo ti ala so amä na bê na lo, Nzapa ayeke mbeni ye so mo lingbi ti hinga nda ni kue pëpe.

Mo hinga tâ lo Nzapa ni?

Kota kangbi ayeke na popo ti mango tënë na ndo ti mbeni zo na hingango tâ zo ni mveni. Ti mä tënë na ndo ti mbeni zo, na tapande, mbeni gbia so zo alingbi ti si ndulu na lo pëpe, mbeni wanguru so iri ti lo awu, wala mbeni walombe ti limon, aye gi ti tene ti hinga so zo ni ayeke dä. Ye oko, ti hinga tâ zo ni mveni andu aye mingi. Andu hingango salango ye ti zo ni, tambela ti lo, atënë ti bê ti lo, aye so lo ye na aye so lo ke, nga aye so lo leke ti sala teti kekereke. Ti hinga tâ zo ni mveni ayeke gue na mo ti leke kpengba songo na lo.

Azo saki ngbangbo mingi atene na nda ni so, ti hinga Nzapa gi tongaso wala ti hinga so lo yeke dä alingbi kue pëpe. Na ala gue juska ti hinga lo nzoni. Ala bâ so ayeke tâ na lege ni tongaso? Paul, mbeni koli so alango na banga ti Zamani, na so amä na bê lani na Nzapa gi tongaso, amû desizion ti hinga Lo nzoni mingi ahon ti kozo. Lo tene: “A hunda ngoi nga na ngangu ti gi ti hinga Nzapa nzoni. Ye oko, aye ti nzoni so aga na pekoni ayeke mingi. Ti duti na nzoni songo na Wasalango ye asala si fini ti zo ti lâ oko oko aga nzoni ahon ti kozo.”

Ngoi nga na ngangu so ahunda ti gi ti hinga Nzapa nzoni alingbi na ni? E hunda na mo ti diko article ti peko.

[Kete tënë na lembeti 3]

Kota kangbi ayeke na popo ti mango tënë na ndo ti mbeni zo na hingango tâ zo ni mveni