Atënë so azo ahunda

Na lege wa Ezéchiel aga “buburu”, wala ‘yanga ti lo akanga’, na ngoi so aturugu ase kando na tele ti Jérusalem, nga na ngoi ti futingo gbata so?

Mbilimbili na lege so lo yeke lani na mbeni ye nde pëpe ti zia na ndo tokua ti prophétie ti Jéhovah so lo fa ni awe.

Prophète Ezéchiel ato nda ti kusala ti lo ti sinziri be-ta-zo teti azo ti Israël, so ayeke na ngbâa na Babylone, na “ngu oku ni na peko ti lâ ni so a gue na gbia Jojakin na ngbâa,” so ti tene na ngu 613 kozoni na ngoi ti e (Ezéchiel 1:2, 3). Na lango bale-oko ti nze bale-oko ni ti ngu 609 kozoni na ngoi ti e, yingo ti Nzapa afa na lo tongo nda ti sengo kando ti aturugu ti Babylone na tele ti Jérusalem (Ezéchiel 24:1, 2). Ye nyen ayeke si ande na pekoni? Fade Jérusalem na azo ti lo so ayeke na mabe pëpe ayeke kpe ande? Na salango kua ti lo ti sinziri, Ezéchiel afa awe tokua ti Jéhovah na ndo vundu so ayeke si ande biani, na a hunda na Ezéchiel pëpe ti zia mbeni tënë na ndo ni, mo bâ mo tene lo ye ti sala si tokua ni akiri aga na azo ni ti yeda na ni. Yanga ti Ezéchiel akanga na ndo ambeni tënë nde kue so andu sengo kando na tele ti Jérusalem.​—Ezéchiel 24:25-27.

Nze omene tongaso na peko ti futingo Jérusalem na ngu 607 kozoni na ngoi ti e, mbeni zo so akpe aga na Ezéchiel, so ayeke na Babylone, asango na ndo bubango ti gbata ti nzoni-kue. Na bï so aga kozoni na singo ti zo so akpe, Jéhovah “alungula yanga ti [Ezéchiel] . . . ; na yanga ti [lo] alungula, na [lo] yeke buburu mbeni pëpe.” (Ezéchiel 33:22). Ye so ahunzi kangango yanga ti Ezéchiel.

Yanga ti Ezéchiel akanga biani na ngoi ni so? A yeke polele so a yeke tongaso pëpe. Biani, même na pekoni so ‘yanga ti lo akanga’, lo tene aprophétie mbilimbili na tele ti akodoro so ayeke ndulu na Jérusalem, na so ayeke na ngia ndali ti tingo ti lo (Ezéchiel, achapitre 25-32). Na tongo nda ti kusala ti Ezéchiel tongana prophète nga sinziri, Jéhovah atene na lo: “Fade Mbi sala si menga ti mo akanga na yanga ti mo, si mo ga buburu, na mo lingbi ga zo ti zingo na ala pëpe; teti ala yeke azo so ake tënë. Me tongana Mbi sala tënë na mo, fade Mbi lungula yanga ti mo.” (Ezéchiel 3:26, 27). Tongana Jéhovah ayeke na mbeni tokua pëpe teti Israël, a lingbi yanga ti Ezéchiel akanga na ndo mara so. Ezéchiel ayeke sala tënë gi tongana Jéhovah aye lo sala tënë, nga na ngoi so Jéhovah aye. Kangango yanga ti Ezéchiel andu salango pëpe atënë so prophétie ayeke na yâ ni teti azo ti Israël.

Bungbi ti sinziri ti laso, so a sa yingo na ndo ti lo, ayeke fa ye na ndo vundu so ayeke tï na ndo Chrétienté, so Jérusalem aduti fä ti lo lani. Tongana “kota ye ti vundu” atï na ndo ‘Babylone ti Kota’, bungbi ti alege ti vorongo ti wataka ti sese kue, na a futi lo, fade a yeke hunda pëpe na bungbi ti Ezéchiel, so a sa yingo na ndo ti lo, ti tene mbeni tënë nde na ndo futingo ti Chrétienté, kota mbage ti bungbi ti alege ti vorongo ti wataka so.​—Matthieu 24:21; Apocalypse 17:1, 2, 5.

Tâ tënë, ngoi ayeke ga ande so fade yanga ti tanga ti ala so a sa yingo na ndo ti ala nga na afon ala ayeke kanga. Ala yeke na mbeni tënë nde ti tene na Chrétienté pëpe. A yeke duti ande na ngoi so “nza bale-oko” nga na “nyama” ti ngonda ayeke futi Babylone ti Kota na lo yeke ngbâ senge senge (Apocalypse 17:16). Biani, so aye pëpe ti tene so fade yanga ti aChrétien ayeke kanga biani. Tongana ti so ala yeke sala fadeso, fade ala yeke sepela Jéhovah na ala sala tënë ti lo lâ na lâ nga “lakue lakue.”​—Psaume 45:18; 145:2.