‘Duti ndulu ti sala nzoni ye lakue’

‘ MO KIRI mo tene na azo kue, a lingbi ala mä yanga ti azo ti komandema na ti azo so ayeke na li ti kodoro; a lingbi ala sala ye so azo ni ahunda na ala ti sala; ala duti ndulu ti sala nzoni ye lakue.’ (Tite 3:1, Fini Mbuki, 2001). Nzo kusala wa bazengele Paul ayeke na ni na li ti lo tongana lo sû ândö atënë so na amba ti lo Chrétien? E. F. Scott, mbeni wandara na ndo Bible agboto lê na ndo ti mbeni lege ti salango nzo kusala tongana lo tene: “A-Chrétien ayeke mä lani pëpe gi yanga ti azo so ayeke na li ti kodoro, me ala yeke duti nga ndulu ti sala anzo kusala kue. . . . Tongana a hunda ti sala ni, aChrétien ayeke na popo ti akozo zo so ayeke sala kusala teti azo kue. Lakue a yeke wara awâ so ayeke gbi ndo, kobela ti futi kodoro, aye ti ngangu nde nde so ayeke pusu anzoni zo ti kodoro ti mû maboko na amba ti ala.”

A-Chrétien ayeke mû mbage ti ala na yâ ambeni kusala teti nzoni ti azo kue tongana akusala ni ague nde na andia ti Nzapa pëpe (Kusala 5:29). Na tapande, na mungo peko ti fango lege ti ndokua ti mingongo wâ na vaka ti ala, ngu oko oko biröo ti filiale ti aTémoin ti Jéhovah na Ebina na Japon ayeke fa peko ti ye so alingbi ti sala tongana wâ aye ti gbi ndo. Na ngoi ni so, sewa ti Béthel ni kue aga legeoko ti mä awango so mbeni zo so aga na iri ti ndokua ni ayeke mû.

Na ndo ni, teti angu bale-oko tongaso, filiale ti Japon asala kusala maboko na maboko na akota zo ti li ti kodoro ni na yâ mbeni fango ye, so a mû nginza ndali ni, ti sala si azo ahinga ti kpe aye so alingbi ti sala si wâ agbi ndo. Na ngoi ti fango ye ni, andokua ti kodoro ni afa na gigi tongana nyen ala yeke ndulu ti mingo wâ na ti kanga lege na ni. Fani mingi a gonda filiale ni ndali ti akode nga na mungo maboko ti aita ni. Na ngu 2001, a mû na ala kozo matabisi ni na yâ fango ye ni. Ala yeke duti ndulu ti sala nzo kusala so alingbi ti sö fini ti zo tongana wâ asi.

Mbeni kusala ti ngele mingi

Ye oko, aTémoin ti Jéhovah ayeke bi bê ti ala na ndo mbeni nzo kusala so ahon tanga ti akusala kue na so ayeke sö nga fini ti zo. Ala yeke gue lakue na ndo ti amba ti ala ti fa nzo tënë ti Royaume ti Nzapa (Matthieu 24:14). A-Témoin ayeke wa azo ti manda na ti sala kusala na akpengba-ndia ti Bible na yâ fini ti ala, na tongaso, ti sala si fini ti ala ti fadeso aga nzoni ahon ti kozo, nga ti wara beku ti fini ti lakue lakue na yâ mbeni sese so tâ siriri nga na nzoni dutingo ayeke mû ande ndo kue.

Ambeni zo ayeke bâ na nene ni pëpe kota ti kusala so aTémoin ti Jéhovah ayeke sala. Ala yeke bâ ala tongana azo ti songo li senge. Ye oko, Jean Crepeau, mbeni Wafango ngbanga ti Kota Da-ngbanga ti Québec na Canada ayeke ti lo lani na mbeni bango ndo so ayeke nde. A-Témoin ti Jéhovah ti kodoro ni ayeda pëpe na mbela ti da-gbata ti Blainville na Québec so ahunda na ala ti duti na mbeni mbeti so amû lege na ala ti fa tënë da na da. Na yâ ndangba tënë ti da-ngbanga ni, Wafango ngbanga Crepeau atene: “Fango tënë ti aTémoin ti Jéhovah ayeke mbeni kusala ti aChrétien ti mû maboko na azo,  nga . . . ambeti so aTémoin ayeke mû na azo ti gbata ni so asala nzara ni ayeke na nene ni mingi; ambeti ni asala tënë na ndo lege ti vorongo, Bible, ambangi, dutingo ngbâa ti sämba, fango lege na amaseka, akpale ti mariage nga na fango yâ ti mariage.” Ndangba tënë ti awafango ngbanga ni atene: “Da-ngbanga ni alingbi gi ti tene na nda ni so, a yeke ye ti zonga, bubango iri, ye ti songo bê, nga na atënë ti wataka ti haka aTémoin ti Jéhovah na azo ti dengo buze.”

A-Témoin ti Jéhovah ayeke mû mbage ti ala na nzoni duti ti azo na ndo so ala ayeke dä na mungo maboko na azo ti hon ndo ti akpale ti ala ti lâ oko oko na ti mû na ala beku teti kekereke. Bible amû na ala aye kue so a hunda ti sala na kusala ni. “Tënë kue ti Mbeti ti Nzapa alondo na yanga ti Nzapa, na a yeke nzoni ti fa nda ti tënë, ti zingo na zo, ti kiri zo na lege ni, na ti fa na zo lege ti sala ye mbilimbili, si zo ti Nzapa alingbi kue, na lo wara ye kue alingbi teti nzo kusala kue.”​—2 Timothée 3:16, 17.

Mo ye ti hinga tongana nyen aTémoin ti Jéhovah ayeke ‘duti ndulu ti sala nzoni ye lakue’? E hunda na mo ti yeda na mungo maboko ti ala ti manda aye mingi na ndo Bible na tongaso ti yeda mo mveni na kpengba kusala ti mungo maboko na azo so ala yeke sala ni na yâ vaka ti mo nga na ndo sese kue.

[Afoto na lembeti 30, 31]

A-Témoin ti Jéhovah ayeke gi ti sala kusala maboko na maboko na akota zo ti li ti kodoro

[Foto na lembeti 31]

A hinga aTémoin na mungo maboko na amba ti ala