‘I mû singila’

“I zia siriri ti Christ akomande bê ti i, . . . na i mû merci.”​—ACOLOSSIEN 3:15.

A YEKE wara bibe ti kiri singila na yâ ti akongregation 94 600 ti aTémoin ti Jéhovah na ndo ti sese kue. Bungbi oko oko ayeke to nda ni na ayeke ko nda ni na mbeni sambela so a wara atënë ti singila na Jéhovah na yâ ni. Mingi ni e yeke mä tënë “singila” na yanga ti amaseka na akangba, nga na yanga ti afini nga na angbele Témoin na ngoi so ala bungbi oko na yâ vorongo nga na yâ songo so amû ngia (Psaume 133:1). So tâ kota kangbi si ayeke na popo ti ye so na bê ti kion so amû ndo na popo ti azo mingi ‘so ahinga Jéhovah pëpe, na ala so ake ti mä nzo tënë’! (2 aThessalonicien 1:8). E yeke na yâ ti mbeni sese so ahinga ti kiri singila pëpe, na a yeke ye ti dongo bê pëpe, tongana e hinga zo so ayeke nzapa ni, Satan Zabolo so ayeke na bibe ti kion ahon azo kue. Baba nga bibe ti Satan ti ke yanga amû yâ ti bungbi ti azo kue!​—Jean 8:44; 2 aCorinthien 4:4; 1 Jean 5:19.

² Teti so sese ti Satan angoro e kue, a lingbi e sala hange si abango ndo ti lo asala pëpe si e ga sioni. Na kozo siècle, bazengele Paul adabe ti aChrétien ti Ephèse: “I tambela  . . giriri na lege ti sese so, na lege ti mokonzi ti angangu ti nduzu, yingo so ayeke sala na yâ amolenge ti azo so ake tënë. Giriri, na lege ti nzara ti mitele ti e, e kue  aduti na popo ti ala so nga, e sala ye so mitele na bibe aye; na lege ti dungo ti e, e yeke amolenge ti ngonzo, legeoko tongana atanga ni.” (aEphésien 2:2, 3). Ye so ayeke tâ tënë nga na ndo azo mingi laso. Tongaso, tongana nyen e lingbi ti bata bibe ti kiri singila? Jéhovah ayeke mû maboko tongana nyen? Na yâ ambilimbili lege wa e lingbi ti fa so e hinga biani ti kiri singila?

Anda ti tënë ti kiri singila

³ A yeke na Jéhovah Nzapa, Wasalango e nga Zo ti mû fini na e, si a lingbi e kiri singila, mbilimbili tongana e bâ ambeni ti gbâ ti adeba nzoni so lo tuku na ndo ti e (Jacques 1:17). Lâ na lâ, e yeke kiri singila na Jéhovah teti so e yeke na fini (Psaume 36:10). Na tele ti e, e yeke bâ aye mingi so afa na gigi akusala so maboko ti Jéhovah asala, tongana lâ, nze, na atongoro. Sese ti e so ayeke na gbâ ti aye so asala si fini angbâ dä; pupu so angoro sese ti e, so a leke aye na kode na yâ ni; tambelango ti akpengba ye na yâ gigi, tongana tambela ti ngu. Aye so kue afa so a lingbi e kiri singila na Babâ ti e ti yayu so ayeke ndoye. Gbia David ahe bia: “O L’Eternel Nzapa ti mbi, kusala ti kpene ti Mo, na bibe ti Mo teti e awu mingi; zo oko ti lingbi na Mo ayeke pëpe; tongana mbi ye ti sala tënë ti kusala ti Mo, fade a yeke mingi mingi, zo alingbi diko kue pëpe.”​—Psaume 40:6.

⁴ Atâa so ala yeke pëpe na yâ mbeni tâ paradis, awakua ti Jéhovah laso ayeke na yâ mbeni paradis ti yingo. Na aDa ti Royaume nga na akota bungbi ti e, e yeke bâ tongana nyen lengo ti yingo ti Nzapa ayeke sala kusala na yâ amba ti e wamabe. Biani, tongana ala yeke fa tënë na azo so ahinga tënë ti Nzapa kete wala oko pëpe, ambeni Témoin ayeke sala tënë ti ye so Paul afa pekoni na yâ mbeti so lo to na azo ti Galatie. Ala gboto lê kozoni na ndo ‘akusala ti mitele’, nga na pekoni ala hunda na azo ni ye so ala bâ awe (aGalate 5:19-23). Mingi ti ala ayeke ndulu ti yeda so a yeke hinga sese ti laso na lege ti aye so. Tongana a fa na ala ye so lengo ti yingo ti Nzapa ayeke, nga na pekoni so a tisa ala na Da ti Royaume ti ndo ni ti tene ala mveni abâ ni na lê ti ala, hio mingi ti ala ayeda: “Nzapa ayeke na popo ti i biani.” (1 aCorinthien 14:25). Me so angbâ gi na Da ti Royaume pëpe. Tambela mo  gue na kodoro kue so mo lingbi ti gue dä, tongana mo tingbi na mbeni oko ti aTémoin ti Jéhovah kutu omene so, mo yeke bâ oko ngia so. Tâ tënë, songo so akpengba zo so ayeke mbeni nda ti ye ti kiri singila na Jéhovah, lo so amû yingo ti lo si ye tongaso alingbi ti duti dä.​—Sophonie 3:9; aEphésien 3:20, 21.

⁵ Matabisi so ayeke kota nga mbilimbili ahon atanga ni kue so Jéhovah amû, ayeke ti Molenge ti lo, Jésus, so na lege ti lo a mû sandaga ti kota ngele. Bazengele Jean asû na mbeti: “Tongana Nzapa andoye e tongaso, a lingbi e ndoye tele ti e na popo ti e nga.” (1 Jean 4:11). Biani, a yeke hinga so e kiri singila teti kota ngele gi pëpe na lege ti fango ndoye nga na singila ti e na mbage ti Jéhovah, me nga na dutingo na fini na mbeni lege so afa so e ndoye ambeni zo.​—Matthieu 22:37-39.

⁶ E lingbi ti kiri ti manda ye mingi na ndo fango na gigi singila na bango lege so Jéhovah asala ye na mbage ti Israël ti giriri. Jéhovah asala kusala na Ndia, so lo mû na mara ni na lege ti Moïse, ti fa na amolenge ti Israël aye mingi. Na lege ti “ndia so hingango ye na tene-biani ayeke na yâ ni”, e lingbi ti manda ye mingi so ayeke mû ande maboko na e ti mû peko ti wango ti Paul: “I mû merci.”​—aRomain 2:20; aColossien 3:15.

Aye ti manda ota na yâ Ndia ti Moïse

⁷ Na yâ Ndia ti Moïse, Jéhovah amû aye ota so na lege ni azo ti Israël alingbi ti fa tâ bê ti kiri singila ti ala teti nzoni bê ti lo. Kozoni, a yeke mungo dîme. A lingbi dîme ti aye ti yaka wala ti lê ti keke, legeoko na “dîme kue ti akota nyama wala ti akete nyama,” aga mbeni ye so “ayeke nzoni-kue teti L’Eternel.” (Lévitique 27:30-32). Tongana amolenge ti Israël amä yanga, Jéhovah ahiri deba nzoni mingi na ndo ti ala. “I ga na dîme kue na yâ da ti batango mosoro, si kobe ayeke na da ti Mbi; i tara Mbi na ye so fadeso, L’Eternel Ti Sabaoth atene, ti bâ tongana Mbi lungula fenêtre ti yayu na i pëpe, na Mbi sa na ndo i ye ti nzoni so ndo alingbi na ni pëpe.”​—Malachie 3:10.

⁸ Use ni, na ndo ti dîme so a hunda, Jéhovah aleke teti amolenge ti Israël ti mû a-offrande ti bê ti ala mveni. Lo mû yanga na Moïse ti tene na amolenge ti Israël: “Tongana i si na sese so Mbi sala si i gue dä, na tongana i te kobe ti sese ni, a lingbi i mu offrande ti yango-na-nduzu na L’Eternel.” A lingbi ala mû ambeni ti “gato ti kozo fuku” tongana kozo ye na ‘offrande na Jéhovah’ na yâ awagame ti ala kue. Bâ so a hunda pëpe mbeni mbilimbili  wungo ti akozo ye (Nombre 15:18-21). Me tongana amolenge ti Israël amû mbeni offrande ti kiri singila, ala hinga biani so ala yeke wara deba nzoni ti Jéhovah. A bâ mara ti lekengo ye tongaso na ndo temple so Ezéchiel abâ na yâ suma. E diko: “Kozo ye ti kozo le-kobe kue, na offrande kue ti ye kue so i mû na offrande, ayeke teti asacrificateur. Fade i mû kozo fuku ti i na asacrificateur ti sala si tënë nzoni aduti na ndo da ti i.”​—Ezéchiel 44:30.

⁹ Ota ni, Jéhovah aleke ti tene a ro le-kobe kue na yaka pëpe. Lo mû yanga: “Tongana mo fâ le-kobe na yaka ti mo, a lingbi mo fâ ti mbundu ti yaka ti mo kue pëpe, na mo ro le-kobe ti mo kue pëpe. Mo ko lê ti vigne ti yaka ti vigne ti mo kue pëpe, na mo ro lê ni so atï na sese na yaka ti vigne ti mo nga pëpe; mo zia lê ni so angbâ teti wanzinga na wande so aduti na mo​—Mbi yeke L’Eternel Nzapa ti i!” (Lévitique 19:9, 10). Ti so nga, a kiri a fa pëpe mbeni mbilimbili wungo ti ye. A yeke lani na zo ti Israël oko oko ti bâ aye oke lo yeke zia teti azo ti mawa. Gbia ti ndara, Salomon, afa nda ni tâ na lege ni: “Zo so asala be-nzoni na awanzinga, lo mû [bon] na L’Eternel, na fade L’Eternel afuta lo teti nzo kusala ti lo.” (aProverbe 19:17). Tongaso, Jéhovah afa ye na ndo bango mawa ti azo so ye atia ala nga na ndo bango ala na nene ni.

¹⁰ Jéhovah ahiri lani deba nzoni na ndo amolenge ti Israël tongana ala mä yanga ti mû dîme, a-offrande ti bê ti ala mveni, nga tongana ala mû mbeni ye na azo ti mawa. Me tongana azo ti Israël afa bê ti kiri singila pëpe, ala nzere na lê ti Jéhovah mbeni pëpe. Ye so aga na ala vundu nga na nda ni a gue na ala na ngbâa na kodoro wande (2 Chronique 36:17-21). Tongaso, e lingbi ti manda aye wa dä?

Fango bê ti kiri singila ti e

¹¹ Kota lege so e lingbi ti sepela Jéhovah na ti fa bê ti kiri singila ti e, legeoko tongaso, andu nga “mungo ye.” Tâ tënë, e aChrétien, e yeke na gbe ti Ndia ti Moïse pëpe, so ahunda ti mû asandaga ti anyama wala ti le-kobe (aColossien 2:14). Ye oko, bazengele Paul awa aChrétien Hébreu tongaso: “A lingbi e mû sacrifice ti merci na Nzapa lakue . . . sacrifice so ayeke lengo ti yanga so asepela iri ti Lo.” (aHébreu 13:15). Na salango kusala na angangu nga na mosoro ti e ti mû sandaga ti sepela na Jéhovah, atâa na yâ fango tënë wala na yâ “bungbi” ti amba ti e wamabe, e lingbi ti fa singila ti bê ti e na Babâ ti e ti yayu so andoye e, Jéhovah Nzapa (Psaume 26:12). Na yâ salango ye tongaso, e lingbi ti manda nyen na ndo alege so amolenge ti Israël afa bê ti kiri singila ti ala na Jéhovah?

¹² Kozoni kue, tongana ti so e bâ awe, mungo dîme ayeke pëpe mbeni ye ti soro; na yâ ye so, zo ti Israël oko oko ayeke na kungba ti yô ni. E aChrétien, e yeke na kungba ti mû mbage ti e na fango tënë nga ti gue na abungbi ti aChrétien. Akusala so ayeke aye ti sorongo ni pëpe. Na yâ kota prophétie ti lo na ndo lâ ti nda ni, Jésus atene polele: “Fade a fa Tene-nzoni so ti royaume na sese so kue teti tënë ti témoin na amara kue; na tongaso fade nda ni aga.” (Matthieu 24:14; 28:19, 20). Na ndo abungbi ti aChrétien, yingo ti Nzapa apusu bazengele Paul ti sû na mbeti: “A lingbi e bi bê ti e na ambeni zo na popo ti e ti wa ala si ala ndoye azo, na ala sala kusala nzoni; a lingbi e zia ti bungbi pëpe, legeoko tongana ambeni zo asala, me e wa tele ti e na ambeni zo, na a lingbi i wa tele ti i mingi ahon teti i bâ so lâ ni aga ndulu.” (aHébreu 10:24, 25). E yeke fa bê ti kiri singila ti e na Jéhovah tongana, na ngia, e yeda na kungba ti e ti fa tënë na ti fa ye, legeoko ti bungbi oko na aita ti e lakue na abungbi ti kongregation, na bango ye so tongana mbeni kota ye nga ye ti gonda.

¹³ Na ndo ni, e lingbi ti wara ye ti nzoni na bango ambeni ye use so a leke lani, so na lege  ni amolenge ti Israël alingbi ti fa bê ti kiri singila ti ala: offrande ti bê ti zo mveni nga ti ro le-kobe na yaka kue pëpe. Nde na dîme, so a hunda polele ti yô mbeni kungba, a-offrande ti bê ti zo mveni nga ti ro le-kobe na yaka kue pëpe ayeke ambeni ye so ahunda mbilimbili wungo ti ye pëpe. Nde na so, a zia si kota ti singila so asi bê ti mbeni wakua ti Jéhovah apusu lo ti sala ye. Legeoko nga, atâa so e hinga so mungo mbage na fango tënë nga guengo na abungbi ti aChrétien ayeke mbeni kota kungba teti wakua oko oko kue ti Jéhovah, e yeke mû mbage dä na bê ti e kue na bibe ti duti ndulu ti sala ye? E yeke bâ ni tongana mbeni lege so azi na e ti fa singila ti bê ti e ndali ti aye kue so Jéhovah asala teti e? E zia ngangu ti e kue na yâ akusala so, tongana dutingo ti e mveni amû lege ti sala tongaso? Wala e bâ aye so kue tongana mbeni kungba so a lingbi e yô gi ni awe? Biani, a lingbi e oko oko e kiri tënë na ahundango tënë so. Bazengele Paul afa ni na lege so: “A lingbi zo atara kusala ti lo mveni ti bâ tongana a lingbi, tongaso fade lo lingbi yä iri ti lo teti kusala ti lo mveni, na teti kusala ti mbeni zo pëpe.”​—aGalate 6:4.

¹⁴ Jéhovah Nzapa ahinga dutingo nga na akatikati ti e nzoni mingi. Lo bâ na nene ni asandaga kue, akota ni wala akete ni, so awakua ti lo ayeke mû na bê kue. Lo ku pëpe ti tene e kue e yeke mû ande oko wungo ti ye, na e lingbi nga ti sala tongaso pëpe. Tongana lo yeke sala tënë na ndo mungo aye ti mitele, bazengele Paul atene na aChrétien ti Corinthe: “Tongana mbeni zo ayeke na nzara ti mû ye, na lo mû ye so alingbi na ye so ayeke na lo, so ayeke nzoni; a hunda lo pëpe ti mû ye so ayeke na lo pëpe.” (2 aCorinthien 8:12). Kpengba-ndia so alingbi nga na kusala ti e na Nzapa. A yeke hinga ye so asala si Jéhovah ayeda na kusala ti e, pëpe na lege ti wungo ti aye so e sala, me na lege so e sala ni, na ngia nga na bê kue.​—Psaume 100:1-5; aColossien 3:23.

Maï bibe ti pionnier na bata ni

¹⁵ Mbeni nzoni lege ti fa bê ti kiri singila ti e  na Jéhovah ayeke ti lï na yâ kusala ti fango tënë ti ngoi kue. Ndali ti so ndoye teti Jéhovah nga singila teti nzobe ti lo apusu ala, awakua mingi so amû tele ti ala na Nzapa agbian akota ye na yâ fini ti ala ti wara ngoi mingi ti sala na Jéhovah. Ambeni awara lege ti sala kua tongana apionnier permanent, na mungo angbonga 70 na nze oko oko ti fa nzo tënë na ti fa tâ tënë na azo. Ambeni nde, so aye nde nde akanga lege na ala, aleke ngoi na ngoi ti mû angbonga 50 na nze oko oko ti fa tënë tongana apionnier auxiliaire.

¹⁶ Me ka ti awakua mingi ti Jéhovah so alingbi pëpe ti sala kua tongana apionnier permanent wala auxiliaire? Ala lingbi ti fa bê ti kiri singila ti ala na maïngo bibe ti pionnier nga na batango ni. Tongana nyen? Na mungo ngangu na ala so alingbi ti sala kua ti pionnier, na yorongo yeke yeke na yâ amolenge ti ala mveni nzara ti sala si kusala ti ngoi kue aga kua ti ala ti lakue, nga na mungo mbage na bê kue na fango tënë alingbi na dutingo ti ala. Ye so e mû na yâ fango tënë ti e aluti mingi na ndo kota ti singila so ayeke na yâ bê ti e teti ye so Jéhovah asala awe, so lo yeke sala fadeso, nga so lo yeke sala ande teti e.

E fa bê ti kiri singila ti e na ‘aye ti ngele ngangu’ ti e

¹⁷ Mbeti ti aProverbe 3:9 atene: “Mo yä iri ti L’Eternel na lege ti ye ti mo [ti ngele ngangu], na kozo lengo ti ye ti mo kue nga.” A hunda na awakua ti Jéhovah mbeni pëpe ti mû dîme. Nde na so, Paul asû mbeti na kongregation ti Corinthe: “Zia azo oko oko kue amû ye tongana bê ti ala aye, na vundu pëpe, wala na forcé pëpe; teti Nzapa andoye zo so amû matabisi na ngia.” (2 aCorinthien 9:7). Mungo a-offrande zo mveni, so amû maboko na kusala ti fango tënë ti Royaume na ndo sese kue, ayeke fa nga na gigi bê ti kiri singila ti e. Singila so alondo na bê apusu e ti sala ye so lakue, peut-être na ziango nde mbeni ye teti yenga oko oko, tongana ti so akozo Chrétien asala lani.​—1 aCorinthien 16:1, 2.

¹⁸ A yeke pëpe wungo ti ye so e mû si afa bê ti kiri singila ti e na Jéhovah. Nde na so, a yeke bibe so e yeke mû na ni. A yeke ye so Jésus agboto lê dä na ngoi so lo yeke bâ azo na bingo amatabisi ti ala na yâ asanduku ti nginza ti temple. Tongana lê ti Jésus atï na ndo mbeni womua so ye atia lo mingi na bingo “kete nginza use”, lo tene: “Biani, Mbi tene na i, womua so, so ayeke wanzinga, amû matabisi kota ahon ala kue. Teti ala so kue azia na yâ sanduku ni gi nginza so ayeke senge na lê ti ala; me womua so azia ye ti nzinga ti lo na yâ ni, même ye kue so ayeke na lo ti vo kobe ti lo.”​—Luc 21:1-4.

¹⁹ Zia si ye so e kiri e bâ na ndo tongana nyen e lingbi ti fa bê ti kiri singila ti e apusu e ti kiri ti bâ alege so e yeke sala na ni. E lingbi ti mû mingi ahon ti kozo sandaga ti e ti sepela Jéhovah, nga ti mû maboko na lege ti mitele na kusala so a yeke sala na ndo sese kue? Tongana e sala tongaso, e lingbi ti hinga na bê kue so tele ti Babâ ti e ti ndoye so ayeke na bê ti mû ye, Jéhovah, ayeke nzere ndali ti so e fa so e hinga ti kiri singila.

Mo dabe mo na ni?

• Ndali ti aye wa a lingbi e kiri singila na Jéhovah?

• Aye wa e manda na lege ti dîme, mungo a-offrande ti bê ti zo mveni, nga rongo tanga ti ale-kobe pëpe?

• Tongana nyen e lingbi ti maï bibe ti pionnier?

• Tongana nyen e lingbi ti mû ‘aye ti ngele ngangu’ ti e ti kiri singila na Jéhovah?

[Ahundango tënë ti manda na ye]

1. Kangbi wa e yeke bâ na popo ti kongregation ti aChrétien nga na sese so ayeke na gbe ti Satan?

2. Gbotongo mê wa a lingbi e bata, na fade e yeke bâ ahundango tënë wa?

3. E yeke kiri singila na Jéhovah teti aye wa?

4. Ngbanga ti nyen a lingbi e kiri singila na Jéhovah teti songo ti ngia so e yeke na ni na yâ kongregation?

5, 6. Tongana nyen e lingbi ti fa so e kiri singila teti kota ngele, matabisi ti Nzapa so ayeke kota ahon atanga ni kue?

7. Tongana nyen mungo dîme azi lege na amolenge ti Israël ti fa bê ti kiri singila ti ala na Jéhovah?

8. Mungo offrande ti bê ti zo mveni ayeke nde na dîme tongana nyen?

9. Jéhovah afa nyen na lege ti so lo hunda ti tene a zia tanga ti le-kobe na yaka teti ambeni zo?

10. Aye wa asi na pekoni na azo ti Israël tongana ala fa bê ti kiri singila pëpe?

11. Kota lege so e lingbi ti fa singila ti e na Jéhovah ayeke so wa?

12. Na ndo kungba ti e ti Chrétien, e lingbi ti manda nyen na ndo mungo dîme?

13. Ye wa e manda na lege ti aye so a leke teti a-offrande ti bê ti zo mveni, nga teti rongo ale-kobe kue pëpe?

14. Jéhovah ayeke ku nyen na mbage ti e na yâ kusala ti lo?

15, 16. (a) Kamba wa ayeke na popo ti kusala ti pionnier na mungo singila? (b) Tongana nyen azo so alingbi pëpe ti mû kua ti pionnier alingbi ti fa na gigi bibe ti pionnier?

17, 18. (a) Tongana nyen e lingbi ti mû ‘aye ti ngele ngangu’ ti e ti fa bê ti kiri singila ti e? (b) Jésus atene nyen na ndo offrande so mbeni womua amû, na ngbanga ti nyen?

19. Ngbanga ti nyen a yeke nzoni ti kiri ti bâ alege so e yeke fa bê ti kiri singila ti e?

[Afoto na lembeti 15]

“Matabisi kue ti nzoni na matabisi kue so alingbi kue alondo na nduzu”

[Afoto na lembeti 16]

A fa ge aye ti manda ota wa na yâ Ndia ti Moïse?

[Afoto na lembeti 18]

Asandaga wa e lingbi ti mû?