‘Wara ngia ti mo na yâ Jéhovah’

“Wara ngia ti mo na yâ L’Eternel, na fade Lo mû na mo ye so bê ti mo aye.”​—PSAUME 37:4.

“NGIA ayeke na azo so ahinga ye ti yingo amanke ala, . . . ngia ayeke na azo so asala be-nzoni na azo, . . . ngia ayeke na awasala-songo.” Legeoko na ambeni tënë omene so afa azo wa si ayeke na ngia, atënë so ayeke na yâ akozo kpengba tënë so Jésus atene na yâ Fango ye ti lo na ndo ti Hoto, so azo ahinga ni mingi. A yeke wasungo Évangile, Matthieu, si asû atënë so na mbeti (Matthieu 5:3-11). Atënë ti Jésus so afa biani na e so e lingbi ti wara ngia.

² Mbeni psaume so Gbia David ti Israël ti giriri asû ni, agboto lê na ndo Lingu ti tâ ngia, Jéhovah. David atene: “Wara ngia ti mo na yâ L’Eternel, na fade Lo mû na mo ye so bê ti mo aye.” (Psaume 37:4). Me nyen la alingbi ti sala si hingango Jéhovah na mingi ti ambage ti salango ye ti lo aga mbeni ye so ayeke mû “ngia”? Tongana nyen gingo ti hinga ye so lo sala awe nga so lo yeke sala ande, ti tene ye so lo leke ti sala aga tâ tënë, ayeke mû na mo beku ti wara “ye so bê ti mo aye”? Hasango yâ ti atënë ti Psaume 37, versê 1 ti si na 11, ayeke kiri tënë na ahundango tënë so.

“Bê asala mo pëpe”

³ E yeke na “lâ ti ye ti ngangu,” so sioni awu dä mingi. E bâ awe gango tâ tënë ti atënë ti bazengele Paul: “Fade lege ti azo ti sioni na azo ti handa azo aga sioni ahon, ala yeke handa azo, na azo ahanda ala.” (2 Timothée 3:1, 13). A yeke ngangu oko pëpe ti tene, ye so akpa nzoni maïngo ti azo ti sioni nga na mosoro ti ala, asala ngangu na ndo e! Aye so kue alingbi ti gboto lê ti e yongoro si e bâ ndo na lege ti yingo mbilimbili mbeni pëpe. Bâ tongana nyen akozo tënë ti Psaume 37 afa na e ye so alingbi ti duti ande mbeni kpale: “Zia bê ti mo agi mo pëpe tënë ti azo so asala sioye, na bê asala mo pëpe ngbanga ti ala so asala kirikiri.”

⁴ Lâ na lâ, andokua ti sango ayeke tokua na e gbâ ti aye ti kirikiri so azo asala na amba ti ala. Azo ti dengo buze ayeke sala ye na lege ti nzi, na mbeni ye ti warango ala ayeke pëpe. Azo ti kengo ndia ayeke sala sioni na azo so ye ti bata ala ayeke pëpe. A yeke gbu azo ti fango zo pëpe, wala a sala ye na ala pëpe. Mara ti atapande so kue, ti bubango yâ ti ye ti mbilimbili, alingbi ti zia ngonzo na bê ti e na ti buba siriri ti bibe ti e. Ye so akpa nzoni maïngo ti aye ti azo ti sioni alingbi ti sala si bê asala e. Me ngonzo ti e alingbi ti leke ye ni nzoni? Aye so akpa aye ti nzoni so  azo ti sioni awara ayeke gbian ye so ayeke si na nda ni na ala? Oko pëpe! Mbeni nda ti tënë ayeke biani dä pëpe ti tene ‘bê ti e agi e’. Ngbanga ti nyen?

⁵ Wasungo psaume akiri tënë: “Fade a fâ ala na sese fade fade tongana pele, na fade ala kpi tongana fini kasa.” (Psaume 37:2). Fini pele alingbi ti duti pendere, me hio akugbe ni ahule na akui. A yeke legeoko tongaso na azo ti sioni. Mosoro ti ala, so zo abâ atene a yeke maï, ayeke ngbâ lakue pëpe. Tongana ala kui, aye so ala wara na lege ti nzi ayeke mû maboko na ala mbeni pëpe. Na nda ni zo oko oko ayeke wara ye so ye ti mbilimbili ahunda. Paul atene so “futa ti siokpari ayeke kui”. (aRomain 6:23). Azo ti sioni nga na azo kue so asala ye ti kirikiri ayeke wara na nda ni gi “futa” ti ala. So ayeke biani mbeni fini so aga na ye ti nzoni kete pëpe!​—Psaume 37:35, 36; 49:16, 17.

⁶ Tongaso, a lingbi e zia si mosoro so ayeke ninga pëpe ti azo ti sioni abuba bê ti e? Ye ti manda na lege ti a-use kozo versê ti Psaume 37 ayeke so: Zia nzoni so ala wara asala pëpe si mo gue nde na lege so mo soro ti sala na Jéhovah. Nde na so, zia lê ti mo angbâ na ndo adeba nzoni nga na aye so mo zia na gbele mo ti sala na lege ti yingo.​—aProverbe 23:17.

‘Zia bê ti mo na Jéhovah na sala nzoni’

⁷ Wasungo psaume awa e ti ‘zia bê ti e na Jéhovah na ti sala nzoni’. (Psaume 37:3a). Tongana agingo bê, wala même akite ahon ndo ti e, a lingbi bê so e zia kue na Jéhovah aluti ngangu. Lo yeke Zo so ayeke bata e nzoni biani na lege ti yingo. Moïse asû na mbeti: “Lo so aduti na ndo ti lingo ti Lo Ti Nduzu Ahon Kue, fade lo duti na gbede ti Lo Ti Ngangu Ahon Kue.” (Psaume 91:1). Tongana guengo na li ni ti kengo ndia na yâ sese so asala si e gi bê ti e, a lingbi e kiri e zia bê ti e na Jéhovah mingi ahon ti kozo. Tongana kamba ti gere ti e awara sioni si e tambela gbä, a yeke nzere na e ti tene mbeni kamarade amû maboko na e. Legeoko nga, tongana e yeke sala ngangu ti tambela na dutingo be-ta-zo, a lingbi e wara mungo maboko ti Jéhovah.​—Esaïe 50:10.

⁸ Ti tene mosoro ti azo ti sioni abuba bê ti e pëpe, mbeni yorö ni ayeke ti duti na ye mingi ti sala na yâ gingo azo so ayeke tongana angasangbaga, na ti mû maboko na ala ti wara tâ hingango ye na ndo ye so Jéhovah aleke ti sala. Na gbele guengo na li ni ti sioni, a lingbi e duti na kua mingi ahon ti kozo na yâ mungo maboko na azo. Bazengele Paul atene: “I girisa pëpe ti sala nzoni na ti mû ye na azo, teti sacrifice tongaso ayeke nzoni na lê ti Nzapa.” Ye ti “nzoni” so ahon atanga ni kue so e lingbi ti sala, ayeke ti fa na azo nzo tënë ti gloire ti Royaume ti Nzapa. Tënë ti e so e yeke fa na gbele azo kue ayeke “sacrifice ti merci”.​—aHébreu 13:15, 16; aGalate 6:10.

⁹ David akiri atene: “Duti na ndo sese ni, na sala ye na dutingo be-ta-zo.” (Psaume 37:3, NW ). “Sese” ti ngoi ti David ayeke lani Sese ti Zendo so Jéhovah amû na Israël. Na ngoi ti komandema ti Salomon, akatikati ti kodoro ni alondo kâ na Dan na banga, ti si na Béer-Shéba, na mbongo. So ayeke ndo ti duti ti Israël lani (1 aGbia 4:25). Laso, atâa e yeke na ndo wa na  ndo sese, e yeke ku kungo ngoi so tongana fini sese ti mbilimbili asi, fade sese kue aga paradis. Ti ku na ngoi ni so, e yeke na yâ nzoni dutingo na lege ti yingo.​—Esaïe 65:13, 14.

¹⁰ Tongana e “sala ye na dutingo be-ta-zo”, ye ti pekoni ayeke duti ande nyen? Mato so a sû na gbe ti yingo adabe e: “Zo so ayeke be-ta-zo, fade nzoye ti lo awu.” (aProverbe 28:20). Tongana e ngbâ lakue ti gi ti fa nzo tënë na ndo kue so e yeke dä nga na azo kue so e lingbi ti wara ala, e lingbi biani ti wara adeba nzoni ti Jéhovah. Na tapande, Frank na wali ti lo, Rose, amû kua ti pionnier a sala angu 40 awe na yâ mbeni gbata ti banga ti Ecosse. Kete wungo ti azo, so asala lani nzara ti tâ tënë kâ, azia lege ni awe. Me bê ti koli na wali pionnier so anze pëpe, ala to nda ti fa tënë na ti sala adisciple. Fadeso, mbeni kongregation so ayeke maï nzoni ayeke na yâ gbata so. Dutingo be-ta-zo ti koli na wali so awara biani deba nzoni ti Jéhovah. Na be-ti-molenge Frank atene: “Deba nzoni ti kota ahon kue ayeke gi so e ngbâ lakue na yâ tâ tënë, na Jéhovah ayeke sala kusala na e.” Biani, tongana e “sala ye na dutingo be-ta-zo”, e yeke wara adeba nzoni mingi nga e yeke yekia ni.

‘Wara ngia ti mo na yâ Jéhovah’

¹¹ Ti kpengba songo ti e na Jéhovah, nga ti ngbâ lakue ti zia bê kue na lo, a lingbi e ‘wara ngia ti e na yâ Lo’. (Psaume 37:4a). E yeke sala ye so tongana nyen? Atâa a yeke ngangu tongana nyen, a hon ti tene e gi bê ti e mingi ngbanga ti dutingo ti e mveni, e yeke zia lê ti e kue na mbage ti Jéhovah. Mbeni oko lege ti sala ye so ayeke ti mû ngoi ti diko Tënë ti lo (Psaume 1:1, 2). Dikongo Bible ti mo ayeke ga na mo ngia? A yeke duti ande tongaso tongana mo diko ni ti manda ambeni ye mingi na ndo Jéhovah. Ngbanga ti nyen pëpe ti luti kete na pekoni so mo diko mbeni mbage ni, na mo hunda tele ti mo, ‘Aversê so afa nyen na mbi na ndo Jéhovah?’ Peut-être mo yeke bâ so a yeke ye ti mungo maboko na mo ti duti na mbeni mbeti ndulu na tele ti mo na ngoi so mo yeke diko Bible. Na ngoi oko oko kue so mo luti ti gbu li na ndo nda ti ye so mo diko awe, sû na mbeti ambeni tënë so adabe mo na oko ti apendere lengo ti Nzapa. Na yâ mbeni psaume nde, David ahe bia: “Zia tënë ti yanga ti mbi na bibe ti mbi amû ngia na Mo, O L’Eternel, Tênë ti mbi na Zo Ti Ton mbi.” (Psaume 19:15). Tongana e bi lê ngangu tongaso na ndo Tënë ti Nzapa, e yeke ‘mû ngia’ na Jéhovah, na e kue nga.

¹² Tongana nyen e lingbi ti wara ngia na lege ti mandango ye nga na ti gbungo li ti e? E lingbi ti zia na gbele e ti manda ye kue so e lingbi ti manda na ndo Jéhovah nga na ndo alege ti lo. Ambeti tongana Koli so ahon tanga ti azo kue nga Ga ndulu na Jéhovah * amû na e asango mingi so e lingbi ti gbu li ti e na ndo ni na bê ti kiri singila. Na mbage, David adë bê ti azo ti mbilimbili so fade Jéhovah ‘amû na ala ye so bê ti ala aye.’ (Psaume 37:4b). A yeke lani mara ti ziango bê kue tongaso si apusu biani bazengele Jean ti sû atënë so: “E zia bê ti e na Lo tënë ti ye so: tongana e hunda ye na lege ti ye so Lo ye, Lo mä e. Na tongana e hinga Lo mä e tënë ti ye so e hunda na tïtî Lo, e hinga e wara ye so e hunda na tïtî Lo.”​—1 Jean 5:14, 15.

 ¹³ E so e bata be-biani ti e, ye so anzere na e ahon atanga ni kue ayeke ti bâ fango na gigi mbilimbili ti kota yanga-ti-komande ti Jéhovah (aProverbe 27:11). Bê ti e asi na ngia tongana e mä so aita ti e, so ayeke na yâ ti akodoro so a komande azo na ngangu, ayeke sala kota kusala ti fango tënë. Ni la pëpe? E yeke ku kungo na bê kue ti bâ liberté so alingbi ti ga ande kozoni si sese so ahunzi. Mingi ti awakua ti Jéhovah so ayeke na akodoro so akanga lege pëpe na kusala ti aChrétien, ayeke sala ngangu mingi ti fa tënë na awamandango mbeti, azo so akpe kodoro ti ala, nga na ambeni zo so ayeke teti kete ngoi na yâ akodoro so, nga so ye ti kanga lege na ala ti voro Nzapa ayeke pëpe. Ye so e ye mingi ayeke ti tene azo so, tongana ala kiri na kodoro ti ala, angbâ ti za lumière ti tâ tënë même na yâ ando so zo abâ atene ayeke kota bingo.—Matthieu 5:14-16.

“Zia lege ti mo na tïtî” Jéhovah

¹⁴ A yeke biani mbeni ye ti dengo bê ti hinga so a lingbi ti yapu nengo ti agingo bê ti e nga ye so na lê ti e ayeke tongana anengo kungba! Tongana nyen? David atene: “Zia lege ti mo na tïtî L’Eternel; zia bê ti mo na Lo”. Na lo kiri lo tene: “Na fade Lo sala ye.” (Psaume 37:5). Na yâ akongregation ti e, e yeke na gbâ ti aye so afa atene e lingbi biani ti zia bê ti e kue na Jéhovah ti mû maboko na e (Psaume 55:23). Ala so ayeke na yâ kusala ti ngoi kue, atâa a yeke apionnier, asurveillant so ague na ndo nde nde, amissionnaire, wala aita so amû tele ti ala ti sala kua na Béthel, alingbi ti fa so zo alingbi biani ti zia bê ti lo ti tene Jéhovah abata lo. Ngbanga ti nyen pëpe ti sala tënë na ala so mo hinga, na ti hunda ala tongana nyen Jéhovah ayeke mû maboko na ala? Ala yeke fa ande na mo ambeni ye so asi, so afa so même na angoi ti ngangu, maboko ti Jéhovah ayeke ndulu lâ oko pëpe. Lo yeke mû lakue aye so a lingbi zo awara.​—Psaume 37:25; Matthieu 6:25-34.

¹⁵ Tongana e zia bê ti e kue na Jéhovah, e lingbi ti hinga ye so wasungo psaume akiri atene: “Fade Lo sala si mbilimbili ti mo asigigi tongana lumière, na fango ngbanga ti mbilimbili ti mo asigigi tongana kota lâ.” (Psaume 37:6). Mingi  ni azo ayeke sala tënë ti e, aTémoin ti Jéhovah, na lege ni pëpe. Me Jéhovah ayeke zi lê ti azo ti bê ti mbilimbili ti mû maboko na ala ti hinga so a yeke ndoye teti Jéhovah nga teti amba ti e si ayeke na gunda ti kusala so e yeke sala na gbele azo kue. Na oko ngoi ni, tambela ti e ti mbilimbili asigigi polele na lê ti azo, atâa so azo mingi asala tënë ni na lege ni pëpe. Jéhovah ayeke mû maboko na e na yâ amara ti kangango lege nde nde kue nga na ti salango ngangu. Na nda ni, mbilimbili ti azo ti Nzapa aza tongana kota lâ.​—1 Pierre 2:12.

“Duti kpô . . . ku Lo na be-nze-pepe”

¹⁶ Na pekoni wasungo psaume atene: “Duti kpô na gbele L’Eternel na mo ku Lo na be-nze-pepe; zia bê ti mo agi mo pëpe ngbanga ti zo so ye ti lo awu, wala ngbanga ti zo so asala sioye na mayele.” (Psaume 37:7). Ge, David agboto lê na ndo nene ti kanga bê ti ku Jéhovah ti sala ye. Hunzingo ti sese so ade ti si pëpe, me so ayeke mbeni ye ti demango tele pëpe. E bâ awe so be-nzoni nga na be-nze-pepe ti Jéhovah ayeke kota mingi ahon ti so e bi bê dä na tongo nda ni. Fadeso, e lingbi ti fa nga so e yeke kanga bê ti ku na ngoi so e yeke na ye mingi ti sala na yâ fango nzo tënë kozoni si nda ni asi. Ni la pëpe? (Marc 13:10). Fadeso ayeke pëpe ngoi ti dö tele ti sala ye so alingbi ti lungula ngia nga na nzoni dutingo ti e na lege ti yingo. A yeke fadeso ngoi ti luti ngangu mingi ahon ti kozo na gbele sioni ngangu ti sese ti Satan. Nga, a yeke fadeso ngoi ti bata salango ye ti e so ayeke na sioni kete pëpe, nga ti zia lâ oko pëpe si dutingo ti e ti zo ti mbilimbili aga sioni na lê ti Jéhovah. Zia e ngbâ ti pusu yongoro abibe na ndo ye ti pitan. Tongana e yeke akoli, zia e kpe ti sala ye so ayeke na lege ni pëpe na mbage ti awali nga même na mbage ti amba ti e koli. Tongana e yeke awali, zia e sala legeoko tongaso nga.​—aColossien 3:5.

¹⁷ David awa e: “Mo sala ngonzo pëpe, na mo zia ngonzo ti wâ; zia bê ti mo agi mo pëpe, teti a handa mo ti sala sioni. Fade A lungula azo so asala sioni; me ala so azia beku ti ala na L’Eternel, fade sese ni aga ye ti héritier ti ala.” (Psaume 37:8, 9). Biani, e lingbi ti ku na bê kue ngoi so aga ndulu mingi fadeso awe, so na yâ ni fade Jéhovah ayeke lungula na ndo ti sese ye ti sioni kue nga azo so ayeke na gunda ni.

“A ngbâ kete”

¹⁸ “A ngbâ kete, na fade azo ti sioni ayeke mbeni pëpe; fade mo bâ ndo so ala duti dä, na ala yeke mbeni pëpe.” (Psaume 37:10). Tâ so ngangu si atënë so amû na e na ngoi so e yeke ga ndulu na hunzingo ti sese so, nga na kota mbage ti ye ti sioni so aga na peko ti komandema so aduti yamba na Jéhovah! Amara nde nde kue ti ngorogbia, wala yanga-ti-komande, so zo asigigi na ni atï na ngu ngangu. Na fadeso e ga ndulu na ngoi so a yeke kiri na tâ komandema so ayeke na gbe ti Nzapa, Royaume ti Jéhovah so ayeke na maboko ti Jésus Christ. Royaume ti Nzapa so ayeke fa ande lege na aye ti sese kue nga lo yeke lungula awato ti lo kue.​—Daniel 2:44.

¹⁹ Na yâ fini sese na gbe ti Royaume ti Nzapa, fade mo yeke gi gbä, mo lingbi ande pëpe ti wara “azo ti sioni”. Biani, na ngoi ni kâ, fade a yeke lungula na loro zo kue so asala ngangu-li na Jéhovah. A yeke wara ande kete pëpe mbeni zo so adë kite na kota yanga-ti-komande ti Jéhovah, wala so ake ti yeda na ngangu ti komande ti lo. Legeoko tongana mo, azo kue so ayeke ndulu na mo ayeke duti ande na nzara ti nzere  na Jéhovah. So nzoni dutingo ande! Akelele wala awen ti yanga ti da ayeke mbeni pëpe, mbeni ye ti kanga lege ti zia bê kue na ti duti na ngia ayeke dä oko pëpe.​—Esaïe 65:20; Michée 4:4; 2 Pierre 3:13.

²⁰ Na pekoni, “azo so ayeke na tâ be-ti-molenge, fade sese ni aga ye ti héritier ti ala”. (Psaume 37:11a). Me “azo so ayeke na tâ be-ti-molenge” ayeke azo wa? Tënë so a kiri pekoni na “tâ be-ti-molenge” alondo na mbeni tënë so nda ni ayeke “ti sala pasi, ti sala zo kete, ti zia kamene na lê”. Biani, “azo so ayeke na tâ be-ti-molenge” ayeke azo so ayeke ku Jéhovah ti leke peko ti ye ti kirikiri kue so asala pasi na ala. “Fade ala wara ngia na yâ siriri so awu mingi.” (Psaume 37:11b). Même fadeso e wara gbâ ti siriri na yâ paradis ti yingo so ayeke na yâ tâ kongregation ti aChrétien.

²¹ Atâa so ade ti zi e na gbe ti pasi pëpe, e yeke mû maboko na popo ti e, nga e yeke dë bê ti ala so vundu ahon ndo ti ala. Ye ti pekoni ayeke so a maï tâ ngia ti gbe ti bê na popo ti azo ti Jéhovah. Aita-koli so a hiri ala na kusala tongana aberger ayeke sala kua na ndoye teti aye ti yingo, nga ngoi na ngoi teti aye ti mitele so atia e, si a mû lege na e ti gbu ngangu na gbe ti pasi so e yeke bâ ndali ti ye ti mbilimbili (1 aThessalonicien 2:7, 11; 1 Pierre 5:2, 3). Siriri so ayeke biani ye ti mosoro so e yeke na ni! E yeke nga na beku ti fini ti lakue lakue na yâ Paradis ti siriri so aga ndulu. Tongaso, zia e mû tapande ti David ti Kota, Christ Jésus, so wâ ti lo teti Jéhovah apusu lo ti sala kua be-ta-zo juska na nda ni (1 Pierre 2:21). Na salango tongaso, fade e yeke ngbâ lakue ti duti na ngia, na sepelango lo so e wara ngia na yâ lo, Nzapa ti e, Jéhovah.

[Kete tënë na gbe ni]

Mo lingbi ti kiri tënë?

• Mo manda nyen na lege ti Psaume 37:1, 2?

• Tongana nyen mo lingbi ‘wara ngia na yâ Jéhovah’?

• Aye wa afa polele so e lingbi ti zia bê kue na Jéhovah?

[Ahundango tënë ti manda na ye]

1, 2. Zo wa ayeke Lingu ti tâ ngia, na tongana nyen Gbia David agboto lê na ndo ye so?

3, 4. Tongana ti so a fa na Psaume 37:1, wango wa David amû, na ngbanga ti nyen batango wango so alingbi biani na ngoi ti laso?

5. Ngbanga ti nyen a haka azo ti sioni na pele?

6. E lingbi ti manda nyen na lege ti Psaume 37:1, 2?

7. Ngbanga ti nyen a lingbi e zia bê kue na Jéhovah?

8. Tongana nyen mungo mbage na kusala ti Chrétien alingbi ti mû maboko na e ti kpe ti tene mosoro ti azo ti sioni abuba bê ti e senge senge?

9. Fa nda ti wango ti David ti “duti na ndo sese ni”.

10. Tongana e “sala ye na dutingo be-ta-zo”, ye ti pekoni ayeke nyen?

11, 12. (a) Tongana nyen e lingbi ti “wara ngia” na yâ Jéhovah? (b) Na ndo tënë ti mandango ye mo mveni, mo lingbi ti zia nyen na gbele mo? Ye ti pekoni ayeke duti peut-être nyen?

13. Na yâ ti angu so ahon, a bâ na yâ akodoro mingi guengo na li ni wa ti kusala ti fango tënë ti Royaume?

14. Ye wa afa so e lingbi ti zia bê kue na Jéhovah?

15. Tongana nyen mbilimbili ti azo ti Nzapa ayeke za?

16, 17. Legeoko na Psaume 37:7, a yeke fadeso ngoi ti sala nyen, nga ngbanga ti nyen?

18, 19. Ye ti mungo ngangu wa mo wara na yâ Psaume 37:10?

20, 21. (a) “Azo so ayeke na tâ be-ti-molenge” ti Psaume 37:11 ayeke azo wa, na ala wara “siriri so awu mingi” na ndo wa? (b) Adeba nzoni wa e yeke wara ande tongana e mû tapande ti David ti Kota?

[Foto na lembeti 9]

A-Chrétien ‘asala pëpe kota bê ti azo so ayeke sala ye ti kirikiri’

[Foto na lembeti 10]

‘Zia bê ti mo na Jéhovah, na mo sala nzoni’

[Foto na lembeti 11]

Wara ngia na yâ Jéhovah na mandango ye kue so mo lingbi ti manda na ndo lo

[Foto na lembeti 12]

“Azo so ayeke na tâ be-ti-molenge, fade sese ni aga ye ti héritier ti ala”