Akpale ti fango lege na molenge laso

NA MBENI bï so l’heure ahon awe, mveni ti mbeni restaurant aleke ti kanga yanga ti da ni ti kiri na kodoro. Mo ye ti bâ, awali use na mbeni kete molenge alï na restaurant ni na ahunda ti vo kobe ti te. Teti lo woko mingi, mveni ti restaurant ni atara ti tene na ala so a kanga yanga ni awe, me lo mû desizion ti leke kobe so ala hunda. Na ngoi so awali use so ayeke sala lisoro na ayeke te kobe, kete molenge ni ayeke kpe loro na lo yeke ngoro yâ ti restaurant ni; lo yeke tuku kobe na sese na lo dö yâ ni. Ahon ti tene lo suku na molenge ni, mama ti lo ayeke he gi ngia. Na pekoni so ala te kobe ni awe, ala hon; a yeke fadeso na mveni ti restaurant ni so awoko awe ti sukula yâ ti da ni na peko ti asaleté so kete molenge so asala.

Tongana ti so peut-être mo hinga ni, tâ ye so asi afa polele so na yâ ti asewa mingi, fango lege na molenge atambela nzoni pëpe. Anda ti tënë ni ayeke nde nde. Ambeni babâ na mama azi lege yamba na amolenge ti ala ti sala ye so bê ti ala mveni aye, na bingo bê so a lingbi ti bata molenge nzoni na yâ mbeni ndo so bibe ti dutingo na liberté ayeke dä. Wala ngbanga ti so kua ahon ndo ti ala mingi, ababâ na mama ayeke mû pëpe ngoi ti bi lê nzoni na ndo ti amolenge ti ala na ti fa lege na ala tongana ti so a hunda. Ambeni babâ na mama abi bê so kota ye teti amolenge ti ala ayeke mandango mbeti. Tongaso, tongana molenge ni awara anzoni note na da-mbeti na a yeda na lo ti lï na mbeni senda-gi so azo aye tënë ni mingi, ala yeke mû na lo mbeni liberté so katikati ni ayeke dä pëpe.

Ye oko, ambeni atene so a lingbi a gbian yâ ti salango ye ti ababâ na mama nga na ti azo kue. Ala tene so amolenge ayeke yôro tele ti ala na yâ amara ti kengo-ndia nde nde kue, nga salango ngangu na ekole ayeke gue gi na li ni lâ na lâ. Tongaso, mbeni kota zo ti li ti mbeni collège na Séoul, kodoro ti Corée, agboto lê so a lingbi a fa kozoni kue na amolenge lege ti maï nzoni asalango ye ti ala. Lo tene: “Na peko ti so a maï nzoni salango ye ti zo ni awe, mo lingbi ti fa mbeti na lo.”

Mingi ti ababâ na mama so aye ti tene molenge ti ala alï na kota-da mbeti na awara nzoni gigi ti kekereke ake ti mä wango. Tongana mo yeke mbeni babâ wala mama, mo ye molenge ti mo aga mara ti zo wa? Mo ye lo ga mbeni biazo so ayeke na nzoni salango ye nga so ahinga ti yô kungba? Mbeni zo so ayeke bi bê na ndo ti amba ti lo, so alingbi gbian salango ye ti lo ti lingbi na aye so asi na so ayeke na nzoni bango ndo? Tongana a yeke tongaso, a yeke nzoni mo diko mbilimbili article so ayeke ga na peko.