Azo so awara diplôme ti Galaad ague tongana awakua ti kongo le-kobe so ayeke na wâ!

“LE-KOBE ti yaka ayeke mingi biani, me azo ti kusala ayeke mingi pëpe. Tongaso i sambela Mveni ti le-kobe ni si Lo to azo ti kusala ti fâ le-kobe ti Lo.” (Matthieu 9:37, 38). Nda ti atënë so ane, mbilimbili teti azo so ayeke wara diplôme ti ala na klase 116 ti Ekole ti Mandango Bible ti Galaad ti Société Watchtower, na ngoi so ala yeke leke tele ti gue na ando so a to ala dä tongana missionnaire.

Na samedi lango 13 ti mars 2004, azo kue 6 684 abungbi na Ndokua ti mandango ye na Patterson, New York, nga na ambeni Béthel so ayo na ni pëpe teti programme ti mungo diplôme na a-élève ni. Na ngoi ni so, azo ti klase ni awara ambeni ndangba wango kozo si ala gue na ando ti ala. Na ngoi so e yeke sala kua na wâ na yâ kongo le-kobe ti yingo, e kue e lingbi ti wara ye ti nzoni na lege ti awango so a mû lani.

Akozo tënë ti Theodore Jaracz, so ayeke na yâ ti Wabatango Bungbi nga so awara diplôme ti lo na klase mbasambala ti Galaad, agboto lê na ndo atënë ti Jésus so: “I gue, i fa tënë na amara kue si ala ga adisciple.” (Matthieu 28:19, 20). Ye so alingbi tâ na ni lani, teti so a yeke tokua a-élève ni ti sala kua na yâ ti akodoro 20! Lo dabe ti a-élève ni so ye so ala manda na yâ Tënë ti Nzapa amû na ala awe ye kue so alingbi ti tene ala duti awakua so ayeke na wâ na yâ kongo le-kobe ti yingo so ayeke kota ahon atanga ni kue.​—Matthieu 5:16.

Lege ti duti awakua ti kongo le-kobe so alë lengo

Kozo zo so amû diskur ayeke Robert Wallen, so asala kusala maboko na maboko na Ekole ti Galaad teti angu mingi. Na salango tënë na ndo li ti tënë “Pendere ti nzobe”, lo sala tënë so na a-élève ni: “Nzobe ayeke yanga ti kodoro so même azo so mê ti ala akanga alingbi ti mä, nga azo so lê ti ala abuba alingbi ti bâ.” Jésus ahinga lani nzoni mingi vundu ti azo, na lo gi ti dë ni (Matthieu 9:36). A-élève ni ayeke wara ande alege mingi ti sala tongaso: na yâ ti fango tënë, ti kongregation, ti da ti amissionnaire nga na yâ ti mariage ti ala mveni. Wamungo diskur ni amû wango so na ala: “Zia pendere ti nzobe afa tele ti lo mveni na yâ fini ti i na ngoi so i yeke sala na azo. Aye so ayeke si lâ oko oko na yâ da ti missionnaire ayeke hunda nzoni salango ye ti i. Ni la, zia i leke na bê ti i ti yü nzobe.”​—aColossien 3:12.

Na pekoni, Gerrit Lösch, so ayeke na yâ ti Wabatango Bungbi nga so awara diplôme ti lo na klase 41 ti Galaad, asala tënë na ndo li ti tënë “Awafango tënë ti salut”. (Esaïe 52:7). Ti tene azo asö kuâ na ngoi ti futingo ti aye ti fadeso, a lingbi ala wara tâ hingango ye na lege ti Tënë ti Nzapa, ala fa na gigi tënë ti mabe ti ala na ala wara batême (aRomain  10:10; 2 Timothée 3:15; 1 Pierre 3:21). Ye oko, kozo nda ti fango tënë ti salut ayeke pëpe ti sö azo, me ti sepela Nzapa. Ni la, Ita Lösch awa azo so ayeke ga ande amissionnaire: “I mû tokua ti Royaume i gue na ni na ndo sese kue, na i duti awafango tënë ti salut so ayeke na wâ; so kue ti sepela Jéhovah.”​—aRomain 10:18.

“Mo yeke za tongana nyen?” ayeke lani tënë so wafango ye na Galaad Lawrence Bowen ahunda. Lo sala tënë ti atënë ti Jésus so a sû na Matthieu 6:22, na lo wa a-élève so ayeke wara diplôme ti ala ti bata lê ti ala “nzoni” si ala “fa lumière ti yingo so amû gloire na Jéhovah na asala nzoni na amba ti ala.” Na tongo nda ti kusala ti lo, Jésus azia mbeni tapande ti mbilimbili-kue na ndo ye so, na batango lê ti lo kue na ndo salango ye so bê ti Nzapa aye. Gbungo li na ndo apendere ye so Babâ ti lo afa na lo lani na yayu amû maboko na Jésus ti gbu ngangu na gbele atara ti Satan na yando (Matthieu 3:16; 4:1-11). Jésus afa so lo zia bê ti lo kue na ndo Jéhovah na yâ salango ye so Nzapa atokua lo ti sala. Legeoko nga, ti hon ndo ti akpale so ayeke ku ala, a lingbi amissionnaire angbâ ti bata nzoni kode ti mandango Bible na ala zia bê ti ala kue na Jéhovah.

Mark Noumair, mbeni wafango ye na Galaad nga so awara diplôme ti lo na klase 77 ti  Galaad, ahunzi molongo ti adiskur so, na salango tënë na ndo li ti tënë “Bâ e yeke na tïtî mo”. (Josué 9:25). Lo wa a-élève ni ti sala ye tongana azo ti Gabaon ti giriri. Atâa so Gabaon ayeke lani “kota kodoro . . . na azo kue ti kodoro ni ayeke awalombe”, azo ti Gabaon agi pëpe ti tene iri ti ala awu, wala ala ku pëpe ti tene a sala ye tongana ti so bê ti ala aye (Josué 10:2). Na bê ti ala mveni ala sala kua tongana “azo ti fâ keke na azo ti tö ngu” na gbe ti azo ti Lévi ti mû maboko na vorongo Jéhovah (Josué 9:27). Biani, a-élève so ayeke wara diplôme ti ala atene awe na Josué ti Kota, Jésus Christ, “Bâ e yeke na tïtî mo”. Fadeso, so ala yeke to nda ti sala kusala ti ala na kodoro wande, a lingbi ala yeda na kusala kue so Josué ti Kota amû na ala ti sala.

Aye so asi nga na ahundango tënë

“Fa nda ti tënë ti Mbeti ti Nzapa” ayeke lani li ti tënë ti lisoro so Wallace Liverance asala na mbeni wungo ti a-élève ni. Lo wara diplôme ti lo na klase 61 ti Galaad na lo yeke mbeni oko ti awafango ye ni. A-élève ni afa na ala haka peko ti aye so asi na ala na fango tënë na yâ nze oku ti mandango ye ti ala na ekole. A yeke polele so aye so ala manda ngangu na yâ Mbeti ti Nzapa na yâ ti ngoi so andu bê ti ala na apusu ala ti fa ni na ambeni zo nde (Luc 24:32). Na ngoi ti mandango ye teti nze oku so, mbeni élève ni awara lege ti fa na ngambe ti lo ti koli ye so lo manda. Ye so apusu ita ti lo ti gi kongregation so ayeke na ndo so lo yeke dä na lo to nda ti manda Bible. Fadeso lo yeke mbeni wafango tënë so ade ti mû batême pëpe.

Na peko ti aye so asi na fango tënë, Richard Ashe na John Gibbard amû li ni na yâ ahundango tënë na awakua be-ta-zo ti Jéhovah so aninga na yâ ti kua ni. Na popo ni a wara asurveillant so ague na ndo nde nde, so ayeke manda ye lani na Ndokua ti mandango ye na Patterson. Ala wara diplôme ti ala na yâ ti akozo klase ti Ekole ti Galaad. Mbeni oko adabe ti lo so Ita Knorr atene tënë so na klase: “Na Galaad, i yeke mû ande ngoi mingi ti manda ambeti. Me tongana i sigigi na baba, andâ e sala kusala ti e pëpe. E ye ti tene i sigigi na mbeni bê so asi na ndoye.” Asurveillant so ague na ndo nde nde amû wango na klase ni ti bi bê na azo, ti sala ye na ala tongana ti so Christ asala lani na ti yeda na tâ be-ti-molenge na kusala kue so a yeke mû na ala. Salango ye alingbi na wango so ayeke mû ande biani maboko na afini missionnaire so ti lë lengo na yâ akusala ti ala.

I gue tongana awakua ti kongo le-kobe so ayeke na wâ!

Azo so aga awara lege ti mä Stephen Lett, so ayeke nga na yâ ti Wabatango Bungbi. Lo mû kota diskur ti programme ni, so li ni ayeke “I gue tongana awakua ti kongo le-kobe so ayeke na wâ!” (Matthieu 9:38). Na yâ tâ ngoi ti kongo le-kobe, zo alingbi ti ku kete pëpe. Tongaso, a lingbi awakua ni asala kua ngangu. A yeke biani kota ye mingi ahon so na ngoi ti hunzingo ti aye ti fadeso! Na yâ kota kongo le-kobe ti yingo, fini ti azo ayeke na kpale (Matthieu 13:39). Ita Lett awa azo so ayeke wara diplôme ti ala ti “zia bê ti [ala] anze pëpe na salango kusala”, me ti tene “yingo ti [ala] aza nzoni” nga ti “sala na Seigneur” na yâ kongo le-kobe so a yeke kiri ande ti sala ni lâ oko pëpe (aRomain 12:11). Wamungo diskur ni afa peko ti atënë ti Jésus so: “I yä lê ti i, i bâ le-kobe ti yaka abe alingbi na fango ni.” (Jean 4:35). Na pekoni lo wa azo so ayeke wara diplôme ti fa wâ ti ala teti kusala ti kongo le-kobe na salango ngangu biani ti ndu azo na ngoi nga na ndo so a lingbi ti wara ala, nga ti gbu angoi kue ti fa tënë na alege kue so azi. Dutingo ndulu ti gi alege kue ti fa tënë alingbi ti sala si a yeke ngangu pëpe ti fa tënë so alë lengo. Jéhovah ayeke Nzapa so ayeke na wâ, na lo ku ti tene e kue e mû tapande ti lo na e sala kua ngangu na yâ kongo le-kobe ti yingo.​—2 aGbia 19:31; Jean 5:17.

Na hunzingo programme ni, président ni, Ita Jaracz, asala tënë ti balao ti afiliale mingi na lo mû adiplôme ti a-élève ni na ala. Mbeni oko ti ala adiko lettre teti a-élève ni, na fango kota singila ti ala teti ye so a fa na ala. A yeke polele, programme ti mungo diplôme na a-élève ti klase 116 asala si azo kue so aga aleke na bê ti ala ahon ti kozo ti gue tongana awakua ti kongo le-kobe so ayeke na wâ.

[Tënë na ndo ti klase ni lembeti 25]

AYE TI HINGA NA NDO KLASE NI

Wungo ti akodoro so a-élève ni alondo dä: 6

Wungo ti akodoro so a tokua ala dä: 20

Wungo ti a-élève ni: 46

Ngu ti ala oko oko angoro na tele ti ngu: 34,2

Ngu ti mingi ti ala na yâ tâ tënë: 17,2

Ngu ti mingi ti ala na yâ kusala ti ngoi kue: 13,9

[Foto na lembeti 26]

Klase 116 ti Galaad, Ekole ti Mandango Bible ti Société Watchtower

Na yâ bungbi ti a-iri so a fa na gbe ni ge, a fa numéro ti amolongo ni ti londo na devant ti kiri na peko, nga na ndo molongo oko oko, a fa iri ti azo ni ti londo na gati ti gue na koti.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.