‘Lo fa na e ti yekia lege ti vorongo ti lo’

MBENI Témoin ti Jéhovah so ayeke na kete kodoro ti Rovigo, Italie, aga ti hinga so lo yeke na mbeni cancer so asala si fini lo ayeke na yâ kpale. A gbanzi lo fani mingi na hôpital, so na ngoi ni, lo hunda ti tene a sava kobela ti lo me lo ye pëpe ti tene a mû na lo mênë. Na pekoni, bungbi ti a-infirmier ti kodoro ni so ayeke bâ azo ti kobela ti cancer ayeda ti gue ti mû maboko na lo.

Ngangu mabe ti zo ti kobela ti ngu 36 so na dutingo ti lo ndulu ti sala kusala maboko na maboko na ala agbu mingi bê ti awanganga so ayeke mû maboko na lo. Kete kozoni si lo kui na kobela ti cancer so, mbeni oko ti a-infirmier so ayeke mû maboko na lo asû na yâ ti mbeni mbeti-sango ti a-infirmier ye so asi na ala na mbeni zo ti kobela so lo hiri lo Angela.

“Angela ayeke zo so ayapu na so aye tâ ti ngbâ gi na fini. Lo hinga biani ye so asi na lo nga kota kobela so lo yeke na ni. Legeoko tongana e kue e yeke sala, lo yeke gi mbeni lege ti leke na kpale ni, mbeni yorö. . . . Yeke yeke, e a-infirmier ni e ga ti hinga lo nzoni. Lo ke pëpe maboko so e ye ti mû na lo. Nde na so, Angela ayeke sala tënë polele, ye so asala si ye kue aduti ngangu pëpe. A nzere na e ti gue ti mû maboko na lo teti e hinga so a yeke duti mbeni ngoi ti tingbi na mbeni zo so ayeke sala ye na bê kue, nga ngoi teti e kue ti wara ye ti nzoni dä. . . . E hinga fade fade so lege ti vorongo ti lo ayeke ga ande mbeni ye so ayeke kanga lege na e ti mû maboko na lo na yâ kobela ti lo.” So ayeke bango ndo ti infirmier ni, ngbanga ti so lo bâ so a lingbi a mû mênë na Angela, ye so Angela ake.​—Kusala 15:28, 29.

“Teti so e manda kua ti mungo maboko na azo ti kobela, e tene na Angela so e yeda na desizion ti lo ni pëpe. Ye oko, na mungo maboko ti lo, e gbu nda ni so fini ayeke tâ kota ye na lê ti lo. E gbu nda ni nga so lege ti vorongo ti lo ayeke kota ye na lê ti lo mveni nga na lê ti asewa ti lo. Angela akiri na peko pëpe. Lo yeke zo so awoko pëpe na gbe ti kobela ti lo. Lo yeke wali biani. Lo ye ti kui pëpe, lo ye ti tiri ti ngbâ na fini. Lo fa na gigi desizion ti lo nga na ye so lo mä na bê dä. Lo yeke na mbeni bibe so mingi ti e ayeke na ni pëpe, mbeni kpengba mabe so atia e. . . . Angela afa na e nene ti yekia lege ti vorongo ti lo, atâa so a gue nde mingi na salango ye ti kusala ti e ti a-infirmier. . . . E mä na bê so aye so Angela afa na e ayeke na nene ni mingi, ndali ti so e yeke tingbi na mara ti azo nde nde kue, aye nde nde so ayeke si, alege ti vorongo nde nde, na e lingbi ti manda ye na mbage ti azo kue so e yeke tingbi na ala nga ti fa mbeni ye na ala.”

Article ti yâ ti mbeti-sango so agboto lê na pekoni na ndo ti Ndia ti asalango ye ti a-infirmier ti kodoro ti Italie, Ndia so a yeda na ni na ngu 1999, so atene: “Infirmier asala kusala ti lo na bango na nene ni tënë ti lege ti vorongo ti zo, ti lege ti tambela ti zo, ti angobo ti salango ye ti zo nga na ti mara ti zo ni, na ti bâ nengo ti zo ni tongana wali wala koli.” Ngoi na ngoi, a lingbi ti duti ngangu na adocteur nga na a-infirmier ti ne atënë ti mabe ti mbeni zo ti kobela, na kite ayeke pëpe so a yeke gonda mingi ala so aye na bê kue ti sala tongaso.

Adesizion so aTémoin ti Jéhovah ayeke mû, so andu tënë ti seni ti ala nga tënë ti mungo maboko ti awanganga, a yeke ye so ala gbu li na ndo ni nzoni. Ala bâ mbilimbili ye so Mbeti ti Nzapa atene na ndo ni nga, tongana ti so tapande ti Angela afa ni, ala yeke pëpe azo so wâ ti ala ahon tâ ndo ni teti aye ti kirikiri so ala mä na bê dä (aPhilippien 4:5). Na ndo lê sese kue, wungo ti azo so abâ tënë ti seni, so ayeda na bê kue ti yekia tënë ti yingo-ti-hinga ti azo ti kobela ti ala so ayeke aTémoin, ayeke gue na li ni.