Ye ti héritier so ayeke na ngele mingi

NDULU na nda ti fini ti lo, bazengele Jean so aga kangba asû na mbeti: “Tongana mbi mä tënë ti amolenge ti mbi so ayeke tambela na lege ti tene-biani, so amû ngia na mbi ahon mbeni ye kue.”​—3 Jean 4.

Bazengele be-ta-zo so ayeke sala tënë ti amolenge ti lo na lege ti yingo. Ye oko, ababâ na mama mingi ayeke tene a-oko tënë so na ndo amolenge ti ala. Lani, ala sala kue ti bata amolenge ti ala na yâ “wango-tene nga na fango lege ti bibe ti Jéhovah”, na fadeso, ala yeke na ngia ti bâ so amolenge ti ala so akono awe ayeke “tambela na lege ti tene-biani,” wala tâ tënë (aEphésien 6:4, NW ). Biani, fango na amolenge ti mo lege so ague na fini ti lakue lakue ayeke mungo na ala ye ti héritier so ayeke na ngele mingi. A yeke tongaso ngbanga ti so dutingo ndulu na Nzapa aye ti tene ti sala ye tongana ti so Jéhovah aye aChrétien asala, ndali ti so “zendo ayeke dä teti fini ti fadeso na teti fini so ayeke ga.”​—1 Timothée 4:8.

Jéhovah, Babâ so ayeke mbilimbili-kue, ayekia mingi ababâ na mama so akpe mbito ti lo na ayeke sala ngangu ti mû fango ye na amolenge ti ala na lege ti yingo. Tongana amolenge asala ye alingbi na ni, ala yeke wara kota ngia ti mû peko ti tâ vorongo legeoko na ababâ na mama ti ala. Tongana amolenge so akono, ala yeke bata na li apendere ye so asi na yâ fini ti ala. Ambeni ayeke dabe ti ala na ngia na kozo ngoi so ala mû lani mbage na Ekole ti Kusala ti aChrétien. * Wala ala yeke dabe na ngoi so, ti fani oko ni, ala lingbi ti diko mbeni versê ti Bible na ngoi so ala yeke fa lani tënë da na da na tele ti babâ wala mama ti ala. Ala lingbi pëpe ti girisa go ti babâ na mama ti ala tongana ala yeke diko ye na ala na yâ buku Mbeti ti atene ti Bible wala Mango Yanga ti Kota Maitre. * Ni la pëpe? Gabriel adabe ti lo na mbeni ye so lo ye ni mingi: “Tongana mbi yeke gi na ngu osio, lakue mama ayeke he bia na mbi na ngoi so lo yeke tö ye. Mbi ngbâ ti dabe ti mbi na mbeni bia ti Royaume so agbu bê ti mbi mingi. Na pekoni, bia ti Royaume so amû maboko na mbi ti bâ nene ti kusala ti Jéhovah.” Peut-être mo nga kue, mo yeke dabe mo na pendere bia so Gabriel asala tënë ni. A yeke bia 157 so ayeke na yâ mbeti ti bia E sepela Jéhovah na abia ti e, so li ti tënë ni ayeke “Voro Jéhovah na la ti pendere ti mo.”

Bia ni ato nda ni tongaso: “Kete molenge deba nzoni Christ,/Na ala dekongo na kota ngia.” Biani, ambeni molenge ayeke dä so ayeke lani na matabisi ti duti na tele ti Jésus, na a lingbi ti tene so wâ ti ala so ayeke dë bê ti zo, nga lege so ala yeke sala tënë polele anzere na lo. Jésus amû même dutingo ndulu ti ala ti manda ye tongana  mbeni tapande so adisciple ti lo alingbi ti haka pekoni (Matthieu 18:3, 4). Tongaso, amolenge ayeke na ndo ti ala na yâ vorongo ti Jéhovah. Biani, atënë ti yâ ti bia ni angbâ ti tene: “Akete molenge gonda Nzapa.”

Na lege ti nzoni tapande ti ala na yanga-da, na ekole nga na ambeni ndo nde, amolenge mingi ayeke ga na gonda na Nzapa nga na sewa ti ala. Tongana ala yeke “na ababa na mama ti mabe,” so ayeke mbeni deba nzoni teti ala (Deutéronome 6:7). Ababâ na mama so amû mbage ti Nzapa ayeke sala aye so lo tene. Tongana mbeni Babâ so asi na ndoye, Nzapa ayeke fa ye na azo so lo leke ala, si ala tambela na ndo lege so a lingbi ala tambela dä. Nga, so ye ti nzoni si ababâ na mama ayeke wara! Na mbage, tongana ala fa ye na amolenge so ayeke na yâ sewa ti ala, so tâ ngia si ala yeke wara ni na mbage ti apendere so ayeda so “a lingbi molenge ama yanga”! (Esaïe 48:17, 18). Angélica, so ayeke sala kusala fadeso na biröo ti aTémoin ti Jéhovah na Mexique, atene: “Babâ na mama ti mbi ayeke sala ngangu lakue ti sala ye alingbi na akpengba-ndia ti Bible. Ye so asala si ngoi so mbi de lani kete anzere mingi. Mbi yeke na ngia lani.”

Mara ti aChrétien tongaso ayeda so a yeke tâ na lege ni ti bata nzoni fango lege ti yingo so babâ na mama ti mo ayeke mû. Peut-être mo yeke mbeni maseka so ayeke kono na yâ ti sewa so abata anzoni salango ye ti aChrétien. Tongana a yeke tongaso, oko bia so amû na mo wango so: “Apendere, i duti nzoni kue.” Ngoi ayeke ga ande so mo mveni mo yeke mû adesizion. Ni la, fadeso “duti na taa mabe na Jéhovah./Gi ti wara yango iri pepee.”

Tongana, na salango ye na lege ni pëpe, mo zia gingo ti wara yango-iri na kozo ndo na yâ fini ti mo, peko ti afango lege kue so mo lingbi ti wara ayeke ngbâ senge, na mo lingbi ti buba beku ti mo ti kekereke. Nzara ti duti zo so iri ti lo awu mingi alingbi ti sala si mo duti na kpengbango lê pëpe. Na nda ni, ambeni ayeke sala kamarade na azo so mo bâ mo tene ala yeke sioni pëpe, so même ala yeke pendere, nga salango ye ti ala ayeke nzoni, me ala yeke bata anzoni salango ye ti aChrétien pëpe. A lingbi ti haka ye so na salango ye ti Tara, so a fa tapande ti lo na yâ ti kasete vidéo Les jeunes s’interrogent​—Comment se faire de vrais amis? Na tapande ti Tara, mbeni lâ, mingi ti amaseka Chrétien so ayeke sala kamarade na azo so abâ tâ vorongo na nene ni pëpe ayeke hinga ande so “andeko ti sioni ayeke son.” A hunda ti sala ngangu teti angu mingi ti lë anzoni salango ye, me a lingbi ti buba ni gi na yâ ti kete ngoi.

Biani, ti duti na fini so afa na gigi kpengo mbito ti Nzapa ayeke kete ye pëpe. Ye oko, tongana ti so bia ni angbâ ti tene, tongana mo “da be na Nzapa so mo de kete”, na mo “voro  lo na yingo, na taa tene”, mo yeke leke mbeni gunda ni so akpengba teti tâ fini so ayeke ga ande nzoni. Nga, ti “gonda lo kozo si mo ga kangba” ayeke kono ande ngia ti mo. Tongana mo yeke kono, mo yeke ga ti hinga nzoni ahon ti kozo so, na gbe ti ndoye ti Jéhovah, mbeni ye so alingbi ti kanga lege na mo ti sala ye so ayeke mbilimbili na lê ti lo ayeke dä pëpe. So ayeke lege ti gango mbeni kota zo so akpe mbito ti Nzapa. Na ndo ni, na ndara, wara nzoni na lege ti fango lege so a yeke mû na aChrétien. Ye so ayeke mû lege na mo ti “duti be-taa-zo ti mu ngia na lo.” Mbeni kota gonda ti hon dutingo zo so azia ngia na bê ti Nzapa ayeke dä pëpe.​—aProverbe 27:11.

Ni la, amaseka, i dabe ti i lakue na ngele ti fango lege so alondo na Jéhovah nga na ababâ na mama ti i so ayeke aChrétien. Zia kota ndoye ti ala teti i apusu i ti sala ye so anzere na lê ti Jéhovah. Na tapande ti Jésus Christ nga na be-ta-zo maseka Timothée, i yeke sala ande si Babâ ti i ti yayu nga na ababâ na mama ti i aduti na ngia. Na tongana mbeni lâ i ga ababâ na mama, i yeke yeda ande biani na tënë so Angélica, so a sala tënë ti lo fade, atene: “Mbeni lâ, tongana mbi wara molenge, a to nda ni na ngoi so lo de kete, mbi yeke sala ande ngangu ti yôro ndoye ti Jéhovah na bê ti lo ti sala si ndoye so aduti kota ye so ayeke fa lege na lo.” Biani, lege ti mbilimbili so ague na fini ti lakue lakue ayeke ye ti héritier so ayeke na ngele mingi!

[Akete tënë na gbe ni]