‘I gue, i sala adisciple’

“A mû na Mbi ngangu kue na yayu na sese. Tongaso i gue, i fa tënë na amara kue si ala ga adisciple.”​—MATTHIEU 28:18, 19.

MBENI lâ na ngu 33 na kodoro ti Israël, adisciple ti Jésus abungbi na ndo ti mbeni hoto na Galilée. Jésus, Seigneur ti ala so azingo na kuâ, ayeke ndulu ti kiri na yayu, me lo yeke na mbeni kpengba tënë ti tene na ala kozoni. Lo yeke na mbeni kusala ti mû na ala. Kusala wa? Salango ye ti adisciple na mbage ti kusala so ayeke tongana nyen? Na tongana nyen kusala so andu e laso?

² A fa peko ti ye so Jésus atene na Matthieu 28:18-20: “A mû na Mbi ngangu kue na yayu na sese. Tongaso i gue, i fa tënë na amara kue si ala ga adisciple, i batize ala na iri ti Babâ, na ti Molenge, na ti Yingo Vulu; i fa na ala ti bata ye kue so Mbi komande i. Na bâ, Mbi yeke na i lakue, même juska na nda ti ngoi so.” Jésus asala tënë ti “ngangu kue”, “amara kue”, “ye kue” nga “lakue”. Yanga so lo mû na so andu aye mingi aga na ambeni kota hundango tënë, so a lingbi ti tene ni na andulu tënë osio: ngbanga ti nyen? na ndo wa? ye wa? nga na ngoi wa? Zia e gi nda ti atënë so oko na oko. *

“A mû na Mbi ngangu kue”

³ Kozoni, ngbanga ti nyen a lingbi e yeda na komandema ti sala adisciple? Jésus atene: “A mû na Mbi ngangu kue na yayu na sese. Tongaso i gue, i fa tënë na amara kue si ala ga adisciple.” Tënë “tongaso” agboto lê na ndo mbeni kota nda ti tënë so ngbanga ni a lingbi e sala ye alingbi na komandema so. Nda ni ayeke so Jésus, lo so amû komandema ni, ayeke na “ngangu kue”. Ngangu ti lo ague juska na ndo wa?

⁴ Jésus ayeke na ngangu na ndo kongregation ti lo, nga ngbele ye na ngu 1914, lo yeke na ngangu na ndo Royaume ti Nzapa so a leke gere ni fini fini (aColossien 1:13; Apocalypse 11:15). Lo yeke archange wala mokonzi ti a-ange, na tongaso lo komande aturugu kutu ngbangbo mingi ti a-ange ti yayu (1 aThessalonicien 4:16; 1 Pierre 3:22; Apocalypse 19:14-16). Babâ ti lo amû yanga na lo ti futi “akozo-gere-ti-komande, na ayanga-ti-komande kue, na angangu kue” so ake akpengba-ndia ti mbilimbili (1 aCorinthien  15:24-26; aEphésien 1:20-23). Ngangu ti Jésus angbâ gi pëpe na ndo azo so ayeke na fini. Lo yeke nga wafango ngbanga ti “azo so ayeke na fini na ti awakinda”, na Nzapa amû na lo ngangu ti zingo azo so alango na yâ kuâ (Kusala 10:42; Jean 5:26-28). Biani, a lingbi a bâ na nene ni mingi mbeni komandema so alondo na Zo so awara mara ti kota ngangu tongaso. Ni la, na bê kue nga na yekiango ndo, e yeke sala ye alingbi na komandema ti Christ ti ‘gue na ti sala adisciple’.

⁵ Gi na tongo nda ti kusala ti lo ge na sese, na mbeni lege so adö bê, Jésus afa lani na adisciple ti lo so hingango ngangu ti lo nga mango akomandema ti lo ayeke ga na aye ti nzoni. Na mbeni ngoi, lo tene na Pierre, so ayeke lani zo ti gingo susu: “Gue na ndo so ngu alï, i sa gbanda ti i ti gi asusu.” Pierre ahinga biani so susu ayeke na ndo so pëpe, ni la lo tene na Jésus: “Maître, e sa gbanda na bï so kue, na e wara ye pëpe.” Ye oko, na tâ be-ti-molenge, Pierre akiri atene: “Me tongana Mo tene, fade mbi sa gbanda ni.” Na peko ti so Pierre amä yanga so Christ amû, lo gbu “asusu mingi”. Na dongo bê, Pierre akuku “na gbele Jésus, lo tene, O Seigneur, zia mbi; teti mbi yeke zo ti siokpari.” Me Jésus akiri tënë: “Zia mbito; na peko ti ye so, fade mo gi azo.” (Luc 5:1-10; Matthieu 4:18). Ye nyen e manda na lege ti tondo so?

⁶ A yeke gi na peko ti so ala gbu gbâ ti asusu na mbeni lege so adö bê si Jésus amû na Pierre, André nga na tanga ti abazengele kusala ti ‘gingo azo.’ (Marc 1:16, 17). A yeke polele so Jésus ahunda pëpe na ala ti mä lo gi tongaso. Lo fa na ala mbeni tâ nda ti tënë so ndali ni, a lingbi ala mä lo. Legeoko tongana ti so aye so aga na peko ti salango ye alingbi na komandema ti Jésus ti sa wala ti bi gbanda ti ala adö bê, mango komandema ti Jésus so ahunda ti “gi azo” ayeke ga nga na gbâ ti aye ti nzoni. Na bê ti ala kue, abazengele ayeda lani na ye so Jésus atene. Mbaï ni ahunzi tongaso: “Ala kiri na ngo ni na yanga ti sese, ala zia ye kue, na ala gue na peko ti Lo.” (Luc 5:11). Laso, tongana e yeke wa azo ti mû mbage ti ala na kusala ti salango adisciple, e yeke mû tapande ti Jésus. E yeke hunda pëpe na azo ti sala gi ye so e tene na ala, me e yeke fa na ala akpengba nda ti tënë so ngbanga ni a lingbi ala mä komandema ti Christ.

Akpengba nda ti tënë nga na anzoni bibe

⁷ E yeke mû mbage na kusala ti fango tënë ti Royaume nga na ti salango adisciple ngbanga ti so e hinga ngangu ti komande ti Christ. Ambeni nda ti tënë nde wa, so aluti na ndo Bible na so andu kusala so, e lingbi ti fa ni na azo so e ye ti pusu ala ti sala anzo kusala? Bâ ye so ambeni Témoin be-ta-zo ti akodoro nde nde atene, nga, bâ lege so aversê so a fa ni amû ngangu na atënë ti ala.

⁸ Roy, so awara batême na ngu 1951: “Na ngoi so mbi mû tele ti mbi na Jéhovah, mbi mû yanga ti sala na lo lakue lakue. Mbi ye ti sala ye alingbi na yanga so mbi mû.” (Psaume 50:14; Matthieu 5:37). Heather, so awara batême na ngu 1962: “Tongana mbi bi bê na ndo aye kue so Jéhovah asala teti mbi, mbi ye ti fa bê ti kiri singila ti mbi na lo na ngbango lakue be-ta-zo ti sala na lo.” (Psaume 9:2, 10-12; aColossien 3:15). Hannelore, so awara batême na ngu 1954: “Na ngoi kue so e yeke fa tënë, a-ange ayeke mû maboko na e: so tâ matabisi!” (Kusala 10:30-33; Apocalypse 14:6, 7). Honor, so awara batême na ngu 1969: “Tongana ngoi ti fango ngbanga ti Jéhovah asi, mbi ye pëpe si mbeni zo ti vaka ti mbi awara lege ti bi tënë na li ti Jéhovah nga na  aTémoin ti lo mo bâ mo tene ala sala kua ti ala pëpe, na ti tene: ‘Mbeni zo agboto mê ti mbi lâ oko pëpe’ .” (Ezéchiel 2:5; 3:17-19; aRomain 10:16, 18). Claudio, so awara batême na ngu 1974: “Bâ kete! Tongana e yeke fa tënë, ‘lê ti Nzapa’ ayeke na ndo ti e nga e yeke na tele ti ‘Christ.’ Na ngoi so e yeke na fango tënë, e yeke na tele ti atâ kota Kamarade ti e.”​—2 aCorinthien 2:17. *

⁹ Tondo ti gbungo susu na lege so adö bê afa nga nene ti duti na ndoye, nzoni ye so ayeke pusu zo ti mä yanga ti Christ. Tongana Pierre atene, “Zia mbi; teti mbi yeke zo ti siokpari”, Jésus azia lo pëpe nga lo fâ ngbanga na li ti Pierre pëpe ndali ti mbeni siokpari (Luc 5:8). Jésus azingo même na Pierre pëpe ndali ti so lo hunda na Lo ti zia lo. Nde na so, Jésus akiri tënë na nzobe: “Zia mbito.” Mbito so ayeke na lege ni pëpe alingbi ti duti mbeni sioni bibe so alingbi ti pusu zo ti mä yanga ti Christ. Nde na so, Jésus atene na Pierre so lo na amba ti lo ayeke ga ande atâ nzoni zo ti gingo azo. Laso, e nga kue e yeke sala kusala pëpe na sioni mbito wala na atënë ti bê so ayeke na lege ni pëpe (tongana bibe ti bango tele tongana zo so tënë ayeke na li ti lo wala kamene) ti gbu azo na ngangu ti mä yanga ti Christ. Gi mango yanga na âme ti mo kue, so aluti na ndo ndoye teti Nzapa nga teti Christ, si ayeke zia ngia na bê ti Jéhovah.​—Matthieu 22:37.

“I fa tënë na amara kue si ala ga adisciple”

¹⁰ Use hundango tënë so andu yanga so Christ amû ayeke so: Na ndo wa si a lingbi ti sala kusala ti salango adisciple so? Jésus atene na adisciple ti lo: “I fa tënë na amara kue si ala ga  adisciple.” Kozo na ngoi ti kusala ti Jésus, a yeke yamba azo ti ambeni mara nde gi tongana ala ga lani na Israël ti sala na Jéhovah (1 aGbia 8:41-43). Jésus lo mveni afa tënë kozoni kue na aJuif ti mitele, me fadeso, lo tene na adisciple ti lo ti gue na popo ti amara kue. Ti tâ tënë ni, ndo ti gingo susu ni, wala territoire so adisciple ti lo ayeke fa tënë dä, angbâ lani gi na aJuif na lege ti mitele, so ayeke tongana mbeni “kete ngu”. Me na yâ ti kete ngoi, a yeke ndu “kota ngu ti ingo” wala azo kue. Atâa so gbiango ye so aga na mbeni kpale na adisciple, ala yeke lani ndulu ti mä wango-tene ti Jésus. Ngu 30 tongaso na peko ti kuâ ti Jésus, bazengele Paul alingbi lani ti sû na mbeti so a fa nzo tënë gi na aJuif pëpe, me na “azo kue na gbe ti yayu”.​—aColossien 1:23.

¹¹ Na yâ ti angoi so ahon ade ti ninga pëpe, a bâ mara ti guengo na li ni so na yâ ti aterritoire so a yeke fa tënë dä. Na tongo nda ti ngu 1900, ‘ando ti gingo susu’ ni angbâ gi na mbeni kete wungo ti akodoro. Ye oko, adisciple ti Christ na ngoi ni kâ amû tapande ti akozo Chrétien, nga na bê kue ala kono yâ ti territoire so ala yeke fa tënë dä (aRomain 15:20). Ti londo na ngu 1930 ti si na ngu 1935, ala yeke sala lani adisciple na yâ ti akodoro 100 tongaso. Laso, a kiri a kono yâ ti ando ti fango tënë ti e, so a haka ni na ‘ando ti gingo susu’, ti si fadeso na akodoro 235.​—Marc 13:10.

“Ti yanga nde nde kue”

¹² Salango adisciple na popo ti amara kue ayeke mbeni kpale gi pëpe ngbanga ti so ndo ni akono mingi, me nga ngbanga ti ayanga ti kodoro so ayeke mingi. Na lege ti prophète Zacharie, Jéhovah afa kozoni: ‘Na lâ ni kâ, fade azo bale-oko ti yanga nde nde kue ti amara, ala gbu sakatumbo ti zo so ayeke Juif, ala tene, Fade e gue na mo, teti e mä so Nzapa ayeke na i.’ (Zacharie 8:23). Na yâ kota gango tâ tënë ti prophétie so, “zo so ayeke Juif” aduti fä ti tanga ti aChrétien so a sa yingo na ndo ti ala, na “azo bale-oko” aduti fä ti “azo mingi so asi singo”. * (Apocalypse 7:9, 10; aGalate 6:16). A yeke wara azo mingi so asi singo ti adisciple ti Christ na popo ti amara mingi, na tongana ti so Zacharie atene, ala yeke tene gbâ ti ayanga ti kodoro. Mbaï ti azo ti Nzapa ti laso afa so ala londo na popo ti amara mingi nga ala yeke tene gbâ ti ayanga ti kodoro? Biani.

¹³ Na ngu 1950, na ndo sese kue tongana a mû aTémoin ti Jéhovah 5, ndulu na 3 ayeke tene yanga ti Anglais. Na ngu 1980, wungo ni agbian: tongana a mû ala 5, 2 ayeke tene Anglais. Laso, tongana a mû aTémoin 5, gi 1 si ayeke tene yanga ti Anglais. Bungbi ti ngbâa be-ta-zo na ti ndara asala nyen na gbele gbiango ye so? Lo mû kobe ti yingo na ayanga ti kodoro mingi ahon ti kozo (Matthieu 24:45). Na tapande, na ngu 1950 a yeke sigigi na ambeti ti e lani na ayanga 90, me laso, wungo so ague asi ndulu na 400. Bingo bê mingi ahon ti kozo na ndo bungbi ti azo so ayeke tene ayanga nde nde alë lengo? Biani! Yenga oko oko na yâ ti ngu oko, azo “ti yanga nde nde kue” ndulu na 5 000 ayeke ga adisciple ti Christ (Apocalypse 7:9). Na a ngbâ ti gue gi na li ni. Na yâ ti mbeni kodoro, “gbanda” ni ayeke gbu gbâ ti susu!​—Luc 5:6; Jean 21:6.

 Mbeni kusala so amû ngia na bê: Mo lingbi ti mû mbage dä?

¹⁴ Na yâ ti akodoro so amaï, guengo ti awande mingi ti sala kodoro kâ asala si a yeke ngangu ti sala si azo ti “yanga nde nde kue” aga adisciple (Apocalypse 14:6). Tongana nyen e lingbi ti mû maboko na azo ti yâ ti territoire ti e so yanga ti kodoro ti ala ayeke nde na ti e? (1 Timothée 2:4). E lingbi ti sala kusala na gbakuru ti gingo susu so alingbi na ala. Mû mbeti na azo tongaso na yanga ti kodoro ti ala. Tongana lege ayeke dä, leke ti tene mbeni Témoin so ayeke tene yanga ti kodoro ti ala ague abâ ala (Kusala 22:2). Teti so aTémoin mingi ayeke manda mbeni yanga ti kodoro so ayeke nde na ti ala ti mû maboko na awande ti ga adisciple ti Christ, a yeke fadeso ngangu pëpe ti leke mara ti aye tongaso. Atondo mingi afa so mara ti mungo maboko tongaso ayeke ga na aye ti nzoni mingi.

¹⁵ Zia e bâ atapande use so alondo na Pays-Bas, kodoro so a leke kusala ti fango tënë ti Royaume dä na ayanga 34. Mbeni koli na wali ti lo so ayeke aTémoin aleke na bê ti ala mveni ti sala adisciple na popo ti azo so aga na kodoro ni na so ayeke tene yanga ti Polonais. Aye so ala wara na peko ti angangu so ala sala ayeke kota mingi. Ye so apusu koli ni ti zi ambeni kua ti lo, na tongaso lo wara mbeni lango oko na yâ ti yenga ni ti manda Bible na azo so asala nzara ti tënë ni. Ngoi kete na pekoni, koli na wali so ayeke mû li ni na yâ ti amandango Bible 20 yenga  oko oko. Ala tene: “Kusala ti e asala si e yeke na ngia mingi.” Azo so ayeke sala adisciple ayeke na ngia mingi tongana bê ti azo so amä atâ tënë ti Bible na yanga ti kodoro ti ala apusu ala ti kiri singila. Na tapande, na ngoi ti mbeni bungbi so a sala ni lani na yanga ti Vietnamien, mbeni mbakoro-koli alondo na lo hunda ti sala tënë. Na ngule, lo tene na aTémoin ni: “Singila mingi na i teti ngangu so i sala ti manda yanga ti kodoro ti mbi so akpengba mingi. Mbi mû singila mingi teti so mbi yeke manda apendere ye na ndo Bible na lâ ti mbakoro ti mbi.”

¹⁶ Tongaso, a yeke ye ti dongo bê pëpe so azo ti akongregation so ayeke sala bungbi na mbeni yanga nde abâ so ala yeke wara aye ti nzoni mingi. Na Grande-Bretagne, mbeni koli na wali ti lo atene: “Fango tënë na popo ti azo so ayeke tene mbeni yanga nde ayeke mbeni oko ti aye so amû na e ngia mingi na yâ ti ngu 40 ti kusala ti Royaume.” Mo lingbi ti gbian ambeni ye na yâ fini ti mo ti mû mbage na kusala so, so amû ngia mingi na bê? Tongana mo ngbâ ti gue na ekole, mo lingbi ti manda mbeni yanga nde ti leke tele ti mo teti mara ti kusala so? Salango tongaso alingbi ti gue na mo na mbeni dutingo na fini so asi singo na adeba nzoni (aProverbe 10:22). Ngbanga ti nyen pëpe ti sala lisoro na ndo ni legeoko na babâ na mama ti mo?

E gbian yâ ti akode ti e

¹⁷ Ti tâ tënë ni, dutingo ti e azi lege pëpe na azo mingi na popo ti e ti bi “gbanda”, wala ti mû mbage na kusala ti fango tënë, na yâ ti aterritoire ti azo so ayeke tene mbeni yanga nde. Ye oko, e lingbi ti wara lege ti ndu azo mingi ti territoire ti e ahon ti so e yeke sala fadeso. Tongana nyen? E lingbi ti sala ni na gbiango akode ti e, me pëpe tokua ti e. Na ambeni ndo mingi, wungo ti azo so ayeke lango na yâ ti ada so gbagba angoro ni wala so asinziri ayeke bata ni ague na li ni. Ambeni mingi ayeke na yanga-da pëpe na ngoi so e yeke fa tënë da na da. Tongaso, peut-être a hunda na e ti bi “gbanda” ti e na angoi nde nde nga na ando nde nde. Na lege so e yeke mû tapande ti Jésus. Lo sala lani ngangu ti sala lisoro na azo na ando nde nde.​—Matthieu 9:9; Luc 19:1-10; Jean 4:6-15.

¹⁸ Na ambeni ndo, fango tënë na ndo kue so a lingbi ti wara azo dä ayeke mbeni kpengba kode ti sala adisciple. Azo ti salango adisciple so ayeke na kode ayeke bi bê ti ala mingi na ndo fango tënë na ando nde nde. Na ndo ti mungo mbage na fango tënë da na da, awakua ayeke fa tënë na ando so azo ayeke ku lapara dä, na yâ ti abiröo, na yâ ti amagazin, na ando ti lutingo ti akete kutukutu, na ando so bus na taxi aluti dä, na lege, na yâ ti aparc, na yanga ti ngu nga na ambeni ndo nde. A yeke na ando tongaso si a wara lege ti tingbi ti fani oko ni na kota mbage ti afini Témoin so awara batême na kodoro ti Hawaii. Gbiango yâ ti akode ti e ayeke mû maboko na e ti sala ye biani alingbi na komandema ti Jésus ti sala adisciple.​—1 aCorinthien 9:22, 23.

¹⁹ Kusala ti salango adisciple so Jésus amû andu gi pëpe anzene nzene ye na ndo ngbanga ti nyen nga na ndo wa e lingbi ti sala kusala so; me a ndu nga ye wa e lingbi ti fa nga juska na ngoi wa si e lingbi ti ngbâ ti sala ni. E yeke bâ ande ambage use so na yâ article ti peko.

[Kete tënë na gbe ni]

Mo dabe mo na ni?

• Ngbanga ti nyen e yeke mû mbage ti e na kusala ti fango tënë ti Royaume na salango adisciple, nga ye wa ayeke pusu e ti sala ni?

• Juska na ndo wa awakua ti Jéhovah ti laso ayeke mû mbage na kusala ti sala si azo ti amara kue aga adisciple tongana ti so Jésus ahunda?

• Tongana nyen e lingbi ti gbian yâ ti kode ti e ti ‘gingo susu’ wala fango tënë ti e, na ngbanga ti nyen a lingbi e sala tongaso?

[Ahundango tënë ti manda na ye]

1, 2. (a) Kusala wa Jésus amû na adisciple ti lo? (b) Ahundango tënë wa so andu akomandema so Jésus amû e yeke gi ande nda ni?

3. Ngbanga ti nyen a lingbi e sala ye alingbi na komandema ti sala adisciple?

4. (a) Ngangu ti Jésus ague juska na ndo wa? (b) Tongana nyen gbungo nda ti ye ti e na ndo ngangu ti Jésus alingbi ti sala ngangu na ndo bango ndo ti e na ndo komandema ti sala adisciple?

5. (a) Tongana nyen Pierre amä atënë ti Jésus lani? (b) So Pierre amä aye so Jésus afa, a ga na aye ti nzoni wa?

6. (a) Ye wa tondo na ndo gbungo susu na lege ti ye ti kpene afa na ndo mara ti mango yanga so Jésus ahunda? (b) Tongana nyen e lingbi ti mû tapande ti Jésus?

7, 8. (a) Ambeni nda ti tënë so Bible amû na ndo kusala ti fango tënë ti Royaume nga na salango adisciple ayeke so wa? (b) Mbilimbili versê wa apusu mo ti ngbâ ti sala kusala ti fango t

ënë? (Bâ nga kete tënë na gbe ni.)

9. (a) Tondo ti ye so asi na Pierre nga na ambeni bazengele na ndo gingo susu afa nyen na ndo nzoni ye so alingbi ti pusu zo ti mä yanga ti Christ? (b) Nzoni ye so ayeke pusu zo ti mä yanga ti Nzapa na ti Christ ayeke nyen, na ngbanga ti nyen?

10. (a) Na ndo yanga so Jésus amû ti sala adisciple, ye wa aduti mbeni kota kpale teti adisciple ti lo? (b) Salango ye ti adisciple na mbage ti komandema ti Jésus ayeke lani tongana nyen?

11. A bâ guengo na li ni wa ti ‘ando ti gingo susu’ ngbele ye na tongo nda ti ngu 1900?

12. Kpale wa prophétie ti Zacharie 8:23 agboto lê na ndo ni?

13. (a) Na ndo tënë ti ayanga ti kodoro, guengo na li ni wa a bâ ni na popo ti azo ti Nzapa ti laso? (b) So a hunda ti wara kobe ti yingo na ayanga ti kodoro nde nde, bungbi ti ngbâa be-ta-zo asala nyen? (Bâ “Ambeti teti awaziba.”)

14. Tongana nyen e lingbi ti mû maboko na azo ti territoire ti e so ayeke tënë mbeni yanga nde? (Bâ “Salango kusala na yanga ti awambongi ti sala adisciple.”)

15, 16. (a) Atapande wa afa so a yeke ye ti ngia mingi ti mû maboko na azo so ayeke tene mbeni yanga nde? (b) Na ndo fango tënë na popo ti azo so ayeke tënë mbeni yanga nde, ahundango tënë wa e lingbi ti gbu li dä?

17. Tongana nyen e lingbi ti ndu azo mingi ahon ti kozo na yâ ti territoire so a mû na kongregation ti e?

18. Na lege wa a yeke polele so fango tënë na ando nde nde ayeke lë lengo? (Bâ “Salango adisciple na popo ti azo ti dengo buze.”)

19. E yeke bâ ande ambage wa ti kusala so Jésus amû na e na yâ article ti peko?

[Kete tënë/Foto na lembeti 10]

Ambeti teti awaziba

Albert, mbeni Chrétien so alango na États-Unis ayeke ancien nga wakua ti ngoi kue. Lo yeke waziba. Salango kua na ambeti so aluti na ndo Bible na so a sû ni na Braille (yanga ti awaziba) amû maboko na lo ti sala kusala ti lo ti fango tënë nga na ti surveillant ti kusala nzoni mingi. Tongana nyen lo yeke mû li ni na yâ kusala ti lo ti kongregation?

James, so ayeke surveillant-président, atene: “E wara lâ oko pëpe na yâ kongregation ti e mbeni surveillant ti kusala so alë lengo mingi tongana Albert.” Albert ayeke oko ti awaziba 5 000 ti États-Unis so, na yâ ti angu so ahon, awara ambeti so aluti na ndo ti Bible na yanga ti Anglais nga na Espagnol so a sû ni na yanga ti awaziba. Ngbele ye na ngu 1912 juska laso, bungbi ti ngbâa be-ta-zo asigigi na ambeti nde nde ahon 100 na yanga ti awaziba. Na salango kusala na akode so ague na li ni, ngu oko oko, andokua ti petengo mbeti ti aTémoin ti Jéhovah ayeke sigigi fadeso na ambeti ti yanga ti awaziba kutu mingi nga na ayanga ahon bale-oko, so a yeke tokua ni na yâ ti akodoro ahon 70. Mo hinga mbeni zo so alingbi ti wara nzoni na lege ti ambeti so aluti na ndo Bible so a leke ni teti awaziba?

[Kete tënë/Foto na lembeti 11]

Salango kusala na yanga ti awambongi ti sala adisciple

Na ndo sese kue, aTémoin saki mingi, so na popo ni amaseka mingi so ayeke na wâ, amanda yanga ti awambongi ti mû maboko na azo so mê ti ala akanga ti ga adisciple ti Christ. Ye ti pekoni ayeke so, gi na Brésil, awambongi 63 awara batême na yâ ti mbeni ngu so ahon ade ti ninga pëpe, nga aTémoin 35 ti kodoro ni so ayeke awambongi ayeke fadeso awafango tënë ti ngoi kue. Na ndo sese kue, a yeke wara akongregation nga na agroupe 1 200 ti yanga ti awambongi. Na Russie, circonscription ti awambongi ayeke oko. Na lege ti konongo ni, a kono ahon tanga ti acirconscription kue, teti a mû yâ ti kodoro ti Russie kue!

[Kete tënë na lembeti 12]

Salango adisciple na popo ti azo ti dengo buze

Na ngoi so lo yeke gue ti bâ azo na place ti kua ti ala, mbeni Témoin ti Hawaii atingbi na mbeni kota zo ti ndokua ti yongo azo. Atâa so lo yeke na kua mingi, koli so ayeda ti manda Bible teti apenze-ngbonga 30 yenga oko oko na yâ ti biröo ti lo. Lakue na mercredi na ndapelele, lo yeke tene na azo ti kua ti lo ti mû téléphone na place ti lo, na tongaso lo wara lege ti dengi mê nzoni na mandango ye ni. Mbeni Témoin nde ti Hawaii ayeke manda Bible fani oko na yâ ti yenga na mveni ti mbeni ndo ti fungo poro. Ala yeke sala étude ni tâ gi na ndo so aclient ayeke ga na aporo ti ala. Tongana client aga, Témoin ni adengi tele ti lo. Tongana lo hon awe, ala kiri na ndo ti étude ni.

A wara lege ti tingbi na azo use so ndali ti so aTémoin ni amû li ni ti bi “gbanda” ti ala, wala ti fa tënë, na ando nde nde. Mo yeke gbu li na ndo ti aplace ti territoire ti kongregation ti mo so mo lingbi ti tingbi na azo so a yeke ngangu ti wara ala na yanga-da?

[Foto na lembeti 12]

Mo lingbi ti fa tënë na popo ti azo so ayeke tene mbeni yanga nde?