Mbeni lettre ndali ti Noé

“ITA Noé, teti angoi mingi mbi yeke diko ye na ndo ti mo na yâ Bible, tongana nyen mo leke lani arche so na yâ ni mo na sewa ti mo asö kuâ na yâ ti Kota Moa.”

A yeke tongaso si mbeni maseka-wali ti ngu 15, so iri ti lo ayeke Minnamaria, ato nda ti lettre so lo zia ni teti mandako ti sungo mbeti so a leke ni teti amaseka ti ngu 14 ti si na 21. A yeke ndokua ti kodoro ti Finlande so ayeke bâ lege ti tokuango alettre, Bungbi ti awafango yanga ti Finnois nga na Ndokua ti sungo ambeti ti yanga ti Finnois si aleke mandako so. A hunda na azo ti salango mandako ni ti sû mbeni lettre so aluti na ndo ti mbeni buku. A lingbi a tokua lettre ni na mveni ti buku ni wala na mbeni zo so buku ni asala tënë ti lo. Awafango mbeti asoro alettre ahon 1 400 so a-élève ti ala asû na ala tokua ni na awafango ngbanga ti mandako ni. Awafango ngbanga ni asoro kozo zo so asû ye ni nzoni ahon atanga ni; na pekoni ala soro bungbi ti azo bale-oko teti ndo use ni nga bungbi ti azo bale-oko teti ndo ota ni. Minnamaria ayeke lani na ngia so lettre ti lo ayeke na popo ti bungbi ota ni.

Ngbanga ti nyen Minnamaria, élève so ade maseka, asû lettre ti lo na Noé, mbeni koli so aduti lani na fini a sala ndulu na ngu 5 000 awe? Lo tene: “Kozo ye so aga lani na li ti mbi ayeke Bible. Azo so Bible asala tënë ti ala ayeke azo so mbi hinga ala nzoni mingi. Teti so mbi yeke diko aye mingi na ndo ti ala, a sala si na lê ti mbi ala yeke tongana azo so angbâ na fini. Mbi soro Noé ndali ti so aye so asi na yâ fini ti lo apika bê mingi nga ayeke nde mingi na ti mbi.”

Atanga ti tënë ti lettre ti Minnamaria so lo sû na Noé ayeke so: “Mo ngbâ lakue mbeni tapande ti mabe nga na ti mango yanga. Salango ye ti mo ayeke pusu azo kue so adiko Bible ti sala ye alingbi na mabe ti ala.”

Lettre so ti mbeni maseka so ayeke wadikongo Bible afa polele so Bible ayeke biani na “fini, na a yeke na ngangu ti sala ye” na ndo azo: amaseka na ambakoro.​—aHébreu 4:12.