Nzapa ayeke bi bê biani na ndo mo

A YEKE biani na lege ni ti toto na Nzapa ti mû maboko na e tongana e yeke na yâ mbeni ngoi ti ngangu, teti lo yeke “kota, na ngangu ti Lo ayeke mingi; nda ti ndara ti Lo ayeke pëpe.” (Psaume 147:5). Lo yeke lo so alingbi biani ti mû maboko na e ti luti na gbele akpale ti e. Na ndo ni, Bible atisa e “ti fa tënë ti bê ti [e] na gigi na gbele Lo”. (Psaume 62:9). Tongaso, ngbanga ti nyen azo mingi ayeke bâ ti ala so Nzapa ayeke kiri tënë na asambela ti ala pëpe? So aye ti tene so lo yeke bi bê na ndo zo pëpe?

Ahon ti tene mo bi tënë hio na li ti Nzapa ndali ti ambeni ye so mo bâ mo tene lo sala ye oko pëpe ngbanga ni, dabe mo na ngoi so mo de kete. Tongana babâ na mama ti mo amû lani na mo pëpe aye kue so mo hunda na ala, mo tene lani so ala ndoye mo pëpe? Mingi ti amolenge ayeke tene tongaso. Ye oko, tongana mo ga kota zo awe, mo ga ti bâ so ala fa ndoye na yâ alege mingi, na mo tene biani so ti mû na molenge aye so kue lo hunda ni ayeke salango ye na ndoye pëpe.

Legeoko nga, tongana Jéhovah akiri tënë pëpe na asambela kue tongana ti so e ku ni, a ye ti tene pëpe so lo girisa e awe. Tâ tënë ni ayeke so, na alege mingi Nzapa ayeke fa bingo bê ti lo na mbage ti e kue.

“Na yâ Lo, e yeke na fini”

Kozoni kue, a yeke ndali ti Nzapa si “e yeke na fini, e yeke tambela, na e yeke”. (Kusala 17:28). Fini so lo mû na e afa polele so lo yeke bi bê na ndo e.

Na ndo ni, Jéhovah ayeke mû na e ye so e yeke na bezoin ni ti tene e ngbâ na fini. E diko: “Lo sala si pele amaï teti anyama, na Lo sala le-kasa teti zo ti sala ye na ni, si Lo lingbi sala si kobe asigigi na yâ sese.” (Psaume 104:14). Ti tâ tënë ni, Wasalango e amû na e pëpe gi akozo ye so alingbi ti bata fini ti e. Na bê ti lo kue, “Lo mû na [e] ngu-nduzu na Lo mû na [e] ngoi ti lengo kobe, na Lo mû na [e] kobe, na ngia, alingbi na bê ti [e].”​—Kusala 14:17.

Ye oko, ambeni zo alingbi ti hunda tele ti ala: ‘Tongana Nzapa andoye e mingi, ngbanga ti nyen lo zia lege na e ti bâ pasi?’ Mo hinga kiringo tënë na hundango tënë so?

A lingbi a bi tënë ni na li ti Nzapa?

A yeke asalango ye ti zo mveni si ayeke na gunda ti mingi ti pasi ti azo. Na tapande, a hinga nzoni aye ti sioni so ayeke ga na lege ti ambeni kusala so ayeke zia fini ti zo na yâ kpale. Ye oko, azo ayeke bi tele ti ala na yâ aye ti pitan, nyongo sämba ahon ndo ni, nyongo ambeni mbangi nga na manga, bingo tele na yâ ti ambeni ngia ti awanguru so azia fini ti zo na lê ti kuâ, akpe na kutukutu na ngangu mingi nga na ambeni ye tongaso. Tongana mara ti asalango ye so azia fini ti zo na yâ kpale aga na zo pasi, a yeke bi tënë ni na li ti zo wa? Na li ti Nzapa wala na li ti zo ni mveni so asala ye na ndara pëpe? Tënë ti Nzapa so a sû na gbe ti yingo atene: “I handa tele ti i mveni pëpe; zo alingbi he Nzapa pëpe, teti ye so zo alu, fade lo fâ lengo ni nga.”​—aGalate 6:7.

Nga, fani mingi, a yeke azo si ayeke sala sioni na amba ti ala na popo ti ala. Tongana mbeni mara alondo ti sala bira na mbeni, ti tâ tënë ni, a lingbi ti zia pëpe Nzapa na gunda ti apasi so kue ayeke ga na lege ti bira ni. Tongana mbeni zo ti kengo ndia aga ti sala ngangu na mbeni mba ti lo ti kodoro oko, si na peko ti ye ti ngangu ni so mba ti lo ni awara kä wala lo kui, a yeke bi tënë ni na li ti Nzapa? Oko pëpe! Na tongana mbeni zo ti sioni so akomande ayeke sala ngangu, ayeke sala sana na ayeke fâ azo so lo komande ala, a lingbi e bi tënë ni na li ti Nzapa? Ti tene tongaso ayeke biani na lege ni oko pëpe.​—Zo-ti-fa-tene 8:9.

Ye oko, ti ala so ayeke duti na yâ ti kota nzinga wala so ayeke bâ pasi na nzara ayeke tongana  nyen? A yeke bi tënë ni na li ti Nzapa? Oko pëpe. Sese ti e ayeke na kobe mingi so alingbi ti kaï nzara ti azo oko oko kue (Psaume 10:2, 3; 145:16). A yeke kangbingo na lege ni pëpe yâ ti matabisi so Nzapa amû na e si ayeke na gunda ti nzara nga na nzinga so asala azo mingi. Na bibe ti kion so zo ayeke na ni akanga lege ti leke akpale so.

Tâ gunda ti akpale ni

Ye oko, a lingbi a bi tënë ni na li ti zo wa tongana mbeni zo atï kobela wala akui teti so lo ga mbakoro? A yeke ye ti dongo bê teti mo ti mä so, même teti ye so, a lingbi ti bi tënë ni na li ti Nzapa pëpe? Nzapa acréé lani zo pëpe ti tene lo ga mbakoro na lo kui.

Na ngoi so a zia lani kozo koli na kozo wali, Adam na Eve, na yâ ti yaka ti Eden, Jéhovah amû lani na ala beku ti duti na fini ti lakue lakue na ndo mbeni sese so ayeke paradis. Ye oko, lo fa polele so lo ye ti tene sese ni asi na azo so ayeke bâ na nene ni ye ti héritier so ala wara. Tongaso, lo leke ti tene ala wara beku ti fini ti kekereke, me a hunda na ala ti sala mbeni ye. Adam na Eve ayeke duti na fini na yâ ti paradis ni gi tongana ala ngbâ ti mä yanga ti Wasalango ala so ayeke na ndoye.​—Genèse 2:17; 3:2, 3, 17-23.

Mawa ni ayeke so, Adam na Eve ake yanga. Eve asoro lani ti mä yanga ti Satan Zabolo. Satan ni atene na Eve kota mvene, na lo ye ti tene biani so Nzapa agbanzi mbeni ye ti nzoni na lo. Tongaso, Eve ato nda ti sala gi ye ti li ti lo mveni na tarango ti ‘ga tongana Nzapa, ti hinga nzoni na sioni.’ Legeoko tongana Eve, Adam nga ake yanga.​—Genèse 3:5, 6.

Na ngoi so ala sala lani siokpari, Adam na Eve afa na gigi so ala mveni alingbi pëpe na fini ti lakue lakue. Ala bâ pasi na peko ti siokpari ti ala. Ngangu ti ala akiri na peko nga na nda ni ala kui (Genèse 5:5). Ye oko, akpale so aga na peko ti kengo yanga ti ala ni ayeke kota mingi. E ngbâ ti hu pono laso na aye ti peko ti siokpari ti Adam na Eve. Bazengele Paul asû na mbeti: “Tongaso, legeoko tongana siokpari aga na sese so na lege ti zo oko [Adam], na kui aga na lege ti siokpari, tongaso kui asi na azo kue, teti azo kue asala siokpari.” (aRomain 5:12). Ni la, ndali ti kengo yanga ti Adam na Eve, siokpari na kui aga na ndo mara ti azo kue legeoko tongana mbeni sioni kobela so agbu azo kue.

 Kota fä ti bingo bê ti Nzapa

So aye ti tene so azo so Nzapa mveni acréé ala ayeke ngbâ gi lakue lakue na yâ ti siokpari tongaso? Oko pëpe. Zia e bâ fadeso kota fä ti bingo bê ti Nzapa na mbage ti e. Atâa so a hunda ye mingi na lo mveni, Nzapa aleke lege ti tene a zi azo na gbe ti siokpari nga na kui. Sandaga ti zingo azo ni ayeke lani fini ti Jésus so ayeke mbilimbili-kue so lo mû na bê kue teti e (aRomain 3:24). Ni la bazengele Jean atene: “Teti Nzapa andoye sese so tongaso, Lo mû Molenge ti Lo ngengele oko, si zo so amä na bê na Lo alingbi kui pëpe, me lo yeke na fini ti lakue lakue.” (Jean 3:16). Tongana ye ti peko ti kota fä ti ndoye so, e lingbi ti kiri ti wara beku ti fini ti lakue lakue. Paul asû na mbeti: “Legeoko tongana ngbanga ti azo kue aga na lege ti kengo-ndia oko, tongaso nga, mbilimbili so amû fini na azo kue aga na lege ti kusala oko ti mbilimbili.”​—aRomain 5:18.

E lingbi ti mä na bê biani so na ngoi so Nzapa asoro ni, fade hungo pono wala kui ayeke duti mbeni pëpe na ndo sese. Nde na so, aye so a sala tënë ni kozo na yâ buku ti Apocalypse ayeke mû ndo kue: “Bâ, Tabernacle ti Nzapa ayeke na popo ti azo, fade Lo duti na ala, na ala ga azo ti Lo, na Nzapa mveni ayeke na popo ti ala, Lo yeke Nzapa ti ala; fade lo mbô ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe teti kozo ye ni ahon awe.” (Apocalypse 21:3, 4). Mo lingbi ti tene: ‘Mbi yeke ngbâ na fini pëpe ti bâ ngoi so.’ Ye oko, mo lingbi ti bâ ni. Na atâa tongana mo kui, Nzapa alingbi ti zingo mo na popo ti awakinda (Jean 5:28, 29). So ayeke ye so Nzapa azê ni na e, na fade a yeke ga tâ tënë. So tâ kota mvene ti tene so Nzapa ayeke bi bê ti lo na ndo azo pëpe!

“Ga ndulu na Nzapa”

A yeke biani ye ti dengo bê ti hinga so Nzapa ato nda ti zia na sese awe mbeni ye ti hunzi na pasi ti azo biaku. Ye oko, ti laso ayeke tongana nyen? Ye nyen e lingbi ti sala na ngoi so e girisa na yâ kui mbeni zo so e ndoye lo wala tongana molenge ti e atï kobela? Ti tâ tënë ni, a yeke pëpe ngoi so Nzapa asoro ti zi kobela na kui. Bible afa so e yeke ku teti kete ngoi ti tene a leke ye so. Me Nzapa azia gi e tongaso pëpe. Disciple Jacques atene: “I ga ndulu na Nzapa, na fade Lo ga ndulu na i.” (Jacques 4:8). Biani, Wasalango ye kue atisa e ti lë kpengba songo na lo, na ala so ayeda ti ga ndulu na lo ayeke bâ mungo maboko ti lo même na yâ ti akota kpale.

Na lege wa e lingbi ti ga ndulu na lo? A sala laso ndulu na ngu saki ota awe so Gbia David ahunda tele ti lo na oko hundango tënë so, lo tene: “O L’Eternel . . . fade zo nyen aduti na Hoto ti Mo ti nzoni-kue?” (Psaume 15:1). David mveni akiri tënë na ahundango tënë ti lo mveni na ngoi so lo tene: “Lo so atambela mbilimbili, na lo sala kusala ti mbilimbili, na lo tene tene-biani na bê ti lo; lo so akunyon zo na menga ti lo pëpe, na lo sala sioni na ita ti lo pëpe, na lo sala tënë ti zonga pëpe na li ti zo so ayeke ndulu na lo.” (Psaume 15:2, 3). Ti tene ni na mbeni lege nde, Jéhovah ayeke na ngia ti yamba ala so amû lege so giriri Adam na Eve ake ni. Lo yeke ga ndulu na ala kue so ayeke sala ye so bê ti lo aye.​—Deutéronome 6:24, 25; 1 Jean 5:3.

Na lege wa e lingbi ti sala ye so bê ti Nzapa aye? A hunda na e ti manda ti hinga “ye so ayeke nzoni, na alingbi na lê ti Nzapa Sauveur ti e” na ti soro ti sala ye alingbi na ni (1 Timothée 2:3). Ye so andu nga warango tâ hingango ye ti Tënë ti Nzapa, Bible (Jean 17:3; 2 Timothée 3:16, 17). Dikongo Bible ni gi tongaso alingbi pëpe. A hunda ti tene e mû tapande ti aJuif ti kozo siècle ti kodoro ti Bérée so adengi mê na fango tënë ti Paul. Na ndo ti ala, Bible atene: “Ala yeke na nzara ti mä tënë so, na ala gi Mbeti ti Nzapa lâ na lâ ti bâ tongana tënë so ayeke biani.”​—Kusala 17:11.

Legeoko laso, mbeni nzoni mandango Bible ayeke kpengba mabe ti e na Nzapa na ayeke mû maboko na e ti lë mbeni kpengba songo na lo (aHébreu 11:6). A yeke mû nga maboko na e ti hinga mbilimbili na lege wa Jéhovah ayeke sala ye na mbage ti azo, gi pëpe ti ga na azo aye ti nzoni teti kete ngoi, me anzoni ye so aninga, mbilimbili teti azo so ayeke na yâ dutingo so alingbi.

Bâ mbilimbili tapande ti mbeni kete wungo ti aChrétien so ayeke na mbeni kpengba songo na Nzapa. Danielle, so ayeke na ngu 16, atene:  “Mbi ndoye Jéhovah mingi, na mbi yeke na aye mingi ti kiri na lo singila ngbanga ni. Lo mû na mbi babâ na mama so ayeke na tâ ndoye teti lo na so afa na mbi ye so ague legeoko na Tënë ti lo.” Nzapa ayeke yamba même ala so ade kete mingi. Mbeni Chrétien na Uruguay asû na mbeti: “Mbi yeke na bê ti kiri singila mingi, na a pusu mbi ti kiri singila na Jéhovah teti nzobe ti lo nga teti songo so mbi yeke na ni na lo.” Gabriela, mbeni molenge ti ngu mbasambala, atene: “Mbi ndoye Nzapa mingi ahon tanga ti aye kue so ayeke na ndo lê sese mobimba! Mbi yeke na Bible ti mbi mveni; mbi yeke na nzara ti manda ye na ndo Nzapa nga na ndo Molenge ti lo.”

Laso, azo kutu mingi na bê ti ala kue ayeda na wasungo psaume so atene lani: “A yeke nzoni na mbi ti ga ndulu na Nzapa.” (Psaume 73:28). A mû maboko na ala ti luti na gbele akpale so ala yeke wara ni laso, na ala yeke tâ na beku ti wara fini ti lakue lakue na ndo sese (1 Timothée 4:8). Ngbanga ti nyen mo zia na gbele mo pëpe ti “ga ndulu na Nzapa”? Biani, e yeke na beku so: “Lo yeke yongoro pëpe na e oko oko kue.” (Kusala 17:27). Ni la, Nzapa ayeke bi bê biani na ndo mo!

[Afoto na lembeti 5]

A bâ bingo bê ti Jéhovah na ndo e na yâ alege mingi

[Foto na lembeti 7]

Même akete molenge alingbi ti ga ndulu na Nzapa

[Afoto na lembeti 7]

Laso, Jéhovah ayeke mû maboko na e ti gbu ngangu. Na ngoi so alingbi, fade lo zi kobela na kui