Nzapa ayeke na gunda ti akpale ti e?

NA NGOI so molenge-wali ti Marion so aga biazo awe ayeke bâ pasi na sioni kobela ti mongoli, Marion asala lani ye so azo mingi na popo ti e alingbi ti sala. * Lo sambela na Nzapa ti mû maboko na lo. Marion atene: “Ade mbi bâ lâ oko pëpe mbeni ngoi tongaso, so zo ti mungo maboko na mbi ayeke pëpe na so mbi yeke gi mbi oko.” Na pekoni, kobela ti molenge ti lo ti wali akiri aga sioni mingi na Marion ato nda ti gi bê ti lo na ndo Nzapa. Lo hunda tele ti lo: “Ngbanga ti nyen ye so ayeke si?” Lo lingbi ti gbu nda ni pëpe so mbeni Nzapa so ayeke na ndoye na so ayeke bi bê ti lo na zo alingbi ti ke lo.

Ye so asi gi na Marion oko pëpe. Gbâ ti azo laso na ndo lê sese kue abâ so Nzapa ake ala na mbeni ngoi so ala yeke na bezoin ti lo. Na peko ti so a fâ tarä ti lo ti koli, Lisa atene: “Lakue mbi yeke tiri na hundango tënë so: ‘Ngbanga ti nyen Nzapa azia lege na aye ti sioni?’ Mbi girisa pëpe mabe ti mbi kue na Nzapa me mbi hinga so mabe ti mbi ni akpengba tongana ti kozo pëpe.” Legeoko nga, na peko ti so lo bâ so kete molenge ti lo awara kuâ senge senge na peko ti mbeni kota kpale, mbeni wali atene: “Nzapa amû na mbi dengo bê oko pëpe na yâ ye so asi. Lo fa na mbi pëpe mbeni fä ti bingo bê wala ti be-ti-ndoye.” Lo tene: “Mbi lingbi ti pardone Nzapa lâ oko pëpe.”

Ambeni zo amaï na mbage ti Nzapa abibe ti ngonzo na ngoi so ala yeke bâ aye so angoro ala. Ala yeke bâ akodoro so yere na nzara ahon ndo ni dä, azo so akpe kodoro ti ala ngbanga ti abira na so ayeke na beku pëpe teti kekereke ti ala, wungo ti amolenge so a lingbi ti diko pëpe so aga anyindu ngbanga ti kobela ti SIDA nga na azo kutu mingi so ayeke hu pono na ambeni kobela. Na gbele akota kpale so nga na ambeni mara ni nde, azo mingi ayeke bi tënë ni na li ti Nzapa ngbanga ti so lo yeke bâ gi akpale ni na lê na lo sala mbeni ye oko pëpe.

Ye oko, ti tâ tënë ni, a yeke Nzapa pëpe si ayeke na gunda ti akpale ti azo. Biani, akota nda ti tënë ayeke dä ti mä na bê so na yâ ti ngoi kete Nzapa ayeke leke ande aye ti sioni so aga na ndo ti sewa ti azo. E tisa mo ti diko article so ayeke ga na peko na ti bâ so Nzapa ayeke bi bê biani na ndo e.

[Kete tënë na gbe ni]