Kpe abungbi ti vorongo nzapa ti wataka!
Kpe abungbi ti vorongo nzapa ti wataka!
“I sigigi na popo ti ala, i duti nde, Seigneur atene; i ndu ye ti sioni oko pëpe.”—2 ACORINTHIEN 6:17.
1. Azo mingi so aye tâ tënë ayeke tâ na nzara ti hinga nyen?
AZO mingi aye tâ tënë, me ala hinga tâ tënë na ndo Nzapa nga na ndo gigi ti kekereke ti azo kue pëpe. Ndali ti so ala wara pëpe kiringo tënë na ahundango tënë so agbu bê ti ala na ndo Nzapa nga na gigi ti kekereke ti azo kue, li ti ala aga kirikiri na ala hinga ye so ala lingbi ti sara pëpe. Azo mingi ayeke angbâa ti atënë ti akotara, ti angobo ti sarango ye nga na ti amatanga so amû ngia pëpe na Nzapa so aleke e. Peut-être, mo hinga ambeni zo nga na ambeni fami ti mo so amä na bê na tënë ti enfer ti wâ, tënë ti Nzapa ota na yâ tere oko, tënë ti âme so angbâ na fini na peko ti kuâ wala ambeni mvene ni tongaso.
2. Amokonzi-nzapa asara nyen? Ye wa asi na pekoni?
2 Nyen la asara si azo mingi tongaso ayeke na yâ ti bingo na lege ti yingo? Ti so zo agi li ti lo na ni gbä a yeke so, a yeke azo so ayeke voro Nzapa, na mbilimbili abungbi ti vorongo nzapa nga na amokonzi-nzapa ni so ayeke fa atënë so ague nde mingi na bango ndo ti Nzapa, si azia azo na yâ ti vukongo ndo so (Marc 7:7, 8). Ye so asara si azo mingi azia tere ti ala si a handa ala; ala pensé ti ala atene ala yeke voro tâ Nzapa, andâ ala yeke so gi bê ti Nzapa ni. A yeke abungbi ti vorongo nzapa ti wataka si ayeke tâ na gbe ni.
3. Zo wa la ayeke tâ kota zo so asara si abungbi ti vorongo nzapa ti wataka amaï? Bible atene lo yeke sara ye tongana nyen?
3 Mbeni zo so lê ayeke bâ lo pëpe la ayeke na peko ti abungbi ti vorongo nzapa ti wataka. Na sarango tënë ti zo ni so, bazengele Paul atene: “Ala so amä na bê pëpe, nzapa ti sese so asara si bibe ti ala aga ziba, si ala lingbi bâ lumière pëpe, lumière ti Tene-nzoni ti gloire ti Christ, Lo so ayeke image ti Nzapa.” (2 aCorinthien 4:4). “Nzapa ti sese so” ayeke gi Satan Zabolo awe. A yeke lo si ayeke tâ kota zo so asara si abungbi ti vorongo nzapa ti wataka ayeke maï. Paul atene: “Satan mveni agbian tere ti lo si azo abâ lo tongana ange ti lumière. Tongaso a yeke kota ye pëpe tongana azo ti lo agbian tere ti ala nga si azo abâ ala tongana azo so asara kusala ti mbilimbili.” (2 aCorinthien 11:14, 15). Satan asara si ye so ayeke sioni akpa ye so ayeke nzoni nga lo yeke handa azo ti yeda na amvene ti lo.
4. Ndia ti Nzapa atene nyen na azo ti Israël na ndo aprophète ti wataka?
4 A yeke biani na lege ni so Bible adë ngbanga ngangu mingi na ndo ti abungbi ti vorongo nzapa ti wataka. Na tapande, Ndia ti Moïse agboto lani mê ti azo ti Nzapa mbilimbili ti kpe aprophète ti wataka. ‘A lingbi a fâ zo kue so’ ayeke maï lani afango ti ye ti wataka nga na vorongo anzapa ti wataka ‘teti lo sara tënë ti ke Jéhovah.’ A mû yanga lani na azo ti Israël ti ‘lungula sioye na popo ti ala.’ (Deutéronome 13:1-5). Ti tâ tënë ni, na lê ti Jéhovah, abungbi ti vorongo nzapa ti wataka ayeke tâ mbeni sioni ye.—Ezéchiel 13:3.
5. Laso, a lingbi aChrétien amä agbotongo mê wa?
5 Jésus Christ nga na adisciple ti lo ayeke lani na oko bango ndo ti Jéhovah so na ndo ti abungbi ti vorongo nzapa ti wataka. Jésus agboto mê ti adisciple ti lo, lo tene: “I kpe lege ti aprophète ti wataka, ala so asi na i na ala yü poro ti ngasangbaga na tere ti ala; me na bê ti ala, ala yeke a-ikaï [wala ambo ti ngonda] ti nzara mingi.” (Matthieu 7:15; Marc 13:22, 23). Paul atene so “ngonzo ti Nzapa alondo na yayu, a zu na ndo ye kue so azo asara ti ke Nzapa, na a zu na ndo ye kue ti kirikiri ti azo so akanga lege ti tene-biani”. (aRomain 1:18). A yeke biani kota ye ti tene atâ Chrétien amä agbotongo mê so na ala kpe azo kue so ayeke kanga lege ti tâ tënë ti Mbeti ti Nzapa wala so ayeke maï afango ye ti wataka.—1 Jean 4:1.
Sigigi na yâ ti “Kota Babylone”
6. Na yâ ti Bible a haka “Kota Babylone” na nyen?
6 Bâ lege so mbeti ti Apocalypse ayeke sara tënë ti abungbi ti vorongo nzapa ti wataka. Mbeti ni ahaka abungbi ti vorongo nzapa ti wataka na mbeni wali-ndumba so sämba asara lo na so lo yeke komande na ndo ti gbâ ti aroyaume nga na azo. Wali ni, so ayeke tâ wali pëpe, asara pitan na agbia mingi nga lo nyon mênë ti atâ wakua ti Nzapa (Apocalypse 17:1, 2, 6, 18). A sû mbeni iri na ndo lê ti wali ni so, iri ni so alingbi tâ na sioni tambela ti lo ni. Iri ni ayeke “Kota Babylone, mama ti awali ti pitan na ti ye ti sioni mingi ti sese.”—Apocalypse 17:5.
7, 8. Tongana nyen abungbi ti vorongo nzapa ti wataka ayeke sara ndumba? Aye ti pekoni ayeke nyen?
7 So Bible ahaka Kota Babylone na mbeni wali-ndumba, hakango ye ni so alingbi biani na abungbi ti vorongo nzapa ti wataka kue. Atâa so gbâ ti abungbi ti vorongo nzapa ti wataka so kue ayeke gi pëpe mbeni bungbi oko, ye so ala yeke gi nga ye so ala yeke sara ague tâ gi oko. Tongana ti so mbeti ti Apocalypse ahaka ala na wali-ndumba, abungbi ti vorongo nzapa ti wataka ayeke na ngangu komandema na ndo agbia ti sese. Na tapande ti mbeni wali so ayeke be-ta-zo na koli ti mariage ti lo pëpe, abungbi ti vorongo nzapa ti wataka ayeke sara gigi ti ndumba na lege so ala yeke te mbele na agbia na peko ti tere. Disciple Jacques atene: “I azo so i sara lango-sioni, i hinga pëpe? ti ndoye sese so ayeke ti ke Nzapa. Tongaso zo so aye ti ga ndeko ti sese so, lo sara si lo mveni aga wato ti Nzapa.”—Jacques 4:4.
8 Mango tere ti abungbi ti vorongo nzapa ti wataka na agbia ti sese so asara si azo abâ pasi mingi. Pakara Xolela Mangcu, mbeni wandara ti Afrika na ndo ti atënë ti poroso, atene: “Mbaï ti sese so asi singo na atapande ti azo so a fâ ala gbani gbani ndali ti mango tere ti abungbi ti nzapa na azo ti poroso.” A de ti ninga pëpe, mbeni mbeti-sango atene: “Akota nga na asioni kpale so azo mingi akui dä laso . . . alondo gi na ndo ti tënë ti nzapa.” Azo kutu mingi akui na yâ ti abira so abungbi ti nzapa amû mbage ti ala dä. Kota Babylone asara ngangu même na atâ wakua ti Nzapa nga lo fâ ala, nda ni la si a tene mênë ti ala asara lo tongana sämba.—Apocalypse 18:24.
9. Tongana nyen mbeti ti Apocalypse afa lege so Jéhovah ake na abungbi ti vorongo nzapa ti wataka?
9 Na lege ti ye so Bible atene ayeke si ande na Kota Babylone, e hinga polele so Jéhovah ake tâ na bê oko abungbi ti vorongo nzapa ti wataka. Apocalypse 17:16 atene: “Nza bale-oko, na nyama ni so mo bâ, fade ala ke wali ti pitan so, ala hunzi ye ti lo kue si tere ti lo angbâ senge, na fade ala te mitele ti lo, na ala zö lo na wâ.” Kozoni, mbeni kota nyama ti ngonda ayeke fâ wali-ndumba ni ti te nyama ti tere ti lo kue. Na pekoni, atanga ti tere ti lo so angbâ, a yeke zö ni kue na wâ. Legeoko nga, na yâ ti kete ngoi fade agbia ti sese so ayeke sara tongaso na abungbi ti vorongo nzapa ti wataka. Nzapa ayeke pusu ande agbia so ti sara tongaso (Apocalypse 17:17). Kota Babylone, so ayeke abungbi ti vorongo nzapa ti wataka kue ti sese so, ayeke gue biani na futingo. “Fade a wara [lo] mbeni pëpe.”—Apocalypse 18:21.
10. A lingbi e bâ abungbi ti vorongo nzapa ti wataka tongana nyen?
10 A lingbi atâ Chrétien abâ Kota Babylone tongana nyen? Bible amû yanga polele, atene: “I sigigi na kodoro so si i sara beoko na siokpari ti lo pëpe, na tongaso sioye ti lo aga na ndo i pëpe.” (Apocalypse 18:4). A lingbi azo so aye ti sö fini ti ala asigigi na yâ ti abungbi ti vorongo nzapa ti wataka kozoni si ye ni kue aga sioni. Tongana lo yeke lani na sese, Jésus Christ afa kozoni so na lâ ti nda ni, fade azo mingi ayeke tene gi na yanga ti ala senge so ala mä yanga ti lo (Matthieu 24:3-5). Na ndo ti azo tongaso, lo tene: “Mbi hinga i giriri oko pëpe; i zia Mbi, i azo so asara siokpari.” (Matthieu 7:23). Jésus Christ so azia lo lani na ndo ti mbata ti komande awe ake abungbi ti vorongo nzapa ti wataka.
Tongana nyen ti kpe abungbi ti vorongo nzapa ti wataka?
11. Ti tene e kpe abungbi ti vorongo nzapa ti wataka, a lingbi e sara nyen?
11 E atâ Chrétien e yeke kpe abungbi ti vorongo nzapa ti wataka, e yeke kpe nga amvene so abungbi ti vorongo nzapa ti wataka ayeke fa. So ti tene so e yeke mä pëpe akuasinga ti abungbi ti vorongo nzapa so a yeke sara ni na radio, e yeke bâ ni pëpe na televizion, nga e yeke diko pëpe ambeti so ayeke tene mvene na ndo ti Nzapa nga na ndo ti Bible (Psaume 119:37). Na ndo ni, e yeke yôro tere ti e pëpe na yâ ti mbeni bungbi wala na yâ ti asarango ngia so mbeni bungbi so ayeke na gbe ti abungbi ti vorongo nzapa ti wataka si amû maboko na ni. Nga, e yeke mû maboko même kete tongaso pëpe na mbeni bungbi ti vorongo nzapa ti wataka (1 aCorinthien 10:21). Sarango ye alingbi na wango so ayeke bata e si mbeni zo agbu e pëpe “tongana angbâa, na lege ti ndoye ndara na handa senge, na lege ti tënë ti akotara, na lege ti kozo tënë ti sese so, me na lege ti Christ pëpe”.—aColossien 2:8.
12. Tongana nyen si mbeni zo alingbi ti sigigi na yâ ti abungbi ti vorongo nzapa ti wataka?
12 Ka ti mbeni zo so aye ti ga Témoin ti Jéhovah, me so na ndembe so iri ti lo angbâ na yâ ti mbeti ti iri ti amembre ti mbeni bungbi ti vorongo nzapa ti wataka? Mingi ni, ti sû mbeni lettre ti fa na azo ti eglize ni so lo zi tere ti lo na yâ ni awe afa polele so lo sigigi na yâ ti bungbi ti vorongo nzapa ti wataka. A yeke nzoni biani ti tene zo ni asara mbeni kpengba ye ti kpe biaku biaku si mbeni kete saleté ti abungbi ti vorongo nzapa ti wataka akiri andu lo pëpe. A lingbi mbeni zo so aye ti ga Témoin ti Jéhovah afa polele na lê ti azo ti abungbi ti vorongo nzapa ti wataka nga na lê ti azo kue so ti lo na abungbi ti vorongo nzapa ti wataka ahunzi biaku biaku awe.
13. Na ndo tënë ti kpengo abungbi ti vorongo nzapa ti wataka, wango wa Bible amû na e?
13 Bazengele Paul atene: “I bungbi tere ti i pëpe na azo so amä na bê pëpe. Mbilimbili asara beoko na siokpari? Lumière asara beoko na bingo? Christ asara beoko na Bélial? Wamabe na zo so amä na bê pëpe, ala lingbi sara beoko? Temple ti Nzapa asara beoko na ayanda? . . . Teti tënë so, I sigigi na popo ti ala, i duti nde, Seigneur atene; i ndu ye ti sioni oko pëpe.” (2 aCorinthien 6:14-17). E yeke mû peko ti wango so gi tongana e kpe abungbi ti vorongo nzapa ti wataka. Wango ti Paul so ahunda nga na e ti kpe azo so ayeke sara nzapa ti wataka?
“I tambela na ndara”
14. Alingbi e ga nduru pëpe na tere ti mbeni zo so ayeke na yâ ti mbeni bungbi ti vorongo nzapa ti wataka? Fa nda ni.
14 A lingbi atâa Chrétien akpe azo so ayeke na yâ ti abungbi ti vorongo nzapa ti wataka? A lingbi e si nduru pëpe na tere ti mbeni zo so ayeke pëpe ita ti e na yâ mabe? Ên-ën, tënë ni ayeke tongaso pëpe. Mbeni oko ti akota komandema use so Jésus afa atene: “Mo ndoye zo so ayeke nduru na mo legeoko tongana mo ndoye mo mveni.” (Matthieu 22:39). E yeke fa biani so e ndoye azo so ayeke nduru na e tongana e yeke fa na ala nzo tënë ti Royaume. E yeke fa nga so e ndoye ala tongana e yeke manda Bible na ala ti fa na ala nene ti tene ala sigigi na yâ ti abungbi ti vorongo nzapa ti wataka.
15. Tongana a tene so e “yeke ti sese so pëpe” aye ti tene nyen?
15 E yeke fa nzo tënë na azo so ayeke nduru na e, me teti so e yeke adisciple ti Jésus, e “yeke ti sese so pëpe”. (Jean 15:19). Ge, tënë “sese so” aye ti sara tënë ti azo so ague yongoro na Nzapa awe (aEphésien 4:17-19; 1 Jean 5:19). E duti nde na sese ni na lege so e ke asarango ye ti azo ni, atënë ti yanga ti ala, nga na tambela ti ala so aso bê ti Jéhovah (1 Jean 2:15-17). Nga, ti sara ye alingbi na kpengba-ndia so a tene “zo ti nzoni so atambela na azo ti sioni afuti lege ti lo”, e ye pëpe ti sara kamarade na ala so ayeke kpe pëpe andia ti Nzapa (1 aCorinthien 15:33). Ti duti nde na sese so aye ti tene ti “ga sioni pëpe na lege ti ye ti sese so.” (Jacques 1:27). Tongaso, dutingo nde na sese so aye ti tene pëpe so na lege ti mitele e zi tere ti e yamba na yâ ti sese ni na e si nduru pëpe na tere ti azo ni, ên-ën a yeke tongaso pëpe.—Jean 17:15, 16; 1 aCorinthien 5:9, 10.
16, 17. A lingbi aChrétien asara ye tongana nyen na mbage ti azo so ahinga tâ tënë ti Bible pëpe?
16 Tongaso, e yeke sara ye tongana nyen na mbage ti azo so ahinga tâ tënë ti Bible pëpe? Paul asû lani mbeti so na aChrétien ti Colosses, lo tene: “I tambela na ndara na lê ti ala so ayeke na gigi, i zia l’heure ti i ahon senge pëpe. I sara si tënë ti yanga ti i ayeke nzoni lakue, i leke na ingo, si i lingbi hinga lege ti kiri tënë na azo oko oko kue.” (aColossien 4:5, 6). Ti Bazengele Pierre, lo tene: “I yekia Christ na bê ti i tongana Seigneur. I leke bê ti i ti kiri tënë lakue na azo kue so ahunda nda ti tënë ti beku so ayeke na yâ i, me i kiri tënë na tâ be-ti-molenge na mbeto.” (1 Pierre 3:15). Paul awa aChrétien atene “ala di iri ti zo oko sioni pëpe, ala gi tënë pëpe, ala sara na lege ti nzobe, na ala fa na azo kue ala yeke na tâ be-ti-molenge.”—Tite 3:2.
17 E aTémoin ti Jéhovah, e kpe ti sara ye na azo na ngangu wala e kpe ti bâ tere ti e so e hon ala mingi. Biani, e yeke zia mbeni sioni iri pëpe na ndo ti azo so ayeke na yâ ti ambeni bungbi ti vorongo nzapa nde. Nde na so, atâa tongana azo so e yeke fa tënë na ala, azo so alango nduru na e wala akamarade ti e ti place ti kua asara ye na mbage ti e na nzobe pëpe wala atene asioni tënë na ndo ti e, e yeke sara ye na ndara.—aColossien 4:6; 2 Timothée 2:24.
“Mo sara na lege ti tapande ti nzo tënë”
18. Ye ti vundu wa asi na ala so akiri na ngbene dutingo ti ala na yâ ti bungbi ti vorongo nzapa ti wataka?
18 So tâ ye ti vundu ande ti bâ so na peko ti so mbeni zo amanda atâ tënë ti Bible awe, lo kiri na ngbene dutingo ti lo ti yâ ti abungbi ti vorongo nzapa ti wataka! Bible afa vundu ti peko ti sarango ye tongaso, tongana a tene: “Teti tongana ala kpe sioye ti sese so awe na lege ti hinga Seigneur na Sauveur Jésus Christ, na sioye so akiri akanga ala na ahon ndo ti ala, fade nda ti ala so ayeke sioni ahon ti kozoni. . . . Ye aga na ala alingbi na proverbe so ayeke tâ tënë, Mbo akiri na tere ti kobe so lo dë awe, na mama ti cochon so a sukula lo awe akiri alango na yâ popoto.”—2 Pierre 2:20-22.
19. Ngbanga ti nyen a yeke kota ye ti tene lê ti e akpengba si mbeni ye ti sioni abuba pëpe dutingo ti e na lege ti yingo?
19 A lingbi lê ti e akpengba si mbeni ye ti sioni abuba dutingo ti e na lege ti yingo pëpe. Aye ti sioni ni ayeke dä biani, tongaso zia lê ti e angbâ ti kpengba! Bazengele Paul agboto mê ti e, atene: “Yingo atene biani, na lâ ti nda ni fade ambeni zo azia mabe ni, ala mä ayingo ti handa, na tënë so ayingo sioni afa.” (1 Timothée 4:1). E yeke fadeso na “lâ ti nda ni” ni so. Ala so ayeke kpe pëpe abungbi ti vorongo nzapa ti wataka, ‘pupu ti tënë nde nde kue alingbi ti yengi ala, na a hon na ala kirikiri tongana ye na lê ti ngu, na lege ti handa ti azo ti mayele, na handa ti ye ti kirikiri.’—aEphésien 4:13, 14.
20. Tongana nyen e lingbi ti bata tere ti e na asioni ngangu so abungbi ti vorongo ti nzapa ti wataka ayeke sara na ndo ti zo?
20 Tongana nyen si e lingbi ti bata tere ti e na asioni ngangu so abungbi ti vorongo nzapa ti wataka ayeke sara na ndo ti zo? Zia e bâ aye kue so Jéhovah amû na e. E yeke na Tënë ti Nzapa, Bible (2 Timothée 3:16, 17). Na lege ti “ngbâa be-ta-zo na ti ndara”, Jéhovah ayeke mû na e gbâ ti akobe ti yingo (Matthieu 24:45, NW ). Tongana e yeke gue na li ni na lege ti yingo, a lingbi e sara nzara ti ‘akpengba kobe so ayeke teti abiazo’; a lingbi nga e sara nzara ti guengo na bungbi ti aChrétien, ndo so e yeke manda tâ tënë dä (aHébreu 5:13, 14; Psaume 26:8). Zia e leke na bê ti e ti wara nzoni biani na yâ ti aye so Jéhovah amû na e tongaso si e lingbi ti ‘sara ye alingbi na lege ti tapande ti nzo tënë’ so e mä awe (2 Timothée 1:13). Na lege so, e lingbi ti kpe abungbi ti vorongo nzapa ti wataka.
Mo manda nyen?
• “Kota Babylone” ayeke nyen?
• Ti kpe abungbi ti vorongo nzapa ti wataka, a lingbi e sara nyen?
• A lingbi e kpe aye ti sioni wa so ayeke buba dutingo ti e na lege ti yingo?
[Ahundango tënë ti manda na ye]
[Foto na lembeti 28]
Mo hinga ngbanga ti nyen a haka “Kota Babylone” na mbeni wali-ndumba?
[Foto na lembeti 29]
“Kota Babylone” ayeke gue biani na futingo
[Foto na lembeti 31]
E yeke sara ye “na tâ be-ti-molenge na mbeto” na mbage ti azo so ayeke pëpe aita ti e na yâ mabe