Mo diko a-article ti Tour ti Ba Ndo so asigigi ade ti ninga ape so nzoni? Bâ wala mo lingbi ti kiri tënë na ahundango ndo so ge:

Na ngoi wa la a fâ lani ngasangbaga ti Pâque na 14 Nisan?

Ambeni Bible atene so a fâ ngasangbaga ni na “lakui”, so ti tene a fâ ngasangbaga ni na pekoni so lâ alinda kozoni si ndo avuko (Ex. 12:6).—15/12, lembeti 18-19.

Amaseka alingbi ti sara kua na afango ye wa ti Bible ti mû anzoni desizion?

Afango ye ni ayeke ota. (1) Ti gi Royaume ti Nzapa na mbilimbili ti lo kozoni (Mat. 6:19-34). (2) Ti duti na ngia ti sara kua teti ambeni zo (Kus. 20:35). (3) Ti duti na ngia ti sara kua teti Jéhovah na lâ ti maseka ti mo (Zo-ti. 12:1).—15/1, lembeti 19-20.

Azo ti kpengo na ambarata osio wa ayeke kpe loro ngbene ye na ngu 1914?

Jésus so ayeke mbeni gbia na yayu la akpe na vuru mbarata ni, lo yeke kpe loro ti sö benda na ndo ti Satan na asioni ange so amû peko ti lo. Ti mbarata so tere ti lo abe tongana wâ, a ye ti sara tënë ti abira so asara si azo abâ pasi. Vuko mbarata ni, a ye ti sara tënë ti kota nzara. Ti mbarata so tere ti lo akpa ti nyama so kobela asara lo, zo so aduti na ndo ti lo aga na kuâ na lege ti asioni kobela ti fango zo (Apoc. 6:2-8).—1/2, lembeti 6-7.

A yeke sara “mariage ti Molenge ti ngasangbaga ni” lawa? (Apoc. 19:7).

A yeke sara “mariage ti Molenge ti ngasangbaga ni” na pekoni so Jésus Christ so ayeke Gbia ni ayeke hunzi songo benda ti lo, so ti tene na pekoni so a yeke futi Babylone, Ngangu gbata nga a yeke tiri bira ti Harmaguédon.—15/2, lembeti 10.

Ngbanga ti nyen aJuif ti ngoi ti akozo Chrétien ayeke “ku” lani Messie “kungo”? (Luc 3:15).

E lingbi ti tene pëpe so aJuif so ayeke na ngoi ti akozo Chrétien ahinga lani prophétie ti Daniel na ndo ti Messie tongana ti so e hinga so (Dan. 9:24-27). Me, ala lingbi ti mä tënë so mbeni ange aga atene lani na aberger wala tënë so Anne mbeni wali so ayeke prophète atene na ndo ti Jésus na ngoi so aga na Jésus na temple na ndembe so lo ngbâ lani bébé. Nga azo ti gingo nda ti aye na lege ti atongoro ayeke gi lani ti bâ “Lo so a dü lo gbia ti aJuif”. (Mat. 2:1, 2). Jean, Wabatizengo azo, afa lani so Christ aga nduru ti si awe.—15/2, lembeti 26-27.

Tongana nyen la e lingbi ti kpe ti tene En ti e aga Ên-ën pëpe? (2 aCor. 1:18).

A lingbi ti si so e sara ye pëpe alingbi na tënë ti yanga ti e, ngbanga ti so mbeni ye asi so asara si e lingbi pëpe ti sara ye alingbi na tënë so e tene. Me tongana e mû zendo ti sara mbeni ye, a lingbi e sara kue ti sara ye alingbi na ni.—15/3, lembeti 32.

Tongana nyen la e lingbi ti luti na lê ti tara ti bango porno?

Aye ota so alingbi ti mû maboko na e (1) Tongana lê ti e atï na ndo ti afoto so ayeke zingo nzara ti tere ti zo, e bi lê ti e na ngonda. (2) Tongana asioni pensé aga na li ti e, e tomba ni na yorongo ambeni nzoni ye na yâ ti li ti e nga e sambela Nzapa. (3) E sara hange na tere ti e na e kpe afilm nga na asite ti porno.—1/4, lembeti 10-12.

Aye wa la alingbi ti si tongana mbeni Chrétien azia sewa ti lo lo gue ti sara kua na kodoro wande?

Tongana babâ na mama ayeke ndo oko pëpe, vundu alingbi ti sara amolenge ni nga anzoni sarango ye ti ala alingbi ti changé. Nzara ti ala alingbi ti sara amolenge ni encore ape. Nga koli wala wali ni alingbi ti gi mbeni wali wala mbeni koli nde.—15/4, lembeti 19-20.

Ndali ti nyen la ândö tongana a kanga azo na ndo ti keke, a yeke kungbi yâ ti gere ti ala?

A-Romain ayeke kanga lani ambeni zo na ndo ti keke. A-Juif ahunda lani ti tene a kungbi yâ ti gere ti asioni zo use so ayeke lani na tere ti Jésus. Ye so asara si ayeke ngangu na ala ti wu nga ala kui hio tongaso si kuâ ti ala angbâ na ndo ti keke ni na bï ape (Deut. 21:22, 23).—1/5, lembeti 11.

Ahundango ndo osio wa a lingbi e bata na li ti e na ngoi so e yeke fa tënë?

Azo wa la mbi yeke fa tënë na ala? Mbi yeke fa tënë na ala na ndo wa? Nzoni ngoi ti wara ala ayeke ngoi wa? Mbi yeke fa tënë na ala tongana nyen?—15/5, lembeti 12-15.

Nyen la afa so nyongo manga afâ azo mingi?

Na popo ti ngu 1900 ti si na ngu 1999, manga afâ azo 100 000 000. A yeke fâ azo 6000000 ngu oko oko.—1/6, lembeti 3.