‘Kiri na mo kpengba aita ti mo’
PIERRE atoto ngangu na pekoni so lo tene ni hinga Jésus ape. Atâa so a lingbi lo sara ngangu ti kiri ti sara na Jéhovah be-ta-zo, Jésus aye ti sara kua na lo ti mû maboko na amba ti lo. Tongaso, Jésus atene na lo, a tene: “Tongana mo kiri awe, kpengba aita ti mo.” (Luc 22:32, 54-62). Pierre aga mbeni oko ti aChrétien so agbu congrégation na nduzu na ngoi ti akozo Chrétien (aGal. 2:9). Legeoko nga, mbeni ita so kozo ayeke ancien alingbi ti kiri ti ga ancien nga ti wara ngia ti kpengba amba ti lo aChrétien na lege ti yingo.
Ambeni ita so ândö ayeke a-ancien si a zi ala na kua ni alingbi ti pensé so angangu so ala sara ti sara na Jéhovah tongana ancien atï na ngu. Julio, * so ayeke lani ancien na Amerika ti Mbongo teti ngu 20 na ndo ni, atene: “Mbi mû tere ti mbi lani mingi ti leke adiskur, ti gue ti bâ aita, nga ti bâ ndo na ndo ti aita ti congrégation. Gi hio tongaso, mbi perdre aye so kue. Ye so asara si mbi yeke nzoni ape.” Laso, Julio akiri aga ancien.
“BÂ NI TONGANA TÂ YE SO AMÛ NGIA”
Disciple Jacques atene: “Aita ti mbi, tongana ala tingbi na mara ti atara nde nde, zia ala bâ ni tongana tâ ye so amû ngia na ala.” (Jacq. 1:2). Jacques ayeke sara lani tënë ti atara so alingbi ti si na e ndali ti so siokpari ayeke na tere ti e wala ndali ti so a sara ye ti ngangu na e. Lo sara tënë ti asioni nzara ti bê, bango yâ ti azo bango si e sara ye na ala nga na ambeni ye nde (Jacq. 1:14; 2:1; 4:1, 2, 11). Na ngoi so Jéhovah ase e, aye so aga na pekoni alingbi ti mû vundu na e (aHéb. 12:11). Me, a lingbi e zia pëpe si ye so asara si e duti na ngia mbeni pëpe.
Même tongana a zi e na kua so e sara na yâ ti congrégation, lege angbâ ti zi na e lakue ti kpengba mabe ti e nga ti fa so e ye Jéhovah. E lingbi nga ti gbu li ti e na ndo ti ye so apusu e ti ga ancien. E ye lani ti ga ancien ti tene e wani la e wara ye ti nzoni dä? Wala a yeke ndali ti so e ye Nzapa nga e hinga na bê ti e kue so congrégation ayeke ti lo nga a lingbi a bâ ndo na ndo ni nzoni? (Kus. 20:28-30). Aita so kozo ayeke a-ancien so angbâ ti sara kusala so ayeke nzoni-kue na Jéhovah na ngia afa na azo kue, nga na Satan, so ala ye Jéhovah na bê ti ala kue.
Na ngoi so Jéhovah ase Gbia David ndali ti akota siokpari so lo sara, lo yeda na ni nga Jéhovah apardone lo. David ahe bia atene: “Ngia ayeke na zo so kengo-ndia ti lo a pardone awe, na lo so siokpari ti lo a honde awe. Ngia ayeke na zo so L’Éternel adiko sioye na li ti lo pëpe, na handa ayeke na yingo ti lo pëpe!” (Ps. 32:1, 2). Sengo ndo so asara si David akiri aga nzoni nga kite ayeke dä ape so asara si lo ga mbeni nzoni berger ti awakua ti Nzapa.
Fani mingi, aita so akiri aga ancien aga anzoni berger ahon ti kozo. Mbeni ancien ni atene: “Fadeso mbi hinga nzoni mingi tongana nyen ti bâ lege ti aita so asara faute.” Mbeni nde atene: “Fadeso mbi bâ na nene ni mingi pasa so mbi yeke na ni ti mû maboko na aita.”
MO LINGBI TI KIRI TI GA ANCIEN?
Mbeni zo ti sungo psaume atene: “Fade [Jéhovah a]ngbâ ti zingo lakue pëpe.” (Ps. 103:9). Tongaso, a lingbi e pensé ape so Nzapa ayeke kiri ti zia bê ti lo lâ oko ape na mbeni zo so asara kota faute. Ricardo, so a zi lo na kua ti ancien so lo sara ni teti ngu mingi, atene: “Vundu asara mbi mingi ndali ti faute so mbi sara. Teti ngoi mingi, mbi bâ so mbi lingbi ape na ye so akanga lege na mbi ti kiri ti sara na aita tongana ancien. Mbi pensé so aita alingbi ti kiri ti zia bê ti ala na mbi ape. Me teti so mbi ye ti mû maboko na azo, mbi manda Bible na azo, mbi wa aita na Da ti Royaume, nga mbi na ala e fa tënë legeoko. Ye so amû maboko na mbi ti wara nzoni pensé nga fadeso mbi kiri mbi ga ancien.”
Jéhovah amû maboko na aita-koli ti kiri ti wara ngia ti ala nga ti kiri ti duti na nzara ti ga ancien
Tongana mbeni ita abata zo na bê alingbi ti kanga lege na lo ti ga ancien. A yeke nzoni mingi ti sara ye tongana David, wakua ti Jéhovah, so akpe Saül, gbia ti kota bê. David ake ti futa kula, même na angoi so lege azi na lo ti sara ni (1 Sam. 24:4-7; 26:8-12). Na ngoi so Saül akui na yâ ti bira, David atoto kuâ ti lo na lo tene so “azo andoye” Saül na molenge ti lo Jonathan mingi (2 Sam. 1:21-23). David abata zo na bê ape.
Tongana mo bâ so azo acomprendre mo ape wala a sara ye na mo na lege ni ape, bata zo na bê ape. Na tapande, na ngoi so a zi William na kua ti ancien na pekoni so lo sara kua ni teti ngu 30 tongaso na Grande-Bretagne, lo bata ambeni ancien na bê. Nyen la amû maboko na William ti kiri ti sara na Jéhovah be-ta-zo? Lo tene: “Dikongo mbeti ti Job amû ngangu na mbi. Tongana Jéhovah amû lani maboko na Job ti leke tënë na akamarade ti lo ota, lo yeke mû maboko na mbi mingi ti leke tënë na aita so ayeke a-ancien.”
NZAPA AIRI TËNË NZONI NA NDO TI AITA SO AKIRI AGA A-ANCIEN
Tongana mo la mo zia lani kua ti bango ndo na ndo ti angasangbaga ti Nzapa, a yeke nzoni mo gbu li ti mo na ndo ti ye so apusu mo ti zia kua ni. A yeke akpale ti mo la ahon ndo ti mo? Ambeni ye nde aga kota ye mingi na lê ti mo? Awokongo ti aita asara si bê ti mo anze? Atâa ye ni ayeke nyen, girisa ape so na ngoi so mo yeke lani ancien mo mû maboko na aita na alege mingi. Adiskur ti mo akpengba ala, tapande ti mo apusu ala ti sara aye ti yingo, nga avizite so mo sara na ala amû maboko na ala ti gbu ngangu na yâ ti atara so asi na ala. Nzoni kua so mo sara na ngoi so mo yeke ancien azia ngia na bê ti Jéhovah nga na bê ti mo.
Fa so mo ye Jéhovah na sarango kua so ayeke nzoni-kue na ngia
Jéhovah amû maboko na aita-koli ti kiri ti wara ngia ti ala nga ti kiri ti duti na nzara ti mû li ni na yâ ti congrégation. Tongana mo la mo zia kua ti ancien wala a zi mo zingo na kua ni, mo lingbi ti kiri ti ‘gi kusala ti zo ti bango ndo na ndo ti congrégation’. (1 Tim. 3:1). Paul ‘azia pëpe ti sambela’ ndali ti aChrétien ti Colosses ti tene ala hinga tâ ye so bê ti Nzapa aye kue kue kue “tongaso si ala tambela na lege so alingbi na lê ti Jéhovah, ti mû ngia mingi na lo.” (aCol. 1:9, 10). Tongana mo yeke na pasa ti kiri ti ga ancien, hunda na Jéhovah ti kpengba mo, ti mû maboko na mo ti kanga bê nga ti duti na ngia. Na alango ti nda ni so, awakua ti Jéhovah ayeke na bezoin ti a-ancien so asara ye na ndoye ti mû maboko na ala na lege ti yingo. Mo lingbi ti kpengba aita ti mo? Mo ye ti sara ni?
^ par. 3 A changé ambeni iri ni.