1, 2. Kua wa la Jéhovah amû na Moïse? Jéhovah atene nyen na lo ti dë bê ti lo?

TARA ti bâ so a hunda na mo ti luti na devant ti mbeni kota gbia ti sese na ti sara tënë na iri ti awakua ti Jéhovah. Bê ti mo ayeke tongana nyen? Kite ayeke pëpe so mo yeke gi bê ti mo, mo yeke bâ so mo lingbi ape nga mbeto ayeke sara mo. Mo yeke leke atënë so mo yeke tene tongana nyen? Nyen la mo lingbi ti sara si atënë ti mo ni ayeke na ngangu ti fa so a yeke Nzapa ti ngangu ahon kue la atokua mo?

² A yeke oko ye so asi lani na Moïse la. Jéhovah atene na Moïse, so ayeke na “tâ be-ti-molenge ahon azo kue so ayeke na lê ti sese”, atene so ni yeke tokua lo ti zi azo ti Israël so ayeke angbâa na Égypte (Nom. 12:3). Aye so asi na pekoni afa so Pharaon ayeke lani gbia so li ti lo akpengba nga lo yeke zo ti baba (Ex. 5:1, 2). Me Jéhovah aye si Moïse ahunda na Pharaon ti mû lege na azo ti Israël kutu na kutu so ayeke angbâa ti sigigi na kodoro ni. Moïse agi bê ti lo, tongaso lo hunda Jéhovah, lo tene: “Mbi yeke zo nyen, si Mbi lingbi gue na Pharaon ti sara si amolenge ti Israël asigigi na Égypte?” Lani Moïse abâ so lo lingbi ape. Me Nzapa adë bê ti lo so lo yeke gi lo oko ape. Lo tene na Moïse, lo tene: “Mbi yeke na mo.”—Ex. 3:9-12.

3, 4. (a) Moïse asara lani mbeto ngbanga ti nyen? (b) Ngbanga ti nyen la ye so asi na Moïse so alingbi nga ti si na mo?

 ³ Moïse asara lani mbeto ngbanga ti nyen? Mbeto asara lo lani ndali ti so lo pensé so Pharaon alingbi pëpe ti yamba mbeni zo so Jéhovah Nzapa la atokua lo wala ti dengi mê ti mä lo. Moïse asara nga mbeto ti azo ti mara ti lo wani ndali ti so lo pensé so ala yeke yeda ape so a yeke Jéhovah la atokua lo ti zi ala. Tongaso, Moïse atene na Jéhovah, a tene: “Me tongana ala mä na bê na mbi pëpe na ala ke tënë so mbi tene, teti ala yeke tene ande atene ‘Jéhovah asi na mo pëpe.’”—Ex. 3:15-18; 4:1, FD.

⁴ Tënë so Jéhovah atene na Moïse nga aye so asi na pekoni alingbi ti fa na e mbeni kpengba ye ti manda. Peut-être lâ oko mo yeke sara tënë pëpe na gbele mbeni kota zo ti komande. Me asi na mo awe so a yeke ngangu na mo ti sara tënë ti Nzapa nga ti sara tënë ti Royaume ti lo na asenge zo so mo yeke wara ka ala lakue? Tongana asi na mo awe, bâ ye so e lingbi ti manda na lege ti ye so asi na Moïse.

5. Nyen la Jéhovah azia na maboko ti Moïse nyen? Tongana nyen la keke so asara si lo sara mbeto encore ape? (Bâ foto so ayeke na tongo nda ti article ni.)

⁵ Na ngoi so Moïse atene na Nzapa so mbeto asara lo ndali ti so a yeke bâ ande tënë so lo yeke gue ti tene na nene ni ape, Nzapa amû maboko na lo ti tene lo sara mbeto ape. Mbaï so ayeke na Exode atene: “L’Éternel atene na lo, So nyen na maboko ti mo? na lo tene, So ayeke keke. Lo tene, Mo bi na sese. Lo bi keke ni na sese, na keke ni aga ngbo; na Moïse akpe lo. L’Éternel atene na Moïse, Mo ye maboko ti mo, mo gbu lo na damba ti lo; na lo ye maboko ti lo, lo gbu lo, na a kiri a ga keke na maboko ti lo. L’Éternel atene, Mo sara so si ala lingbi hinga L’Éternel . . . asi na mo biani.” (Ex. 4:2-5). Nzapa asara miracle, keke ni aga ngbo na yâ ti maboko ti Moïse. Miracle so ayeke fa ande so Nzapa la atokua lo nga Nzapa la amû ngangu na lo. Jéhovah atene na lo atene: “Fade mo kamata keke so na maboko ti mo ti sara fä na ni.” (Ex. 4:17). Fadeso, Moïse alingbi ti duti na confiance so lo lingbi ti sara tënë na iri ti Nzapa na devant ti amara ti lo nga na devant ti Pharaon.—Ex. 4:29-31; 7:8-13.

6. (a) A lingbi nyen la ayeke na maboko ti e na ngoi so e yeke fa tënë? Ngbanga ti nyen? (b) Fa tongana nyen “tënë ti Nzapa ayeke na fini”. Fa nga tongana nyen la ‘a yeke na ngangu ti sara ye.’

⁶ Tongana e yeke fa tënë nyen la ayeke na maboko ti e nyen? Mingi ni, Bible la ayeke na maboko ti e ti tene e sara kua na ni hio. Atâa so ambeni zo abâ Bible tongana mbeni senge mbeti, Jéhovah asara tënë na e na lege ti tënë ti lo so a sû ni na yâ ti Bible na gbe ti yingo ti lo (2 Pi. 1:21). Azendo ti Nzapa so asara tënë ti aye so ayeke si ande na ngoi so Royaume ti lo ayeke komande ayeke na yâ ti Bible. Ni la bazengele Paul atene: “Tënë ti Nzapa ayeke na fini na ayeke na ngangu ti sara ye.” (Diko aHébreu 4:12.) Azendo ti Jéhovah kue ayeke gue ti ga tâ tënë, nga ayeke ga ande tâ tënë kue kue kue (És. 46:10; 55:11). Na ngoi so zo ahinga so Mbeti ti Nzapa ayeke tongaso, ye so lo yeke diko na yâ ni ayeke sara ngangu mingi na ndo ti fini ti lo.

7. E lingbi ti ‘sara kusala na lege ni na tënë so ayeke tâ tënë’ tongana nyen?

⁷ Biani, Jéhovah azia na maboko ti e Bible, tënë ti lo so ayeke na fini so na lege ni e lingbi ti fa so tënë so e yeke fa ayeke tâ tënë nga alondo na lo. A yeke ndali ni la, na pekoni so Paul asara mbeti na aHébreu, lo wa Timothée so lo fa ye na lo ti ‘sara ngangu kue ti sara kusala na lege ni na tënë so ayeke tâ tënë.’ (2 Tim. 2:15). Tongana nyen la e lingbi ti sara ye alingbi na wango ti Paul so? E lingbi ti sara ni na lege so e yeke soro anzoni versê so alingbi ti ndu bê ti zo so e yeke sara lisoro na lo. Atract so a sigigi na ni na ngu 2013 ayeke atract so a leke ni ti mû maboko na e ti sara tongaso.

8. Tënë wa la mbeni surveillant ti kusala atene na ndo ti atract?

⁸ Fason so a sara na afini tract ni kue ayeke oko. Tongaso, tongana e hinga ti sara kua na mbeni oko, e yeke hinga ti sara kua na atanga ni kue. Ngbanga ti nyen a yeke ngangu ape ti fa tënë na ni? Mbeni surveillant ti kusala na kodoro ti Hawaii na Amerika atene: “E hinga lani ape so afini tract so ayeke mû maboko na e ti fa tënë nzoni da na da nga na ndo so azo ayeke dä mingi.” Me lo bâ so lege so a sara na tract ni amû lege na azo ti sara nzara ni nga azi lege na anzoni lisoro. Lo bâ so a yeke ndali ti so a sara na ndo ti atract ni mbeni hundango ndo nga na gbâ ti akiringo tënë so zo alingbi ti soro ni. Zo ayeke gi bê ti lo ape ti mû mbeni kiringo tënë so ayeke na lege ni ape.

9, 10. (a) Tongana nyen la atract ti e ayeke mû maboko na e ti sara kua na Bible? (b) Atract wa la mo sara na kua nzoni na fango tënë? Ngbanga ti nyen?

⁹ Tract oko oko amû maboko na e ti diko mbeni versê so a soro ni nzoni so ayeke na yâ ni. Na tapande, bâ tract Pasi ayeke hunzi ande la? Atâa zo so e fa tënë na lo asoro kiringo tënë “a yeke hunzi”, “a yeke hunzi ape”, wala “mo hinga ape” ti kiri tënë na hundango ndo ni, zi yâ ti tract ni nga tene na lo: “Bâ tënë so Bible atene.” Na pekoni, diko Apocalypse 21:3, 4.

¹⁰ Legeoko nga, tongana e yeke sara kua na tract Mo bâ ti mo Bible tongana nyen? Tongana zo ni asoro kiringo tënë oko na popo ti akiringo tënë ota so ayeke na ndo ti tract ni, tënë ayeke dä ape zi gi yâ ti tract ni nga tene na lo, mo tene: “Bible atene so ‘atënë kue ti yâ ti Mbeti ti Nzapa, a sara ni na mbeti na gbe ti yingo ti Nzapa.’” Mo lingbi nga ti tene: “Me, ambeni tënë ti yâ ti versê ni angbâ.” Na pekoni, zi Bible nga diko na lo 2 Timothée 3:16, 17.

11, 12. (a) Na lege wa mo lingbi ti wara ye ti nzoni na lege ti sarango kua nzoni na atract na fango tënë? (b) Tongana nyen la atract alingbi ti mû maboko na mo ti leke tere ti mo ti sara avizite?

¹¹ Ye so zo ni ayeke sara na pekoni so mo diko na lo versê ni la ayeke mû lege na mo ti ngbâ ti sara lisoro na lo wala pëpe. Me même tongana lege azi na mo ti sara lisoro mingi na azo wala pëpe, mo zia tract ni na ala awe nga kamême mo diko na ala ambeni tënë so ayeke na yâ ti Bible awe. Atâa tongana mo diko na ala gi versê oko wala use na kozo tingbingo tere ti mo na ala, ti peko mo lingbi ti kiri ti sara lisoro ni senge.

¹² Na peko ti tract oko oko mo yeke wara  kete li ti tënë so atene: “Bâ tënë so”. Na gbe ti kete li ti tënë ni mo yeke wara aversê nga na mbeni hundango ndo so mo lingbi ti sara lisoro na ndo ni na vizite ti peko. Na yâ ti tract Mo bâ dunia ti kekereke tongana nyen? Hundango ndo ni ayeke “Nzapa ayeke sara nyen ti tene dunia aga tâ nzoni mingi?” A fa Matthieu 6:9, 10 nga na Daniel 2:44. Ti tract A yeke zingo ande biani azo so akui awe? Hundango ndo ni ayeke “E yeke ga mbakoro na e kui ngbanga ti nyen?” A fa Genèse 3:17-19 nga na aRomain 5:12.

13. Fa tongana nyen la mo lingbi ti sara kua na atract ti to nda ti étude na azo.

¹³ Atract so ayeke mû maboko na e ti to nda ti étude na azo. Tongana zo ni ascanné code QR so ayeke na peko ti tract ni, lo yeke gue droit na ndo ti site ti e so alingbi ti mû lege na lo ti yeda ti manda Bible. Tract ni azi nga nda ti ambeni tënë so ayeke na yâ ti brochure Nzoni tënë so alondo na Nzapa! Tract oko oko asara tënë na ndo ti mbeni ye ti manda so ayeke na yâ ti brochure ni. Na tapande, tract Dunia so ayeke biani na tïtî zo wa? ague oko na ye ti manda 5 ti brochure ni. Tract Nyen la alingbi ti sara si sewa aduti na ngia? ague oko na ye ti manda 9 ni. Tongana mo sara ye alingbi na akode so, mo yeke sara kua nzoni na Bible na ngoi so mo tingbi na mbeni zo kpa nga na ngoi ti avizite. A yeke sara nga si mo yeke to nda ti étude na azo mingi. Mbeni ye so mo lingbi nga ti sara ti sara kua nzoni na Bible na fango tënë ayeke nyen?

14, 15. E yeke mû tapande ti Paul tongana nyen na fango tënë?

¹⁴ A nzere na Paul mingi ti “wara mingi ti azo” ti fa tënë na ala. (Diko 1 aCorinthien 9:19-23.) Bâ so Paul aye lani ti “wara aJuif . . . , ala so ayeke na gbe ti ndia . . . , ala so ayeke na ndia pëpe . . . , azo so awoko.” Biani Paul aye lani ti fa tënë na “mara ti azo nde nde kue, si na yâ ti ye kue [lo] sö fini ti ambeni.” (Kus. 20:21). E yeke mû tapande ti Paul tongana nyen na ngoi so e leke tere ti e ti fa tâ tënë na “azo nde nde kue” so ayeke na yâ ti territoire ti e?—1 Tim. 2:3, 4.

¹⁵ Na yâ ti a-Kusala ti Royaume ti nze oko oko e yeke na akode ti fango tënë. Tara ti sara kua na ni. Me tongana mbeni ye nde la agbu bê ti azo ti territoire ti mo, leke mbeni nzoni lisoro so alingbi ti ndu bê ti ala. Gbu li na ndo ti aye so asi na ndo so mo yeke dä, azo so alango na ndo ni so nga na ye so agbu bê ti ala mingi. Na pekoni, gbu li na ndo ti mbeni versê so alingbi na bezoin ti ala. Mbeni surveillant ti circonscription afa tongana nyen lo na wali ti lo ayeke sara kua mingi na Bible na fango tënë. Lo tene: “Azo mingi ayeke yeda ti tene e diko na ala mbeni versê oko tongana e sara tënë nduru nga e gue droit na ndo ti tënë ni. E zi Bible ti e kozo si e bara zo ni, na pekoni, e diko na lo mbeni versê.” Zia e bâ tapande ti ambeni li ti tënë, ti ambeni hundango ndo nga na ambeni versê so ambeni ita asara kua na ni na ala bâ atambela nzoni. E lingbi ti sara kua na ni na fango tënë.

16. Fa tongana nyen la e lingbi ti sara kua na Ésaïe 14:7 na fango tënë.

¹⁶ Tongana mo lango na mbeni kodoro so azo ayeke fâ azo dä nga ala yeke sara ye ti ngangu na amba ti ala, mo lingbi peut-être ti hunda mbeni zo, mo tene: “Mo pensé so mbeni lâ mo lingbi ti diko na ndo ti mbeni mbeti-sango tënë so atene: ‘Sese kue ayeke na siriri na aduti kpô; azo adekongo na ngia ?’ A yeke ye so Bible asara tënë ni na Ésaïe 14:7. Biani, Bible asara tënë ti gbâ ti azendo ti siriri so Nzapa amû so aga nduru ti ga tâ tënë awe.” Na pekoni, diko na lo mbeni versê ti Bible so asara tënë na ndo ti mbeni oko ti azendo so.

17. Tongana nyen la mo lingbi ti sara kua na Matthieu 5:3 na yâ ti mbeni lisoro?

¹⁷ A yeke ngangu mingi na azo ti ndo so mo yeke dä ti bâ lege ti azo ti sewa ti ala nzoni? Tongana ayeke tongaso, mo lingbi ti komanse lisoro na mbeni zo, mo tene: “Nginza oke la zo ayeke na bezoin ti wara ti mû lege na lo ti bâ  lege ti azo ti sewa ti lo si ala duti na ngia?” Tongana zo ni akiri tënë awe, mo lingbi ti tene na lo, mo tene: “Azo mingi awara gbâ ti nginza ahon so mo fa so, me so kue azo ti sewa ti ala ayeke na ngia ape. Me, nyen la ala yeke biani na bezoin ni?” Na pekoni, diko Matthieu 5:3 nga mä tere na lo ti manda Bible.

18. Tongana nyen la mo lingbi ti sara kua na Jérémie 29:11 ti dë bê ti azo?

¹⁸ Azo ti ndo so mo yeke dä ayeke bâ pasi ndali ti mbeni ye ti ngangu so asi ade ti ninga ape? Mo lingbi ti komanse lisoro na mbeni zo, mo tene: “Mbi ga na yanga-da ti mo ti sara na mo mbeni tënë so alingbi ti dë bê ti mo. (Diko Jérémie 29:11.) Mo bâ aye so Nzapa aye ndali ti e? Lo ye ti tene e duti na ‘siriri’ nga na ‘beku’. A yeke nzoni ti hinga so Nzapa aye ti tene gigi ti e aduti nzoni. Me lo yeke sara ni tongana nyen?” Na pekoni, gue na yâ ti brochure Nzoni tënë, na sara lisoro na lo na ndo ti mbeni ye ti manda so asara tënë na ndo ti tënë ni.

19. Fa tongana nyen la mo lingbi ti sara kua na Apocalypse 14:6, 7 ti sara lisoro na azo so aye tënë ti nzapa.

¹⁹ Mo yeke lango na yâ ti mbeni vaka so azo ni aye tënë ti nzapa mingi? Tongana a yeke tongaso, mo lingbi ti komanse lisoro na mbeni zo, mo tene: “Tongana mbeni ange asara tënë na mo, mo yeke dengi mê ti mo ti mä tënë so lo ye ti tene na mo so?” (Diko Apocalypse 14:6, 7.) So ange ni atene: “Ala kpe mbeto ti Nzapa.” Lo yeke sara lani tënë ti Nzapa wa la? Ange ni amû maboko na e ti hinga kiringo tënë ni tongana lo sara tënë ti “Lo so asara yayu na sese”. A yeke zo wa? Na pekoni, diko Psaume 124:8 so atene: “[Ye ti mungo maboko na e alondo na lo so iri ti lo ayeke Jéhovah, FD] Lo so asara ayayu na sese.” Nga, tene na lo so mo ye ti sara lisoro na lo mingi na ndo ti Jéhovah Nzapa.

20. (a) E yeke sara kusala na aProverbe 30:4 tongana nyen ti fa iri ti Nzapa na mbeni zo? (b) Versê wa la mo yeke sara ka kua na ni nzoni mingi na fango tënë?

²⁰ Mo lingbi ti komanse lisoro na mbeni maseka, mo tene: “Mbi ye ti diko na mo mbeni versê so mbeni kota hundango ndo ayeke na yâ ni. (Diko aProverbe 30:4.) Mbeni zo oko alingbi pëpe ti sara aye so a sara tënë ni na yâ ti versê so. Tongaso, versê so asara tënë ti Nzapa so acréé ye kue. * E lingbi ti hinga iri ti lo tongana nyen? A yeke nzere na mbi ti fa ni na mo na yâ ti Bible.”

21, 22. (a) Tongana nyen la versê so a soro ni nzoni alingbi ti changé zo? (b) Mo leke na bê ti mo ti ngbâ ti sara nyen na ngoi so mo yeke fa tënë?

²¹ Mo hinga ape wala azo ayeke sara ye tongana nyen na ngoi so mo diko na ala mbeni versê so a soro ni nzoni. Na tapande, na Australie aTémoin ti Jéhovah use apika yanga-da ti mbeni maseka-wali. Mbeni oko ahunda wali ni atene: “Mo hinga iri ti Nzapa?” Na pekoni lo diko na lo versê ti Psaume 83:19. Wali ni atene: “Li ti mbi akpe, mbi sara tënë oko ape. Na pekoni so ala hon, mbi sara kilomètre 56 na oto ti gue na ndo so a yeke kä ambeti dä ti gi ambeni Bible nde ti gi iri ni so dä, mbi gi nga ni na yâ ti mbeni bakari. Na ngoi so mbi wani mbi hinga so iri ti Nzapa ayeke Jéhovah, mbi gi bê ti mbi wala mbeni ye angbâ so ade mbi hinga ni ape.” Aninga ape, lo na koli so lo na lo avivre sân mariage akomanse ti manda Bible. Na pekoni ala sara mariage na ala wara batême.

²² Mbeti ti Nzapa ayeke na ngangu ti changé azo so adiko ni nga so ayeke na mabe so azendo ti Jéhovah ayeke ga tâ tënë. (Diko 1 aThessalonicien 2:13.) Tënë ti Bible ayeke na ngangu mingi ahon atënë kue so e lingbi ti tene ti gi ti ndu bê ti zo. A yeke ndali ni la, a lingbi e sara kua na Bible na ngoi kue so lege azi na e ti sara ni. A yeke na fini!