MBENI groupe ti amaseka so ayeke aTémoin ayeda ti gue ti bâ mbeni film. Mingi ti akamarade ti ala ti ekole atene so film ni ayeke pendere mingi. Na ngoi so ala si na place ti bango film ni, ala bâ na ndo ti a-affiche ni akota ngombe nga na awali so ayü abongo so azia tere ti ala na gigi. Nyen la ala yeke sara nyen? Ala yeke lï na yâ ti da ti film ni ti bâ ni?

Ye so asi so afa so e yeke tingbi mingi na aye so a hunda ti tene e mû adesizion so andu songo ti e na Jéhovah. Adesizion ni alingbi ti sara si songo ti e na Jéhovah akpengba wala awoko. Na ambeni ngoi, mo lingbi ti leke ti sara mbeni ye, me na pekoni so mo gbu li ti mo na ndo ti ye ni nzoni, mo changé bango ndo ti mo. So aye ti tene so mo hinga ti mû desizion ape, wala mo sara ye so ayeke na lege ni?

Yengo so e ye na Jéhovah la apusu e ti mû fini ti e na lo nga ti wara batême. E ye mingi ti ngbâ be-ta-zo na Nzapa. Me, wato ti e Satan Zabolo ayeke sara kue ti tene e ngbâ be-ta-zo na Nzapa ape (Apoc. 12:17). E mû desizion ti sara na Jéhovah nga ti sara ye alingbi na acommandement ti lo. A yeke ye ti vundu mingi tongana e sara ye alingbi na desizion ti e ape. Ye so alingbi ti sara si e wara kuâ.

A hon ngu 2600 tongaso awe, Nebucadnetsar so ayeke gbia ti Babylone aleke mbeni kota image ti lor na lo hunda na azo kue ti kuku na gbe ni ti voro ni. Zo so ake ti sara ni a yeke bi lo na yâ ti four ti wâ. Sadrac, Mésac na Abed-Nego so ayeke awakua ti Nzapa so akpe mbeto ti lo ake ti sara ye so gbia ni ahunda. Teti so ala ke ti kuku na gbe ti image ni, a bi ala na yâ ti four ti wâ. Jéhovah abata ala na lege ti miracle. Me ala yeke lani nduru ti zia fini ti ala na lê ti kuâ ahon ti sara ye ague nde na desizion so ala mû ti sara na Nzapa.—Dan. 3:1-27.

Na pekoni, prophète Daniel angbâ lani ti sambela Nzapa atâa so a mû yanga ti tene a  bi zo so asara ni na yâ ti dû ti abamara. Lo ngbâ lani ti sambela Jéhovah lege ota na yâ ti lango oko tongana ti so lo yeke sara ka. Daniel aleke na bê ti lo ti ngbâ ti voro tâ Nzapa, lo changé bango ndo ti lo ape. Ye so asara si Jéhovah asö lo. “Ngangu ti abamara” asara ye oko na lo ape.—Dan. 6:1-27.

Laso nga kue, awakua ti Jéhovah ayeke sara ye alingbi na yanga so ala mû ti sara na lo. Na yâ ti mbeni ekole na Afrika, ambeni élève so ayeke aTémoin ti Jéhovah ake ti mû mbage na barango drapeau ti kodoro ti ala. A tene na ala so tongana ala sara ni legeoko na tanga ti a-élève ni ape, a yeke tomba ala na ekole ni. Kete na pekoni, gbenyon-gbia so abâ tënë ti mandango mbeti na yâ ti kodoro ni asara lisoro na ambeni élève ni. A-élève ni asara mbeto ape, me na nengo zo ala fa na lo ndani so ala ke ti bara drapeau ni. Ngbene ye na ngoi ni so, kpale so alondo encore ape. Aita so ayeke amaseka ayeke gue na ekole ni sân ti tene a pusu ala ti sara mbeni ye so alingbi ti buba songo ti ala na Jéhovah.

Bâ nga tapande ti Joseph, so wali ti lo abâ pasi na kobela ti cancer na lo kui gi hio tongaso. Azo ti sewa ti Joseph ahinga bango ndo ti lo na ndo ti tënë ti lungo kuâ nga ala bâ ni na nene ni. Me, afami ti wali ti lo ayeke aTémoin ape na ala ye lani ti sara ambeni ye so azo ayeke sara ka na ngoi ti lungo kuâ nga na ambeni sarango ye so Nzapa ake. Joseph atene: “Na ngoi so mbi ke ti sara ye so ala hunda na mbi, ala sara kue ti pusu amolenge ti mbi ti sara ni, me ala kue ake. Afami ni agi nga ti sara place ti kuâ na yanga-da ti mbi tongana ti so azo ayeke sara ka. Me, mbi tene na ala so tongana ala ye gi ti sara place ti kuâ ni, place ni ayeke na yanga-da ti mbi ape. Ala hinga so tënë ti sarango place ti kuâ ague oko pëpe na aye so mbi na wali ti mbi e mä na bê na ni. Tongaso, na peko ti so e sara lisoro aninga, ala gue asara place ti kuâ ni na mbeni ndo nde.

“Na ngoi ti ye ti vundu so, mbi hunda na Jéhovah ti mû maboko na mbi tongaso si mbi na azo ti sewa ti mbi e sara ye ague nde na andia ti Nzapa ape. Jéhovah amä asambela ti mbi na lo mû maboko na e ti ngbâ ti luti ngangu na gbe ti aye ti ngangu so.” Joseph na amolenge ti lo abâ so ti changé bango ndo ti ala na ndo ti vorongo Jéhovah ayeke lani pëpe ye so a lingbi ala soro ni sorongo.

Kete na peko ti matanga ti Pâque ti ngu 32, mbeni wali so ayeke zo ti Israël ape aga nduru na Jésus Christ na Sidon. Lo hunda Jésus lege mingi ti tomba sioni yingo so ayeke na yâ ti molenge ti lo ti wali. Na tongo nda ni, Jésus azi yanga na lo oko ape. Lo tene na adisciple ti lo, lo tene: “A tokua mbi pëpe na mbage ti azo nde, me gi na mbage ti angasangbaga ti da ti Israël so agirisa.” Teti so wali ni angbâ gi ti hunda, Jésus atene na lo, a tene: “A yeke na lege ni pëpe ti mû mapa so ayeke ti amolenge ti bi ni na amolenge ti mbo.” Ndali ti so lo yeke na kpengba mabe, lo kiri tënë na Jésus, lo tene: “Tâ tënë, Seigneur. Me, biani amolenge ti mbo ayeke te afuku ti kobe so alondo na ndo ti table ti awa ti ala si a tï na sese.” Jésus asara ye so wali ni ahunda na lo na lo sava molenge ti wali ni.—Mat. 15:21-28.

Na sarango ye so, Jésus amû tapande ti Jéhovah so ayeke nduru ti changé bango ndo ti lo na yâ ti ambeni ye tongana lo bâ so a yeke nzoni ti sara tongaso. Na tapande, Nzapa aye lani ti fâ azo ti Israël na ngoi so ala leke mbeni molenge ti bagara ti lor ala voro ni, me na ngoi so Moïse avoro yanga na Jéhovah ti fâ ala ape, Jéhovah achangé bango ndo ti lo.—Ex. 32:7-14.

Bazengele Paul amû tapande ti Jéhovah nga na ti Jésus. Na mbeni ngoi, Paul apensé so a yeke na lege ni ape ti mû Jean Marc na peko ti ala ti sara voyage ti ala ti missionnaire ndali ti so Marc adö lo na Barnabas azia na ngoi ti kozo voyage ti ala ti missionnaire. Me, na pekoni, Paul abâ so Marc akpengba na lege ti yingo awe nga lo lingbi ti mû maboko mingi na lo. Tongaso, Paul atene na Timothée, lo tene: “Mo mû Marc na tere ti mo, mo  ga na lo, teti lo lingbi ti mû na mbi maboko na yâ ti kusala ni.”—2 Tim. 4:11.

Ka ti e? Tongana e mû tapande ti Babâ ti e ti yayu so asara ye na nzoni bê, so ahinga ti kanga bê nga so asara ye na ndoye, e lingbi ti bâ so a yeke na lege ni ti changé bango ndo ti e. Nde na Jéhovah na Jésus, e yeke na siokpari na tere ti e. Tongaso, e yeke na araison mingi ti changé bango ndo ti e na ambeni ngoi. Na tapande, e lingbi ti changé bango ndo so e yeke na ni na ndo ti amba ti e na ngoi so e hinga ye mingi na ndo ti dutingo ti ala.

Na ambeni ngoi e yeke na bezoin ti changé bango ndo ti e na ndo ti akua ti Nzapa so e zia na gbele e. Ambeni zo so ayeke manda Bible nga so ayeke gue na abungbi teti ambeni ngoi aye peut-être ti wara batême hio ape. Wala ambeni ita alingbi ti sara mbeto ti mû kua ti pionnier, atâa so ala lingbi ti sara kua ni nzoni. Ambeni ita aye peut-être pëpe ti sara kua tongana awakua ti mungo maboko wala a-ancien na yâ ti congrégation (1 Tim. 3:1). A si na mo lâ oko awe ti pensé tongaso? Mo bâ so mo lingbi ti changé bango ndo ti mo? Jéhovah aye ti tene mo sara aye so. Nga duti na ngia ti sara kua na lo nga na amba ti mo.

Ella, so asara kua na yâ ti mbeni filiale ti aTémoin ti Jéhovah na Afrika, atene: “Na ngoi so mbi si lani na Béthel kpâ, mbi hinga ape wala mbi yeke ngbâ aninga. Mbi ye lani ti sara na Jéhovah na âme ti mbi kue, me mbi ye nga lani ti zia azo ti sewa ti mbi ape. Na tongo nda ni, nzara ti ala ahon ndo ti mbi ngangu. Me, mba ti mbi so mbi na lo e lango na yâ ti chambre oko akpengba mbi, tongaso mbi yeda ti ngbâ. Na peko ti so mbi sara ngu bale-oko na Béthel, mbi ye ti ngbâ ti sara kua so mbi yeke sara na Béthel ti mû maboko na aita ti mbi.”

Mo dabe ti mo na ye so asi na Caïn na ngoi so bê asara lo na tere ti ita ti lo nga ngonzo agbu lo mingi? Nzapa atene na Caïn, so ngonzo ahon ndo ti lo, so ni lingbi ti bâ lo na nzoni lê tongana lo sara ye so ayeke nzoni. Nzapa awa lo ti hon ndo ti siokpari so “ayeke na yanga ti da”. Caïn alingbi fade ti changé bango ndo ti lo, me lo sara sanka ti wango ti Nzapa. Ye ti mawa ni ayeke so, Caïn afâ ita ti lo na lo ga kozo zo ti fango zo.—Gen. 4:2-8.

Bâ nga tapande ti Gbia Ozias. Na tongo nda ni, lo sara ye so ayeke nzoni na lê ti Jéhovah nga lo yeke na nzoni songo na Nzapa. Me mawa ni ayeke so, Ozias abuba nzoni sarango ye ti lo na lege so lo ga zo ti baba. Lo lï na yâ ti temple ti zö yombo, atâa so lo yeke prêtre ape. Na ngoi so aprêtre awa lo atene lo yeke na droit ti sara ni ape, eskê lo changé bango ndo ti lo? Ên-ën. “Ngonzo agbu” Ozias na lo sara sanka ti wango ti ala. Tongaso, Jéhovah apika lo na kobela ti buruma.—2 Chron. 26:3-5, 16-20.

Ambeni ngoi ayeke dä so a lingbi e changé bango ndo ti e. Mbeni tapande ti ngoi ti e ayeke ti Joachim. Lo wara batême na ngu 1955, me a bi lo na gigi na ngu 1978. Ngu 20 na ndo ni na pekoni, lo changé bê ti lo nga a kiri na lo na bungbi. Ade ti ninga ape, mbeni ancien ahunda lo ndani so lo ku ngbii tongaso ti kiri na bungbi. Joachim akiri tënë, a tene: “Ngonzo asara mbi nga baba asara mbi. Mbi regretté so mbi ku ngbii tongaso so. Na ngoi so a bi mbi lani na gigi, mbi hinga so aTémoin ti Jéhovah ayeke fa tâ tënë.” A lingbi lo changé lani bango ndo ti lo nga na bê ti lo.

Mbeni ye alingbi ti si na e so ahunda na e ti tene e changé bango ndo ti e nga na sarango ye ti e. A lingbi e duti nduru ti sara ni tongaso si e nzere na lê ti Jéhovah.—Ps. 34:9.