1, 2. Nzapa aye ti tene azo ti lo, atâa a yeke maseka wala kangba, avoro lo tongana nyen?

MO YEKE maseka? Tongana mo yeke maseka, a yeke nzoni mo hinga so e bâ na nene ni mingi place so mo yeke na ni na yâ ti bungbi ti Jéhovah. Na yâ ti akodoro mingi, na popo ti azo so ayeke wara batême, mingi ni ayeke amaseka. A nzere na e mingi ti bâ so gbâ ti amaseka asoro ti sara na Jéhovah.

² So mo yeke maseka so, a nzere na mo ti duti ndo oko na amba ti mo amaseka? Kite ayeke pëpe so a nzere na mo. A yeke nzere na e tongana e mû ambeni ngoi ti sara ngia na azo so ngu ti e na ala ayeke oko. Me, atâa e yeke maseka wala kangba wala dutingo ti e ayeke tongana nyen, Nzapa aye ti tene e kue e voro lo beoko. Bazengele Paul atene so Nzapa aye ti tene “mara ti azo nde nde kue asö fini ti ala na ala si na tâ hingango ye na ndo ti tâ tënë.” (1 Tim. 2:3, 4). Apocalypse 7:9 asara tënë ti awakua ti Nzapa atene ala londo na popo ti “amara kue, akete mara kue, azo ti kodoro kue, ayanga ti kodoro kue”.

3, 4. (a) Bibe wa la amaseka mingi ayeke na ni laso? (b) Sarango ye wa la ague oko na tënë ti Paul so ayeke na aÉphésien 4:25?

³ Kota kangbi ayeke na popo ti amaseka so ayeke voro Jéhovah na amaseka ti dunia so. Amaseka mingi so avoro Jéhovah ape  ayeke pensé gi na ndo ti ala wani nga na ndo ti aye so ala ye. Ni la ambeni zo ti gingo nda ti ye atene so kion ti amaseka ti laso ahon ndo ni. Fason so ala yeke sara na tënë nga ala yeke yü na bongo afa so ala ne azo ape, mbilimbili akangba.

⁴ Bibe so amû ndo. Tongaso, awakua ti Jéhovah so ayeke amaseka abâ so a lingbi ala sara ngangu mingi ti kpe ni nga ti sara ye so Nzapa aye. Même na ngoi ti akozo Chrétien, Paul amû wango na amba ti lo aChrétien ti kpe “yingo so ayeke sara kua fadeso na yâ ti amolenge ti kengo yanga” na so ala “tambela dä ândö”. (Diko aÉphésien 2:1-3.) A lingbi e gonda amaseka so akpe mara ti bibe so, na so ayeke voro Jéhovah beoko na aita ti ala kue. Sarango ye ti ala so ague oko na tënë ti Paul so lo tene “e yeke amembre ti tere ti mba.” (aÉph. 4:25). So a ga nduru ti futi dunia so awe, e yeke na bezoin mingi ti duti beoko na aita ti e. Zia e bâ ambeni tapande ti Bible so ayeke mû maboko na e ti hinga ndani so a lingbi e duti nduru na mba, so ti tene ti duti beoko.

5, 6. Nyen la e manda na yâ ti mbaï ti Lot na amolenge ti lo ti wali na ndo ti dutingo nduru na mba?

⁵ Ândö giriri, a nzere na Jéhovah ti bata awakua ti lo tongana ala yeke beoko nga ala yeke mû maboko na mba na angoi ti ngangu. Awakua ti Nzapa laso, atâa a yeke maseka wala kangba, alingbi ti manda ye na lege ti atapande so ayeke na yâ ti Bible. Mbeni tapande ni ayeke ti Lot. Zia e bâ ye so asi na lo.

⁶ Lot na azo ti sewa ti lo ayeke lani na yâ ti ye ti ngangu ndali ti so Jéhovah aye ti futi Sodome, gbata so ala yeke dä. Lo tokua a-ange na Lot ti tene na lo ti sigigi na yâ ti kodoro ni na ti kpe ti gue na ndo so ahoto ayeke dä. Ala tene na lo atene: “Mo kpe ti bata fini ti mo.” (Gen. 19:12-22). Lot amä yanga, nga amolenge ti lo ti wali use kue amû peko ti lo ala sigigi na yâ ti gbata ni. Mawa ni ayeke so, ambeni fami ti Lot ake ti mû peko ti lo. Na ngoi so Lot atene na ambeni maseka-koli so ayeke akogara ti lo, so a lingbi ala sigigi, ala pensé ti ala atene lo yeke mbeni mbakoro so ayeke “sara [tënë ti] ngia senge.” Ye so asara si ala wara kuâ (Gen. 19:14). Gi Lot na amolenge ti lo ti wali, so aduti nduru na lo, la asö kuâ lani.

7. Tongana nyen la Jéhovah amû maboko lani na azo so afa so ala yeke na bibe ti dutingo beoko na ngoi so azo ti Israël asigigi na Égypte?

⁷ Zia e bâ mbeni tapande ni. Na ngoi so azo ti Israël asigigi lani na Égypte, ala bungbi oko la ala gue na Sese ti Zendo me ala kangbi tere ti ala pëpe na yâ ti groupe nde nde ti tene groupe oko oko amû lege ti lo ti gue. Nga na ngoi so Moïse “aye maboko ti lo na ndo Kota Ngu-Bengba” na Jéhovah akangbi yâ ti ngu ni use, gi Moïse lo oko wala na ambeni kete wungo ti azo ti Israël la ahon na yâ ti ngu ni pëpe. Me, congrégation ni kue la afâ ngu ni na lege ti mungo maboko ti Jéhovah (Ex. 14:21, 22, 29, 30). Ala yeke lani na bibe ti dutingo beoko, na “azo mingi ti amara nde nde”, so ayeke azo ti Israël ape, ague legeoko na ala (Ex. 12:38). A yeke duti fade ye ti buba tongana groupe ti ambeni zo ni, peut-être ti ambeni maseka, asoro ti mû mbeni lege so ala pensé atene ayeke tâ nzoni lege. Jéhovah ayeke bata pëpe azo kue so aye ti sara gi ye ti bê ti ala.—1 aCor. 10:1.

8. Na ngoi ti Gbia Josaphat, tongana nyen la awakua ti Nzapa afa so ala yeke beoko?

⁸ Na ngoi ti Gbia Josaphat, “azo mingi mingi” so ayeke ngangu mingi aga ti sara bira na awakua ti Nzapa (2 Chron. 20:1, 2). Awakua ti Nzapa agi lani pëpe ti hon awato ti ala na ngangu ti ala wani. Me ala zia bê ti ala na Jéhovah na ala sambela lo ti fa lege na ala. (Diko 2 Chronique 20:3, 4.) Azo ti Israël agi ti leke kpale ni zo oko oko ape, me ala kue abungbi oko ti sara ni. Bible atene: “Azo ti Juda kue, na akete molenge ti ala, na awali ti ala, na amolenge-koli ti ala, aluti na  gbele L’Éternel.” (2 Chron. 20:13). Azo ni kue, amaseka nga na akangba, asara ngangu ti mû peko ti fango lege ti Jéhovah, na Jéhovah abata ala si awato ti ala asara sioni na ala ape (2 Chron. 20:20-27). So ayeke mbeni nzoni tapande so afa tongana nyen awakua ti Nzapa alingbi ti hon ndo ti akpale.

9. Sarango ye ti akozo Chrétien nga na bango ndo ti ala afa na e nyen na ndo ti dutingo beoko?

⁹ Akozo Chrétien nga lani ayeke bungbi oko ti voro Jéhovah na yâ ti siriri nga maboko na maboko. Na tapande, na peko ti so aJuif mingi nga na aprosélyte aga aChrétien, ala mû tere ti ala kue “na fango ye ti abazengele na ti kangbi aye kue na popo ti ala, ti te kobe legeoko na ti sambela.” (Kus. 2:42). A bâ dutingo beoko ti ala so lani polele na ngoi so a sara ngangu na ala. A yeke na ngoi so la si ala yeke lani na bezoin ti mba mingi (Kus. 4:23, 24). Na ngoi so a sara ngangu na e, e nga kue a lingbi e duti beoko nga e mû maboko na mba.

10. Na ngoi wa la a yeke duti ande kota ye mingi ti duti beoko?

¹⁰ E ga nduru awe ti tingbi na mbeni ngoi so ayeke ngangu mingi ahon atanga ni kue na yâ ti mbaï ti azo. Prophète Joël asara tënë ni, lo tene a yeke tongana mbeni “lâ ti bingo, bingo so avuko mingi”. (Joël 2:1, 2; Soph. 1:14). A yeke duti ande kota ye mingi ti tene awakua ti Nzapa aduti beoko na ngoi ni so. E girisa pëpe tënë ti Jésus so lo tene: “Royaume kue so yâ ni akangbi ayeke futi.”—Mat. 12:25.

11. Hakango ye so ayeke na Psaume 122:3, 4 abâ awakua ti Nzapa tongana nyen laso? (Bâ foto so ayeke na tongo nda ti article ni.)

¹¹ Na ngoi ti ye ti ngangu so ayeke ga, e yeke duti ande na bezoin ti duti biani beoko. A lingbi ti haka dutingo beoko so na fason so a yeke leke na ada nduru na tere ti tere ândö na Jérusalem. So a leke ada ni so nduru na tere ti tere asara si mbeni zo ti sungo psaume atene so Jérusalem ayeke tongana mbeni “kota kodoro so da oko atingbi na mbeni”. Ye so amû lege na azo ti kodoro ni ti mû maboko na amba ti ala nga ti bata ala. Na ndo ni, ada ni so a leke na tere ti tere alingbi nga ti dabe ti zo ti sungo psaume so na ndo ti amara ti Israël na ngoi so ala bungbi tongana mara oko ti voro Jéhovah. (Diko Psaume 122:3, 4.) Laso nga na yâ ti alango ti ngangu so ayeke ga, e nga kue e yeke na bezoin ti ngbâ na tere ti mba.

12. Nyen la ayeke mû maboko na e ti sö kuâ na ngoi so a yeke ga ande ti sara bira na awakua ti Nzapa?

¹² Ngbanga ti nyen a yeke duti ande kota ye mingi ti tene e duti beoko? Ézéchiel chapitre 38 afa na lege ti prophétie so “Gog, zo ti sese ti Magog” ayeke sara ande bira na awakua ti Nzapa. A yeke ande pëpe ngoi ti tene e zia si mbeni ye akangbi yâ ti e. Kite ayeke pëpe so e yeke ye ande dä pëpe ti kpe na mbage ti dunia so ti gi mungo maboko. Me, e yeke duti ande nduru na aita ti e. Ti tâ tënë ni, e yeke sö kuâ ande pëpe gi ngbanga ti so e yeke na popo ti awakua ti Nzapa so abungbi oko. Azo so airi Jéhovah na iri ti lo la Jéhovah na Molenge ti lo ayeke bata ande ala na yâ ti aye ti ngangu so (Joël 2:32; Mat. 28:20). Me eskê a yeke na lege ni ti pensé so azo so angbâ pëpe beoko na yâ ti kundu ti Nzapa (ala so aye ti sara ye ti bê ti ala) ayeke sö kuâ ande?—Mi. 2:12.

13. Aye wa la amaseka so akpe mbeto ti Nzapa alingbi ti manda na lege ti aye so e londo ti bâ juska ge so?

¹³ Tongana mo yeke mbeni maseka, mo bâ so a yeke nzoni mingi ti ngbâ nduru na tere ti aita ti mo? E ga nduru awe ti si na mbeni ngoi so e yeke duti ande na bezoin ti mba mingi, atâa e yeke maseka wala kangba. A yeke fadeso ngoi ti tene e gi ti kpengba songo so ayeke na popo ti e na aita ti e nga e voro Jéhovah legeoko na ala. Na yâ ti ngoi so ayeke ga, dutingo beoko ti e na  awakua ti Jéhovah ayeke mû lege na e ti sö kuâ.

14, 15. (a) Ngbanga ti nyen la Jéhovah ayeke fa na amaseka nga na akangba ti duti beoko laso? (b) Wango wa la Jéhovah amû na e ti duti beoko?

¹⁴ Jéhovah amû maboko na e ti ‘sara na Lo beoko.’ (Soph. 3:8, 9). Lo yeke fa ye na e ti mû lege na lo ti sara ye so lo leke na bê ti lo ti sara. Ye so Nzapa aleke na bê ti lo ti sara ayeke ngbâ lakue lakue. Ye so andu nyen? A ndu ‘bungbingo aye kue oko na yâ ti Christ’. (Diko aÉphésien 1:9, 10.) Jéhovah aleke na bê ti lo ti bungbi a-ange kue so ayeke na yayu nga na azo kue so ayeke na sese ti ga mbeni sewa oko so ayeke voro lo. Kite ayeke pëpe so lo yeke sara ni. Amaseka, ye so amû maboko na ala ti bâ so ala yeke na bezoin ti duti beoko na bungbi ti Jéhovah?

¹⁵ Jéhovah ayeke fa na e ti duti beoko fadeso, tongaso si e lingbi ti duti beoko teti lakue lakue. Bible awa e fani mingi ti ‘bi bê ti e na mba’ ti duti na ‘tâ yengo tere na popo ti e’ ti “dë bê ti mba” nga ti “kpengba mba”. (1 aCor. 12:25; aRom. 12:10; 1 aThes. 4:18; 5:11). Jéhovah ahinga so e aChrétien e yeke na siokpari na tere ti e, ye so alingbi ti sara si na ambeni ngoi a yeke ngangu na e ti duti beoko. Tongaso, e yeke na bezoin ti ‘pardone mba na bê ti e kue’.—aÉph. 4:32.

16, 17. (a) Mbeni raison so ndali ni e yeke gue na abungbi ayeke so wa? (b) Tapande ti Jésus na ngoi so lo ngbâ lani maseka afa nyen na amaseka?

¹⁶ Jéhovah ayeke mû nga maboko na e na lege ti abungbi ti e ti aChrétien ti duti nduru na mba. A-Hébreu 10:24, 25 adabe ti e so mbeni raison so e yeke gue na abungbi ndali ni ayeke ti “bi lê na ndo ti mba ti pusu mba ti duti na ndoye na ti sara apendere kusala”. Me, a lingbi e hinga so e yeke gue na abungbi ti “wa tere na popo ti e nga [ti] ngbâ ti sara ni mingi ahon ti kozo, so [e] bâ lango ni ayeke pusu nduru.”

¹⁷ Na ngoi so Jésus angbâ lani maseka, lo zia na e nzoni tapande ndali ti so lo ye guengo na bungbi mingi. Na ngoi so lo yeke na ngu 12, lo na babâ na mama ti lo ague na mbeni kota bungbi na temple. Na ngoi so ala yeke kiri, a si na mbeni ndo, babâ na mama ti Jésus abâ so lo yeke na popo ti ala pëpe. Lo yeke lani na popo ti amba ti lo amaseka? Ên-ën. Na ngoi so babâ na mama ti lo awara lo, lo yeke lani na tere ti awafango ye na yâ ti temple, lo na ala ayeke sara lisoro na ndo ti Mbeti ti Nzapa.—Luc 2:45-47.

18. Tongana nyen la asambela ti e ayeke kpengba dutingo beoko ti e?

 ¹⁸ Mbeni ye so e lingbi ti sara ti kpengba dutingo beoko ti e ayeke ti sambela ndali ti aita ti e, nga ti hunda na Jéhovah ti mû maboko na ala na yâ ti ambilimbili ye so e fa ni polele na lo. Tongana e yeke sambela ndali ti aita ti e, e yeke bi bê ti e na ala mingi. A lingbi e ndoye aita ti e, e wa ala na ngoi ti abungbi nga e sambela ndali ti ala. Ala amaseka, ala yeke gi ti sara aye so e londo ti fa so tongaso si ala lingbi ti duti na kpengba songo na aita na yâ ti congrégation ti ala? Tongana ala sara ni, a yeke mû maboko na ala ti duti pëpe na mbage ti dunia ti Satan na ngoi so a yeke futi ni.

19-21. (a) Na lege wa la e yeke fa so ‘e yeke amembre ti tere ti mba’? Fa ambeni tapande ni. (b) Nyen la e manda na ndo ti lege so ambeni ita amû maboko na ngoi ti ambeni kota kpale?

¹⁹ Awakua ti Jéhovah ayeke sara ye alingbi na fango ye so ayeke na aRomain 12:5 so atene: “E yeke amembre ti tere ti amba ti e oko oko kue.” E yeke bâ ka ni na ngoi so ye ti ngangu asi. Na décembre, ngu 2011, mbeni kota ngu apika na asuku amû ndo na zoa ti Mindanao na Philippines. Na bï oko, ngu ni abuba ada ahon 40 000, na popo ni mo yeke wara ada ti aita mingi. Filiale ni atene so “même kozo ti tene aita ti Komite ti mungo maboko na ngoi ti ye ti ngangu asi, aita ti ambeni ndo so ayeke na tere ti kodoro ni atokua aye ti mû maboko na aita ni.”

²⁰ Legeoko nga, na ngoi so sese ayengi ngangu na tö ti Japon na asara si kota ngu-ingo asuku amû ndo, aita mingi agirisa aye ti ala. Ambeni ita ni agirisa aye ti ala kue. Ita-wali Yoshiko, so da ti lo abuba kue, alango ayo akilomètre 40 tongaso na Da ti Royaume. Lo tene: “Mbeni ngoi na pekoni, bê ti e adö ti mä so lango oko na peko ti yengingo ti sese ni surveillant ti circonscription na mbeni ita-koli aga ti gi e.” Na ngia na yanga ti lo, lo tene: “E yeke biani na ngia mingi so congrégation abâ lege ti abezoin ti e na lege ti yingo. Na ndo ni e wara abongo ti ngu, aporo, abozo nga na abongo ti lango.” Mbeni membre ti komite ti mungo maboko na ngoi ti ye ti ngangu atene: “Aita ti akodoro ti Japon kue asara kua beoko nga ala mû maboko na mba. Aita alondo même na yâ ti akodoro ti Amerika ti ga ti mû maboko. Tongana a hunda ala ndani so ala sara yongoro voyage tongaso, ala tene: ‘E yeke beoko na aita ti e ti Japon na ala yeke na bezoin ti mungo maboko.’” A nzere na mo pëpe ti duti na yâ ti mbeni bungbi so a yeke bâ lege ti azo ti yâ ni mingi so? Mo lingbi ti duti na kite oko pëpe so a nzere na Jéhovah mingi ti bâ mara ti dutingo beoko tongaso.

²¹ Ti duti na bibe so laso, a yeke mû maboko na e ti duti beoko ti hon ndo ti akota kpale so ayeke ga, même tongana e wara lege pëpe ti sara lisoro na ambeni ita ti e so ayeke na yâ ti ambeni kodoro nde. Ti duti beoko ayeke leke e ndali ti akpale so e yeke tingbi ande na ni na ngoi so futingo ti dunia so aga nduru. Fumiko, mbeni ita-wali, so asö kuâ na ngoi ti kota ngu so apika na Japon, atene: “A ga nduru ti futi dunia so awe. A lingbi e ngbâ ti mû maboko na amba ti e aChrétien ti ku na ngoi so kpale oko ayeke duti ande dä ape.”

22. Tongana nyen la dutingo beoko ayeke mû maboko na e na yâ ti ngoi so ayeke ga?

²² Amaseka nga na akangba so laso ayeke gi ti duti beoko, a yeke leke biani tere ti ala ti sö kuâ na ngoi so a yeke futi dunia so azo ti yâ ni ayeke beoko ape so. Legeoko tongana ti ngoi ti giriri, Nzapa ti e ayeke sö azo ti lo (És. 52:9, 10). Zia lakue na li ti mo so mo lingbi ti duti na popo ti azo so ayeke sö kuâ tongana mo ngbâ na popo ti azo ti Nzapa so ayeke beoko. Mbeni ye nde so ayeke mû ande maboko na e, a yeke ti bâ na nene ni mingi aye so e wara. Article ti peko ayeke sara tënë na ndo ni.