NA NGU 1870 na Pittsburgh (Allegheny), na Pennsylvanie na Amerika, mbeni kete groupe ti azo akomanse ti gi ti hinga ye na ndo ti Bible. Charles Taze Russell la amû li ni na ndo ti ala. Ala manda ye na ndo ti ngere so Christ afuta ti zi na azo na hio ala hinga kota ye so ngere so asara na yâ ti ye so Jéhovah aleke ti sara. A nzere na ala lani mingi ti hinga so ngere so Christ afuta ti zi na azo amû lege na azo ti sö kuâ, même na ala so ade amä lani tënë na ndo ti Jésus pëpe. Teti so ala bâ ye so na nene ni mingi apusu ala ti sara matanga ti dabe ti ala na kuâ ti Jésus ngu oko oko.—1 aCor. 11:23-26.

Ita Russell akomanse ti sigigi na Tour ti Ba Ndo so asara tënë mingi na ndo ti ngere so Christ afuta ti zi na azo tongana kota ye so Nzapa asara ti fa ndoye so lo yeke na ni na mbage ti azo. Na yâ ti Tour ti Ba Ndo so a iri Matanga ti Dango Bê na kuâ ti Christ “tâ mbeni pendere ngoi” na a wa azo so adiko ni ti sara matanga so na Pittsburgh wala na ambeni ndo nde na yâ ti agroupe. “Même tongana azo use wala ota so tënë ti mabe ti ala ayeke oko”, wala même gi zo oko, Christ ayeke na ala.

Ngu oko oko, gbâ ti aita ayeke ga lani na Pittsburgh ti sara Matanga ti Dango bê na kuâ ti Christ. Na ndo ti mbeti ti tisango ndo ndali ti matanga ni, a tene: “A yeke yamba mo na ngia”. A-Wamandango Bible ti Pittsburgh ayeke nduru ti mû na aita ti ala ndo ti lango nga na kobe. Na ngu 1886, na yâ ti nze ti Dango Bê na kuâ ti Christ a yeke sara lani mbeni “kota bungbi” so aninga alango mingi. Tour ti Ba Ndo awa azo atene: “Ala ga, ala so andoye mingi Maître ti ala, aita ti lo nga na tâ tënë.”

Teti angu mingi, aWamandango Bible ti Pittsburgh ayeke leke lani akota bungbi ndali ti azo so amä na bê na ngere so a futa ti zi na azo na so aga na Pittsburgh ndali ti Dango Bê na kuâ ti Christ. Na ngoi so wungo ti aWamandango Bible aga mingi wungo ti azo so ayeke ga na Dango Bê na kuâ ti Christ nga kue aga mingi, nga a sara ni na yâ ti ando mingi na yâ ti dunia. Ray Bopp so ayeke na congrégation ti Chicago atene so na yâ ti ngu so alondo na ngu 1910 ti si na ngu 1919, hongo na mapa na vin ti Dango Bê na kuâ ti Christ amû l’heure mingi ngbanga ti so mingi ti azo so aga ayeke te mapa ni nga ayeke nyon vin ni.

Aye wa la a sara lani na kua na ngoi ti Dango Bê na kuâ ti Christ ni? Atâa so Jésus asara lani kua na vin na ngoi ti Kobe ti Seigneur, teti mbeni ngoi Tour ti Ba Ndo ahunda ti tene a sara kua na ngu ti raisin wala na raisin so atö ni, tongaso si “azo so awoko”, wala azo so alingbi ti nyon sämba ahon ndo ni, alingbi ti tï pëpe. Ye oko, a yeke mû vin na ala so ayeda so “vin so ason la alingbi a sara kua na ni.” Na pekoni, aWamandango Bible aga ti hinga so bengba vin la ayeke tâ fä ti mênë ti Jésus.

Dango Bê na kuâ ti Jésus amû lege na aita ti gbu li ti ala mingi. Ye oko, na yâ ti ambeni congrégation, mawa asara aita na ngoi ti dango bê ni nga tongana kapa ni  ahunzi, zo oko asara tënë pëpe. Buku Jéhovah ti ngu 1934 atene so a lingbi a sara Matanga ti Dango Bê na kuâ ti Christ na yâ ti “vundu” pëpe ndali ti kuâ ti pasi so Jésus akui, me a lingbi a sara ni na yâ ti “ngia” ndali ti so lo yeke Gbia na yayu ngbene ye na ngu 1914.

A komanse na ngu 1935 a changé lege so a yeke sara fadeso na Matanga ti Dango Bê na kuâ ti Christ ndali ti so a zi nda ti tënë “azo mingi mingi” so a sara tënë ni na Apocalypse 7:9. Ngbene ye na ngu ni so ti ga na ni, awakua ti Jéhovah abâ “azo mingi mingi” so tongana aChrétien so amû tere ti ala na Nzapa awe na so ayapu na yâ ti kua ti Nzapa mingi ape. Na ngoi ni so, a bâ gbâ ti azo so tongana awakua ti Nzapa so ayeke be-ta-zo na so ayeke na beku ti wara fini na yâ ti paradis na ndo ti sese. Na peko ti so Russell Poggensee akiri abâ zingo nda ti ye so nga lo gbu li ti lo na ndo ti lo wani, lo tene: “Jéhovah asoro mbi pëpe na lege ti yingo vulu ti lo ti gue na yayu.” Ita Poggensee, nga na ambeni ita mingi so ayeke be-ta-zo tongana lo, azia ti te mapa ni nga ti nyon vin ni me ala ngbâ ti gue na Matanga ti Dango Bê na kuâ ti Christ.

Na ‘tâ pendere ngoi’ so, kapa ti fango tënë so ayeke nde amû lege na azo kue ti fa singila ti ala ndali ti ngere so a futa ti zi na azo. Na yâ ti Bulletin, wala Kusala ti Royaume ti ngu 1932 a wa aChrétien ti duti pëpe “asaint ti Dango Bê na kuâ ti Christ,” azo so ate gi mapa ni nga anyon gi vin ni me ala yeke pëpe “atâ awakua,” azo so ayeke fa tâ tënë. Na yâ ti Bulletin ti ngu 1934 a hunda ndo na ndo ti wungo ti azo so ayeke ga “apionnier auxiliaire,” a tene: “E yeke wara ande ala 1000 na ngoi ti Dango Bê?” Na ndo ti azo so a soro ala ti gue na yayu Informateur atene: “Ala lingbi ti wara ngia gi tongana ala fa tënë ti Royaume.” A si na mbeni ngoi, azo so ayeke na beku ti wara fini na ndo ti sese ayeke wara nga ngia gi tongana ala fa tënë. *

Ti awakua ti Jéhovah kue, lakui so a yeke sara na Matanga ti Dango Bê na kuâ ti Christ ayeke ngoi so ayeke nzoni-kue na yâ ti ngu ni so ahon atanga ni kue. Ala yeke sara ni même na yâ ti angoi so ayeke ngangu. Na ngu 1930, Pearl English na ita ti lo ti wali, Ora atambela akilomètre 80 ti gue ti sara Matanga ti Dango Bê na kuâ ti Christ. Na ngoi so Harold King, so ayeke mbeni missionnaire, ayeke gi lo oko na da ti kanga na Chine, lo sû mbeni suma-tene nga na abia na ndo ti Dango Bê na kuâ ti Christ nga lo mû mbeni lê ti keke la lo sara na vin ni nga lo sara mapa ni na loso. Ti londo na akodoro so ayeke na tö ti Europe ti si na akodoro so ayeke na bê ti Amerika nga ti si na Afrika, aChrétien asara Matanga ti Dango Bê na kuâ ti Christ na mbeto pëpe na angoi ti bira wala na angoi so a kanga lege na ala ti fa tënë. Atâa ndo wa la e yeke dä wala dutingo ti e ayeke tongana nyen, e yeke bungbi oko ti gonda Jéhovah Nzapa nga na Jésus Christ na pendere ngoi ti Dango Bê na kuâ ti Christ.