Mo diko a-article ti Tour ti Ba Ndo so asigigi ade ti ninga ape so nzoni? Bâ wala mo lingbi ti kiri tënë na ahundango ndo so ge:

A yeke nzoni aChrétien asambela Jésus Christ?

Ên-ën. Jésus wani afa na e ti sambela Jéhovah, nga lo zia tapande ni na e na lege so lo sambela Babâ ti lo (Mat. 6:6-9; Jean 11:41; 16:23). Ni la, adisciple ti lo asambela lani Nzapa, me Jésus ape (Kus. 4:24, 30; aCol. 1:3).—1/1, lembeti 14.

Nyen la e lingbi ti sara ngu oko oko ti leke tere ti e ndali ti Matanga ti Dango Bê na kuâ ti Jésus?

Mbeni ye so e lingbi ti sara a yeke ti diko aversê so a zia ni ndali ti matanga ni. E lingbi nga ti sara ngangu ti fa tënë mingi ahon ti kozo na ngoi ni so. A yeke nga nzoni ti tene e sambela nga e gbu li ti e na ndo ti beku so Nzapa amû na e.—15/1, lembeti 14-16.

Nyen la asi lani na azo ti Égypte use so atene na Joseph abango li ti ala so asara si li ti ala aga kirikiri?

Joseph atene na mokonzi ti azo ti mungo ye ti nyongo ni na Pharaon so a yeke kiri na lo ande na ngbene kua ti lo. Me, bango li ti mokonzi ti azo ti sarango mapa ti Pharaon aye ti fa so Pharaon ayeke fâ lo nga ayeke kanga lo na nduzu na ndo ti keke. Atënë so kue aga tâ tënë (Gen. 40:1-22).—1/2, lembeti 12-14.

Mbeni nzoni ye wa azo ti Japon awara so ala ku tere ti ala na ni ape?

Ala wara mbeti ti Matthieu so ayeke na yâ ti Fini Dunia. Aita amû mbeti so na azo na fango tënë, na azo mingi so ahinga Bible ape ayeda ti mû ni.—15/2, lembeti 3.

Aye wa la amû maboko lani na ngoi ti akozo Chrétien ti fa nzoni tënë?

Pax Romana asara si bira ayeke lani mingi ape. Akozo disciple ayeke voyagé lani na ndo ti anzoni lege nga alege ayeke gbani. Azo mingi atene lani yanga ti Grec, a sara si a yeke lani ngangu ape ti fa tënë même na aJuif so ayeke na ando nde nde na Rome. Na ndo ni, adisciple asara kua na ndia ti Rome ti gbu koko ti nzoni tënë.—15/2, lembeti 20-23.

Ngbanga ti nyen aChrétien asara matanga ti Pâques ape?

Jésus ahunda pëpe na adisciple ti lo ti sara matanga ti dango bê na zingongo ti lo na kuâ, me ti dango bê na kuâ ti lo (Luke 22:19, 20).—1/3, lembeti 8.

Na yâ ti angu so ahon ade ti ninga ape, ngbanga ti nyen na yâ ti ambeti ti e a sara tënë mingi pëpe na ndo ti ambeni ye na a tene so ayeke fä ti mbeni ye nde?

Aversê ti Bible afa na e so ambeni zo so a sara tënë ti ala na yâ ti Bible ayeke fä ti mbeni kota ye so ayeke si ande. Mbeni tapande ni ayeke na aGalate 4:21-31. Ye oko, a yeke nzoni pëpe ti tene e gi ti fa ambeni ye na ndo ti mbeni mbaï ti fa so aye ti sara tënë ti mbeni ye so ayeke si ande. Me, a lingbi e gi ti bâ aye so e lingbi ti manda na lege ti azo nga na ambaï so ayeke na yâ ti Bible (aRom. 15:4).—15/3, lembeti 17-18.

Ngbanga ti nyen mbeni kete mbage ti papyrus so a wara ni na yâ ti mbeni ngbene place ti gbâ ti asaleté na Égypte ayeke kota ye ndali ti e?

A sara ngu ngbangbo oko tongaso awe, a wara mbeni kete mbage ti papyrus, na yâ ni a yeke wara mbage ti Évangile ti Jean. A sû ni peut-être angu bale-oko na ndo ni tongaso na peko ti so bazengele Jean asû mbeti ti lo nga atënë ti yâ ni ague oko na aye so e yeke diko laso na yâ ti Bible so e wani e yeke na ni, na afa so atënë ti yâ ti Bible ague oko.—1/4, lembeti 10-11.

Ngbanga ti nyen bingo zo na gigi ti bungbi ayeke mbeni ye so a sara na ndoye?

Bible afa ambeni ye so tongana zo asara ni a lingbi ti bi lo na gigi ti bungbi, ye so ayeke ga na aye ti nzoni (1 aCor. 5:11-13). A mû gonda na iri ti Nzapa, a bata congrégation so ayeke nzoni-kue, nga a lingbi ti sara si li ti zo so asara siokpari aga dä.—15/4, lembeti 29-30.