1, 2. Na yâ ti mbeti ti Nzapa so a sû na yanga ti Hébreu, tënë “mbata ti gere” aye ti sara tënë ti nyen?

JÉHOVAH Nzapa atene: “Yayu ayeke trône ti Mbi, na sese ayeke mbata ti gere ti Mbi.” (És. 66:1). Lo sara nga tënë ti “mbata ti gere” ti lo, lo tene: “Fade Mbi yä iri ti ndo ti gere ti Mbi.” (És. 60:13). Tongana nyen la lo yeke sara ni? Tënë so aye ti tene nyen ndali ti e so e yeke na ndo ti sese so ayeke “mbata ti gere” ti Nzapa?

² Tënë “mbata ti gere” aye ti sara tënë ti sese. Na yâ ti mbeti ti Nzapa so a sû ândo na yanga ti Hébreu aye nga ti sara tënë ti ngbene temple so ayeke lani na Israël (1 Chron. 28:2; Ps. 132:7). Temple ni ayeke lani pendere mingi na lê ti Jéhovah ndali ti so ayeke ndo so a yeke voro lani tâ Nzapa dä. A yeke na yâ ti temple so la azo ayeke mû lani gloire na Jéhovah na ndo ti sese.

3. Temple ti Nzapa ti yingo ayeke nyen? Temple ni abâ gigi lawa?

³ Laso, kota ndo so a yeke voro Nzapa dä ayeke encore mbeni temple na ndo ti sese pëpe. Me, mbeni temple ti yingo ayeke dä so ayeke mû gloire na Jéhovah mingi ahon temple so zo aleke ni. Temple ti yingo so ayeke ye so Nzapa aleke ti mû lege na azo ti  sara songo na lo na lege ti ngere so Jésus Christ afuta ti zi na azo nga na kua so lo sara tongana prêtre. Temple so abâ gigi na ngoi so Jéhovah asoro Jésus ti ga Kota Prêtre ti temple ti Jéhovah na ngoi ti batême ti Jésus na ngu 29.—aHéb. 9:11, 12.

4, 5. (a) Ti gue oko na Psaume 99, nyen la atâ wakua ti Jéhovah aye mingi ti sara? (b) Tënë wa la a lingbi e hunda tere ti e na ni?

⁴ E yeke fa so e kiri singila na Jéhovah ndali ti ye so lo leke ni na lege ti temple ti lo ti yingo, na lege so e yeke gonda lo na fango iri ti lo na azo nga e sara tënë na ala na ndo ti ngere so lo futa ti zi na azo. A nzere na e mingi ti hinga so laso atâ Chrétien ahon million miombe ayeke mû gonda na Jéhovah na ngangu ti ala kue. Nde na ambeni zo so ahanda tere ti ala na lege so ala yeke pensé so ala yeke gonda ande Nzapa na ngoi so ala gue na yayu, aTémoin ti Jéhovah kue abâ so a lingbi ala gonda Jéhovah ge na sese nga a lingbi ala sara ni laso.

⁵ Na ngoi so e yeke gonda Jéhovah, e yeke mû tapande ti awakua be-ta-zo ti lo so a sara tënë ti ala na Psaume 99:1-3, 5-7. (Diko ni.) Tongana ti so psaume so afa, Moïse, Aaron nga na Samuel amû maboko mingi na aye so Jéhovah aleke ndali ti tâ vorongo na ngoi ti ala. Laso, kozo ti tene tanga ti aita ti Jésus so a soro ala ague na yayu ti sara kua ti aprêtre legeoko na Jésus, ala yeke sara kua na Jéhovah na bê ti ala kue na yâ ti mbage ti temple ti yingo so ayeke na ndo ti sese. “Ambeni ngasangbaga” kutu na kutu ayeke mû maboko na ala na bê ti ala kue (Jean 10:16). Atâa so aita ti Jésus ayeke na beku ti wara fini na yayu nga ambeni ngasangbaga ayeke na beku ti wara fini na sese, ala kue ayeke voro Jéhovah ge na sese. Me a lingbi e oko oko kue e hunda tere ti e: ‘Mbi yeke mû maboko mingi na yâ ti aye so Jéhovah aleke ndali ti tâ vorongo?’

6, 7. Kpale wa la abâ gigi lani na popo ti akozo Chrétien? Nyen la apasêe angu ngbangbo mingi na pekoni?

⁶ Na peko ti so a zia lani gere ti congrégation ti aChrétien na sese, ade ti sara ngu ngbangbo oko ape, a-apostat so a sara tënë ti ala kozo awe akomanse ti mû ndo (Kus. 20:28-30; 2 aThes. 2:3, 4). Ye so asara si a yeke lani ngangu ti hinga azo so ayeke voro biani Jéhovah na yâ ti temple ti lo ti yingo. A sara ngu 1800 tongaso na pekoni la Jéhovah asara kua na Jésus ti fa na gigi azo so ayeke voro lo biani na yâ ti temple ti lo ti yingo.

⁷ Na ngu 1919, a hinga polele azo so Jéhovah ayeda na ala na so asara kua na yâ ti temple ti lo ti yingo. A zi saleté na tere ti ala na lege ti yingo tongaso si Jéhovah ayeda na kua ti ala (És. 4:2, 3; Mal. 3:1-4). Ye so bazengele Paul abâ na suma asara angu ngbangbo mingi kozo awe akomanse ti ga tâ tënë yeke yeke.

8, 9. Fa aye ota so “paradis” so Paul abâ na yâ ti suma apeut ti duti ni.

⁸ A sara tënë ti suma ti bazengele Paul so na 2 aCorinthien 12:1-4. (Diko ni.) Aye ti ndima so Paul abâ tongana suma aye lani ti sara tënë ti mbeni ye so Nzapa afa ni. A ye pëpe ti sara tënë ti mbeni ye so asi lani na ngoi ti Paul me ti mbeni ye so ayeke si ande. So “a mû [Paul] a hon na lo juska na ota yayu ni”, “paradis” wa la lo bâ lani? “Paradis” so lo bâ ni apeut ti duti paradis so ayeke duti ande na ndo ti sese (Luc 23:43). A peut ti duti nga nzoni dutingo ti awakua ti Jéhovah na lege ti yingo. Na mbage, a peut ti duti pendere nzoni duti so ayeke na yayu na yâ ti “paradis ti Nzapa.”—Apoc. 2:7.

 ⁹ Tongaso, ndali ti nyen Paul atene so lo “mä ambeni tënë so zo akpa ti tene pekoni pëpe, atënë so a mû lege na zo ti tene ni pëpe”? Lo tene tongaso ndali ti so a yeke lani pëpe ngoi ti tene lo fa anzene nzene ye na ndo ti apendere ye so lo bâ na yâ ti suma so. Me laso Jéhovah amû lege na e ti fa na azo anzoni ye so e awakua ti lo e wara ni laso.

10. Kangbi wa la ayeke na popo ti “paradis ti yingo” na “temple ti yingo”?

¹⁰ E yeke sara ka tënë mingi na ndo ti paradis ti yingo, me a yeke nyen? A yeke ye so Jéhovah aleke ti tene e awakua ti lo e duti na siriri na lo nga na aita ti e. Tongaso, a lingbi e tene pëpe so “paradis ti yingo” nga na “temple ti yingo” ayeke oko. “Temple ti yingo” ayeke ye so Nzapa aleke ndali ti tâ vorongo. Paradis ti yingo amû lege ti hinga polele azo so Nzapa ayeda na vorongo ti ala, ala so laso ayeke voro lo na yâ ti temple ti lo ti yingo.—Mal. 3:18.

11. Pasa wa la e yeke na ni laso?

¹¹ A nzere na e mingi ti bâ so ngbene ye na ngu 1919 ti ga na ni, Jéhovah amû lege na e so siokpari ayeke na tere ti e ti sara kua maboko na maboko na lo ti leke paradis ti yingo, ti sara si akpengba nga akono. Mo yeke mû maboko na pendere kua so? A nzere na mo ti ngbâ ti sara kua legeoko na Jéhovah ti mû gloire na lo na ndo ti sese?

12. E hinga tongana nyen so atënë so ayeke na Ésaïe 60:17 aga tâ tënë awe? (Bâ foto so ayeke na tongo nda ti article ni.)

¹² Prophète Ésaïe afa kozo awe so a yeke sara ande gbâ ti achangement na yâ ti mbage ti bungbi ti Jéhovah so ayeke na ndo ti sese. (Diko Ésaïe 60:17.) Azo so ayeke amaseka wala azo so aga na yâ ti tâ tënë fini fini adiko ye na ndo ti achangement so wala ambeni ita asara tënë ni na ala awe. Me ambeni ita wani ayeke na pasa ti duti dä na ngoi so a sara achangement so lani. Ala hinga na bê ti ala kue so Jéhovah ayeke sara kua na Gbia ti e Jésus ti fa lege na bungbi ti lo. Tongana aita so afa na e aye so asi na ala, mabe ti e ayeke kpengba nga e yeke zia bê ti e kue na Jéhovah ahon ti kozo.

13. Ti gue oko na Psaume 48:13-15, nyen la a lingbi e sara?

¹³ Atâa e sara ngoi oke na yâ ti tâ tënë, a lingbi e sara tënë ti bungbi ti Jéhovah na azo. A yeke ye ti miracle ti bâ so atâa so e yeke na yâ ti sioni dunia ti Satan, e yeke na siriri na aita ti e na yâ ti dunia kue nga e duti beoko. A lingbi e fa na “awagame so ayeke ga na peko”, wala amolenge ti e, apendere ye so ayeke na yâ ti bungbi ti Jéhovah wala “Sion”, nga e fa na ala atâ tënë so e hinga na ndo ti paradis ti yingo.—Diko Psaume 48:13-15.

14, 15. Achangement wa la a sara lani na peko ti ngu 1970? A ga na ye ti nzoni wa na bungbi ti Jéhovah?

¹⁴ A sara angu mingi awe, ambakoro so ayeke na popo ti e abâ ambeni changement so a sara ni na yâ ti bungbi ti Jéhovah so asara si mbage ti bungbi ti Jéhovah so ayeke na sese aga pendere mingi. Ala dabe ti ala so lani na yâ ti acongrégation a yeke wara mbeni serviteur ti congrégation me pëpe bungbi ti a-ancien nga a yeke wara na yâ ti akodoro mbeni serviteur ti filiale me pëpe Komite ti filiale. Nga ala dabe ti ala so lani président ti société Watch Tower la ayeke mû adesizion me pëpe Bebungbi ti aTémoin ti Jéhovah. Atâa so aita so ayeke lani na ambeni ita so ayeke be-ta-zo so ayeke mû maboko na ala, gi zo oko la ayeke mû adesizion na yâ ti acongrégation, na yâ ti afiliale nga na kota ndokua ti e. Na peko  ti ngu 1970, a sara achangement, fadeso a yeke zo oko la ayeke mû adesizion pëpe me bungbi ti a-ancien la ayeke mû adesizion.

¹⁵ Achangement so aga na ye ti nzoni? EN. A sara ni ndali ti so e kiri e mä yâ ti aversê ti Bible nzoni. Ahon ti tene zo oko la amû adesizion kue, a yeke mbeni groupe ti a-ancien la ayeke mû adesizion, na bungbi ti Jéhovah ayeke wara ye ti nzoni na lege ti anzoni sarango ye ti a-ancien kue wala ti “akoli” so Jéhovah amû ala “tongana amatabisi”.—aÉph. 4:8; aProv. 24:6.

16, 17. Na popo ti achangement so a sara ade ti ninga ape, so wa la anzere na mo mingi? Ngbanga ti nyen?

¹⁶ Gbu li ti mo nga na ndo ti achangement so a sara ni ade ti ninga ape, na tapande fason so a leke na ambeti ti e pendere, atënë ti yâ ni nga na akode so e yeke kangbi na ni. E yeke na ngia mingi ti kangbi na azo na fango tënë apendere mbeti so ayeke mû awango so azo ayeke biani na bezoin ni. Gbu nga li ti mo na ndo ti afini ye so awandara asigigi na ni so e yeke sara kua na ni na fango tënë. Na tapande, azo mingi ayeke gue na ndo ti site jw.org ti wara mungo maboko so ala yeke na bezoin ni. Na yâ ti achangement so kue, e bâ tongana nyen la Jéhovah abibe ti lo mingi na azo nga lo ye ala.

¹⁷ E bâ nga na nene ni changement so andu lango ti abungbi. Ye so amû lege na e ti wara ngoi mingi ti voro Nzapa na yâ ti sewa wala ti manda ye e wani. E bâ nga na nene ni achangement so andu akapa ti akota bungbi ti e. Fani mingi e yeke tene ka so kota bungbi ti ngu so ayeke pendere mingi! E yeke nga na ngia mingi ti wara afango ye na lege ti gbâ ti a-ekole ti mandango Bible. E bâ maboko ti Jéhovah polele na yâ ti achangement so kue. Yeke yeke lo sara  si bungbi ti lo nga na paradis ti yingo so e yeke na yâ ni laso aga pendere mingi.

18, 19. Tongana nyen la e lingbi ti sara si paradis ti yingo aga pendere mingi?

¹⁸ So Jéhovah amû lege na e ti sara si paradis ti yingo aga pendere so, a yeke mbeni pasa. E yeke sara ni na lege so e yapu na fango nzoni tënë ti Royaume nga e sara adisciple mingi. Lakue tongana e mû maboko na mbeni zo juska lo mû tere ti lo na Jéhovah na lo wara batême, andâ e yeke kono yâ ti paradis ti yingo la.—És. 26:15; 54:2.

¹⁹ E lingbi nga ti sara si paradis ti e ti yingo aga pendere mingi tongana e ngbâ ti sara ngangu ti tene sarango ye ti e ti aChrétien aga nzoni ahon ti kozo. Tongana e sara tongaso, paradis ti yingo so ayeke ga pendere mingi na lê ti azo. Mingi ni, a yeke pëpe na lege ti hingango ye ti e na ndo ti Bible la si e yeke ga na azo na yâ ti bungbi, na mbage ti Jéhovah nga na Jésus, me ayeke na lege ti asarango ye ti e.

20. Ti gue oko na aProverbe 14:35, nyen la a lingbi e sara?

²⁰ Tere ti Jéhovah na Jésus adoit ti nzere mingi na ngoi so ala bâ pendere paradis ti yingo so e yeke na yâ ni laso. Ngia so e yeke na ni laso ti sara si paradis ti yingo so aga pendere ayeke kete tongana a haka ni na ngia so e yeke wara ande na ngoi so e yeke sara si sese aga Paradis. Zia e bata na li ti e atënë so ayeke na aProverbe 14:35, so atene: “Boi so asara na lege ti ndara awara nzobe ti gbia.” Zia e sara ye lakue na ndara na ngoi so e yeke sara kua ngangu ti tene paradis ti yingo aga pendere mingi.