Mo diko a-article ti a-Tour ti Ba Ndo so asigigi ade ti ninga ape so nzoni? Bâ wala mo lingbi ti kiri tënë na ahundango ndo so ge:

Na ngoi ti nda ni, a yeke futi ande aye wa?

Ambeni ye ni so a yeke futi ande ni ayeke agouvernement ti azo, bira nga dorongo droit ti azo ayeke hunzi, abungbi ti nzapa so afa tâ tënë pëpe na azo na ndo ti Nzapa nga na azo so akpe Nzapa pëpe.—1/5, l. 3-5.

Zo wa la ayeke Gog ti Magog so mbeti ti Ézéchiel asara tënë ti lo?

Gog ti Magog aye ti sara tënë ti Satan pëpe, me ti mbeni bungbi ti amara so amä tere ti sara ande bira na awakua ti Nzapa ngoi kete kozoni na Harmaguédon.—15/5, l. 29-30.

Aye omene wa zo alingbi ti sara ti duti na ngia na lâ ti mbakoro ti lo?

Bible atene so a lingbi (1) e sara tere ti e kete, (2) e sara ye na lege ni, (3) e duti na nzoni bango ndo, (4) e mû ye na azo, (5) e gi ti wara akamarade nga (6) e hinga ti tene merci. Gbungo li na ndo ti asarango ye so alingbi ti mû maboko na zo ti wara ngia na lâ ti mbakoro ti lo.—1/6, l. 8-10.

Tongana nyen la amiracle ti Jésus afa so lo yeke zo ti mungo ye na zo?

Na ngoi ti mbeni matanga ti mariage na Cana lo sara si litre ti ngu 380 aga vin. Na mbeni ngoi nde Jésus amû kobe na azo ahon 5000 na lege ti miracle (Mat. 14:14-21; Jean 2:6-11). Na yâ ti aye so use kue, Jésus amû tapande ti Babâ ti lo so ahinga ti mû ye na zo.—15/6, l. 4-5.

Ngbanga ti nyen la e hinga biani so atâa so siokpari ayeke na tere ti e, e lingbi ti zia ngia na bê ti Nzapa?

Azo tongana Job, Lot nga na David asara lani afaute. Ye oko, ala ye lani ti sara na Nzapa na bê ti ala kue. Ala regretté aye so ala sara, nga ala changé sarango ye ti ala. Ndali ni la si Nzapa abâ ala na nzoni lê, e nga kue e lingbi ti sara tongaso.—1/7, l.12-13.

A yeke fâ ande azo kue so ayeke kozo na yâ ti abungbi ti vorongo nzapa ti wataka si asigigi na ngoi so a yeke futi Babylone, Ngangu gbata?

Ên-ën. Zacharie 13:4-6 atene so même ambeni kota zo ti nzapa ayeke zia ande lege ti abungbi ti nzapa so ala yeke na yâ ni nga ala yeke ke ti yeda so ala yeke na yâ ni ândö.—15/7, l. 15-16.

Ngbanga ti nyen la Barak ayeda ti tiri bira ni gi tongana Débora ague na lo?

Barak ayeke lani na mabe. Ye so afa ni ayeke so lo hunda pëpe gbâ ti aye ti bira na Nzapa. Lo bâ so tongana Débora so asara kua na iri ti Jéhovah aduti na tere ti lo na azo ti lo, ye so ayeke sara si ala yeke wara ngangu (aJu. 4:6-8; 5:7).—1/8, l. 13.

Ambeni ye so aChrétien alingbi ti gbu li ti ala na ndo ni ayeke so wa?

Aye so Jéhovah acréé, Bible, pasa so e yeke na ni ti sambela Jéhovah nga ngere so lo futa ti zi na azo.—15/8, l. 10-13.

Tongana nyen la ti kpe ti sara kamarade na asioni zo andu bango tere na mbeni zo ndali ti mariage?

E yeke sara ye na nzoni bê na azo so ayeke aTémoin ti Jéhovah ape. Ye oko, tongana mbeni Témoin ti Jéhovah abâ tere ndali ti mariage na mbeni zo so amû tere ti lo na Jéhovah ape nga so asara ye pëpe alingbi na andia ti lo, lo sara ye ague nde na fango lege ti Nzapa (1 aCor. 15:33).—15/8, l. 25.

Tongana nyen la mabe ti Pierre awoko lani? Tongana nyen la mabe ti lo akiri akpengba?

Mabe ti Pierre amû maboko na lo ti tambela na ndo ti ngu ti ga na mbage ti Jésus (Mat. 14:24-32). Me na ngoi so Pierre abâ kota pupu ti ngu ni mbeto asara lo. Na pekoni Pierre akiri azia bê ti lo kue na Jésus nga lo yeda ti tene Jésus amû maboko na lo.—15/9, l. 16-17.

Kusala 28:4 atene so azo ti Malte apensé ti ala lani atene bazengele Paul ayeke zo ti fango zo. Ngbanga ti nyen?

Na ngoi so mbeni sioni ngbo adë Paul, ala tene ti ala so a yeke Dike, nzapa-wali ti mbilimbili la apunir lo so. Me tënë ti ala ni ayeke na lege ni ape.—1/10, l. 9.

So Marthe azia si kua ahon ndo ti lo so e manda nyen dä?

Marthe amû ngoi ti lo mingi ti tö gbâ ti kobe. Jésus atene so ita ti lo asoro nzoni mbage ni ndali ti so lo dengi mê ti mä ye so lo yeke fa. A yeke nzoni e sara hange si aye so ayeke asenge senge ye amû place ti aye so e yeke sara ti voro na Jéhovah ape.—15/10, l. 18-20.