Mbeni ye so asi afa so Jésus aga Kota Prêtre na ngoi so lo wara batême na ngu 29. Nyen la asi na ngoi ni so? Na ngoi ti batême ti Jésus, lo fa so lo yeke nduru ti mû fini ti lo na sandaga na ndö ti gbalaka, so aye ti sara tënë ti ‘ye so bê ti Nzapa aye’. (aGal. 1:4; aHéb. 10:5-10). So gbalaka ayeke mbeni kota ye na yâ ti mbeni temple, âmanke temple ti yingo abâ nga gigi na ngoi so Jésus awara batême. Kota temple ti yingo aye ti sara tënë ti aye kue so amû lege na e ti voro Jéhovah na lege ni grâce na sandaga ti Jésus.—Mat. 3:16, 17; aHéb. 5:4-6.

Na peko ti so kota temple ti yingo abâ gigi, a bezoin lani mbeni kota prêtre. Ti wara kota prêtre ni, Jéhovah asoro Jésus “na lege ti yingo vulu nga na ngangu”. (Kus. 10:37, 38; Marc 1:9-11). Ye oko, tongana nyen la e lingbi ti hinga biani so a soro Jésus tongana Kota Prêtre kozo na kuâ ti lo nga na zingongo ti lo na kuâ? Tapande ti Aaron nga na akota prêtre so asara kua na peko ti lo ayeke mû maboko na e ti kiri tënë na hunda so.

Tongana ti so ndia ahunda, gï kota prêtre la alingbi ti lï na yâ ti Ndo so ayeke nzoni kue kue kue ti tabernacle nga na ti temple. Mbeni rideau la akangbi popo ti Ndo so ayeke nzoni kue kue kue na Ndo so ayeke nzoni-kue. Kota prêtre ayeke hon na peko ti rideau ni gï na Lango ti zingo siokpari (aHéb. 9:1-3, 6, 7). A soro Aaron nga na akota prêtre so asara kua na peko ti lo ti ga akota prêtre kozo ti tene ala hon na peko ti rideau ti lï na Ndo so ayeke nzoni kue kue kue. Tongaso, a doit lani ti soro Jésus ti ga Kota Prêtre kozo na kuâ ti lo, na pekoni lo hon “na yâ ti rideau ni, so ti tene mitele ti lo,” ti gue na yayu (aHéb. 10:20). Ndani la, bazengele Paul atene so Jésus aga lani “tongana mbeni kota prêtre”, na pekoni lo lï “na yâ ti tente so ayeke kota mingi nga so ayeke mbilimbili-kue ahon ti kozoni so, tente so maboko ti zo la asara ni pëpe,” nga lo lï “tâ na yayu”.—aHéb. 9:11, 24.

Kangbi ayeke pëpe na popo ti ngoi so Jéhovah ayeda na fini mbele nga na ngoi so fini mbele ni akomanse ti sara kua. E tene tongaso ngbanga ti nyen? Na ngoi so Jésus amonté na yayu na lo fa na Jéhovah ngangu so sandaga ti lo ayeke na ni ti sö e, lo sara akozo ye use na popo ti aye ota so asara si Jéhovah ayeda na fini mbele, wala lo sara si a gue oko na ndia. A-oko ye so asara nga si fini mbele akomanse ti sara kua biani. Aye so ayeke aye wa?

Kozoni, Jésus asi na gbele Jéhovah; na pekoni, lo fa na Jéhovah ngangu so sandaga ti lo ayeke na ni ti sö azo, nga na nda ni Jéhovah ayeda so mênë ti Jésus so atuku ayeke na ngangu ti sö azo. Juska na ngoi so a sara aye so, fini mbele ni ade akomanse ti sara kua ape.

Bible afa na e pëpe mbilimbili ngoi so Jéhovah ayeda na ngangu so sandaga ti Jésus ayeke na ni ti sö azo. Tongaso, e lingbi pëpe ti fa mbilimbili ngoi so Jéhovah ayeda na fini mbele ni nga na ngoi so akomanse ti sara kua. Ye oko, e hinga so Jésus amonté na yayu lango bale-oko kozo na lâ ti Pentecôte (Kus. 1:3). Na mbeni ngoi na yâ ti nduru ngoi so, lo fa na Jéhovah ngangu so sandaga ti lo ayeke na ni ti sö azo, na Jéhovah ayeda na ni (aHéb. 9:12). A bâ ye so polele na lâ ti Pentecôte (Kus. 2:1-4, 32, 33). Na ngoi ni so, a yeke polele so a zia fini mbele na sese nga akomanse ti sara kua.

Na nduru tënë, Jéhovah ayeda na fini mbele ni nga akomanse ti sara kua na peko ti so Jéhovah ayeda na ngangu so mênë ti Jésus so atuku ayeke na ni ti sö azo. Na pekoni, fini mbele ni akomanse ti sara kua, na Jésus ayeke Kota Prêtre ni nga lo sara kua tongana Walekengo-songo ti mbele ni.—aHéb. 7:25; 8:1-3, 6; 9:13-15.