A dü mbi na ngu 1954 na Saint-Paul, na Minnesota, so ayeke na États-Unis. Babâ na mama ti mbi ayeke lani na mosoro mingi ape nga ala yeke awayere ape, nga ala yeke lani aCatholique. Mbi yeke use molenge na popo ti amolenge oku. Na ngoi so mbi ngbâ kete, mbi gue na mbeni ekole ti aCatholique nga mbi yeke mbeni servant. Ye oko, mbi hinga aye mingi na ndö ti Bible ape. Atâa so mbi mä na bê lani so mbeni Nzapa adoit ti duti dä so acréé aye kue, mbi bâ so Eglize Catholique alingbi pëpe ti mû maboko na mbi ti voro lo.

Na kozo ngu so mbi sara na mbeni dasendagi so a yeke manda droit dä, aTémoin ti Jéhovah aga na da ti mbi. Mbi yeke sukula lani bongo ti mbi, tongaso couple so aga na da ti mbi ayeda na nzoni bê ti ga ti bâ mbi mbeni lâ. Tongana ala ga, mbi hunda ala na ahunda use: “Ngbanga ti nyen la aye so anzoni zo ayeke sara ayeke maï ka ape?” nga “Nyen la ayeke sara si zo aduti biani na ngia?” Ala mû na mbi buku Ta Tene so aga na Zo Fini ti La Koue La Koue nga na Mbeti ti Nzapa ti fini dunia, so couverture ni ayeke vert na aza zango. Mbi yeda nga ti manda Bible. Lê ti mbi azi encore mingi. A nzere na mbi mingi ti hinga so Royaume ti  Nzapa ayeke mbeni gouvernement so e bezoin ni mingi so ayeke komande ande sese. Mbi bâ so azo akomande na lege ni oko ape na asara si pasi ayeke mingi na yâ ti dunia, a sara ye na azo na lege ni ape nga azo ayeke na vundu.

Mbi mû terê ti mbi na Jéhovah na tongo nda ti ngu 1982, na pekoni mbi wara batême na kota bungbi ti lango ota so mama-tene ayeke “Tâ tënë ti Royaume” (na Anglais) so a sara ni na yâ ti mbeni kota da na gbata ti Saint-Paul. Na yenga ti peko, mbi kiri mbi gue na yâ ti kota da so ti sara examen ti ga avocat. Na tongo nda ti nze ti octobre, a fa na mbi so mbi wara examen ni na amû lege na mbi ti sara kua ti avocat.

Na Kota bungbi “Tâ tënë ti Royaume”, mbi wara terê na Mike Richardson, mbeni Béthelite na Brooklyn, na lo fa na mbi so, na kota ndokua ti e, a zia na sese mbeni bureau so abâ atënë ti ndia. Mbi dabe ti mbi na atënë so kota zo ti Éthiopie atene na Kusala 8:36, na mbi hunda ndo, mbi tene: ‘Nyen la akanga lege na mbi ti sara kua na yâ ti bureau so?’ Tongaso, mbi sû demande ti sara kua na Béthel.

A nzere lani na babâ na mama ti mbi ape so mbi ga Témoin ti Jéhovah. Babâ ti mbi ahunda mbi wala kua so mbi yeke sara na Béthel alingbi ti ga na mbi nzoni ye na yâ ti kua ti mbi ti avocat. Mbi fa na lo so mbi yeke sara kua kâ tongana volontaire. Mbi tene na lo so a yeke mû na mbi mbeni kete nginza tongana ti so a yeke mû lani na tanga ti aBéthelite kue nze oko oko.

So mbi yeda lani awe ti sara kua na mbeni da-ngbanga, mbi peut pëpe ti gue na Béthel na lê ni lê ni, tongaso mbi komanse ti sara kua na Béthel ti Brooklyn, na New York, na ngu 1984. A tokua mbi ti sara kua na yâ ti Bureau so abâ atënë ti ndia. Aye so mbi manda na ngoi so mbi sara kua na da-ngbanga so aleke mbi ndali ti kua so mbi sara na pekoni.

A vo lani da ti théâtre ti Stanley so ayeke na Jersey City, na New Jersey, na novembre ngu 1983. Aita-koli asara lani demande ti wara ambeti so amû lege ti leke akamba ti wâ nga na atuyau ti ngu ti yâ ti da ni. Na ngoi so aita awara terê na akota zo ti ndo ni, ala fa na ala so bungbi ti Jéhovah aye ti leke da ni ti tene aga da ti sarango akota bungbi ti aTémoin ti Jéhovah dä. Ye so aga na mbeni kpale. Andia ti gbata ni ahunda ti tene a sara ada ti vorongo Nzapa gï na avaka so azo alango dä. Da ti théâtre ti Stanley ayeke na milieu ti gbata ni na place so ando ti dengo buze ayeke mingi, tongaso akota zo ti gbata ni ake ti mû na  ala ambeti ni. Aita ni ahunda ti tene a kiri a bâ yâ ti tënë ni, me akota zo ni angbâ na ndö ti desizion ti ala.

Na yâ ti kozo yenga ti mbi na Béthel, bungbi ti Jéhovah ague na tënë ni na gbele ngbanga. Ndali ti so ade ti ninga ape mbi sara kua ngu use na yâ ti da-ngbanga ti Saint-Paul, na Minnesota, mbi hinga ye nzoni na ndö ti mara ti tënë so. Mbeni oko ti a-avocat ti e atene so a sara lani aye nde nde so gbâ ti azo ague dä na yâ ti da ti théâtre ti Stanley, na tapande, azo ague ti bâ afilm nga na aconcert na yâ ni. Tongaso, ngbanga ti nyen la a tene so ndia ake ti tene a sara mbeni ye ti vorongo Nzapa dä? Da-ngbanga ni abâ so gbata ti Jersey City adoro droit so e yeke na ni ti duti na liberté ti voro Nzapa. Da-ngbanga ni ahunda na akota zo ti gbata ni ti mû na e ambeti so e bezoin ni, na mbi komanse ti bâ tongana nyen la Jéhovah asara tufa na ndö ti aye so bungbi ti lo asara ti sara kua na andia ti kodro ti maï kua ti lo. Mbi yeke lani na ngia mingi so mbi mû mbage dä.

Aita akomanse ti leke gbâ ti aye na terê ti da ni, na a sara ngu oko ape na pekoni, a sara bungbi ti mungo diplôme na a-élève ti klase 79 ti Ekole ti Galaad na yâ ti Da ti Assemblée ti Jersey City na lango 8 ti septembre, ngu 1985. Mbi bâ so, so mbi wara lege ti pusu akua ti Royaume na devant, na lege so mbi yeke oko ti aita so abâ tënë ti ndia, amû na mbi ngia mingi ahon ti so mbi wara lani na ngoi so mbi sara kua ti avocat kozo ti ga na Béthel. Mbi hinga lani ape so Jéhovah ayeke sara kua na mbi ti bâ lege ti atënë mingi so a gue na ni na gbele ngbanga.

Na yâ ti angu 1980, mingi ni adocteur nga na ahôpital ayeke mû mênë na aTémoin so ayeke akota zo atâa so ala ke ni. Aita-wali so ayeke na ngo awara lani akota kpale ndali ti so mingi ni ajuge abâ so ala yeke na droit ape ti ke ti tene a mû mênë na ala. Ajuge ni atene so tongana a mû mênë na mama ti ngo ape, lo lingbi ti kui na molenge ni angbâ sân mama.

Na lango 29 ti décembre, ngu 1988, mênë ayuru gbani na terê ti Ita-wali Denise Nicoleau na peko ti so lo dü molenge ti koli. Ndali ti so docteur ti lo apensé so fini ti lo ayeke na yâ ti kpale, lo ye ti tene lo yeda ti mû mênë. Ita-wali Nicoleau ake. Na ndade ni na ndapre, akota zo ti hôpital ni ahunda na mbeni juge ti mû lege na ala ti mû mênë na ita ni. Juge ni amû lege pëpe na Ita Nicoleau wala koli ti lo ti fa bango ndo ti ala nga lo tene même na ala ape so lo mû yanga na azo ti hôpital ni ti mû mênë na ita ni.

Na vendredi, lango 30 ti décembre, akota zo ti hôpital ni amû mênë na Ita Nicoleau atâa so koli ti lo nga na amembre ti sewa so ayeke na terê ti lo ake. Na lakui ni so, a gbu ambeni membre ti sewa ni nga na ambeni ancien ndali ti so a bi tënë na li ti ala a tene ala bungbi gbani na terê ti ita ni  ala kanga lege ti tene a mû mênë na lo. Na samedi na ndapre, na lango 31 ti décembre, a sara tënë ti gbungo azo ni na yâ ti ambeti-sango, na télé nga na yâ ti aradio ti New York City nga na agbata so ayeke na terê ni.

Na lundi na ndapre, mbi sara lisoro na Juge Milton Mollen so ayeke juge ti mbeni kota da-ngbanga. Mbi fa na lo aye so asi nga mbi fa na lo so juge ni amû yanga ti tene a mû mênë na ita-wali ni sân ti sara lisoro na lo. Juge Mollen ahunda mbi ti ga na bureau ti lo na après-midi ni ti tene e sara lisoro na ndö ti tënë ni nga na andia so andu tënë ni. Mbi na surveillant ti mbi, Philip Brumley, e gue na bureau ti Juge Mollen na lakui ni so. Juge ni ahunda nga na avocat ti hôpital ni ti ga ti wara e. Lisoro ni ayeke lani ngangu. A si na mbeni ngoi, Ita Brumley asû mbeni note na mbi, lo tene: “Sara tënë yeke.” Tongana mbi pensé na ni, mbi bâ so a yeke lani nzoni wango ndali ti so bê ti mbi ason na ngoi so mbi yeke gi ti fa so atënë ti avocat ti hôpital ni ayeke na lege ni ape.

Ngbonga oko tongaso na pekoni, Juge Mollen atene so tënë ni so ayeke kozo tënë so a yeke bâ lege ni kekereke na ndapre. Na ngoi so e yeke quitté bureau ti Juge Mollen, lo tene so avocat ti hôpital ni ayeke na “kota kua kekereke.” So aye ti tene so a yeke duti ande kete ye na avocat ni ape ti fa so hôpital ni ayeke lani na raison ti forcé Ita-wali Nicoleau ti yeda ti mû mênë. Mbi pensé so Jéhovah ayeke fa na mbi so lege ayeke dä ti tene e sö benda. Li ti mbi akpe ti bâ tongana nyen la Jéhovah ayeke sara kua na e ti sara ye so bê ti lo aye.

E sara kua juska na bï ti leke atënë so e yeke tene na ndade ni. Da-ngbanga ni ayeke tâ nduru na Béthel ti Brooklyn, tongaso mingi ti aita so ayeke sara kua na Bureau so abâ atënë ti ndia atambela ague kâ. Na peko ti so ajuge osio amä atënë ti e, ala mingo yanga so a mû ti mû mênë na ita-wali ni. Kota da-ngbanga ni amû mbage ti Ita-wali Nicoleau nga atene so, so a mû yanga ti mû mênë na lo sân ti mä lo ague nde na adroit so ndia amû na azo.

Kete na pekoni, kota da-ngbanga ti New York atene so Ita-wali Nicoleau ayeke na droit ti tene a soigné lo sân mênë. Mbi yeke na pasa ti mû mbage na yâ ti angbanga osio so andu tënë ti mênë, so akota da-ngbanga nde nde na États-Unis amû desizion na ndö ni. Na popo ti angbanga osio so, kozo desizion ni la. (Bâ encadré “ Songo benda  na gbele akota da-ngbanga ti États-Unis.”) Mbi na ambeni avocat ti Béthel e bâ nga lege ti ambeni ngbanga so andu droit ti batango amolenge, divorce, tënë ti sarango kua na aterrain nga na ada.

Na ngoi so mbi wara terê na wali ti mbi, Dawn, ti kozo ni, lo sara lani divorce nga lo yeke bata amolenge ti lo ota. Lo yeke sara kua nga lo yeke pionnier. Gigi akpengba na lo, nga so lo leke na bê ti lo ti ngbâ ti sara na Jéhovah apika bê ti mbi mingi. Na ngu 1992, e gue na Kota bungbi ti lango ota “Azo ti zango lumière,” na Anglais, so a sara na New York City. Mbi hunda lo ti tene e bâ terê ndali ti mariage. Ngu oko na pekoni e sara mariage. So mbi yeke na wali so azia Jéhovah kozo na yâ ti fini ti lo nga so aye ngia ayeke mbeni cadeau so Jéhovah amû na mbi. Dawn asara si mbi wara biani anzoni ye na yâ ti ngoi kue ti gigi ti mbi na lo. —aProv. 31:12.

Na ngoi so e sara mariage, amolenge ti lo ayeke na ngu 11, 13 nga 16. Mbi ye lani ti duti mbeni nzoni babâ ndali ti ala, ni la mbi diko nzoni aye kue so mbi wara na yâ ti ambeti ti e na ndö ti batango amolenge ti wali wala ti koli ti mo, na mbi sara kue ti sara ye alingbi na ni. Tongana angu ayeke hon, e wara akpale, me a nzere na mbi so amolenge ni asara confiance na mbi tongana kamarade ti ala nga ala bâ mbi tongana babâ ti ala so aye ala. Lakue e yamba akamarade ti amolenge ti e na yanga-da ti e na a nzere na e so amaseka so ayeke na ngangu ayeke na terê ti e.

Na ngu 2013, mbi na Dawn e gue na Wisconsin ti bâ lege ti babâ ti mbi nga na babâ na mama ti lo. Li ti mbi akpe so kua ti mbi na Béthel ahunzi ape. A hunda na mbi ti ngbâ ti sara kua tongana volontaire ti mû maboko na bungbi ti e na ndö ti atënë ti ndia.

Na septembre ngu 2018, mbi bâ so fani mingi kozo ti tene mbi sara tënë mbi doit ti tiko si. Docteur ti e asara examen ti mbi, me lo hinga ape ye so aga na kpale ni. Na pekoni, na janvier ngu 2019, mbeni docteur nde atene na mbi so peut-être mbi yeke na mbeni kobela so gbâ ti azo ayeke na ni ape so mbeni lâ ayeke ga na ngangu kpale na terê ti mbi kue.

Lango ota na pekoni, na ngoi so mbi yeke sara sport so mbi ye ni mingi, mbi tï na maboko ti mbi ti koli akungbi. Mbi sara sport so na yâ ti gigi ti mbi kue na mbi sara ni nzoni mingi. Tongaso, mbi hinga so mbi peut encore ape ti sara ye na maboko ti mbi wala gere ti mbi tongana ti so mbi ye. Li ti mbi akpe so kobela ni aga sioni sioni hio. Ti sara tënë, ti tambela nga ti mene ye aga ngangu na mbi mingi.

Mbi yeke na ngia mingi so mbi wara lege ti mû maboko na bungbi ti Jéhovah tongana avocat. Mbi yeke na ngia so mbi wara nga lege ti sû gbâ ti a-article so asigi na yâ ti ambeti so adocteur, a-avocat nga na ajuge adiko ni. Mbi mû tënë na gbele gbâ ti azo ti dunia ti gbu koko ti droit ti aTémoin ti Jéhovah ti soro ti tene a opéré ala nga a soigné ala sân mênë. Atâa so kue, mbi tene oko tënë so Luc, so ayeke mbeni wasungo Bible, atene na Luc 17:10, lo tene: ‘Mbi yeke gï senge senge ngbâa. Ye so mbi sara ayeke gï ye so a lingbi mbi sara ni.’