1. Tongana ti so 3 Jean 3, 4 afa, nyen la asara si e yeke na ngia?

ESKÊ mo peut ti imaginé tongana nyen la bazengele Jean ayeke na ngia na ngoi so lo mä so azo so lo mû maboko na ala ti manda tâ tënë angbâ lani ti sara na Jéhovah be-ta-zo? Ala wara lani gbâ ti akpale, nga Jean asara ngangu ti kpengba mabe ti aChrétien so ayeke be-ta-zo so, so lo bâ ala tongana amolenge ti lo na lege ti yingo. Legeoko nga, e yeke na ngia na ngoi so amolenge ti e wala azo so e mû maboko na ala ti hinga tâ tënë amû terê ti ala na Jéhovah nga ala ngbâ ti sara na lo.—Diko 3 Jean 3, 4.

2. Ngbanga ti nyen la bazengele Jean asû alettre ti lo?

² Na ngu 98, peut-être Jean asara kodro na Éphèse wala nduru na ni. Peut-être lo kiri kâ na peko ti so a zi lo na kanga so lo sara lani na ndö ti zoa ti Patmos. Nduru na ngoi so la yingo vulu ti Jéhovah apusu lo ti sû alettre ti lo ota. Lo sû alettre so ti pusu aChrétien be-ta-zo ti ngbâ ti duti na mabe na Jésus nga ti ngbâ ti tambela na yâ ti tâ tënë.

3. E yeke kiri tënë na ahunda wa?

³ Jean ayeke lani ndangba bazengele so ayeke na fini, nga lo gi bê ti lo ndali ti ngangu so azo ti fango ye ti wataka asara na ndö ti acongrégation * (1 Jean 2:18, 19, 26). A-apostat so atene so ala hinga Nzapa, me ala sara ye alingbi na acommandement ti Jéhovah ape. Zia e bâ awango so yingo vulu apusu Jean ti mû na aChrétien. Na ngoi so e yeke bâ ni, e yeke kiri tënë na ahunda ota so: Ti tambela na yâ ti tâ tënë aye ti tene nyen? Akpale wa la alingbi ti kanga lege na e ti sara ni? Tongana nyen la e lingbi  ti mû maboko na mba ti ngbâ na yâ ti tâ tënë?

4. Ti gue oko na 1 Jean 2:3-6 nga na 2 Jean 4, 6, a lingbi e sara nyen ti tambela na yâ ti tâ tënë?

⁴ Ti tambela na yâ ti tâ tënë, a lingbi e hinga tâ tënë so ayeke na yâ ti Bible. Na ndö ni, a lingbi e “bata acommandement ti [Jéhovah]”, so ti tene a lingbi e sara ye alingbi na ni. (Diko 1 Jean 2:3-6; 2 Jean 4, 6.) Jésus ayeke tâ nzoni tapande ti zo so amä yanga ti Jéhovah. Tongaso, mbeni kota ye so e lingbi ti sara ti mä yanga ti Jéhovah ayeke ti mû peko ti gere ti Jésus mbilimbili.—Jean 8:29; 1 Pi. 2:21.

5. Nyen la a lingbi e hinga na bê ti e kue?

⁵ Ti ngbâ ti tambela na yâ ti tâ tënë, a lingbi e hinga na bê ti e kue so Jéhovah ayeke Nzapa ti tâ tënë, nga so aye kue so lo tene na e na yâ ti Bible ayeke tâ tënë. Nga a lingbi e hinga na bê ti e kue so Jésus ayeke Messie so a mû zendo ti lo. Laso, azo mingi ayeke na kite so a soro Jésus lani ti ga Gbia ti Royaume ti Nzapa. Jean agboto lani mê ti e na ndö ti “gbâ ti azo ti handango azo” so alingbi ti handa azo so aleke terê ti ala ape ti gbu koko ti tâ tënë na ndö ti Jéhovah nga na Jésus (2 Jean 7-11). Jean atene: “Zo ti mvene ni ayeke zo wa? A yeke lo so ake so Jésus ayeke Christ.” (1 Jean 2:22). Gï oko lege so e lingbi ti kpe ti tene a handa e ayeke ti manda Bible. Tongana e manda Bible, e yeke hinga Jéhovah na Jésus (Jean 17:3). Nga, e yeke hinga na bê ti e kue so e yeke na yâ ti tâ tënë.

6. Nyen la alingbi ti kanga lege na aChrétien so ade maseka ti tambela na yâ ti tâ tënë?

⁶ A lingbi aChrétien kue asara hange si ndara ti azo ti dunia so ahanda ala ape (1 Jean 2:26). A yeke mbilimbili aChrétien so ade maseka la abezoin ti sara hange na kûkû so. Alexia, * mbeni ita-wali ti France so ayeke na ngu 25, atene: “Na ngoi so mbi yeke maseka mingi, fason so azo ti dunia so ayeke fa na nda ti ambeni ye asara si li ti mbi aga kirikiri, na tapande tënë ti évolution nga na ndara ti azo ti dunia so. Na ambeni ngoi, mbi bâ so atënë so ayeke na lege ni nga mbi yeda na ni. Me mbi bâ so mbi peut pëpe ti mä gï aye so a yeke fa na mbi lani na ekole sân ti mû lege na Jéhovah ti sara tënë.” Alexia amanda lani buku La vie: comment est-elle apparue? Évolution ou création? Ambeni yenga na pekoni, lo yeke na akite encore ape. Alexia atene: “Mbi wani mbi hinga so  aye so ayeke na yâ ti Bible ayeke tâ tënë. Nga, mbi bâ so ti sara ye alingbi na aye so Bible ahunda ayeke sara si mbi duti na ngia nga na siriri.”

7. A lingbi e sara hange si e sara nyen ape? Ngbanga ti nyen?

⁷ A lingbi aChrétien kue, amaseka nga ambakoro, asara hange si ala sara ye pëpe mo bâ mo tene ala yeke sara na Jéhovah, me na oko ngoi ni, ala yeke sara asioni ye. Jean atene so e lingbi pëpe ti tambela na yâ ti tâ tënë, me na oko ngoi ni, e sara asioni ye (1 Jean 1:6). Tongana e ye ti zia ngia na bê ti Jéhovah laso nga na yâ ti angoi so ayeke ga, a lingbi e sara ye mo bâ mo tene lê ti azo kue ayeke lakue na ndö ti e. Même tongana azo abâ pëpe aye so e sara na hondengo ni, Jéhovah abâ aye kue so e yeke sara.—aHéb. 4:13.

8. Nyen la a lingbi e ke ni?

⁸ A lingbi e ke bango ndo ti azo ti dunia so na ndö ti siokpari. Bazengele Jean atene: “Tongana e tene: ‘E yeke na siokpari pëpe,’ e handa terê ti e wani.” (1 Jean 1:8). Na ngoi ti Jean, a-apostat atene so mbeni zo alingbi ti ngbâ ti sara siokpari na mbana nga ti ngbâ ti duti na songo na Nzapa. Laso, e vivre na popo ti azo so ayeke na oko bango ndo so. Azo mingi atene so ala mä na bê na Nzapa, me ala yeke na bango ndo ti Jéhovah na ndö ti siokpari ape, mbilimbili tongana a ndu tënë ti bungbingo koli na wali. Ambeni fason so azo ayeke bungbi koli na wali ayeke sioni na lê ti Jéhovah, me ala tene so a yeke na lege ni ti tene mbeni zo asara aye so tongana lo ye.

9. Anzoni ye wa la amaseka ayeke wara tongana ala sara aye so Bible afa so ayeke na lege ni?

⁹ A lingbi ti duti ngangu mingi na aChrétien so ayeke amaseka ti ngbâ ti duti na nzoni bango ndo na ndö ti bungbingo koli na wali tongana azo ti place ti kua ti ala wala amba ti ala ti ekole ayeda pëpe na ye so Bible atene na ndö ni. Aleksandar awara lani kpale so. Lo dabe ti  lo, lo tene: “Ambeni maseka-wali ti ekole ti mbi agi ti pusu mbi ti bungbi na ala koli na wali. Ala tene so, so mbi yeke na mbeni ndeko ape, âmanke mbi ye ti bungbi gï na amba ti mbi koli.” Tongana mo wara mara ti kpale so, girisa ape so tongana mo sara aye so Bible afa so ayeke na lege ni, mo yeke bata nengo ti mo, seni ti mo, songo ti mo na Jéhovah, nga vundu ayeke sara mo ape. Nga lakue tongana mo tï pëpe na yâ ti tara, a yeke duti ngangu na mo mingi ape ti sara ye na lege ni. Nga, girisa ape so sioni bango ndo so azo ti dunia so ayeke na ni na ndö ti bungbingo koli na wali alondo na Satan. Tongaso, tongana mo ke ti pensé tongana azo ti dunia so, mo yeke “hon Zo ti sioni na ngangu”.—1 Jean 2:14.

10. Tongana nyen la 1 Jean 1:9 amû maboko na e ti sara na Jéhovah na mbeni nzoni conscience?

¹⁰ E yeda so Jéhovah ayeke na droit ti fa na e ye so ayeke siokpari. Nga, e yeke sara kue ti sara siokpari ape. Me na ngoi so e sara siokpari, e yeke fa ni na Jéhovah na yâ ti sambela. (Diko 1 Jean 1:9.) Nga, tongana e sara mbeni kota siokpari, e yeke gi mungo maboko ti a-ancien so Jéhovah azia ala ti bâ lege ti e (Jacq. 5:14-16). Ye oko, a lingbi e ngbâ pëpe ti fâ ngbanga na ndö ti e wani ndali ti mbeni siokpari so e sara ândö. Ngbanga ti nyen? Ngbanga ti so Babâ ti e so aye e amû Molenge ti lo tongana ye so a futa ti zi e, tongaso si lo lingbi ti pardonné asiokpari ti e. So Jéhovah atene lo yeke pardonné azo so asara siokpari si achangé bê ti ala, lo yeke sara ni biani. Tongaso, mbeni ye so alingbi ti kanga lege na e ti sara na Jéhovah na nzoni conscience ayeke dä ape.—1 Jean 2:1, 2, 12; 3:19, 20.

11. Nyen la e bezoin ti sara ti bata li ti e si afango ye so alingbi ti sara si mabe ti e atï asara sioni na e ape?

¹¹ A lingbi e ke afango ye ti a-apostat. Ngbene ye so congrégation ti aChrétien abâ gigi, Zabolo ayeke sara kua na gbâ ti azo ti handango azo ti dü kite na yâ ti li ti awakua  be-ta-zo ti Nzapa. Ye so asara si e bezoin ti hinga tongana nyen ti zia kangbi na popo ti atënë so ayeke tâ tënë nga na amvene. * Awato ti e alingbi ti sara kua na Internet wala aréseau sociaux ti gi ti sara si e yeke na confiance na Jéhovah mingi ape nga e ndoye aita ti e mingi ape. Girisa ape zo so ayeke na peko ti asabango so, na ke ni!—1 Jean 4:1, 6; Apoc. 12:9.

12. Ngbanga ti nyen la a lingbi e kpengba mabe so e yeke na ni na atâ tënë so e hinga ni?

¹² Ti luti na Satan, a lingbi e sara confiance mingi na Jésus nga na kua so lo yeke na ni na yâ ti ye so Jéhovah aleke na bê ti lo ti sara. A lingbi e sara nga confiance na azo so Jéhovah ayeke sara kua na ala ti fa lege na bungbi ti lo (Mat. 24:45-47). E yeke sara ni tongana e manda Bible lakue. Na pekoni, mabe ti e ayeke duti tongana mbeni keke so gunda ni alï sese mingi. Paul atene mbeni tënë so ague oko na tënë so na ngoi so lo sû lettre na congrégation ti Colosses. Lo tene: “So ala yeda na Seigneur Christ Jésus awe, zia ala ngbâ ti tambela beoko na lo, gunda ti ala alï sese na ala kpengba na yâ ti lo, ala yengi pëpe na yâ ti mabe.” (aCol. 2:6, 7). Tongana e sara kue ti kpengba mabe ti e, Satan nga na azo so lo sara ngangu na ndö ti ala alingbi pëpe ti kanga lege na e ti tambela na yâ ti tâ tënë.—2 Jean 8, 9.

13. Nyen la a lingbi e ku terê ti e na ni? Ngbanga ti nyen?

¹³ A lingbi e ku ti tene dunia so ake e (1 Jean 3:13). Jean adabe ti e so “dunia so kue ayeke na gbe ti Zo ti sioni.” (1 Jean 5:19). So a ga nduru ti futi dunia so, Satan asara ngonzo mingi (Apoc. 12:12). Lo yeke sara kua na aye so ayeke handa zo, na tapande nzara ti sarango lango-sioni nga na amvene ti a-apostat. Lo yeke sara nga kua na aye so zo ayeke bâ ni polele, na tapande sarango aye ti ngangu mingi na zo. Satan ahinga so a ngbâ na lo ngoi mingi ape ti gi ti kanga lege na kua ti e ti fango tënë wala ti kinda mabe ti e. Tongaso, li ti e akpe ape so ambeni kodro akanga lege na ambeni kua ti e wala akanga lege na ni kue. Atâa so kue, aita ti e so ayeke na yâ ti akodro so ayeke gbu ngangu. Tongaso, atâa ye wa la Satan ayeke sara na e azo ti Jéhovah, e lingbi ti ngbâ be-ta-zo.

14. Mbeni lege so e lingbi ti mû maboko na aita ti e ti ngbâ na yâ ti tâ tënë ayeke so wa?

¹⁴ Ti mû maboko na aita ti e ti ngbâ na yâ ti tâ tënë, a lingbi e bâ mawa ti ala (1 Jean 3:10, 11, 16-18). A lingbi e ndoye terê gï pëpe na ngoi so aye atambela nzoni me nga na ngoi so akpale alondo. Na tapande, eskê mo hinga mbeni zo so aperdre mbeni zo so lo ye lo mingi na so abezoin dengo bê nga na mungo maboko na ambeni lege nde? Wala mo mä so ambeni ita agirisa aye ti ala mingi ndali ti mbeni kpale tongana ngu so asuku amû ndo wala kota pupu so abuba aye, na ala yeke na bezoin ti mungo maboko ti kiri ti leke aDa ti Royaume ti ala wala ada ti ala? E yeke fa so e ye aita ti e mingi nga so e bâ mawa ti ala mingi gï pëpe na lege ti atënë ti e, me kota ye ni, na lege ti aye so e sara.

15. Tongana ti so 1 Jean 4:7, 8 afa, nyen la a lingbi e sara?

¹⁵ E yeke sara ye tongana Babâ ti e ti ndoye tongana e ndoye terê na popo ti e. (Diko 1 Jean 4:7, 8.) Mbeni kota lege so e lingbi ti fa so e ndoye terê ayeke ti pardonné mba. Na tapande, peut-être mbeni ita ason bê ti e me na pekoni lo hunda pardon. E yeke fa so e ndoye lo tongana e pardonné lo nga e girisa ye so lo sara (aCol. 3:13). Mbeni ita so iri ti lo ayeke Aldo awara kpale so na ngoi so lo mä mbeni ita  so lo ne lo atene mbeni tënë so ason bê ti lo na ndö ti mara ti lo. Aldo atene: “Mbi sambela Jéhovah lakue ti mû maboko na mbi ti duti pëpe na sioni bibe na ndö ti ita so.” Me Aldo asara nga mbeni ye nde. Lo mû desizion ti hunda ita ni ti sigi legeoko na lo na fango tënë. Na ngoi so ala yeke fa tënë legeoko, Aldo afa na ita ni tongana nyen la atënë ti lo ason bê ti lo. Aldo atene: “Na ngoi so ita ni amä tongana nyen la atënë ti lo ason bê ti mbi, lo hunda pardon. Totongo ti go ti lo afa na mbi so lo regretté mingi atënë so lo tene. Na pekoni, e kiri e ga anzoni kamarade.”

16-17. Nyen la a lingbi e leke na bê ti e ti ngbâ ti sara?

¹⁶ Ndoye ti bazengele Jean na mbage ti aita ti lo asara si lo gi bê ti lo na ndö ti nzoni duti ti ala na lege ti yingo, na ndoye so asigi polele na yâ ti awango so lo mû na ala na yâ ti alettre ota so lo sû na gbe ti yingo vulu. Ti hinga so akoli na awali so a soro ala ti komande legeoko na Christ ayeke tongana Jean akpengba e mingi.—1 Jean 2:27.

¹⁷ Zia e gbu li nzoni na ndö ti awango so e bâ fade. Zia e leke na bê ti e ti ngbâ ti tambela na yâ ti tâ tënë na lege so e mä yanga ti Jéhovah na yâ ti aye kue so e sara. Manda Bible na sara confiance na ni. Sara si mabe ti mo na Jésus akpengba mingi. Ke ndara ti azo ti dunia so nga na afango ye ti a-apostat. Sara hange si mo sara ye pëpe mo bâ mo tene mo yeke sara na Jéhovah, me na oko ngoi ni, mo yeke sara asioni ye, nga mä pëpe azo so agi ti pusu mo ti sara siokpari. Sara ye alingbi na anzoni sarango ye so Jéhovah ahunda so ayeke na nduzu mingi. Nga zia e mû maboko na aita ti e ti ngbâ ti kpengba na lege so e pardonné aita ti e so ason bê ti e nga e mû maboko na aita so abezoin ni. Na pekoni, atâa akpale so e wara, e yeke ngbâ ti tambela na yâ ti tâ tënë.