Jésus Christ: Missionnaire so ahon atanga ni kue
Jésus Christ: Missionnaire so ahon atanga ni kue
“Mbi londo na tere ti Lo, na Lo to Mbi.”—JEAN 7:29.
1, 2. Tënë missionnaire aye ti tene nyen? Kota Missionnaire so ahon atanga ni kue ayeke zo wa?
TONGANA a sara tënë ti “missionnaire”, mo yeke pensé na nyen? Ambeni zo ayeke pensé na amissionnaire ti a-eglize so atene ala yeke aChrétien, so ayeke yôro tere ti ala na yâ ti aporoso nga na atënë ti konomi ti akodoro so ala yeke sara kusala na yâ ni. Ye oko, tongana mo yeke Témoin ti Jéhovah, kite ayeke dä pëpe so mo pensé na amissionnaire so Wabatango Bungbi ayeke tokua ala ti fa nzo tënë na yâ ti akodoro nde nde na ndo ti sese (Matthieu 24:14). Na kion pëpe, amissionnaire so amû ngoi ti ala nga na ngangu ti ala ndali ti nzoni kusala so ayeke mû maboko na azo ti ga nduru na Jéhovah Nzapa na ti duti na nzoni songo na lo.—Jacques 4:8.
2 A yeke wara tënë “missionnaire” nga na tënë “amissionnaire” pëpe na yâ ti Bible ti Sango. Ye oko, tënë ti yanga ti Grec so Bible ti Sango akiri pekoni na tënë “a-évangéliste” na aEphésien 4:11 aye nga ti tene “amissionnaire.” Jéhovah ayeke kota Évangéliste so ahon atanga ni kue, me a lingbi pëpe ti tene so lo yeke kota Missionnaire ndali ti so lâ oko pëpe mbeni zo atokua lo ti fa tënë. Ye oko, Jésus Christ atene na ndo ti Babâ ti lo ti yayu, lo tene: “Mbi londo na tere ti Lo, na Lo to Mbi.” (Jean 7:29). Ti fa so Jéhovah aye azo ti sese mingi, lo tokua ngengele Molenge ti lo oko na ndo ti sese (Jean 3:16). A lingbi ti iri Jésus kota Missionnaire so ahon atanga ni kue ndali ti so mbeni tënë so apusu Jéhovah ti tokua lo ti ga na sese ayeke ti tene lo “sara tënë ti témoin ti tene-biani.” (Jean 18:37). Kusala ti lo ti fango nzo tënë ti Royaume aga na aye ti nzoni mingi, na juska laso, e ngbâ ti wara aye ti nzoni na pekoni. Na tapande, e lingbi ti fa ye tongana ti Jésus na ngoi so e yeke fa tënë, atâa e yeke missionnaire wala e yeke missionnaire pëpe.
3. Ahundango tënë wa e yeke bâ ande ni?
3 Kusala so Jésus asara tongana mbeni wafango tënë ti Royaume asara si mara ti ahundango tënë so alondo: Ye wa asi na Jésus na ngoi so lo yeke sara kusala ti lo na sese ge? Ngbanga ti nyen la lege so Jésus afa na ye aga na aye ti nzoni mingi? Nga, ye wa asara si lo wara aye ti nzoni mingi na yâ ti kusala ti lo?
Jésus ayeke nduru ti sara ye so a hunda ti mû maboko na azo
4-6. Jésus achangé aye wa na yâ ti dutingo ti lo na ngoi so a tokua lo na sese ge?
4 Laso, amissionnaire nga na ambeni Chrétien ayeke zia ando ti ala ti gue na ambeni ndo so ayeke na bezoin ti awafango tënë ti Royaume dä mingi. A lingbi peut-être ti hunda na ala ti changé nzoni dutingo ti ala ti kozo si a lingbi na ti azo ti ndo so ala gue dä. Me a yeke ngangu na e ti bâ kota kangbi so ayeke na popo ti dutingo ti Jésus na ndo ti sese ge na ti so lo yeke na ni kozo na yayu. Na yayu kâ, lo duti na tere ti Babâ ti lo nga na popo ti a-ange so asara na Jéhovah na bê so ayeke na sioni oko pëpe (Job 1:6; 2:1). Tara ti bâ tongana nyen dutingo ti Jésus na popo ti awasiokpari so sarango ye ti ala ayeke sioni mingi ayeke tâ nde mingi! (Marc 7:20-23). A hunda lani na Jésus ti kanga bê na ngoi so adisciple ti lo so lo ye ala mingi ayeke papa na popo ti ala ti bâ zo wa ayeke kota ahon amba ti lo kue (Luc 20:46; 22:24). Ti tâ tënë ni, lo sara ye tâ na lege ni na yâ ti aye kue so asi na lo na ndo ti sese.
5 Jésus ato nda ni gi tongaso pëpe ti sara tënë na lege ti kpene; lo to nda ti manda yanga so azo ayeke tene na ngoi so lo de molenge. Ti manda yanga so azo ayeke tene ayeke mbeni kota gbiango ye mingi na yâ ti fini ti Jésus so ândö lo yeke mû yanga na a-ange na yayu! Na ngoi so Jésus ayeke na sese, lo tene kamême mbeni oko ti ‘ayanga ti azo nde nde’. Yanga so ayeke nde mingi na ‘yanga ti a-ange’. (1 aCorinthien 13:1). Ye oko, tongana a ndu tënë ti tenengo apendere tënë, zo oko ti sara tënë tongana ti Jésus ayeke dä pëpe.—Luc 4:22.
6 Bâ ambeni lege so dutingo ti Molenge ti Nzapa achangé mingi na ngoi so lo yeke lani na sese. Atâa so Jésus ayeke pëpe na siokpari so alondo na Adam, lo ga zo tongana aChrétien so na pekoni aga “aita” ti lo, wala adisciple ti lo so a sa yingo na ndo ti ala. (Diko aHébreu 2:17, 18.) Na ndangba bï ti fini ti Jésus tongana zo na sese ge, lo ke ti hunda na Babâ ti lo ti yayu ti tokua “a-ange ahon légion bale-oko na ndo ni use”. Me tara ti bâ a-ange so lo komande ala na ngoi so lo yeke lani Michel Archange! (Matthieu 26:53; Jude 9). Biani, Jésus asara lani amiracle; ye oko, aye so lo sara na ngoi so lo yeke na sese ayeke mingi pëpe tongana a haka ni na aye so lo lingbi ti sara tongana lo ngbâ lani na yayu.
7. Tongana a ndu sarango ye alingbi na Ndia ti Moïse, aJuif ayeke sara ye lani tongana nyen?
7 Kozoni si Jésus aga na sese, a iri lo “Tënë ni”. Peut-être Jésus ayeke Wayanga ti Nzapa so ayeke fa lege na azo ti Israël na yando (Jean 1:1; Exode 23:20-23). Ye oko, ala “wara Ndia giriri na lege ti a-ange, me [ala] bata Ndia so pëpe.” (Kusala 7:53; aHébreu 2:2, 3). Ti tâ tënë ni, amokonzi-nzapa ti aJuif ti ngoi ti akozo Chrétien ake ti hinga tâ ye so Ndia ti Moïse aye ti fa na ala. Na tapande, bâ ndia ti Sabbat. (Diko Marc 3:4-6.) Ascribe nga na aFarizien ‘abata nengo tënë ti Ndia pëpe, so atene, mbilimbili, be-nzoni, na mabe.’ (Matthieu 23:23). Ye oko, Jésus atene pëpe so zo alingbi pëpe ti mû maboko na ala na tongaso lo zia pëpe ti fa tâ tënë na ala.
8. Ngbanga ti nyen Jésus alingbi ti mû maboko na e?
8 Jésus aye lani mingi ti mû maboko na azo. Lo ye azo mingi na lo yeke na kota nzara ti mû maboko na ala. Lo duti lakue na kota nzara ti fango nzo tënë. Na teti so Jésus ayeke be-ta-zo na Jéhovah na ngoi so lo yeke na sese, lo “ga Zo ti mû salut ti lakue lakue na ala kue so amä [yanga] ti Lo”. Na ndo ni, “teti Lo wu pono na yâ handa giriri, Lo lingbi sara na [azo tongana e] so ye ahanda [e].”—aHébreu 2:18; 5:8, 9.
Jéhovah afa ye nzoni na Jésus
9, 10. Aye wa a fa na Jésus kozo si a tokua lo na sese?
9 Kozo ti tene a tokua aChrétien ti laso tongana amissionnaire, Wabatango Bungbi aleke si a fa ye nzoni na ala. A fa ye lani nzoni na Jésus Christ? Biani, a fa ye nzoni na lo. Me, lo sara pëpe ekole ti aJuif so a yeke manda tënë ti Nzapa dä kozo ti tene a sa yingo na ndo ti lo ti ga Messie; nga lo manda ye lâ oko pëpe na gbe ti akota mokonzi-nzapa. (A haka Jean 7:15 na Kusala 22:3.) Tongaso, nyen la asara si Jésus afa ye lani pendere mingi?
10 Atâa aye so Marie mama ti Jésus nga na Joseph babâ so abata Jésus afa na lo, Jéhovah so ayeke Kota Wafango ye afa ye mingi na Jésus. Na ndo ti tënë so, Jésus atene: “Mbi sara tënë ti bê ti Mbi mveni pëpe; me Babâ so ato Mbi, Lo mû komandema na Mbi, tënë ti ye so Lo ye Mbi tene, na tënë ti ye so Lo ye Mbi fa na azo.” (Jean 12:49). Bâ so a fa na Molenge ni mbilimbili ye so a lingbi lo fa. Kozo ti tene Jésus aga na sese ge, kite ayeke dä pëpe so lo mû ngoi mingi ti mä aye so Babâ ti lo ayeke fa na lo. Aye so Jéhovah afa na Jésus ayeke nzoni mingi ahon atanga ni kue.
11. Juska na ndo wa Jésus ayeke nduru ti sara ye na mbage ti azo tongana ti Babâ ti lo?
11 Ngbene ye na ngoi so a créé Molenge ni, lo yeke na mbeni kpengba songo na Babâ ti lo. Kozoni si Jésus aga na sese, lo hinga bango ndo ti Jéhovah na mbage ti azo ndali ti so lo bâ lege so Jéhovah ayeke sara ye na mbage ti ala. Jésus nga aye azo mingi tongana ti Babâ ti lo. Ye so asara si Jésus (so Bible asara tënë ti lo atene lo yeke ndara) atene: “Mbi wara ngia na popo ti amolenge ti azo.”—aProverbe 8:22, 31.
12, 13. (a) Na lege wa Jésus amanda ye na bango lege so Babâ ti lo ayeke sara ye na mbage ti azo ti Israël? (b) Na lege wa Jésus asara ye alingbi na ye so lo manda?
12 Molenge ni amanda ye nga na bango lege so Babâ ti lo ayeke sara ye na gbele aye nde nde so asi. Na tapande, bâ lege so Jéhovah asara ye na ngoi so azo ti Israël ake yanga ti lo. Néhémie 9:28 atene: “Tongana ala wara siriri awe, ala kiri ala sara sioni mbeni na gbele Mo [Jéhovah]; tongaso Mo zia ala ngbâ na tïtî awato ti ala, si awato akomande ala; me tongana ala kiri, na ala toto na Mo, Mo mä toto ti ala na yayu; Mo [zi] ala lege mingi na lege ti be-nzoni ti Mo.” Teti so Jésus asara kusala legeoko na Jéhovah na lo bâ aye so Jéhovah ayeke sara, a mû lege na lo ti bâ mawa ti azo so lo yeke fa tënë na ala.—Jean 5:19.
13 Jésus asara ye alingbi na ye so lo manda na ngoi so lo sara ye na nzoni bê na mbage ti adisciple ti lo. Na bï so aga kozoni na kuâ ti Jésus, abazengele ti lo kue so lo ye ala mingi “azia Lo, ala kpe.” (Matthieu 26:56; Jean 13:1). Bazengele Pierre atene fani ota so ni hinga Jésus pëpe. Ye oko, Jésus asara si lege angbâ ti zi na abazengele ti lo ti kiri na mbage ti lo. Lo tene na Pierre, lo tene: “Mbi sambela teti mo awe, si mabe ti mo awe pëpe; na mo, tongana mo kiri na lege ni, mo sara si aita ti mo akpengba.” (Luc 22:32). A leke Israël ti yingo nzoni mingi na ndo ti “abazengele na aprophète”, na a zia iri ti abazengele 12 ti Jésus Christ (so ayeke Molenge ti Ngasangbaga) na ndo ti atênë so ayeke gere ti gbagba ti Fini Jérusalem. Na, abazengele so ayeke be-ta-zo na Jésus. Juska laso, aChrétien so a sa yingo na ndo ti ala legeoko na aChrétien so ayeke sara kusala maboko na maboko na ala, wala “ambeni ngasangbaga”, ayeke wara aye ti nzoni mingi na yâ ti kusala ti fango nzo tënë ti Royaume. Na raison ni ayeke so Nzapa aleke ala ti sara kusala ni, nga Molenge ti lo so lo ye lo mingi ayeke fa lege na ni.—aEphésien 2:20; Jean 10:16; Apocalypse 21:14.
Lege so Jésus afa ye
14, 15. Na alege wa fango ye ti Jésus ayeke nde mingi na ti ascribe nga na ti aFarizien?
14 Na lege wa Jésus asara ye alingbi na ye so lo manda na ngoi so lo yeke fa ye na adisciple ti lo? Tongana e haka lege so Jésus afa na ye na ti amokonzi-nzapa ti aJuif, e yeke bâ polele so Jésus afa ye tâ nzoni mingi ahon ala. Ascribe nga na aFarizien ‘asara si Tënë ti Nzapa aga ye senge senge ngbanga ti tënë ti akotara ti ala.’ Nde na so, ye so Jésus afa ayeke tënë ti bê ti lo wani pëpe; lo fa lakue tënë ti yanga ti Nzapa (Matthieu 15:6; Jean 14:10). So ayeke nga ye so a hunda ti tene e sara ni.
15 Mbeni ye nde asara si Jésus ayeke tâ nde mingi na amokonzi-nzapa. Jésus atene na ndo ti ascribe nga na aFarizien, lo tene: “I sara, na i bata ye kue so ala tene na i; me i sara na lege ti kusala ti ala pëpe, teti ala tene ye, me ala sara pëpe.” (Matthieu 23:3). Jésus asara ye alingbi na aye so lo fa. Zia e bâ mbeni tapande so afa so Jésus asara tongaso biani.
16. Ye wa afa na mo so Jésus asara ye alingbi na tënë so lo tene na Matthieu 6:19-21?
16 Jésus ahunda na adisciple ti lo ti “bungbi mosoro . . . na yayu”. (Diko Matthieu 6:19-21.) Jésus asara ye alingbi na wango so? En, lo sara ye alingbi na ni ndali ti so lo tene na ndo ti lo wani, lo tene: “Ambako ayeke na dû ti ala, na andeke ti nduzu ayeke na da ti ala, me Molenge Ti Zo ayeke na ndo oko pëpe ti zia li ti Lo dä.” (Luc 9:58). Jésus ayeke na akungba mingi pëpe. Mingi ni, lo mû tere ti lo kue ti fa nzo tënë ti Royaume. Na dutingo ti lo afa biani so zo alingbi ti duti na siriri ti bê tongana lo gi pëpe ti bungbi mosoro na sese so. Jésus afa polele so a yeke nzoni mingi ti bungbi mosoro na yayu, “ndo so papalapo wala soko ate pëpe, na ndo so awanzi agë dû pëpe ti nzi ye.” Mo yeke sara ye alingbi na wango so Jésus amû na ndo bungbingo mosoro na yayu?
Asarango ye ti Jésus so asara si azo aye lo mingi
17. Asarango ye wa asara si Jésus aduti lani mbeni kota évangéliste?
17 Asarango ye wa asara si Jésus aduti lani mbeni kota évangéliste? Mbeni oko ti asarango ye so ayeke bango ndo ti lo na mbage ti azo so lo yeke mû maboko na ala. Na popo ti apendere sarango ye ti Jéhovah so Jésus aduti na ni, a yeke wara tâ be-ti-molenge, ndoye nga na bango mawa ti zo. Bâ tongana nyen asarango ye so asara si azo mingi aga na mbage ti Jésus.
18. Ngbanga ti nyen e lingbi ti tene so Jésus ayeke lani na tâ be-ti-molenge?
18 Na yengo dä ti ga na sese, Jésus ‘azia gloire ti Lo, Lo kamata tere ti ngbâa, Lo ga tongana zo’. (aPhilippien 2:7). Ye so afa biani so lo yeke lani na tâ be-ti-molenge. Na ndo ni, Jésus abâ azo tongana ambumbuse zo pëpe. Lo tene pëpe: “Mbi londo na yayu la mbi ga, tongaso a lingbi ala mä mbi si.” Nde na azo so atene mvene atene ani yeke amessie, Jésus agi lâ oko pëpe ti sara si azo kue ahinga so lo la lo yeke tâ Messie ni. Ngoi na ngoi, lo hunda na azo ti fa pëpe zo so lo yeke wala aye so lo sara (Matthieu 12:15-21). Jésus aye si azo ayeda ti mû peko ti lo ndali ti aye so ala wani abâ na lê ti ala. Adisciple ti Jésus awara ye ti nzoni mingi ti hinga so Seigneur ti ala Jésus aku na mbage ti ala pëpe ti sara ye kue tâ na lege ni tongana ti a-ange so lo na ala ayeke lani na yayu.
19, 20. Na lege wa ndoye nga bango mawa ti zo apusu Jésus ti mû maboko na azo?
19 Jésus Christ afa nga so lo yeke na ndoye, mbeni kota sarango ye ti Babâ ti lo ti yayu (1 Jean 4:8). Ndoye la apusu lani Jésus ti fa ye na azo so ayeke mä lo. Na tapande, tara ti bâ tënë ti bê ti Jésus na mbage ti mbeni mokonzi so ayeke zo ti mosoro na so ade maseka. (Diko Marc 10:17-22.) Jésus ‘andoye lo,’ na lo ye ti mû maboko na lo. Ye oko, mokonzi so ake ti zia lege ti gbâ ti aye so lo yeke na ni na ti ga disciple ti Christ.
20 Na popo ti apendere sarango ye ti Jésus so azo aye ni mingi, a yeke wara bango mawa ti zo. Tongana tanga ti azo kue so ayeke mbilimbili-kue pëpe, azo so ayeda na aye so Jésus afa ayeke lani azo so akpale ahon ndo ti ala. Ndali ti so Jésus ahinga ni, tongana lo yeke fa ye na azo, lo bâ mawa ti ala. Bâ tapande so: Mbeni lâ, Jésus na adisciple ti lo ayeke na ngoi ti te ye pëpe ngbanga ti so ala yeke na kusala mingi. Ye oko, Jésus asara ye tongana nyen na ngoi so lo bâ gbâ ti azo abungbi ti mä lo? ‘Lo ye ti sara be-nzoni na ala, teti ala yeke tongana angasangbaga so ayeke na berger pëpe; na Lo komanse ti fa ye mingi na ala.’ (Marc 6:34). Jésus abâ dutingo ti azo ti mawa so lo yeke fa tënë na ala na lo sara ngangu ti fa ye na ala nga lo sara amiracle teti nzoni ti ala. Apendere sarango ye ti Jésus nga na atënë ti lo agboto ambeni zo na mbage ti lo na asara si ala ga adisciple ti lo.
21. E yeke bâ ande nyen na yâ ti article ti peko?
21 Aye ayeke mingi so e lingbi ti manda na ndo ti kusala ti Jésus na sese ge, tongana ti so article ti peko ayeke fa ande na e. Ambeni lege so e lingbi ti mû tapande ti Jésus Christ, kota Missionnaire, ayeke so wa?
Mo yeke kiri tënë tongana nyen?
• Ye wa Jésus amanda kozoni ti tene a tokua lo na sese?
• Na lege wa kode so Jésus afa na ye ayeke nzoni mingi ahon ti ascribe nga na ti aFarizien?
• Asarango ye wa ti Jésus asara si azo aye lo mingi?
[Ahundango tënë ti manda na ye]
[Foto na lembeti 18]
Jésus afa ye tongana nyen na gbâ ti azo so abungbi?