Mû tapande ti missionnaire so ahon atanga ni kue

“I sara tongana mbi sara, legeoko tongana mbi sara tongana Christ asara.”​—1 ACORINTHIEN 11:1.

1. Ngbanga ti nyen a yeke nzoni e mû tapande ti Jésus Christ?

BAZENGELE PAUL amû tapande ti Missionnaire so ahon atanga ni kue, Jésus Christ. Paul awa amba ti lo aChrétien, lo tene: “I sara tongana mbi sara, legeoko tongana mbi sara tongana Christ asara.” (1 aCorinthien 11:1). Na pekoni so Jésus asukula gere ti abazengele ti lo ti fa na ala ti duti na tâ be-ti-molenge, lo tene tënë so na ala: “Mbi mû tapande so na i, si i lingbi sara legeoko tongana ye so Mbi sara na i.” (Jean 13:12-15). Teti so e yeke aChrétien, a lingbi e mû tapande ti Jésus Christ na yâ ti atënë so e yeke tene nga na yâ ti aye so e yeke sara.​—1 Pierre 2:21.

2. Même tongana Wabatango Bungbi atokua mo pëpe ti sara kusala ti missionnaire, a yeke nzoni mo gi ti duti na nzara ti sara nyen?

² Na yâ ti article so ahon, e bâ so missionnaire ayeke mbeni zo so a tokua lo ti sara kua ti évangéliste: mbeni zo so ague ti fa nzo tënë na azo. Na ndo ti tënë so, Paul asigigi na ambeni pendere hundango tënë. (Diko aRomain 10:11-15.) Bâ so bazengele ni ahunda tënë, lo tene: “Tongana zo ti fa tënë ayeke pëpe, ala lingbi mä . . . tongana nyen?” Na pekoni, lo kiri na ndo ti tënë so prophète Esaïe atene lani, lo tene: “Gere ti azo so aga na Tene-nzoni ti nzoye ayeke pendere mingi!” (Esaïe 52:7). Même tongana a tokua mo ti sara kusala na yâ ti mbeni kodoro nde tongana missionnaire pëpe, mo lingbi ti gi ti duti na nzara mingi ti fa nzo tënë. Na ngu so ahon, wungo ti awafango tënë ti Royaume 6 957 852 ‘asara kusala ti évangéliste’ na yâ ti akodoro 236.​—2 Timothée 4:5.

“E zia ye kue, na e tambela na peko ti Mo”

3, 4. Jésus azia aye wa lani na yayu ti ga na sese? A lingbi e sara nyen ti mû tapande ti Jésus?

³ Ti sara kusala so a mû na lo na ndo ti sese, Jésus ‘akamata tere ti ngbâa,’ lo zia ndo ti lo na yayu nga na gloire so lo yeke na ni kâ (aPhilippien 2:7). Atâa ye wa e sara ti mû tapande ti Christ, a lingbi pëpe ti haka ye so e sara na ye so Jésus asara na ngoi so lo ga na sese. Me teti so e yeke adisciple ti Jésus, e lingbi ti ngbâ be-ta-zo, na e yeke sara pëpe nzara ti aye so e yeke na ni ândö na yâ ti sese ti Satan, na so e zia ni awe.​—1 Jean 5:19.

 ⁴ Mbeni lâ, bazengele Pierre atene na Jésus, lo tene: “Bâ, e zia ye kue, na e tambela na peko ti Mo.” (Matthieu 19:27). Na ngoi so Jésus atisa Pierre, André, Jacques nga na Jean ti mû peko ti lo, hio tongaso, ala zia agbanda ti ala ti gingo susu. Ala zia lege ti kusala ti ala ti gingo susu na ala soro ti sara kusala ti fango tënë. Luc afa na yâ ti Évangile ti lo tënë so Pierre atene, lo tene: “Bâ, e zia ye ti e kue na e gue na peko ti Mo awe.” (Luc 18:28). A hunda na mingi ti e pëpe ti zia “ye ti e” kue si e mû peko ti Jésus. Ye oko, a hunda lani na e ti ‘ke tere ti e mveni’ si e ga adisciple ti Christ na ti sara kua ti Jéhovah na bê ti e kue (Matthieu 16:24). Mara ti sarango ye tongaso asara si zo awara aye ti nzoni mingi na pekoni. (Diko Matthieu 19:29.) Ti duti na nzara mingi ti fa nzo tënë tongana ti Christ ayeke sara si e duti na ngia, mbilimbili tongana e mû mbage ti e ti mû maboko na mbeni zo ti ga nduru na Nzapa nga na Molenge ti lo so lo ye lo mingi.

5. Fa mbeni ye so asi so na yâ ni afa ye so mbeni zo so ague na mbeni kodoro wande alingbi ti soro ti sara na ngoi so lo manda Bible.

⁵ Valmir ayeke mbeni zo ti kodoro ti Brésil so alango na Suriname. Lo yeke lani mbeni zo ti gingo lor. Lo yeke lani mbeni zo ti nyongo sämba so sarango ye ti lo ayeke sioni. Mbeni lâ na ngoi so lo yeke na yâ ti gbata ni, mbeni Témoin ti Jéhovah ato nda ni ti manda Bible na lo. Lo manda Bible lâ oko oko, lo changé aye mingi na yâ ti fini ti lo nga ngoi kete na pekoni, lo wara batême. Lo bâ so kua ti lo asara si a yeke ngangu na lo ti sara ye ague oko na ye so Bible afa. Atâa so lo la lo yeke kota zo ti place ti kua ni, lo yeda ti tene a mû na lo mbeni wungo ti nginza alingbi na aye so lo zia, si lo lingbi ti kiri na kodoro ti Brésil ti mû maboko na sewa ti lo na lege ti yingo. Na ngoi so azo mingi so ague na akodoro so mosoro ayeke dä amanda Bible, ala yeke yeda na bê ti ala wani ti zia kua ti nginza ti ala na ti kiri na kodoro ti ala ti mû maboko na afami ti ala nga na ambeni zo nde na lege ti yingo. Mara ti awafango tënë tongaso afa so ala ye fango nzo tënë mingi.

6. Ye wa e lingbi ti sara tongana e lingbi pëpe ti gue na mbeni ndo so bezoin ti awafango tënë ti Royaume ayeke mingi dä?

⁶ A-Témoin ti Jéhovah mingi ague na ando so bezoin ti awafango tënë ti Royaume ayeke mingi dä. Ambeni ague même na mbeni kodoro wande ti fa tënë. Peut-être mo lingbi ti sara tongaso pëpe, me mo lingbi ti mû tapande ti Jésus na lege so mo yeke gi lakue ti sara ye kue so mo lingbi ti sara na yâ ti kusala ti fango tënë.

Jéhovah ayeke fa ye na e

7. A-ekole wa a sigigi na ni ti fa ye na awafango tënë ti Royaume so aye ti fa ye nzoni mingi ahon ti kozo?

⁷ Legeoko tongana ti so Babâ ti  Jésus afa ye na lo, e lingbi nga ti wara aye ti nzoni na lege ti a-ekole so Jéhovah asigigi na ni ti fa ye na e laso. Jésus atene: “Mbeti ti aProphète atene, Fade Nzapa [ayeke fa ye, Fini Mbuki, 2001] na ala kue.” (Jean 6:45; Esaïe 54:13). Laso, a yeke wara a-ekole so a sigigi na ni ti mû maboko na e so e yeke awafango tënë ti Royaume. Kite ayeke dä pëpe so e kue e wara ye ti nzoni na lege ti Ekole ti Kusala ti aChrétien so a yeke sara na yâ ti akongregation ti e. Apionnier ayeke wara pasa ti gue na Ekole ti aPionnier. Ambeni pionnier so aninga na kusala ni akiri asara ekole ni ti fani use ni. A-ancien na aserviteur ti mungo maboko ague na Ekole ti Kusala ti Royaume ti mû lege na ala ti fa ye nzoni mingi ahon ti kozo. A mû nga maboko na ala ti sara kusala ndali ti aita ti ala nzoni mingi ahon ti kozo. Ambeni ancien nga na ambeni serviteur ti mungo maboko so ade kumbamba ague na Ekole ti Formation Ministérielle. Ekole so afa na ala tongana nyen ti mû maboko na aita ti ala ti fa tënë. Nga, aita mingi so a tokua ala tongana amissionnaire ti sara kusala na yâ ti ambeni kodoro nde, a fa ye na ala na Ekole ti Galaad ti Mandango Bible ti Société Watchtower.

8. Aye wa aita mingi ayeke nduru ti zia ni si ala wara aye ti nzoni na lege ti aye so Jéhovah aleke ti fa ye na e?

⁸ A-Témoin ti Jéhovah mingi achangé aye na yâ ti dutingo ti ala ti mû lege na ala ti gue na a-ekole so. Ti gue na Ekole ti Formation Ministérielle so a sara na kodoro ti Canada, Yugu ake kua ti nginza ti lo ndali ti so patron ti lo ake ti mû na lo congé ti tene lo gue. Yugu atene: “Mbi gi bê ti mbi oko pëpe ndali ti ye so mbi sara. Ti tâ tënë ni, tongana ala yeda fade ti mû na mbi congé ti gue na ekole so, peut-être ala yeke ku ti tene mbi ngbâ lakue ti sara kua na yâ ti ndokua ni. Me ti fadeso, mbi lingbi ti gue na ando kue ti sara kua so Jéhovah amû na mbi ti sara.” Ti wara ye ti nzoni na lege ti aye so Nzapa aleke ti fa ye na e, aita mingi ayeda na bê ti ala wani ti zia aye so ala bâ ni ândö na nene ni mingi.​—Luc 5:28.

9. Mû mbeni tapande so afa so ti manda Bible na ti yeda na bê kue ti sara ye alingbi na ni ayeke ga na ye ti nzoni na zo.

⁹ Tongana zo amanda ye so Mbeti ti Nzapa afa, na lo sara ye alingbi na ni na bê ti lo kue, a yeke mû maboko na lo mingi (2 Timothée 3:16, 17). Bâ ye so asi na Saulo so ayeke na kodoro ti Guatemala. A dü lo na mbeni kobela so asara si mongoli ti lo asara kusala nzoni kue pëpe. Na, mbeni wali so ayeke fa mbeti na Saulo atene na mama ti Saulo so a yeke nzoni lo gbu molenge ni na ngangu pëpe ti manda ti diko mbeti, ndali ti so sarango tongaso ayeke sara nzoni pëpe na Saulo. Saulo asigigi na ekole sân ti hinga ti diko mbeti. Ye oko, mbeni Témoin ti Jéhovah afa na Saulo ti diko mbeti, lo sara kusala na brochure I Sala Ngangu Kue ti Diko na ti Sû Mbeti. * Na pekoni, Saulo ague na li ni nzoni na lo zia iri ti lo na Ekole ti Kusala ti aChrétien. Mbeni lâ, na ngoi so mama ti Saulo ayeke fa tënë da na da, lo tingbi na wali so ayeke fa mbeti ândö na Saulo. Tongana wali ni amä so Saulo ahinga ti diko mbeti awe, lo hunda na mama ti Saulo ti ga na Saulo na lo na yenga ti peko. Na ngoi so ala ga na ndo ti wali ni, wali ni ahunda Saulo, lo tene: “Nyen la mo ga ti fa ande na mbi?” Saulo ato nda ti diko na lo mbeni paragraphe so ayeke na yâ ti buku Bible afa nyen biani? * Wali ni atene: “Bê ti mbi adö mingi ti bâ so mo fa ye na mbi fadeso. Wali ni atoto na ngu ti lê, lo gbu Saulo na kate ti lo.

Aye so Bible afa ayeke pusu zo ti sara ye

10. Pendere buku wa a sigigi na ni ti tene e sara kua na ni ti fa na azo ye so Bible afa?

¹⁰ Aye so Jésus afa aluti na ndo ti aye so Jéhovah afa na lo nga na ndo ti atënë so a sû na yâ ti Mbeti ti Nzapa (Luc 4:16-21; Jean 8:28). E yeke mû tapande ti Jésus na lege so e yeke sara ye alingbi na awango ti lo nga e yeke fa aye so alondo na yâ ti Bible. Tënë ti yanga ti e nga na atënë ti bê ti e ague gi oko, na ye so asara si e duti beoko (1 aCorinthien 1:10). E kiri singila mingi na “ngbâa be-ta-zo na ti ndara” so ayeke mû na e ambeti so azi nda ti Bible ti sara si aye so e yeke fa ague oko. Ambeti so ayeke mû maboko na e ti fa nzo tënë (Matthieu 24:45, MN; 28:19, 20). Mbeni oko ti ambeti so ayeke buku Bible afa, so a yeke wara ni fadeso na yanga ti akodoro 179.

11. Na lege wa mbeni ita-wali ti kodoro ti Ethiopie asara kusala na buku Bible afa ti hon ndo ti kangango lege?

 ¹¹ Mandango Mbeti ti Nzapa na lege ti buku Bible afa alingbi même ti sara si bê ti azo so ayeke gi ti kanga lege na kusala ti e achangé. Mbeni lâ, na ngoi so Lula, mbeni ita-wali so ayeke pionnier na kodoro ti Ethiopie ayeke manda Bible na mbeni zo, ngonzo agbu mbeni fami ti zo ni na lo tene so ala yeke na bezoin ti mara ti étude tongaso pëpe. Lula asara tënë yeke na fami ti wamandango Bible so, lo sara kusala na tapande so ayeke na yâ ti chapitre 15 ti buku Bible afa, so asara tënë na ndo ti faux billet. Bê ti wali ni adë na lo zia lege na ala ti kiri ti manda ye ni. Lo duti dä na ngoi ti étude ti peko nga lo hunda ti tene a manda Bible na lo; lo tene même so ni ye ti futa étude ni futango! Hio tongaso, lo to nda ti manda Bible fani ota na yâ ti yenga oko oko nga lo gue na li ni nzoni mingi.

12. Mû mbeni tapande so afa tongana nyen mbeni maseka alingbi ti fa ye so Bible afa nzoni mingi.

¹² Amaseka alingbi ti sara kusala na buku Bible afa ti mû maboko na amba ti ala. Keanu, mbeni molenge ti koli na Hawaii na kodoro ti Amerika, ayeke na ngu 11. Na ngoi so lo yeke diko buku Bible afa na ekole, mbeni kamarade ti lo ti klasse aga, lo hunda lo, lo tene: “Ngbanga ti nyen la mo yeke sara amatanga tongana tanga ti azo kue pëpe?” Keanu adiko na lo kiringo tënë ni so ayeke na yâ ti mbage “Ambeni tënë ti bâ na ndo ni”, so li ti tënë ni ayeke “A lingbi e sala amatanga so azo ayeke sala laso?” Na pekoni, Keanu azi buku ni na lembeti so a yeke wara li ti atënë ni dä na lo hunda na molenge-koli ni ti soro mbeni li ti tënë so agbu bê ti lo mingi. Ala to nda ti mandango Bible. Na ngu ti kusala so ahon, aTémoin ti Jéhovah amanda Bible na azo 6 561 426.Mingi ti aTémoin ti Jéhovah so asara kusala nzoni na buku Bible afa. Mo yeke sara kusala nzoni na buku so na ngoi so mo yeke manda Bible na azo?

13. Na lege wa mandango Bible alingbi ti sara ye mingi na ndo ti azo?

¹³ Ti manda Bible na sarango kusala na buku Bible afa alingbi ti sara ye mingi na ndo ti azo so ayeke na nzara ti sara ye so bê ti Nzapa aye. Mbeni koli na wali ti lo so ayeke apionnier spécial na kodoro ti Norvège ato nda ti mandango Bible na mbeni sewa so azo ni alondo na kodoro ti Zambie. Koli na wali so ayeke na amolenge ti wali ota na ala ye pëpe ti kiri ti dü mbeni molenge. Tongaso, na ngoi so wali ni amû ngo, koli na wali ni aleke na bê ti ala ti tuku ngo ni. Lango mingi pëpe kozoni ti tene ala gue abâ docteur, ala manda chapitre so li ti tënë ni ayeke: “Bâ fini tongana ti so Nzapa abâ ni.” Foto ti mbeni foroto so ade ti dü lo pëpe, so ayeke na yâ ti chapitre ni, andu bê ti koli na wali so mingi na asara si ala yeda mbeni pëpe ti tuku ngo ni. Ala ngbâ lani lakue ti gue na li ni nzoni. Na ngoi so a dü molenge ni, ala zia iri ti ita-koli so ayeke manda Bible na ala na ndo ti lo.

14. Mû tapande ti fa tongana nyen sarango ye alingbi na ye so e fa alingbi ti ga na anzoni ye.

¹⁴ Mbeni kpengba lege so Jésus ayeke fa na ye ayeke so lo yeke sara ye alingbi na aye so lo fa. Azo  mingi abâ so aTémoin ti Jéhovah ayeke sara ye nzoni mingi, ndali ti so ala mû tapande ti Jésus na ndo ti tënë so. Azo ti nzi alï na ngangu na yâ ti kutukutu ti mbeni zo ti dengo buze ti kodoro ti Nouvelle-Zélande, na ala mû bozo ti lo ala hon na ni. Lo sara tënë ti ye so asi na lo na azo ti lapolice. Azo ni atene na lo: “Mo yeke wara bozo ti mo na aye so ayeke na yâ ni gi tongana mbeni Témoin ti Jéhovah la awara ni.” Mbeni wali so ayeke Témoin ti Jéhovah na so kua ti lo ayeke ti kangbingo ambeti-sango na azo so avo ni awara bozo ti koli so. Na ngoi so koli so amä so ita-wali so awara bozo ti lo, lo ga na ndo ti ita-wali ni. Bê ti lo adë ti bâ so kpengba mbeti ti lo angbâ na place ni na yâ ti bozo ni. Ita-wali ni atene na lo atene: “Mbi bâ so a lingbi mbi kiri na bozo ni nga na aye ti yâ ni na wani, mbilimbili ndali ti so mbi yeke Témoin ti Jéhovah.” Ye so andu bê ti zo ti dengo buze ni mingi, na bê ti lo atï na ndo ti tënë so zo ti lapolice so atene na lo na ndapre ni. A yeke polele so atâ Chrétien ayeke sara ye alingbi na aye so Bible afa nga ala yeke mû tapande ti Jésus.​—aHébreu 13:18.

Bâ azo tongana ti so Jésus ayeke bâ na ala

15, 16. Na lege wa e lingbi ti pusu azo ti mä tënë so e yeke fa?

¹⁵ Sarango ye ti Jésus na mbage ti azo apusu ala ti mä tënë so lo yeke fa. Na tapande, ndoye nga na tâ be-ti-molenge so lo yeke na ni asara si azo so ayeke na tâ be-ti-molenge aga na mbage ti lo. Lo fa so lo bâ mawa ti azo so aga na mbage ti lo nga lo tene anzoni tënë na ala ti dë bê ti ala, lo sava nga akobela ti azo mingi. (Diko Marc 2:1-5). E lingbi pëpe ti sara amiracle, me e lingbi ti fa so e yeke na ndoye, e yeke na tâ be-ti-molenge nga e bâ mawa ti azo, na a yeke asarango ye so la ayeke mû maboko na azo ti manda tâ tënë.

¹⁶ Bango mawa ti zo ayeke mbeni kpengba sarango ye so amû maboko na Tariua, mbeni ita-wali so ayeke pionnier spécial, na ngoi so lo yeke na yanga-da ti mbeni mbakoro koli so iri ti lo ayeke Beere. Mbakoro koli so ayeke lango na mbeni oko ti azoa ti Kiribati so ayo mingi na atanga ni, na so ayeke na yâ ti Kota Ngu-ingo ti Pacifique ti Mbongo. Atâa so koli ni afa so lo yeke na nzara ti mä Tariua pëpe, Tariua abâ so mbage ti tere ti lo akui na tongaso lo bâ mawa ti lo. Tariua ahunda lo, lo tene: “Mo hinga zendo so Nzapa amû ndali ti azo ti kobela nga na ambakoro?” Na pekoni, lo diko na lo ambeni versê ti prophétie ti Esaïe. (Diko Esaïe 35:5, 6.) Aversê ni andu bê ti koli ni, na lo tene: “A sara angu mingi fadeso awe so mbi yeke diko Bible, na a sara angu mingi awe so mbeni missionnaire ti bungbi ti nzapa so mbi yeke dä ayeke ga ayeke bâ mbi, me ade mbi diko aversê so lâ oko pëpe.” Ita-wali so ato nda ti manda Bible lani na Beere, na lo gue na li ni nzoni. Atâa so mbage ti tere ti lo akui, lo wara batême, lo mû li ni ti bâ lege ti groupe so ayeke na yâ ti zoa so nga lo yeke tambela na yâ ti zoa ni kue ti fa nzo tënë.

Ngbâ ti mû tapande ti Christ

17, 18. (a) Nyen la mo lingbi ti sara ti ga mbeni nzoni wafango nzo tënë? (b) Ye wa ayeke ku azo so abâ fango nzo tënë na nene ni mingi?

¹⁷ Tongana ti so anzoni ye so ayeke si na fango tënë ayeke fa, e lingbi ti ga anzoni wafango nzo tënë tongana e gi ti sara ye tongana ti Jésus na yâ ti fini ti e. Ni la, a yeke tâ na lege ni ti tene e mû tapande ti Christ na lege so e yeke fa nzo tënë na bê ti e kue.

¹⁸ Na ngoi so ambeni zo aga adisciple ti Jésus na ngoi ti akozo Chrétien, Pierre ahunda tënë, lo tene: “Fade e wara nyen?” Jésus akiri tënë, lo tene: “Azo kue so azia da, wala aita ti ala ti koli, wala aita ti ala ti wali, wala babâ, wala mama, wala amolenge, wala yaka, teti iri ti Mbi, fade A mû ye so kue na ala lege ngbangbo oko, na fade ala wara fini ti lakue lakue.” (Matthieu 19:27-29). E yeke hinga ande biani so atënë so ayeke tâ tënë tongana e ngbâ ti mû tapande ti Jésus Christ, Missionnaire so ahon atanga ni kue.

[Kete tënë na gbe ni]

Mo yeke kiri tënë tongana nyen?

• Na lege wa Jéhovah ayeke fa ye na e ti tene e ga anzoni wafango nzo tënë?

• Ngbanga ti nyen buku Bible afa asara si e yeke wara aye ti nzoni mingi na fango tënë?

• Na lege wa e lingbi ti bâ azo tongana ti so Jésus abâ na ala?

[Ahundango tënë ti manda na ye]

[Foto na lembeti 21]

Na ngoi so Jésus atisa Pierre, André, Jacques nga na Jean, ala yeda hio ti mû peko ti lo

[Foto na lembeti 23]

Ambeti tongana buku “Bible afa” ayeke sara si aye so e yeke fa ague gi oko