Singo ti Christ aye ti tene nyen na mo?
Singo ti Christ aye ti tene nyen na mo?
“Fade fä ti singo ti Mo, na ti nda ti ngoi so, ayeke nyen?”—MATTHIEU 24:3.
1. Apendere hundango tënë wa abazengele ti Jésus ahunda lani na lo?
A SARA nduru na ngu 2 000 awe so ambeni bazengele ti Jésus osio aga asara lisoro na lo na ndo ti Hoto ti Oliviers na ngoi so lo yeke gi lo oko. Ala hunda Maître ti ala, ala tene: “Fade ye so aga lâ nyen? na fade fä ti singo ti Mo, na ti nda ti ngoi so, ayeke nyen?” (Matthieu 24:3). Na yâ ti ahundango tënë so, abazengele asigigi na akpengba tënë use: “singo ti Mo” nga na “nda ti ngoi so”. Atënë so aye ti sara tënë ti nyen?
2. Tongana a sara tënë ti “nda” ti mbeni ye, a ye ti tene nyen?
2 Kozoni kue, e yeke gi ti bâ use tënë ni so a kiri pekoni na yâ ti Bible ti Sango na tënë “nda” ti mbeni ye. Tënë so alondo na tënë ti yanga ti Grec syn·teʹlei·a. Na yâ ti Bible Traduction du Monde Nouveau, a kiri ka na peko ti tënë “nda” ti mbeni ye na tënë “hunzingo” ti mbeni ye, me a kiri na peko ti tënë ti yanga ti Grec te’los na tënë “kongo nda” ti mbeni ye. Ti hinga kangbi so ayeke na popo ti atënë use so, zia e bâ lege so a yeke mû na mbeni diskur na Da ti Royaume. Hunzingo ti mbeni diskur ayeke ndangba mbage ti diskur ni. Na ndangba mbage ti diskur ni, zo so amû ni ayeke mû ngoi kete ti dabe ti azo so ayeke mä lo na ndo ti aye so lo fa kozoni awe, nga lo yeke fa na ala tongana nyen tënë ni andu ala. Diskur ni ayeke ko nda ni na ngoi so zo so amû ni azia estrade. Legeoko nga, na yâ ti Bible, tënë “nda ti ngoi so” aye ti sara tënë ti mbeni ngoi so aye ti ngoi so ayeke gue ti hunzi nga na ngoi so aye ni ayeke ko nda ni.
3. Ambeni ye so ayeke si na ngoi ti singo ti Jésus ayeke so wa?
3 Nda ti tënë “singo” so abazengele ti Jésus asigigi na ni aye ti tene nyen? Tënë so alondo na tënë ti yanga ti Grec pa·rou·siʹa. * Pa·rou·siʹa ti Christ, wala singo ti lo ato nda ni na ngoi so a zia Jésus tongana Gbia na yayu na ngu 1914, nga a yeke wara na yâ ni ngoi so lo yeke ga ti futi azo ti sioni na ngoi ti “kota ye ti vundu”. (Matthieu 24:21). Aye mingi ayeke si na ngoi ti singo ti Jésus. Na popo ti aye so a yeke wara “lâ ti nda ni” ti aye ti sioni ti laso, bungbingo azo so a soro ala nga na zingongo ala na kuâ ti wara fini na yayu (2 Timothée 3:1; 1 aCorinthien 15:23; 1 aThessalonicien 4:15-17; 2 aThessalonicien 2:1). A lingbi ti tene so ngoi ti “hunzingo ti aye ti ngoi so” (syn·teʹlei·a) nga na ngoi ti singo ti Christ (pa·rou·siʹa) ayeke si na oko ngoi.
Mbeni ngoi so ague a ninga
4. Na lege wa ngoi ti singo ti Jésus aye ti gue oko na aye so asi na ngoi ti Noé?
4 Ti hinga so tënë pa·rou·siʹa aye ti sara tënë ti mbeni ngoi so ague a ninga ague oko na tënë so Jésus atene na ndo ti ngoi ti singo ti lo. (Diko Matthieu 24:37-39.) Bâ so Jésus ahaka ngoi ti singo ti lo pëpe na nduru ngoi so Kota Moa asi na yâ ni na ngoi ti Noé. Me, lo haka ngoi ti singo ti lo na ngoi so ague a ninga juska Kota Moa asi. Na yâ ti ngoi so, a yeke wara ngoi so Noé aleke na arche nga lo fa tënë; na lo sara aye so juska Kota Moa asi. Aye so asi na yâ ti angu mingi. Legeoko nga, ngoi ti singo ti Christ andu aye so ayeke si juska na ngoi ti kota ye ti vundu, nga a ndu ngoi ti kota ye ti vundu ni mveni.—2 aThessalonicien 1:6-9.
5. Na lege wa atënë so e wara na chapitre 6 ti Apocalypse afa so ngoi ti singo ti Jésus ayeke mbeni ngoi so ayeke gue a ninga?
5 Ambeni prophétie ti Bible afa polele so ngoi ti singo ti Christ aye ti sara tënë ti mbeni ngoi so ayeke gue a ninga me gi pëpe ngoi so lo yeke ga ti futi azo ti sioni. Mbeti ti Apocalypse afa Jésus tongana mbeni zo so ayeke na ndo ti vuru mbarata lo yeke kpe na ni nga so couronne ayeke na li ti lo. (Diko Apocalypse 6:1-8.) Na pekoni so a zia Jésus tongana Gbia na ngu 1914, a fa Jésus tongana mbeni zo so ayeke “hon na ngangu, na lo gue ti hon na ngangu.” Aversê ni afa so ambeni zo so ayeke na ndo ti ambarata so couleur ti tere ti ala ayeke nde nde ayeke mû peko ti lo. Prophétie ni afa so azo ni na ambarata ni aye ti sara tënë ti bira, kota nzara nga na akobela so ayeke fâ azo gbani gbani, na aye so kue asi na yâ ti ngoi so ayeke gue a ninga, so a iri ni “lâ ti nda ni”. E bâ so atënë ti prophétie so ayeke ga tâ tënë na ngoi ti e laso.
6. Na lege wa chapitre 12 ti Apocalypse amû maboko na e ti hinga ye na ndo ti ngoi ti singo ti Christ?
6 Chapitre 12 ti Apocalypse afa anzene nzene ye na ndo ti Royaume ti Nzapa so abâ gigi na yayu. Chapitre ni afa so mbeni bira abâ gigi na yayu. Michel, so ti tene Jésus Christ na ngoi so lo ngbâ na yayu, nga na a-ange ti lo atiri na Zabolo na adémon ti lo. Ye ti pekoni ayeke so a bi Satan Zabolo na adémon ti lo na sese. Na ndo ti tënë so, aversê ni afa na e so Zabolo ayeke na kota ngonzo mingi ndali ti lo “hinga lâ ti lo angbâ mingi pëpe.” (Diko Apocalypse 12:7-12.) Ni la a yeke polele so na pekoni so a zia Christ tongana Gbia na yayu, mbeni ngoi ayeke gue a ninga. Na yâ ti ngoi ni so fade “vundu” aga na sese nga azo ayeke wara aye ti “vundu” mingi.
7. Psaume 2 asara tënë na ndo ti nyen? A sara tënë ti lege wa so azi?
7 Psaume 2 afa nga prophétie na ndo ti ziango Jésus tongana Gbia na ndo ti Hoto ti Sion ti yayu. (Diko Psaume 2:5-9; 110:1, 2.) Ye oko, Psaume so afa so, teti mbeni ngoi, lege ayeke zi na agbia ti sese nga na azo ti ala ti yeda na komandema ti Christ. A wa ala ti “duti na ndara” nga ti yeda ti “mä wango”. Biani, na ngoi ni so, fade “ngia ayeke na azo kue so akpe na [Nzapa] ti bata tere ti ala.” Tongaso, na ngoi ti singo ti Jésus tongana Gbia, lege ayeke zi na agbia nga na azo ti ala ti fa so ala yeda na komandema ti lo.—Psaume 2:10-12.
Hingango aye so afa ngoi ti singo ti Christ
8, 9. Azo wa la ayeke hinga aye so afa ngoi ti singo ti Christ nga ayeke hinga ye so aye ni so aye ti tene?
8 Na ngoi so aFarizien ahunda Jésus ti hinga lawa si Royaume ni ayeke ga, lo tene na ala so Royaume ni ayeke ga ande pëpe “na lege ti ye so zo alingbi bâ.” (Luc 17:20, 21). Azo so ayeke atâ Chrétien pëpe alingbi ti hinga ni pëpe. Ala yeda même pëpe ti tene Jésus aga ande gbia ti ala. Tongaso, azo wa la ayeke hinga ande aye so afa ngoi ti singo ti Christ nga ayeke hinga ye so aye ni so aye ti tene?
9 Jésus atene na adisciple ti lo so fade ala yeke bâ aye so afa ngoi ti singo ti lo polele, tongana ti so zo ayeke bâ “nyekpa [so] asu na mbage oko na gbe yayu na asu juska na mbeni mbage na gbe yayu”. (Diko Luc 17:24-29.) A yeke nzoni ti hinga so Matthieu 24:23-27 afa gi oko ye so Luc afa na ndo ti aye so amû lege na e ti hinga ngoi ti singo ti Christ.
Azo so abâ aye so afa ngoi ti singo ti Christ
10, 11. (a) Kozoni ândö, a fa nda ti tënë ‘wagame’ so a sara tënë ti lo na Matthieu 24:34 tongana nyen? (b) Adisciple ti Jésus ahinga so ‘wagame’ so andu azo wa?
10 Kozoni ândö, a fa na yâ ti Tour ti Ba Ndo so na ngoi ti akozo Chrétien, tënë ‘wagame so’, so a sara tënë ni na Matthieu 24:34, aye ti sara tënë ti “aJuif mingi so agbian bê ti ala pëpe ti ngoi ni kâ.” * A lingbi ti bâ so ye so a fa lani ayeke na lege ni ndali ti so na ambeni ngoi, tongana Jésus ayeke sara tënë ti azo tongana “wagame”, lo yeke sara tënë ti azo ti sioni. Nga na yâ ti mingi ti aye, ti fa so sarango ye ti aJuif so amä na bê pëpe ayeke nzoni pëpe, Jésus azia atënë tongana “siokpari” na tere ti tënë wagame (Matthieu 12:39; 17:17; Marc 8:38). Ni la, ti fa gango tâ tënë ni na ngoi ti e laso, Tour ti Ba Ndo afa lani so tongana Jésus asara tënë ti ‘wagame’ ti sioni, lo ye ti sara tënë ti azo so ayeke atâ Chrétien pëpe so ayeke bâ aye nde nde so afa ngoi ti hunzingo ti aye ti ngoi so (syn·teʹlei·a) nga so ayeke bâ kongo nda ni ti aye ti ngoi so (teʹlos).
11 A yeke tâ tënë so tongana Jésus ayeke sara tënë ti ‘wagame’ na lo zia atënë tongana “siokpari” na tere ni, lo ye ti sara tënë ti azo ti sioni ti ngoi ti lo. Me na Matthieu 24:34, lo ye biani ti sara tënë ti azo ti sioni? Girisa pëpe so adisciple ti Jésus osio aga nduru na lo na ngoi so “mbeni zo ayeke pëpe” na tere ti lo (Matthieu 24:3). Na ngoi so Jésus ayeke sara tënë na ala na ndo ti ‘wagame so’, sarango tënë ti lo afa so lo yeke sara pëpe tënë ti azo ti sioni. Ni la, kite ayeke dä pëpe so abazengele ni ahinga so ala na amba ti ala adisciple ti Jésus ayeke na popo ti ‘wagame’ so ayeke hon pëpe ‘juska ye so kue’ asi.
12. Ye wa aversê so aga kozoni na Matthieu 24:34 afa na ndo ti azo so Jésus ayeke sara tënë ti ala tongana lo sara kua na tënë ‘wagame’?
12 Aye wa amû lege na e ti tene tongaso? Ti bâ aversê so aga kozoni na Matthieu 24:34 amû lege na e ti tene tongaso. Tongana ti so e bâ na Matthieu 24:32, 33, Jésus atene: ‘Fadeso i manda parabole ti keke ti figue. Tongana tikeke ni aton, na kugbe ni asigigi, i hinga ngoi ti lâ aga nduru. Tongaso i nga, tongana i bâ ye so kue, i hinga Molenge Ti Zo ayeke nduru, même na yanga ti da.’ (Bâ nga Marc13:28-30; Luc 21:30-32.) Na pekoni, Matthieu 24:34 atene: ‘Biani, Mbi tene na i, fade wagame so ahon pëpe juska ye so kue’ asi.
13, 14. Ngbanga ti nyen e lingbi ti tene so ‘wagame’ so Jésus ayeke sara lani tënë ti lo ayeke biani adisciple ti lo?
13 Jésus atene so a yeke adisciple ti lo, so a ga nduru lani awe ti sa yingo na ndo ti ala, si alingbi biani ti hinga ye so aye so aye ti tene tongana ala bâ “ye so kue” asi. Tongaso, Jésus ayeke sara lani tënë ti adisciple ti lo tongana lo tene tënë so e diko na Matthieu 24:34, so atene: ‘Fade wagame so ahon pëpe juska ye so kue’ asi.
14 Nde na azo so ayeke atâ Chrétien pëpe, adisciple ti Jésus ayeke bâ gi pëpe aye nde nde so afa ngoi ti singo ti Christ, me ala yeke hinga nga nda ti aye ni so. Ala yeke “manda” ye na lege ti aye nde nde so nga ala yeke “hinga” tâ nda ti aye ni so. Ala yeke hinga polele so Jésus “ayeke nduru, même na yanga ti da.” A yeke tâ tënë so aJuif so amä na bê pëpe nga na akozo Chrétien so a sa yingo na ndo ti ala, so ayeke be-ta-zo, abâ so ambeni ye so Jésus asara tënë ni aga tâ tënë. Ye oko, gi adisciple ti Jésus ti ngoi ni kâ so a sa yingo na ndo ti ala awe si alingbi ti manda ye na lege ti aye so asi: ala lingbi ti gbu tâ nda ti aye so ala bâ.
15. (a) Azo wa laso ayeke ‘wagame’ so Jésus ayeke sara tënë ti lo lani? (b) Ngbanga ti nyen e lingbi pëpe ti hinga ngoi so ‘wagame so’ ayeke sara? (Bâ encadré so ayeke na lembeti 25.)
15 Ti azo so agbu nda ti atâ tënë ti Bible pëpe laso, ala bâ so “ye so zo alingbi bâ”, so afa ngoi ti singo ti Christ ayeke dä pëpe. Ala tene ti ala so ye kue angbâ ti tambela tongana ti kozo (2 Pierre 3:4). Na mbage, aita ti Christ so a sa yingo na ndo ti ala, so laso ayeke sara mara ti kusala so Jean asara lani, ahinga aye so afa ngoi ti singo ti Christ. Na lê ti ala, aye ni so ayeke tongana mbeni nyekpa so aza na lê ti nduzu nga ala hinga tâ nda ti ye so aye ni so aye ti tene. Bungbi ti aChrétien so a sa yingo na ndo ti ala ayeke laso ‘wagame’ so ayeke hon pëpe ‘juska ye so kue’ asi. * Ye so aye ti fa so ambeni ita ti Christ so a sa yingo na ndo ti ala ayeke ngbâ ande na fini na ndo ti sese na ngoi so kota ye ti vundu so a sara tënë ni kozo awe ayeke to nda ni.
“I bata”
16. A lingbi adisciple ti Christ kue asara nyen?
16 Ye oko, a hunda ti sara ye mingi ahon gi ti hinga aye so afa ngoi ti singo ti Christ. Jésus atene: ‘Ye so Mbi tene na i, Mbi tene na azo kue, I bata.’ (Marc 13:37). Atâa e yeke mbeni Chrétien so asa yingo na ndo ti lo wala e yeke na popo ti azo mingi so asi singo, ye so ayeke kota ye mingi teti e kue laso. A hon ngu 90 awe so Jésus aga Gbia na yayu na ngu 1914. Atâa so a lingbi ti duti ngangu ti sara ni, a lingbi e fa so e leke tere ti e awe nga e ngbâ ti bata, wala e lango pëpe. Ti hinga so Christ ayeke komande ayeke mû maboko na e ti ngbâ ti sara aye so. A yeke mû nga maboko na e ti hinga so na yâ ti ngoi kete, Christ ayeke ga ti futi awato ti lo “na l’heure ni so [e] yeke ku pëpe”.—Luc 12:40.
17. Ti hinga ye so ngoi ti singo ti Christ aye ti tene ayeke mû maboko na e ti sara nyen? Ye wa a yeke nzoni e leke na bê ti e ti sara?
17 Ti hinga ye so ngoi ti singo ti Christ aye ti tene ayeke mû maboko na e ti sara aye mingi ahon ti kozo ti fa so e lango pëpe. E hinga so Jésus asi awe na lo yeke komande tongana Gbia na yayu ngbene ye na ngu 1914. Na yâ ti ngoi kete, lo yeke ga ande ti futi azo ti sioni nga lo yeke changé ande aye mingi na ndo ti sese kue. Tongaso, a yeke nzoni e leke na bê ti e ti mû mbage mingi na yâ ti kusala so Jésus asara tënë ni kozoni awe, lo tene: ‘Fade a fa Tene-nzoni so ti royaume na sese so kue teti tënë ti témoin na amara kue; na tongaso fade nda ni [teʹlos] aga.’—Matthieu 24:14.
[Akete tënë na gbe ni]
^ par. 3 Na 2 aCorinthien 10:10, 11 nga na aPhilippien 2:12, bazengele Paul atene ni yeke “na popo ti i” wala ni yeke “na i pëpe”. Kangbi so ayeke na popo ti atënë ti lo use so amû lege na e ti hinga nda ti tënë pa·rou·siʹa. Ti hinga ambeni nzene nzene tënë na ndo ti tënë so, bâ Étude perspicace des Écritures, Mbage 2 ni, lembeti 648-651.
^ par. 10 Bâ Tour ti Ba Ndo, lango 1 ti novembre 1995, lembeti 22-25, 29.
^ par. 15 Wagame so, wala azo ti ngoi so, aye ti gue oko na gango tâ tënë ti kozo ye so Jean abâ tongana suma na yâ ti mbeti ti Apocalypse (Apocalypse 1:10–3:22). Aye nde nde so ayeke na yâ ti aversê so, so afa singo ti lâ ti Seigneur, ayeke si ngbene ye na ngu 1914 juska na ngoi so tanga ti aChrétien so a sa yingo na ndo ti lo akui na a zingo lo.—Bâ buku La Révélation: le grand dénouement est proche!, lembeti 24, paragraphe 4.
Mo yeke kiri tënë tongana nyen?
• E hinga tongana nyen so ngoi ti singo ti Jésus ayeke mbeni ngoi so ague a ninga?
• Azo wa la ahinga aye so afa ngoi ti singo ti Jésus na ye so aye ni so aye ti tene?
• Azo wa la ayeke wagame so a sara tënë ti lo na Matthieu 24:34?
• Ngbanga ti nyen e lingbi pëpe ti hinga mbilimbili ngoi so ‘wagame so’ ayeke sara?
[Ahundango tënë ti manda na ye]
[Foto na lembeti 29]
‘Wagame so’ aninga ngoi oke? Lege ayeke dä ti hinga ni?
[Encadré na lembeti 29]
Fani mingi, tënë ‘wagame’ asara tënë ti azo so ngu ti ala ayeke nde nde na so aduti na fini na mbeni mbilimbili ngoi wala na ngoi so mbeni mbilimbili ye asi. Na tapande, Exode 1:6 atene: ‘Na Joseph akui, na aita ti lo kue, na wagame so kue.’ Ngu ti Joseph nga na ti aita ti lo ayeke nde nde, me mbeni ye asi na ngoi ti ala so ala hinga ni. Na yâ ti ‘wagame so’ a yeke wara ambeni ita ti Joseph so a dü ala kozo ti lo. Ambeni ti aita ti Joseph so angbâ na fini na peko ti kuâ ti lo (Genèse 50:24). Ambeni zo so ayeke na yâ ti ‘wagame so’, na tapande Benjamin, so a dü lo na pekoni so a dü Joseph na so angbâ peut-être na fini na pekoni so Joseph akui.
Tongaso, tongana a sara tënë ti ‘wagame’ ti sara tënë ti azo so aduti na fini na mbeni mbilimbili ngoi, zo alingbi pëpe ti hinga mbilimbili wungo ti ngoi ni. Ye oko, ngoi so ayeke hunzi ande. Ni la, tongana Jésus asara tënë ti ‘wagame so’, tongana ti so e wara na Matthieu 24:34, lo fa na adisciple ti lo pëpe mbeni ye so ayeke mû lege na ala ti hinga mbilimbili ngoi so “lâ ti nda ni” ayeke ko nda ni. Ahon ti sara tongaso, Jésus afa polele so ala yeke hinga pëpe ‘lâ ni na l’heure ni’.—2 Timothée 3:1; Matthieu 24:36.
[Foto na lembeti 26]
Na pekoni so a zia Jésus Gbia na ngu 1914, a fa lo tongana mbeni zo so ayeke “hon na ngangu”
[Foto na lembeti 28]
‘Fade wagame so ahon pëpe juska ye so kue’ asi