Job ane mingi iri ti Jéhovah

“Sara tënë nzoni na iri ti L’Éternel!”​—JOB 1:21.

1. Zo wa la peut-être asû mbeti ti Job? Lo sû ni lawa?

MOÏSE ayeke na ngu 40 tongaso tongana lo kpe Égypte ti tene Pharaon afâ lo pëpe, na lo gue lo sara kodoro na Madian (Kus. 7:23). Na ngoi so lo yeke na Madian, lo mä peut-être tënë ti akpale so asi na Job so ayeke lango na kodoro ti Uts so ayeke nduru na Madian. Angu mingi na pekoni, na ngoi so Moïse na azo ti Israël ayeke nduru na kodoro ti Uts na hunzingo ti tambela ti ala na yando, Moïse amä peut-être tënë ti aye so asi na Job na ngoi so lo ga mbakoro mingi. Atënë ti akotara ti aJuif afa so Moïse asû mbeti ti Job na peko ti kuâ ti Job.

2. Na alege wa mbeti ti Job ayeke kpengba awakua ti Jéhovah ti ngoi ti e laso?

² Mbeti ti Job ayeke kpengba mabe ti awakua ti Jéhovah ti ngoi ti e laso. Na alege wa? Atënë ti yâ ti mbeti so azi lê ti e na ndo ti akpengba ye so asi lani na yayu na so andu e laso. Ye so asi lani so agboto lê ti e na ndo ti dutingo ti Nzapa tongana gbia ti dunia kue, tënë so ayeke kota mingi. Atënë ti yâ ti mbeti ti Job asara nga si e hinga ye mingi na ndo ti ye so dutingo lakue be-ta-zo aye ti tene. A mû nga maboko na e ti hinga ngbanga ti nyen ngoi na ngoi Jéhovah azia lege si awakua ti lo abâ pasi. Na ndo ni, mbeti ti Job afa Satan Zabolo tongana kota Zo ti dengo gaba na Jéhovah nga wato ti azo. Mbeti ni afa nga so azo so ayeke mbilimbili-kue pëpe tongana Job alingbi ti ngbâ be-ta-zo na Jéhovah atâa angangu tara so ala wara. Zia e bâ ambeni ye so mbeti ti Job asara tënë ni.

Satan atara Job

3. Nyen la e hinga na ndo ti Job nyen? Ngbanga ti nyen Satan agi ti sara sioni na Job?

³ Job ayeke mbeni zo ti mosoro nga azo ane lo mingi; lo yeke nga mbeni babâ ti kota sewa so ayeke mû li ni nzoni mingi. A yeke polele so Job ayeke lani mbeni nzoni wamungo wango so azo ane lo mingi; lo yeke mû nga maboko na azo so ye ti ala ayeke dä pëpe. Mingi ahon so, Job akpe mbeto ti Nzapa. Bible atene so Job ‘alingbi kue na lo yeke mbilimbili, lo kpe mbeto ti Nzapa na lo zia lege ti sioye.’ Satan Zabolo agi ti sara sioni lani na Job ndali ti so lo gbu tënë ti Nzapa ngangu, me pëpe ngbanga ti so lo yeke na mosoro nga so azo ane lo mingi.​—Job 1:1; 29:7-16; 31:1.

4. Ti duti be-ta-zo aye ti tene nyen?

⁴ Akozo tënë ti mbeti ti Job afa ye so asi na ngoi so a-ange abungbi na yayu na ala luti na gbele Jéhovah. Satan ayeke nga lani dä, na lo bi atënë na li ti Job. (Diko Job 1:6-11.) Atâa so Satan asara tënë ti akungba ti Job, mingi ni lo dë kite na ndo ti dutingo be-ta-zo ti Job. Tënë “be-ta-zo” aye ti sara tënë ti zo so ayeke sara ye na lege ni, zo so tënë ayeke na li ti lo pëpe nga zo ti mbilimbili. Na yâ ti Bible, tënë be-ta-zo aye ti sara tënë ti zo so ayeke sara na Jéhovah na bê kue.

5. Satan atene nyen na ndo ti Job?

⁵ Satan atene so Job ayeke voro Nzapa ndali ti so lo ye ti wara ye na maboko ti lo, me pëpe ndali ti so lo ye ti duti be-ta-zo na lo. Satan atene so Job aduti be-ta-zo na Jéhovah gi tongana Nzapa angbâ ti futa lo nga ti bata lo. Ti hinga wala tënë ti Satan ayeke tâ tënë wala mvene, Jéhovah azia lege na lo ti tara koli so, so ayeke be-ta-zo. So a zi lege na Satan awe, gi na yâ ti lango oko, Job amä so a nzi anyama ti lo wala a fâ ala, a fâ mingi ti azo ti kua ti lo nga amolenge ti lo bale-oko akui (Job 1:13-19). Aye so Satan asara na Job asara si lo duti be-ta-zo mbeni pëpe? Mbeti ti Job so a sû na gbe ti yingo ti Nzapa afa ye so Job atene na pekoni so aye so asi na lo: “L’Éternel amû, na L’Éternel alungula; sara tënë nzoni na iri ti L’Éternel!”​—Job 1:21.

6. (a) Ye wa asi na ngoi ti mbeni bungbi so a kiri a sara na yayu? (b) Azo wa la Satan ayeke bi bê lani na ndo ti ala na ngoi so lo yeke dë kite na ndo ti ndani so Job aduti be-ta-zo na Jéhovah?

 ⁶ Na pekoni, a-ange akiri abungbi na yayu na gbele Jéhovah. Satan akiri abi atënë na li ti Job, lo tene: “Poro teti poro, biani, fade zo amû ye ti lo kue ti bata fini ti lo. Me fadeso Mo ye tïtî Mo, Mo ndu bio ti lo na mi ti lo, na fade lo zonga Mo na tâ lê ti Mo.” Bâ so tënë so Satan atene ge andu gi Job lo oko pëpe. Zabolo atene: ‘Fade zo amû ye ti lo kue ti bata fini ti lo.’ Ge, lo yeke dë kite gi pëpe na ndo ti dutingo be-ta-zo ti Job me na ndo ti dutingo be-ta-zo ti “zo” kue so ayeke voro Jéhovah. Na pekoni, Nzapa amû lege na Satan ti bi mbeni sioni kobela na tere ti Job (Job 2:1-8). Me a yeke atara so Job awara kue la pëpe.

Bango ndo ti Job afa nyen na e?

7. Na alege wa wali ti Job nga na azo so aga ti bâ Job asara si ye ni akiri aga ngangu mingi na lo?

⁷ Na tongo nda ni, wali ti Job abâ pasi tongana ti koli ti lo Job. Lo yeke na vundu mingi ndali ti so amolenge ti lo bale-oko akui nga ndali ti so ala girisa mosoro ti ala kue. A mû na lo vundu mingi ti bâ koli ti lo abâ pasi na mbeni sioni kobela. Lo dekongo na li ti Job, lo tene: “Mo ngbâ ti sara na lege ni? mo zonga Nzapa, mo kui.” Na pekoni, akoli ota, Éliphaz, Bildad na Tsophar, aga; ala tene so ala gi ti dë bê ti Job. Ye oko, wango ti ala ayeke na lege ni pëpe nga a fa so ala yeke “awawango so awoko zo.” Na tapande, Bildad atene so amolenge ti Job asara aye ti sioni na ye so asi na ala so alingbi na ala. Éliphaz atene so Job abâ pasi ndali ti aye ti sioni so lo sara. Lo hunda même atënë na Job ti sara si lo bâ so Nzapa ayeke bâ na nene ni kete pëpe azo so ayeke be-ta-zo na lo (Job 2:9, 11; 4:8; 8:4; 16:2; 22:2, 3). Job angbâ be-ta-zo atâa angangu tara so lo wara. Ti tâ tënë ni, Job asara faute tongana lo ‘bâ lo mveni mbilimbili me lo bâ mbilimbili ti Nzapa pëpe.’ (Job 32:2). Ye oko, lo ngbâ be-ta-zo na yâ ti aye kue so asi na lo.

8. Nzoni tapande wa Élihu azia na azo so ayeke mû wango laso?

⁸ Na pekoni, Bible asara tënë ti Élihu so aga nga ti bâ Job. Élihu amû ngoi kozoni ti mä atënë so Job na akoli ota so ayeke tene. Atâa so ngu ti Élihu ayeke kete na ti akoli osio so, lo fa so lo yeke na ndara mingi ahon ala. Lo ne Job na ngoi so lo yeke sara tënë na lo. Élihu agonda Job ndali ti so lo yeke sara ye na lege ni. Me lo tene nga so Job agi mingi ti fa so lo yeke zo ti mbilimbili. Na pekoni, Élihu adë bê ti Job so sarango na Nzapa na bê kue ayeke lakue nzoni mingi. (Diko Job 36:1, 11.) So tâ nzoni tapande teti azo so laso a hunda ti tene ala mû wango na azo! Élihu afa so lo hinga ti kanga bê ti ku, lo dengi mê nzoni ti mä tënë so a tene, lo gonda zo tongana a hunda ti sara ni nga lo mû awango so ayeke kpengba zo.​—Job 32:6; 33:32.

9. Jéhovah asara nyen ti mû maboko na Job?

⁹ Na nda ni, mbeni kpengba ye asi na Job na ngoi so Jéhovah asara tënë na lo. Bible atene: “Na yâ gingisale L’Éternel akiri tënë na Job.” Na hundango atënë na Job na nzoni bê Jéhovah amû maboko na lo ti changé bango ndo ti lo. Job ayeda na bê ti lo kue na awango so, na lo tene: “Mbi yeke kete ye senge . . . mbi ke sioye ti mbi na yâ pupu-sese, na mbi-wa.” Na pekoni so Jéhovah asara tënë na Job, lo fa so bê ti lo ason na tere ti akoli ota so ndali ti so ala ‘sara tënë pëpe na lege ti mbilimbili.’ A hunda na Job ti sambela ndali ti ala. Na pekoni, “tongana Job asambela teti andeko ti lo, L’Éternel akiri Job na kozo ndo ti lo, na L’Éternel amû na Job lege use ye ni kue so ayeke na lo kozoni.”​—Job 38:1; 39:37; 42:6-10.

E ye Jéhovah mingi?

10. Ngbanga ti nyen Jéhovah asara pëpe sanka ti Satan wala lo futi lo pëpe?

¹⁰ Jéhovah ayeke Wasarango dunia kue nga lo komande na ndo ti ye kue so lo sara. Ngbanga ti nyen lo gi gi pëpe ti kanga lê na ndo ti tënë ti kite so Zabolo asigigi na ni? Nzapa ahinga lani so sarango sanka ti Satan wala futingo lo ayeke leke ande pëpe tënë ni. Zabolo atene lani so Job, mbeni kpengba wakua ti Jéhovah, ayeke ngbâ be-ta-zo na lo pëpe tongana lo girisa mosoro ti lo. Job angbâ be-ta-zo atâa atara so lo wara. Na pekoni, Satan atene so zo oko ti  ngbâ be-ta-zo na Nzapa ayeke dä pëpe tongana lo bâ pasi. Job abâ pasi, me lo ngbâ lakue be-ta-zo. Job angbâ be-ta-zo atâa so lo yeke mbilimbili-kue pëpe, na ye so afa so Satan ayeke zo ti mvene. Ka ti tanga ti awakua ti Nzapa, a yeke tongana nyen?

11. Na lege wa Jésus afa biani biani so Satan ayeke zo ti mvene?

¹¹ Biani, wakua ti Jéhovah oko oko kue so angbâ be-ta-zo na lo atâa atara so Satan ayeke ga na ni afa so na ndo ti lo wakua ni wani, atënë ti wato ti e so ayeke mvene, wato ti e so ayeke na vundu kete pëpe ndali ti aye ti sioni so lo yeke sara na e. Jésus aga na ndo ti sese, na aye so lo sara afa biani so Satan ayeke zo ti mvene. Jésus ayeke mbilimbili-kue, tongana ti kozo babâ ti e Adam. Jésus angbâ be-ta-zo juska na kuâ, na ye so afa biani biani so Satan ayeke zo ti mvene na atënë so lo bi na li ti azo ayeke atënë ti wataka.​—Apoc. 12:10.

12. Lege azi na e awakua ti Jéhovah oko oko kue ti sara nyen nga a yeke ngbanga ti e ti sara nyen?

¹² Atâa so kue, Satan angbâ lakue ti tara awakua ti Jéhovah. Lege azi na e oko oko kue na a yeke ngbanga ti e ti fa na lege ti dutingo be-ta-zo ti e so e yeke sara na Jéhovah ndali ti so e ye lo, me pëpe ndali ti so e ye ti wara ye na maboko ti lo. So a yeke ngbanga ti e ti fa so e ye Jéhovah biani, e yeke bâ ni tongana nyen? Na lê ti e, ti duti be-ta-zo na Jéhovah ayeke mbeni kota pasa mingi. Na ndo ni, bê ti e adë ti hinga so Jéhovah ayeke mû na e ngangu ti gbu ngangu nga, tongana ti so lo sara na Job, lo yeke zia lege pëpe si atara so e yeke wara ahon ndo ti e.​—1 aCor. 10:13.

Satan ayeke zo ti kengo yanga nga apostat

13. Anzene nzene tënë wa mbeti ti Job afa na ndo ti Satan?

¹³ Mbage ti Bible so a sû ândö na yanga ti Hébreu afa anzene nzene ye na ndo ti aye ti kamene so Satan asara lani ti dë kite na Jéhovah nga ti sara si azo ague yongoro na Nzapa. Na yâ ti mbage ti Bible so aChrétien asû ândö na yanga ti Grec, e wara asango mingi na ndo ti aye so Satan asara ti londo ti ke Jéhovah; nga mbeti ti Apocalypse afa so Jéhovah ayeke sara ande si a hinga so lo yeke Gbia ti Dunia Kue nga lo yeke futi Satan. Mbeti ti Job akiri afa na e ambeni ye so Satan asara ti fa so lo yeke zo ti kengo yanga. Na ngoi so Satan ayeke lani dä na ngoi so a-ange abungbi na gbele Jéhovah na yayu, lo ga pëpe ti gonda Jéhovah. Zabolo ayeke na sioni bango ndo nga lo leke na bê ti lo ti sara mbeni sioni ye. Na pekoni so Satan abi atënë na li ti Job na a zia lege na lo ti tara Job awe, “Satan asigigi na gbele L’Éternel.”​—Job 1:12; 2:7.

14. Bango ndo ti Satan ayeke tongana nyen na mbage ti Job?

¹⁴ Ni la mbeti ti Job afa so Satan ayeke wato ti azo, na lo yeke bâ mawa ti ala pëpe. Bible afa pëpe ngoi oke ahon na popo ti abungbi so a sara na yayu, so a sara tënë ni na Job 1:6 na ti so a sara tënë ni na Job 2:1. Me na yâ ti ngoi ni so, Satan atara Job ngangu mingi. Dutingo be-ta-zo ti Job amû lege na Jéhovah ti tene na Satan: “[Job angbâ] ti sara na lege ni, kamême mo wa Mbi ti ke lo, ti futi lo senge senge.” Me Satan ake ti yeda so atënë ti lo ayeke mvene. Lo hunda ti tene a zia lege na lo ti tara Job na mbeni ngangu tara. Tongaso, Zabolo atara Job na ngoi so lo yeke na ye mingi nga na ngoi so lo yeke na ye pëpe. A yeke polele so Satan ayeke bâ pëpe mawa ti awayere wala ti azo so ye ti ngangu asi na ala. Lo ke azo so ayeke be-ta-zo (Job 2:3-5). Ye oko, dutingo be-ta-zo ti Job afa so Satan ayeke zo ti mvene.

15. Na lege wa a-apostat ti laso ayeke sara ye tongana ti Satan?

 ¹⁵ Satan ayeke kozo créature so aga apostat. A-apostat ti ngoi ti e laso ayeke sara nga ye tongana ti Zabolo. Ala yeke nduru ti kasa mingi azo so ayeke na yâ ti acongrégation, a-ancien wala Bebungbi. Ambeni apostat aye pëpe ti tene a di iri ti Nzapa, Jéhovah. A nzere na ala pëpe ti manda ye na ndo ti Jéhovah wala ti sara na lo. Tongana ti babâ ti ala, Satan, a-apostat so agi ti sara si azo aduti be-ta-zo mbeni pëpe (Jean 8:44). A yeke ye ti dongo bê pëpe so awakua ti Jéhovah ake na bê ti ala oko ti ga nduru na a-apostat.​—2 Jean 10, 11.

Job ane mingi iri ti Jéhovah

16. Bango ndo ti Job ayeke tongana nyen na mbage ti Jéhovah?

¹⁶ Job adi iri ti Jéhovah na lo sepela iri so. Même na ngoi so Job ayeke na vundu mingi ndali ti so lo mä tënë ti kuâ ti amolenge ti lo, lo tene sioni tënë pëpe na ndo ti Nzapa. Atâa so na lege ni pëpe Job abâ so Nzapa la asara si amolenge ti lo akui, lo ngbâ lakue ti ne mingi iri ti Jéhovah. Na yâ ti chapitre 28 ti mbeti ti Job, lo tene tënë ti ndara, lo tene: “Bâ, ti kpe mbeto ti Nzapa ayeke ndara; ti zia lege ti sioye ayeke ti hinga nda ti ye.”​—Job 28:28.

17. Nyen la amû maboko na Job ti ngbâ be-ta-zo?

¹⁷ Nyen la amû maboko na Job ti ngbâ be-ta-zo? A yeke polele so kozoni si aye ti vundu asi na lo, lo yeke na mbeni kpengba songo na Jéhovah. Atâa so mbeni ye afa na e pëpe so Job ahinga ye na ndo ti kite so Satan adë na Jéhovah, Job aleke na bê ti lo ti ngbâ be-ta-zo. Lo tene: “Fade mbi zia mbilimbili ti mbi pëpe juska mbi kui.” (Job 27:5). Nyen la amû maboko na Job ti lë kpengba songo na Nzapa? Kite ayeke dä pëpe so lo bâ na nene ni ye so lo mä na ndo ti lege so Nzapa asara ye na mbage ti Abraham, Isaac nga na Jacob, so ayeke akotara ti lo. Na ndo ni, bango aye so Jéhovah asara amû lege na Job ti hinga asarango ye ti Jéhovah mingi.​—Diko Job 12:7-9, 13, 16.

18. (a) Na lege wa Job afa so lo gbu tënë ti Jéhovah ngangu? (b) Na alege wa e yeke mû nzoni tapande ti Job?

¹⁸ Aye so Job amanda apusu lo ti gi ti nzere na lê ti Nzapa. Job ayeke mû asandaga lakue ndali ti so lo yeke gi bê ti lo so peut-être azo ti sewa ti lo asara mbeni ye so anzere na Nzapa pëpe wala ala “zonga Nzapa na bê ti ala.” (Job 1:5). Même na ngoi so Job awara angangu tara, lo ngbâ lakue ti tene anzoni tënë ti Jéhovah (Job 10:12). So tâ pendere tapande! E nga kue, a lingbi e manda ye lakue na ndo ti Jéhovah nga na aye so lo leke ti sara. E ngbâ lakue ti duti na mbeni nzoni kapa so amû lege na e ti manda ye, ti gue na abungbi, ti sambela nga ti fa nzoni tënë. Na ndo ni, e yeke sara ye kue so e lingbi ti sara ti tene azo ahinga iri ti Jéhovah. Nga, tongana ti so dutingo be-ta-zo ti Job anzere lani na Jéhovah, dutingo be-ta-zo ti awakua ti Jéhovah laso ayeke zia ngia na bê ti lo. A yeke ye so e yeke bâ na yâ ti article ti peko.

Mo dabe ti mo na ni?

• Ngbanga ti nyen Satan Zabolo agi ti sara sioni na Job?

• Atara wa asi na Job? Lo sara ye tongana nyen?

• Nyen la ayeke mû maboko na e ti ngbâ be-ta-zo tongana ti Job?

• Mbeti ti Job amû maboko na e ti hinga nyen na ndo ti Satan?

[Ahundango tënë ti manda na ye]

[Foto na lembeti 12]

Aye wa alingbi ti tara mabe ti mo ti bâ wala mo yeke be-ta-zo wala pëpe?