Ambeni zo akomande, na azo mingi awara aye ti nzoni dä

NGBENE YE na ngoi ti abazengele, Nzapa ayeke soro na popo ti azo mbeni kete wungo ti aChrétien so ayeke be-ta-zo ti ga amolenge ti lo. Mbeti ti Nzapa atene so a kiri a dü ala fini ndali ti so dutingo ti ala agbian mingi na pekoni so ala ga amolenge ti Nzapa. Ndani so a kiri a dü awakua ti Nzapa fini ayeke ti leke ala so a kiri a dü ala mbeni ti tene ala komande na yayu (2 Timothée 2:12). Ti mû lege na ala ti komande, a zingo ala na kuâ ti wara fini na yayu (aRomain 6:3-5). Na yayu, “ala yeke komande tongana agbia na ndo ti sese” legeoko na Christ.​—Apocalypse 5:10; 11:15.

Ye oko, Bible atene so ambeni zo nde na aChrétien so a kiri a dü ala mbeni ayeke wara ande salut ti lakue lakue. Na yâ ti Bible (mbage so a sû ândö na yanga ti Hébreu nga na so aChrétien asû ândö na yanga ti Grec), atene so  Nzapa aleke na bê ti lo ti sö groupe use ti azo: mbeni groupe ni, azo ti yâ ni ayeke mingi pëpe na ala yeke komande na yayu; nga mbeni groupe ni so azo ti yâ ni ayeke mingi mingi, na ala yeke duti ande na gbe ti Royaume ni na ndo ti sese. Na tapande, bâ tënë so bazengele Jean asû na amba ti lo aChrétien so a kiri a dü ala fini. Na ndo ti Jésus, lo tene: “Lo yeke sandaga so amû lege ti leke songo na popo ti zo na Nzapa, sandaga ndali ti asiokpari ti e. Na gi ndali ti asiokpari ti e [kete groupe ti azo] pëpe, me nga ndali ti asiokpari ti azo ti dunia kue [groupe ti azo mingi mingi].”​—1 Jean 2:2.

Legeoko nga, bazengele Paul atene: “Lê ti création [groupe ti azo mingi mingi] ayeke gi na lege ti ku ngoi so amolenge ti Nzapa [kete groupe ti azo] ayeke fa tere ti ala na gigi.” (aRomain 8:19-21). Atënë ti bazengele Jean na bazengele Paul so aye ti tene nyen? A ye ti tene so ala so a kiri a dü ala mbeni aga agbia na yâ ti ngorogbia ti yayu. Ti sara nyen? Ti sara si azo kutu mingi mingi so ayeke duti ande na sese na gbe ti ngorogbia ti Nzapa so abâ nzoni teti lakue lakue. Ni la, Jésus ahunda na adisciple ti lo ti sambela, lo tene: “Zia royaume ti mo aga. Zia a sara ye so bê ti mo aye, na yayu legeoko nga na ndo ti sese.”​—Matthieu 6:10.

Mbage ti Bible so a sû ândö na yanga ti Hébreu asara nga tënë ti agroupe use so ayeke wara ande salut. Na tapande, bâ ye so Jéhovah atene na Abraham, kotara ti Jésus: “Na yâ ahale ti mo [kete groupe ti azo] fade amara kue ti sese [groupe ti azo mingi mingi] awara tënë nzoni.” (Genèse 22:18). Biani, na lege ti “ahale”, wala ngongoa ti Abraham, Nzapa ayeke iri tënë nzoni na ndo ti amara kue.

“Ahale” ni ayeke azo wa? A yeke Jésus Christ na ala so Nzapa asara si a kiri a dü ala fini na lo mû ala ti ga amolenge ti lo. Bazengele Paul atene: “Tongana ala yeke ti Christ, ala yeke biani ngongoa ti Abraham.” (aGalate 3:16, 29). Na ndo ni, tënë nzoni so Nzapa ayeke iri na ndo ti azo ti amara kue na lege ti “ngongoa” so ayeke nyen? A yeke kota pasa so ala yeke na ni ti kiri ti ga nzoni na lê ti Nzapa nga ti wara fini ti lakue lakue na yâ ti paradis na ndo ti sese. Wasungo psaume David atene prophétie so: “Sese ni aga ye ti héritier ti azo ti mbilimbili, na fade ala duti dä lakue.”​—Psaume 37:29; Ésaïe 45:18; Apocalypse 21:1-5.

Ti tâ tënë ni, gi mbeni kete wungo ti azo si ayeke komande ande na yayu, me azo mingi mingi la ayeke wara ande na ndo ti sese fini ti lakue lakue nga na aye ti nzoni kue so ayeke ga na pekoni na gbe ti Royaume so. Zia mo na sewa ti mo aduti na popo ti azo so ayeke bâ ande nzoni teti lakue lakue na lege ti Royaume ti Nzapa.

[Foto na lembeti 12]

Azo kutu mingi mingi ayeke wara ande fini ti lakue lakue na ndo ti sese. Mo yeke duti ande na popo ti ala?