E ga ti Jéhovah na lege ti kota nzobe ti lo
E ga ti Jéhovah na lege ti kota nzobe ti lo
“E yeke ti Jéhovah.”—AROM. 14:8.
1, 2. (a) Pasa wa e yeke na ni? (b) Ahundango ndo wa e yeke gue ti bâ?
AMOLENGE ti Israël ayeke lani na pendere pasa na ngoi so Jéhovah atene na ala: “Fade i ga ye ti Mbi mveni na popo ti amara kue.” (Ex. 19:5). Laso, amembre ti congrégation ti aChrétien ayeke nga na pasa ti ga ti Jéhovah (1 Pi. 2:9; Apoc. 7:9, 14, 15). A yeke mbeni pasa so e lingbi ti bâ nzoni dä teti lakue lakue.
2 Na ndo ti pasa so, ti ga ti Jéhovah aga nga na akusala mingi. Ambeni alingbi ti hunda tere ti ala: ‘Fade mbi lingbi ti sara ye so Jéhovah aku na mbage ti mbi? Tongana mbi tï na yâ ti siokpari, fade lo yeke ke mbi pëpe? Ti ga ti Jéhovah ayeke kanga lege na mbi ti duti na liberté?’ A yeke na lege ni ti gbu li na ndo ti mara ti agingo bê tongaso. Kozoni kue, zia e gbu li na ndo ti hundango tënë so: Ye ti nzoni wa zo ayeke wara tongana lo ga ti Jéhovah?
Ti ga ti Jéhovah ague na zo ti wara ngia
3. Tongana nyen desizion ti Rahab ti sara na Jéhovah aga na lo aye ti nzoni?
3 Azo so aga ti Jéhovah awara aye ti nzoni na pekoni? Bâ tapande ti Rahab, mbeni wali-ndumba so ayeke giriri na kodoro ti Jéricho. Kite ayeke pëpe so a bata lo na yâ ti sioni bungbi ti vorongo anzapa ti Canaan. Me, tongana lo mä tënë ti asongo benda so Jéhovah amû na azo ti Israël, lo hinga so Jéhovah ayeke tâ Nzapa. Ni la, lo zia fini ti lo na lê ti kuâ ti bata azo ti Nzapa so Nzapa asoro ala na tongaso lo zia beku ti lo na tïtî ala. Bible atene: “A diko lani Rahab, so ayeke wali-ndumba, tongana zo ti mbilimbili ndali ti akusala na peko ti so lo yamba nzoni mingi awatokua so asi na ndo ti lo na lo zia ala si ala gue na mbeni lege nde; a yeke tongaso pëpe?” (Jacq. 2:25). Tara ti bi bê ti mo na aye ti nzoni so lo wara na ngoi so lo ga oko ti azo ti Jéhovah so vorongo ti ala ayeke na sioni pëpe, azo so Nzapa afa ye na ala na lege ti Ndia ti lo na ndoye nga mbilimbili. So ngia si Rahab ayeke na ni ti zia ngbene lege ti duti ti lo! Lo sara mariage na mbeni zo ti Israël na lo bata molenge ti lo ti koli, Boaz, so aga mbeni nzoni zo ti Nzapa.—Jos. 6:25; Ruth 2:4-12; Mat. 1:5, 6.
4. Tongana nyen Ruth awara ye ti nzoni na lege ti desizion so lo mû ti sara na Jéhovah?
4 Ruth ti kodoro ti Moab nga amû desizion ti sara na Jéhovah. Tongana lo de kete, peut-être lo voro lani Kemosh na ambeni nzapa ti Moab, me na pekoni so lo hinga tâ Nzapa, Jéhovah, lo sara mariage na mbeni zo ti Israël so aga ti bata tere ti lo na kodoro ti lo. (Diko Ruth 1:1-6.) Na pekoni, tongana Ruth na wali ti ita ti koli ti lo, Orpa, alondo ti mû peko ti kogara ti ala Naomi so ayeke gue na Bethléhem, Naomi ahunda na awali use so ti kiri na kodoro. A yeke duti ande ngangu kete na ala ti sara kodoro na Israël. Tongaso, Orpa “akiri na azo ti lo, na anzapa ti lo;” me Ruth ake ti lo. Lo sara ye na lege ti mabe na lo hinga zo so lo ye ti ga ti lo. Lo tene na Naomi: “Mo ngbâ ti hunda mbi pëpe ti zia mo na ti kiri, si mbi zia ti tambela na peko ti mo; na ndo so mo gue dä, fade mbi gue dä; na ndo so mo lango dä, fade mbi lango dä; fade azo ti mo aga azo ti mbi, na Nzapa ti mo aga Nzapa ti mbi.” (Ruth 1:15, 16). Ngbanga ti so lo soro ti sara na Jéhovah, Ruth abâ nzoni na lege ti ye so Ndia ti Nzapa aleke teti awomua, awayere nga na azo so ayeke na sese ti fâ yaka dä pëpe. Na gbe ti maboko ti Jéhovah, lo wara ngia, batango tere na nzoni duti.
5. Nyen la mo bâ na ndo ti azo so asara na Jéhovah be-ta-zo?
5 Peut-être mo hinga ambeni zo so amû tere ti ala na Jéhovah na asara na lo be-ta-zo teti angu mingi. Hunda ala ti fa na mo aye ti nzoni so ala wara na pekoni. Atâa so azo kue ayeke wara ka akpale, aye mingi afa so tënë ti wasungo psaume so ayeke tâ tënë: “Ngia ayeke na azo so L’Éternel ayeke Nzapa ti ala.”—Ps. 144:15.
Jéhovah ahunda ye ahon ndo ni pëpe na zo
6. Ngbanga ti nyen a lingbi mbeto ti sara ye so Jéhovah aku na mbage ti e asara e pëpe?
6 Mo lingbi ti hunda tere ti mo wala mo lingbi ande ti sara ye so Jéhovah aku na mbage ti mo. A yeke ngangu pëpe ti tene li ti zo aga kirikiri na ndo ti tënë ti gango wakua ti Nzapa, ti sarango ye alingbi na ndia ti lo na ti sarango tënë na iri ti lo. Na tapande, Moïse abâ so lo lingbi pëpe tongana Nzapa atokua lo ti sara tënë na azo ti Israël nga na gbia ti Égypte. Me, Nzapa aku ye mingi pëpe na mbage ti Moïse. Jéhovah ‘afa na lo ye so lo lingbi ti sara.’ (Diko Exode 3:11; 4:1, 10, 13-15.) Teti so Moïse ayeda na maboko so Nzapa amû na lo, lo wara ngia na sarango ye so Nzapa aye. Legeoko nga, ye so Jéhovah ahunda na e ahon ndo ni pëpe. Lo hinga so e yeke awasiokpari, na lo ye ti mû maboko na e (Ps. 103:14). Sarango na Nzapa tongana disciple ti Jésus adë bê ti e me ane na ndo ti e nengo pëpe, ndali ti so mara ti sarango ye tongaso aga na ye ti nzoni na azo na amû ngia na Jéhovah. Jésus atene: “Ala ga na mbi, . . . na fade mbi dë bê ti ala. Ala yô joug ti mbi na ala manda ye na tere ti mbi, teti mbi yeke sara ye na ngangu pëpe na mbi yeke na tâ be-ti-molenge.”—Mat. 11:28, 29.
7. Ngbanga ti nyen mo lingbi ti hinga na bê ti mo kue so Jéhovah ayeke mû maboko na mo ti sara ye so lo ku na mbage ti mo?
7 Jéhovah ayeke mû ande lakue na e awango so e yeke na bezoin ni, na ngoi kue so e zia bê ti e na lo ti mû na e ngangu. Na tapande, Jérémie ayeke zo so ayapu pëpe na sarango tënë. Me, tongana Jéhovah asoro lo ti ga prophète ti lo, Jérémie atene: “Aï, Seigneur L’Éternel! bâ, mbi hinga lege ti sara tënë pëpe, teti mbi de molenge.” Na pekoni, lo gue même ti tene: “[Fade] mbi sara tënë na iri ti Lo mbeni pëpe.” (Jér. 1:6; 20:9). Me, Jéhovah awa Jérémie, na tongaso teti ngu 40, lo wara lege ti fa tënë so mingi ti azo aye ti mä ni pëpe. Jéhovah adë bê ti lo lakue na lege ti tënë so: “Mbi yeke na mo ti sö mo na ti zi mo.”—Jér. 1:8, 19; 15:20.
8. E yeke fa tongana nyen so e zia bê ti e kue na Jéhovah?
8 Tongana ti so Jéhovah akpengba Moïse na Jérémie, lo lingbi ti mû maboko na e ti sara ye so lo ku na mbage ti aChrétien laso. Kota ye ni ayeke ti zia bê kue na Nzapa. Bible atene: “Zia bê ti mo kue na L’Éternel, na zia bê ti mo na hingango ye ti mo mveni pëpe. Mo bi bê ti mo na Lo na lege ti mo kue, na fade Lo sara si lege ti mo aga mbilimbili.” (aProv. 3:5, 6). E yeke fa so e zia bê ti e kue na Jéhovah tongana e yeda na mungo maboko so lo yeke mû na e na lege ti Bible nga na congrégation. Tongana e zia si Jéhovah afa lege na fini ti e, ye oko ti kanga lege na e ti ngbâ be-ta-zo na lo ayeke pëpe.
Jéhovah abâ lege ti azo ti lo oko na oko
9, 10. Mara ti batango ndo wa Psaume 91 asara tënë ni?
9 Na ngoi so ambeni zo ayeke gbu li ti ala na ndo ti mungo tere ti ala na Jéhovah, ambeni alingbi ti gi bê ti ala na ndo ti kpale so alingbi ti si tongana ala sara siokpari, tongana ala lingbi mbeni pëpe, na tongana Jéhovah ake ala. A yeke ye ti nzoni ti hinga so, Jéhovah amû ye kue so e yeke na bezoin ni ti bata nzoni songo ti e na lo. Zia e bâ tongana nyen a fa ni na yâ ti Psaume 91.
10 Psaume so ato nda ni tongaso: “Lo so aduti na ndo ti lingo ti Lo Ti Nduzu Ahon Kue, fade lo duti na gbede ti Lo Ti Ngangu Ahon Kue. Fade mbi sara tënë ti L’Éternel, Lo yeke Ndo Ti Bata Tere ti mbi na Gbada Ti Bira ti mbi; Nzapa ti mbi, Lo so mbi zia bê ti mbi na Lo. Teti fade Lo zi mo na son so zo aleke ti gbu mo na ni.” (Ps. 91:1-3). Bâ so Jéhovah amû zendo ti bata azo so aye lo na azia bê ti ala kue na lo. (Diko Psaume 91:9, 14.) Batango tere wa la lo sara tënë ni? Ti bâ nzoni, Jéhovah abata ambeni wakua ti lo ti giriri na lege ti mitele si ala kui pëpe: ti ambeni lo sara tongaso ti bata molongo ti hale ti azo so ayeke gue ti si na Messie so a mû zendo ti lo. Me, ambeni zo mingi so ândö ayeke be-ta-zo asara kanga, a sara sana na ala, na ala kui kuâ ti ngangu, teti Satan so ayeke na peko ti aye so aye si ala duti be-ta-zo na Nzapa pëpe (aHéb. 11:34-39). Ala hon ndo ti aye so sân mbeto teti Jéhovah abata ala na lege ti yingo si ala ngbâ be-ta-zo. Tongaso, e lingbi ti bâ tënë ti Psaume 91 tongana mbeni zendo ti Nzapa ti bata e na lege ti yingo.
11. “Ndo ti lingo ti Lo Ti Nduzu Ahon Kue” ayeke nyen? Zo wa la Nzapa ayeke bata lo na yâ ni?
11 “Ndo ti lingo ti Lo Ti Nduzu Ahon Kue,” so zo ti sungo psaume so asara tënë ni, ayeke fä ti batango tere na lege ti yingo. Azo so aduti na yâ ni legeoko na Nzapa tongana gene ti lo, mbeni ye wala mbeni zo alingbi pëpe ti sara sioni na mabe ti ala nga na ndoye ti ala na mbage ti Nzapa (Ps. 15:1, 2; 121:5). A yeke ndo ti lingo teti so azo so ahinga Nzapa pëpe alingbi ti hinga ni pëpe. Ge, mo bâ mo tene Jéhovah ayeke bata azo so atene: ‘Mo yeke Nzapa ti mbi, lo so mbi zia bê ti mbi na lo.’ Tongana e ngbâ na ndo ti batango tere so, e yeke na bezoin ti gi bê ti e ahon ndo ni pëpe ti tene e tene Jéhovah ayeke ke e tongana e tï na yâ ti kûkû ti Satan, ‘zo ti lekengo son.’
12. Akpale wa aye ti sara sioni na songo ti e na Nzapa?
12 Akpale wa aye ti buba kpengba songo ti e na Nzapa? Zo ti sungo psaume so asara tënë ti akpale mingi, so na popo ni “kobela ti futi kodoro so atambela na yâ bingo, . . . [nga] ye ti futi so afuti ye na kota lâ.” (Ps. 91:5, 6). ‘Zo ti lekengo son’ agbu azo mingi na lege ti nzara ti dutingo yamba na Nzapa (2 aCor. 11:3). Lo gbu ambeni na lege ti maïngo bibe ti kota bê, fandara, na nzara ti warango mosoro. Lo ngbâ ti handa ambeni na lege ti atënë tongana yengo kodoro, atënë so atene zo abâ gigi na lege ti nyama, nga na lege ti abungbi ti vorongo nzapa ti wataka (aCol. 2:8). Na lo gboto ambeni mingi na yâ ti kûkû ti lango-sioni. Na lege ti yingo, mara ti akota kobela tongaso asara si azo kutu na kutu agirisa ndoye ti ala na mbage ti Nzapa.—Diko Psaume 91:7-10; Mat. 24:12.
Bata ndoye ti mo na mbage ti Nzapa
13. Tongana nyen Jéhovah abata e nde na aye so aye ti sara sioni na nzoni dutingo ti e na lege ti yingo?
13 Tongana nyen Jéhovah abata azo ti lo na yâ ti aye so asara sioni na azo na lege ti yingo? Psaume ni atene: “Fade Lo wa a-ange ti Lo ti bata mo na lege ti mo kue.” (Ps. 91:11). A-ange ti yayu afa lege na e na abata e si e fa nzoni tënë (Apoc. 14:6). Nde na a-ange, e yeke nga na a-ancien so aluti ngangu na ndo ti Mbeti ti Nzapa na yâ ti fango ye ti ala ti bata e si atënë ti mvene ahanda e pëpe. Ala lingbi ti mû maboko na zo oko oko so ayeke na kpale ti hongo ndo ti abibe ti dunia so (Tite 1:9; 1 Pi. 5:2). Nga, “ngbâa be-ta-zo so ayeke sara ye na ndara” amû na e kobe ti yingo ti bata e nde na fango ye na ndo ti tënë so atene zo abâ gigi na lege ti anyama, asioni nzara so ahanda zo, tombango peko ti amosoro nga na gingo kota ndo nga na ambeni gbâ ti asioni nzara so ayeke sara ngangu na ndo ti zo (Mat. 24:45). Nyen la amû maboko na mo ti luti ngangu na gbele ti ambeni kpale so?
14. Tongana nyen e lingbi ti wara aye ti nzoni na lege ti aye so Nzapa amû ti bata e?
14 A lingbi e sara nyen ti ngbâ na “ndo ti lingo” ti Nzapa si lo bata e? Tongana ti so a lingbi e bata tere ti e lakue si aye tongana ndao, asioni zo wala akobela asara sioni na fini ti e pëpe, legeoko nga a lingbi e sara ngangu lakue ti bata tere ti e nde na aye so alingbi ti sara sioni na e na lege ti yingo. Tongaso, a lingbi e gi lakue ti wara aye ti nzoni na lege ti fango ye so Jéhovah ayeke fa na e na yâ ti ambeti ti e, na ngoi ti abungbi ti congrégation nga na akota bungbi. E hunda na a-ancien ti mû na e wango. E yeke nga na aita ti e ti koli na ti wali so asarango ye ti ala nde nde asara nzoni na e. Biani, dutingo nduru na aita na congrégation amû maboko na e ti ga azo ti ndara.—aProv. 13:20; diko 1 Pierre 4:10.
15. Ngbanga ti nyen mo lingbi ti hinga na bê ti mo kue so Jéhovah alingbi ti bata mo yamba na aye so alingbi ti sara si lo ke mo?
15 E yeke na raison pëpe ti dë kite so Jéhovah alingbi ti bata e yamba na aye so alingbi ti sara si lo ke e (aRom. 8:38, 39). Lo bata congrégation na tere ti angangu wato so atene ala yeke azo ti Nzapa nga na azo ti poroso so agi kozoni kue ti fâ e pëpe, me ti kangbi e na Nzapa ti e so ayeke nzoni-kue. Zendo ti Jéhovah so aga tâ tënë, so atene: “Ye ti bira so azo asara ti ke mo na ni alingbi sara ye na mo pëpe.”—És. 54:17.
Zo wa la amû na e liberté?
16. Ngbanga ti nyen dunia so alingbi ti mû na e liberté pëpe?
16 Tongana e ga ti Jéhovah, a yeke kanga lege ande na e ti duti na liberté? Ên-ën, ti ga ti dunia so la ayeke kanga lege na e ti duti na liberté. Dunia so akangbi na Jéhovah na ayeke na gbe ti mbeni sioni nzapa so asara azo na ngbâa (Jean 14:30). Na tapande, aye ti ngoi so Satan ayeke na ndo ni ayeke sara kusala na kpale ti konomi ti nzi liberté ti azo. (Bâ nga Apocalypse 13:16, 17.) Siokpari nga ayeke na ngangu ti sara azo na ngbâa (Jean 8:34; aHéb. 3:13). Ni la, même azo so amä na bê na Nzapa pëpe alingbi ti pusu azo ti mû mbeni lege ti sarango ye so ague nde na fango ye ti Jéhovah ti wara liberté, na azo kue so amû peko ti ala ayeke tï fade fade na yâ ti siokpari na fini ti ala ayeke buba gi bubango.—aRom. 1:24-32.
17. Mara ti liberté wa Jéhovah amû na e?
17 Na mbage, Jéhovah ayeke zi e ande na yâ ti aye kue so alingbi ti sara sioni na e tongana e mû bê ti e kue na lo. E lingbi ti tene so dutingo ti e ayeke tongana ti mbeni zo so azia fini ti lo na tïtî mbeni wanganga so ahinga ti suru zo nzoni mingi ti tene azi sioni kobela na tere ti lo. E kue e yeke na yâ ti mbeni sioni dutingo so e wara na lege ti siokpari so a dü e na ni. Gi tongana e zia bê ti e kue na Jéhovah, na lege ti sandaga ti Christ, si e lingbi ti duti na beku ti sigigi na gbe ti asioni ye so siokpari aga na ni na ti duti na fini lakue lakue (Jean 3:36). Legeoko tongana e mä a tene mbeni wanganga ahinga ti sara kua nzoni e yeke zia bê ti e kue na lo, tongaso nga mandango ye na ndo ti Jéhovah ayeke sara si e zia bê ti e na lo mingi. Ni la, e yeke ngbâ ti manda Mbeti ti Nzapa nzoni ngbanga ti so ayeke mû maboko na e ti ndoye Nzapa si e lingbi ti sara mbeto pëpe ti ga azo ti lo.—1 Jean 4:18.
18. Azo so aga ti Jéhovah ayeke wara ande nyen na pekoni?
18 Jéhovah amû liberté ti soro ye na azo kue. Bible atene: “Mo kamata [soro, FD] fini, si mo ngbâ na fini, mo na amolenge ti mo; mo ndoye L’Éternel Nzapa ti mo.” (Deut. 30:19, 20). Lo ye si e wani e fa so e ye lo na sorongo e wani ti sara na lo. A hon ti tene ti ga ti Nzapa so e ndoye lo akanga lege na e ti duti na liberté, a yeke sara si e wara ande ngia na e bata ngia ti e.
19. Ngbanga ti nyen ti ga ti Jéhovah ayeke fä ti kota nzobe ti lo?
19 Teti so e yeke awasiokpari, e lingbi pëpe ti ga azo ti Nzapa, teti Nzapa alingbi kue. Gi kota nzobe ti Nzapa la amû lege na e ti ga ti lo (2 Tim. 1:9). Ni la, bazengele Paul atene: “Tongana e duti na fini, e duti na fini ndali ti Jéhovah, nga atâa e kui, e kui ndali ti Jéhovah. Tongaso, atâa tongana e duti na fini wala e kui, e yeke ti Jéhovah.” (aRom. 14:8). Biani, a yeke son ande e lâ oko pëpe tongana e soro ti ga ti Jéhovah.
Mo yeke kiri tënë tongana nyen?
• Aye ti nzoni wa zo ayeke wara tongana lo ga ti Jéhovah?
• Ngbanga ti nyen e lingbi ti sara ye so Nzapa aku na mbage ti e?
• Tongana nyen Jéhovah ayeke bata awakua ti lo?
[Ahundango tënë ti manda na ye]
[Afoto na lembeti 15]
Hunda amba ti mo ti fa na mo aye ti nzoni so ala wara na peko ti so ala ga ti Jéhovah
[Foto na lembeti 16]
Na ambeni lege wa Jéhovah ayeke bata e?